Ero yinhîrî takî tî on wara xakn̂e Tapi, Piristew komo yar̂maxi tî cekn̂e. Nar̂mekn̂e tak, cewetîn̂e me takî tî n̂examro n̂iir̂akn̂e. Kace tî nahsîyakn̂e Piristew yewtontho. Ewtoci mko marha tî nahsîyakn̂e Kace mîtwono mko.

2 Ero yinhîrî Moabita pen komo marha tî nar̂mekn̂e. Ero ke Tapi yewetîn̂e me takî tî xatken̂e. Puranta tî nîmyatken̂e roro yîwya.

3 Ero yinhîrî Atatese tî cekn̂e Ewpratesî Yepu kwaka. Ero porerono komo yahsîso tî cekn̂e tmaywen komo me ahsîso ha. Soba pono komo kayaritomon tî mîk xakn̂e Atatese. Ewpratesî kwaka cetaw mokyakn̂e takî tî Tapi noro yakro etar̂max hara. Miya roro tî cetken̂e Tapi komo cetar̂maro noro yakro. Amace pona roro tî cetken̂e noro poko ro.

4 N̂examro tararantho tî nahsîyakn̂e Tapi mer̂pora, 1.000. Sowtatunthîrî marha tî nahsîyakn̂e kawaru mkaw tîtosomînhîrî, 7.000. Tîhtarî po tîtosom komo marha nahsîyakn̂e 20.000. Iyokuthîrî komo marha tî nîwîrîmekn̂e kawaru pen. Yîhraknu micin tî nîhkocekn̂e ahnoro. Nîmcekn̂e rma tko yîhkoton komo 100 tarara yaan̂e wicakno. Ero wa tî xakn̂e Tapi Atatese poko.

5 Ero yinhîrî Siriu komo takî tî cetken̂e Atatese yakronomaxi. Tamasku pono komo tî mîkyam cetken̂e. N̂etar̂metken̂e Tapi komo n̂examro yakro. N̂examro pen yopo marha tî xatken̂e Tapi komo. 22.000 Siriu pen komo tî waihketken̂e Tapi komo.

6 Ero yinhîrî takî tî tîsowtatun komo n̂ekenmekn̂e Tapi Siriu komo cheka, Tamasku pona rma. Tapi yepeman̂e me roro marha takî tî xatken̂e Siriu kom hara. Puranta tî nîmyatken̂e roro yîwya. Ero wara roro tî xakn̂e Tapi, tîîxatî pîn komo yopono me roro tî xakn̂e. Ero wara roro noro n̂iir̂akn̂e Kporin komo, ahna na cetaw Tapi yiixatî pîn komo yar̂man̂e me roro tî n̂iir̂akn̂e.

7 On wara tî xatken̂e Atatese sowtatun komo anarî komo, cececen̂an ke cemyarke so tî xatken̂e ooru ciixapu ke. Ero mko tî nahsîyatken̂e Tapi komo. Xerusaren pona tî naar̂atken̂e.

8 Anarî mko tî xakn̂e hara Atatese yewtontho, Cibace, Kun, ero mko yosotî. Ero poi tî bronse pen naar̂atken̂e Tapi komo mer̂pono pînî ro mak. Ero ke rma porin tuuna yen tî n̂iir̂akn̂e Saromaw, Kaan mîn mapatan marha porin, mîn hak makî tî n̂iir̂akn̂e iike ha, en̂exa ehxapu ke ha.

9 Ero yinhîrî takî tî Tapi yehtopo n̂encekn̂e Tou, Amace pono komo kayaritomon. Atatese sowtatun pen komo ahnoro tî nar̂matîkai Tapi, kacho tî n̂encekn̂e.

10 Ero ke tumumuru takî tî n̂en̂epekn̂e Tapi yaka yîmtapotareso. Atoraw tî mîk xakn̂e yumumuru yosotî. Kir̂wan̂he nai ham awya Atatese pen yar̂machonho, kaxi tî n̂en̂epekn̂e. Tou xatî pînînhîrî tî mîk xakn̂e Atatese. N̂etar̂metken̂e tî. Atatese yopo tko tî xakn̂e Tou. Taa, on wara tî xakn̂e Atoraw, Tapi ya tî nîmyakn̂e mîn hak mak cepethîkemu mko. Ooru ciixapu, prata ciixapu, bronse ciixapu, ero warai ciixapu mko tî nîmyakn̂e Tapi ya.

11 Ero mko rma tko tî nîmyakn̂e Tapi Kporin komo ya hara. Mîk hak rowon pono yemyawnonho tî nîmyakn̂e yîwya tînar̂mathîrî pen komo yemyawnonho. Eton pono pen komo, Moabita pen komo, Amonita pen komo, Piristew pen komo, Amarekita pen komo, ero warai pen komo yemyawnonho tî nîmyakn̂e Kporin komo ya hara.

12 On wara marha tî xakn̂e Abisai, Seruia mrerî, Eton pono pen komo tî waihkekn̂e woskara po, Yîmîtî Ken̂arî po. 18.000 tî waihkekn̂e.

13 Ero yinhîrî sowtatu komo marha tî n̂ekenmekn̂e Abisai Eton pono komo cheka. Tapi yepeman̂e me roro marha takî tî xatken̂e ahnoro Eton pono kom hara. Ahna na Tapi cetaw yiixatî pîn komo yopono me roro tî n̂iir̂akn̂e Kporin komo.

14 Ero wa tî xakn̂e Tapi, ahnoro Ixaw Yana komo kayaritomon me tî xakn̂e. Takîhso tî tmaywen komo panatanmekyakn̂e, takîhso marha tî n̂examro n̂en̂ekekn̂e.

15 On wara tî xatken̂e Tapi maywenî ro komo, sowtatu komo yantoman̂e me tî xakn̂e Xoabe, Seruia mrerî. Kayaritomo mtapotacho mewren̂e me tî xakn̂e Xeosapa, Airuce mumuru.

16 Asakî tî xakn̂e Kporin komo yaka cewomsom komo, Satoke, Aitube mumuru, Abimereke, Abiata mumuru. Kayaritomo karitan mewren̂e ro me tî xakn̂e Sapsa.

17 Benaia tî xakn̂e kayaritomo kurunpen̂e ro komo yantoman̂e me. Xoiata mumuru tî mîk xakn̂e Benaia. Kayaritomo yakro cesentaxmu me roro tî xatken̂e Tapi mumuru komo mak hara. Ero wa tî xatken̂e Tapi maywenî ro komo.