Ero yinhîrî takî tî tîmîn yaw xakn̂e Tapi. Iito cexitaw Natan yakro tî n̂esencekn̂e. Kweronoman̂e mîk xakn̂e Natan. On wara tî kekn̂e Tapi yîwya, Ai oyakno, on wara wîhtînoyasî, kir̂wanî ro yaw was ow mîîmo yaw. Setru sahsamaxapu on omîn. Kporin komo mtapotarî yen nasî roona yaw makî reha okwe, kekn̂e tî yîwya.

2 On wara tî n̂eyukyakn̂e Natan, Taa, anîhtînorî yaw roro rma esko. Awakro rma nasî Kaan, kekn̂e tî.

3-4 On wara tko tî xakn̂e Natan ero po rma kosope, Kaanî mtapotarî tî n̂encekn̂e. On wara tî kekn̂e Kaan yîwya, Ai Natan, etoko xa hara Tapi yaka, oyanton yaka. On wara kasko yîwya, Ai Tapi, on wara tî nîîke Kporin komo awya, omîn cirihra mas amoro.

5 Mîîmo yawhra ro makî ka wîxakn̂e mehxa ro Exitu poi Ixaw Yana komo yehtoponho n̂ixa ro rma. Roona mko yawno me mak wîxakn̂e, anarî yaw, anarî yaw, ero wara.

6 Ixaw Yana komo yakro rma ketar̂akn̂e xiya miya wara. Xatken̂e yaake n̂examro yenîn̂e komo. Owî rma n̂examro wantomekn̂e oyanan komo yentopo poko, tooku n̂eenasî oper̂a yosom ero wara n̂examro wantomekn̂e. Noro yipu komo ya ma re wîîkekn̂e awya, Ahce kacho kir̂wan omîn cirihra ka mîxatken̂e setru ciixapu ha? wîîkekn̂e ha ma re?

7 Ero ke on wara kasko Tapi ya, oyanton ya, On wara kesî Kporin komo, Kantoman̂e ro, Oper̂a yenîn̂e me ka mîxakn̂e, oper̂a wacan yaw mîwînîkyakn̂e. Oper̂a yakro metar̂akn̂e. En̂exa tak kekyakn̂e oyanan komo kayaritomon me tak awitome hara Ixaw Yana kayaritomon me.

8 Kakronomekn̂e roro ahna na awcetaw. Aaxatî pîn komo ahnoro war̂mapekn̂e awya. Cekaiporesom me xa tak kiire, kyopono komo n̂esekaiporexe roowo poko hakno komo, ero wara rma kiire amoro.

9-10 On wara wasî Ixaw Yana komo poko hara, oyanan komo poko, n̂examro yeken wukuknomes amn̂e. Iina n̂examro wiir̂asî naatî wara. Cekenî ro po tak naxe ero yimaw. Anana so cesekenmaxmu me exihra tak naxe. Kicicitho komo n̂emetanmekrî me tak exihra naxe ero yimaw. Pahxa n̂emetanmekyatken̂e. Emapona roro n̂examro n̂emetanmekyatken̂e. Ero ke oyanan town̂e komo wenpekn̂e yîwya so emapona. Ero warahra tak naxe amn̂e, emetanmekn̂e komo exihra tak naxe ero yimaw. Aaxatî pîn komo ahnoro wiir̂asî awewetîn̂e komo me. On wara marha wîîkes awya, amîn xa matko wiir̂as Ow hara, wîîkesî.

11 Amn̂e tak roowo po awehtoponhîrî yenatîche ero yimaw tak nasî aporin pen komo yaka awtotopo me. Ero yimaw awepamthîrî komo tak wiir̂asî kayaritomo me hara. Amumuru rma mîk ero me wiir̂asî. Noro wiir̂asî Ixaw Yana komo n̂ewetîrî me.

12 Omîn tak n̂iir̂asî noro. Noro wiir̂asî kayaritomo me towîhnî me ro mak. Eroromero wiir̂asî kayaritomo me.

13 Noro yîîm me wasî, omumuru me nasî noro hara. Noro yîpînînkara wasî. Pahxa Sau wîpînînkekn̂e, kayaritomo mera ka awexitawno pen. Ero warahra reha wasî amumuru poko.

14 Omîn yawno yenîn̂e me wiir̂asî amumuru, omaywen komo yenîn̂e me marha wiir̂asî eroromero. Kayaritomo me wiir̂asî towîhnî me ro mak, kesî Kporin komo awya, kasko yîwya, kekn̂e tî Kporin komo yîwya. Ero wa tî kekn̂e Kporin komo Natan ya.

15 Ero ke ero wa kacho rma tî n̂ekatîmtîkekn̂e Natan Tapi ya hara, Kaan kekn̂e yîwya ero.

16 Ero yinhîrî takî tî Kaan mîn yaka n̂ewomyakn̂e Tapi. Iina tî n̂eremekn̂e Kporin komo yeepatai. On wara tî kekn̂e yîwya, Ai Apa, ponaro oyehtopo Amoro. Kar̂pen mak ow. Kar̂pen me marha naxe oyanan komo. Ahce wa na oyenîrî ke awya ow miire kayaritomo me?

17 Wahra mak kakronomai, mîîkai ha re ka ero poko. Miya roro oyakronomacho poko tak mîmtapowas hara. Pahxarono poko meero mîmtapota oyepamtho komo poko rma. Kyopono ro pokono wara mîmtapota opoko apa. Kaan xa Amoro Oporin ha.

18 Ero wa ham okre Apa, ow makronome ham kyopono me oritopo ke, wîîkesî rma re awya Apa. Ahce wa thakwa re wîîke xa hara awya? Awanton mak ow. Oropotarî meen̂asî rma wa.

19 Awanme ro mak mekatmo owya kyopono me oritopo, ooxe awexirî ke ham. Miyanî rma amna ritopo mekatmo owya.

20 Apa, anarî exihra ro mak nasî awarai. Anarî exihra ro mak nasî kaan. Kaan me anarî yehtopo yentara ro mak amna nasî.

21 Anarî yana komo exihra marha naxe ayanan komo warai, Ixaw Yana komo warai. Roowo yakwerî poko hakno komo rma re naxe anarî yana komo merpono pîn. Amna towso makî tko mîîcekn̂e amna yahsîtome ayanan komo me. Amna mowyakn̂e Exipsiu komo yantonînho. Ero wa amna makronomekn̂e awehtopo yenpotome. Cirihnî ro miir̂akn̂e, yîwîrîmano marha. Ero yinhîrî tak mîk hak rowon pono komo mar̂mapekn̂e ayanan komo ya. Ero wa karitî me xa awehtopo menpekn̂e.

22 Ixaw Yana komo mahsîyakn̂e ayanan me eroromerono me. Ponaro n̂examro yehtopo me marha tak mas Amoro hara.

23 Oroto tak mîmtapota opoko, oyepamrî poko marha. Ero ke amtapotachonhîrî yaw roro rma amna cirko miya roro towîhnî me ro mak.

24 Ero wara rma amna cirko kir̂wanî ro me awehtopo yîhtînomexpotome miyan komo ya rma. On wara tak kexe amn̂e ero wara amna ciriche awya, Kporin komo xa nai ham kantoman̂e ro me. Noro rma nasî ponaro Ixaw Yana komo yehtopo, kexe. Ero wa kachome marha oyepamrî komo cirko kayaritomo me eroromero.

25 On wara mîîka owya, Amîn xa matko wiir̂asî, mîîka. Ero ke mak ero yipu wîhtînopu awakro omtapotacho.

26 Oroto tak on wara wîîkes awya Apa, Kaanî ro xa Amoro, awanton mak ow ha. Kir̂wan̂he xa oritopo mekatmo owya.

27 Kir̂wan̂he oritopo mîhtînopu ham awanme ro. Ehcamnopîn me ro mak oyepamrî miir̂a ham kayaritomo me. Kir̂wan̂he oyepamrî komo ciitopo poko marha mîmtapota, ero ke kir̂wan̂he an̂irirî me nai ham Apa, eroromero, wîîkes awya, kekn̂e tî. Ero wa tî kekn̂e Tapi Kporin komo ya.