1 Kronikas 20

Amonita Pen Komo Nar̂mexe Xa Hara Ixaw Yana Komo

Ero yinhîrî on wara takî tî xakn̂e Xoabe, sowtatu komo tî naar̂akn̂e xa hara Amonita komo waparî me. On wara naxe kayaritomo komo, cwotu yimawnonho yenatîche roro cexe etar̂maxi anarî komo yakro. Ero ke ero yimaw xa marha tî sowtatu komo naar̂akn̂e Xoabe. Amonita komo mararîn tî nîwîrîmetken̂e, iyokuthîrî komo marha tî naar̂atken̂e. N̂examro kayaritomon yewton wamtoso marha tî cetken̂e Haba wamtoso. Xerusaren po rma tko tî xakn̂e Tapi. Wara rma Haba pona takî tî cetken̂e Xoabe komo. Iitononhîrî komo tî nar̂metken̂e, yîmînthîrî komo tî nakn̂iyatken̂e.

2 N̂examro pen kayaritomonînho xapikantho tî naar̂akn̂e Tapi. Ero yawsîn tî nukuknometken̂e. 1 tarentu wicakî tî nawsînakn̂e okyo. Ooru re tî mîn xakn̂e. Tporokye marha tî xakn̂e toopuci enporixapu mko ke. Ero takî tî n̂iir̂atken̂e Tapi kanahtaka mak hara. Ero yinhîrî iitononhîrî komo yemyawnonho tî naar̂akn̂e Tapi mer̂pora ro mak.

3 Iitono pen komo marha tî naar̂akn̂e apickachome. Sasamacho poko tî n̂examro nantomekn̂e, weewe yamarî poko marha, roowo yahtorî poko marha. Ero wa tî ahnoro Amonita komo yewton pononho komo n̂iir̂akn̂e. Ero yinhîrî takî tî Tapi n̂etîramekn̂e Xerusaren pona hara tîsowtatun komo yakro rma.

Tooto Imo Pen Komo Nar̂mexe Tapi Sowtatun Komo

4 Ero yinhîrî takî tî Piristew komo yakro n̂etar̂metken̂e xa hara Ixaw Yana komo Xese po. Iito tî xakn̂e tooto imo yepamrî, Sipai tî osotî. Noro pen tî waihkekn̂e Sibekai, Usa pono. Ero ke Ixaw Yana komo yewtîn̂e me takî tî xatken̂e Piristew komo.

5 Ero yinhîrî takî tî n̂etar̂metken̂e xa hara Piristew komo Ixaw Yana komo yakro. Ero yimaw iito tî xakn̂e Rami, Korias pen yaknonho, Kace pononho pen yaknonho. Porin me ro makî tî xakn̂e noro rahnu yecepu. Poono kahtopo yecepu wicakî tî xakn̂e okyo. Noro pen tî waihkekn̂e Ew-Anan, Xai mumuru ha.

6 Ero yinhîrî n̂etar̂metken̂e xa hara Kace pono komo Ixaw Yana komo yakro. Iito tî xakn̂e tooto imo anarî hara. Anarme tî xakn̂e noro yamoyaran, yîhrorî kom ha. 6 so tî xakn̂e amoyaran amorî poko so, 6 so marha tî xakn̂e yîhrorî yîhtarî poko so. Tooto imo yepamrî marha tî mîk xakn̂e.

7 On wara tî xakn̂e noro, Ixaw Yana komo nîwîrîyakekn̂e. Ero wa ketaw Tapi yakno mumuru tî waihkekn̂e noro pen. Xonatas tî xakn̂e noro yosotî. Simea mumuru tî mîk xakn̂e, Tapi yakno mumuru.

8 Ero wa tî xatken̂e tooto imo komo, tooto imo xîkrî me n̂ewruyatken̂e Kace po. N̂examro pen tî waihkekn̂e Tapi, noro sowtatun pen komo marha tî. Ero wa tî xatken̂e.