Ero yinhîrî takî tî waihyakn̂e Naas pen, Amonita komo kayaritomonînho pen. Yumumuthîrî takî tî xakn̂e kayaritomo me noro pen retawno me hara.

2 Ero ke on wara tî kekn̂e Tapi, Anun poko tawake kesenpesî, Naas pen mumutho poko ha. Yîîmînhîrî pen xakn̂e tawake opoko, ero ke ero wa xa marha kesenpesî yumumuthîrî ya hara, kekn̂e tî. Ero ke tî Anun yewyakîren̂e komo tî n̂en̂epekn̂e yîhyaka, Aamonhîrî pen waihye okwe, kan̂e komo tî. Ero ke ero wa kaxi tî cetken̂e Amon yepamtho komo cheka, Anun yaka. Ewyakîreso tî cetken̂e.

3 On wara tko tî ketken̂e iitono yantoman̂e komo Anun ya, Ahce wa katî meen̂a Tapi maywen komo mohtopo? Aamonhîrî pen xatî wara katî re meen̂a Tapi awya? Krowon komo yerasmaxi makî twa n̂examro n̂en̂epei. Mokyaxe ha men amn̂e kwaparî me hara, ketken̂e yîwya.

4 Ero ke Tapi maywen komo takî tî nahsîyakn̂e Anun. N̂examro pen yetpoci takî tî pahyakn̂e okwe, ponon komo marha tî nawocekn̂e eknu to xa kica. Ero wa ciriche n̂en̂epekn̂e hara.

5 N̂examro yenîn̂enho komo tî cetken̂e Tapi yaka ekatîmso. Maywen komo yîhyapamnoretoponho tî n̂ekatîmyakn̂e yîwya. Nîhyapamyatken̂e xa tî Amonita komo yaka en̂epexapu komo. Ero ke anarî komo tî n̂en̂epekn̂e hara yîhyaka so. On wara kacho tî n̂entamexpekn̂e yîwya so, Xer̂ko po makî ka ehcoko. Amn̂e awetpoci komo yatîhtache n̂he tak amohcoko oona hara, kacho tî n̂entamexpekn̂e yîwya so.

6 Ero yinhîrî takî tî on wara ketken̂e Amonita komo, Kicicme men keen̂axe so okwe Tapi, ketken̂e tî. Ero ke on wara takî tî xatken̂e Anun, Amonita komo yakro, puranta narpetken̂e anarî komo yaka kayaritomo komo yaka. Prata tî narpetken̂e yîhyaka so mer̂pora, 1.000 tarentu wicakî. Mesopotamya pono komo yaka tî narpetken̂e, Maaka pono komo yaka marha, Soba pono komo yaka marha. Tarara yepetho tî mîn narpetken̂e, sowtatu yepetho marha, kawaru mkaw tîtosom komo yepetho marha.

7 Ero ke Maaka pono komo kayaritomon takî tî mokyakn̂e. Tarara tî n̂ekyakn̂e 32.000. Tmaywen komo marha tî n̂ekyakn̂e. Meteba mîtkoso tî n̂iir̂atken̂e cetarî komo. Amonita komo marha tî mokyatken̂e cewton komo poi so. Etar̂maxi twa mokyatken̂e.

8 Ero wa mohtopo komo yentache tak Tapi ya, Xoabe takî tî n̂en̂epekn̂e sowtatu komo yakro. Ahnoro tîsowtatun komo tî n̂en̂epekn̂e.

9 On wara takî tî xatken̂e Amon komo, cewton komo potai rma tî n̂epanacetken̂e. Mehxa tî xatken̂e anarî komo, kayaritomo kom hara, akronomaxi mohxapu komo, cewyaro so tî xatken̂e woskara po n̂he.

10 Ero wa cetakpaxi exirî komo yeen̂ataw Xoabe ya on wara tî xakn̂e, karitî komo xa tî men̂ekekn̂e Ixaw Yana kom ha. N̂examro takî tî naar̂akn̂e noro Siriu komo wece.

11 Anarî komo reha tî n̂iir̂akn̂e takno nantomarî me, Abisai nantomarî me ha. Amonita komo wece tî tîtosom me n̂examro nantomekn̂e.

12 On wara tî kekn̂e Xoabe takno ya etakpetaw so rma, Oyopono me exitaw so Siriu komo oyakronomaxi tak amohcoko amyamro. Ayopo so exitaw so Amonita komo awakronomaxi amna mokyas hara.

13 Erasîra ro mak ehcoko. Erasin me ro mak cetar̂macerî kyanan komo yukurunpetome, Kaan yewtonî mko yukurunpetome marha. Kporin komo ha tko. Ahce wa na kiir̂atu so, tanme ro mak nîhtînope kir̂wan̂he kiitopo komo, kekn̂e tî. Ero wa tî kekn̂e Xoabe takno ya.

14 Ero ke Siriu komo wece takî tî cetken̂e Xoabe komo. N̂etar̂metken̂e takî tî. Ero yinhîrî takî tî n̂emahciyatken̂e Siriu komo. Xoabe komo tî xatken̂e iyopo so.

15 Ero ke tî on wara xatken̂e Amonita kom hara, Siriu komo yemahcirî tî n̂een̂atken̂e. Ero ke n̂examro makîrha takî tî n̂emahciyatken̂e Abisai komo yai hara, Xoabe yakno komo yai. Ewto pona takî tî cetken̂e. Ero yinhîrî takî tî Xerusaren pona n̂etîramekn̂e hara Xoabe.

16 Taa, on wara takî tî ketken̂e Siriu komo, Okwe, kyopo so n̂ehcow okwe Ixaw Yana komo. Tîtkukmacerî xa hara ika amn̂e, ketken̂e tî. Ero ke anarî komo takî tî nan̂ikpetken̂e Siriu komo rma. Ewpratesî yeco pono komo tî mîkyam nan̂ikpetken̂e. Ero ke mokyatken̂e mer̂pono pîn sowtatu komo. Sopake tî mokyakn̂e n̂examro poturme. Atatese sowtatun komo yantoman̂e tî mîk xakn̂e Sopake.

17 Mohtopo komo tî n̂ekatîmyatken̂e enîn̂enhîrî komo Tapi ya. Ero ke Ixaw Yana komo tî nan̂ikyakn̂e xa hara. Xotaw Yepu tî wacetken̂e, Siriu komo wece tî cetken̂e. Pahnoke exitaw so n̂examro wece cewru tî n̂epanacetken̂e. Ero yinhîrî takî tî n̂etar̂metken̂e.

18 N̂emahciyatken̂e xa hara tko tî Siriu komo Ixaw Yana komo yai. Cemahcisom pen komo tî waihketken̂e Ixaw Yana komo mer̂pono pîn. Tarara yaan̂e pen tî waihketken̂e 7.000. Tîhtarî po tîtosom komo marha tî waihketken̂e 40.000. Sopake pen marha tî waihketken̂e Siriu sowtatun komo yantoman̂enho ha.

19 Ero yinhîrî on wara takî tî ketken̂e Atatese maywen komo, Kyopo so n̂ehcow ham okwe Ixaw Yana komo, ketken̂e tî. Ero ke etar̂mara cehtopo komo poko takî tî n̂esencetken̂e n̂examro Tapi yakro. Noro yepeman̂e me roro takî tî xatken̂e. Ero yinhîrî Amonita komo yakronoma xera takî tî xatken̂e Siriu komo. Ero wa tî xatken̂e.