Ero yinhîrî takî tî Kaan yamatan n̂ekyatken̂e ewto pona xa tak. Roona yaka n̂ermonoyatken̂e Tapi n̂iritho yaka. Iina ciriche okno komo xa hara tî nakn̂iyatken̂e Kaan mîtwo. Takn̂itîkaxmu tî nakn̂iyatken̂e, Aaxe xa was Apa, kacho marha tî.

2 Ero yipu yakn̂itîkache takî tî Ixaw Yana komo nakronomapekn̂e Tapi Kporin komo ya. Noro yanan me exirî ke so ero wa nakronomapekn̂e.

3 Ixaw Yana komo ya takî tî erewsî n̂ekamyakn̂e Tapi. Wooxam komo ya tî nîmyakn̂e, kîrkomo ya marha tî. Iyuru komo tî n̂ekamyakn̂e cewn̂e so, wooto marha tî cewn̂e so, uupa amnonoxapu cewn̂e so marha tî.

4 Repita komo poyino marha tî nantomekn̂e Kporin komo yakro yîmtapotacho komo poko. Kir̂wan̂he amna makronomai Apa, kan̂e me ehcoko, Kir̂wan̂he amna makronomesî, kan̂e me marha, Kir̂wan̂he xa mai ham okre, kan̂e me marha. Ero wa amtapotacoko amyamro tan Kaan yamatan mîtwo, ponaro Ixaw Yana komo yehtopo mîtwo ha, kekn̂e tî yîwya so.

5 On warai komo tî nantomekn̂e ero poko, Asape, n̂examro yantoman̂e tî mîk xakn̂e noro. Noro yakro tî xakn̂e Sakarias. Ero yinhîrî tî xatken̂e Xeiew, Semiramoce, Xeiew, Macicias, Eriabe, Benaia, Obece-Eton, Xeiew, ero wara. N̂examro tî nîyorketken̂e pioraw warai, ahpaci marha. Car̂ar̂a kan̂e poko tî xakn̂e Asape.

6 On wara tî xatken̂e Benaia, Xaasiew komo, Kporin komo ya tîmsom pokono komo re xatken̂e n̂examro. Tuu kan̂e me roro marha tî xatken̂e Kaanî mtapotarî yen mîtwo. Ero poko tî n̂examro nantomekn̂e Tapi.

7 Ero kaamo po takî tî waano nîmyakn̂e Tapi Asape ya, iyanan komo ya marha. Mewrexapu tî mîn nîmyakn̂e yîwya so. Kir̂wan̂he Kporin komo nai ham okre, kacho tî mîn xakn̂e waano.

8 On wara kacho tî mîn waano, Kir̂wan̂he xa mai ham okre, tîtkacerî Kporin komo ya. Noro yosotî etacicoko yiixe awehtopo komo poko amtapowataw so. Noro yehtoponho ekatîmcoko anarî yana komo ya.

9 Noro n̂entarî me ewanomacoko, Kir̂wan̂he xa mai ham okre, kacho aacoko. Ahce wa na ciino ritoponho yîwya ekatîmtîkacoko, poko keserepokacho kom ha.

10 Noro yosotî poko ahwotacoko kir̂wanî ro me exirî ke. Nahwotacowpe Kporin komo yepon̂e komo.

11 Kporin komo epocoko. Kar̂pe Noro yehtopo aponcoko marha. Noro yewru epocoko miya roro yîtîhkan me ro mak.

12 Yîwya ciino ritoponho ponaro rma ehcoko, poko keserepokacho kom ha, cirihnî ciitopono yîwya. Yîmtapotarî ponaro marha ehcoko, en̂ekano ritopo poko yîmtapotacho ha.

13 Ero wa ehcoko amyamro Ixaw pen yepamtho komo, Kaan yanton pen yepamtho kom ha. Xako pen yepamtho amyamro, Kporin komo nahsîtho kom ha. Ero wa ehcoko amyamro Noro poko.

14 Kporin komo Mîk, ponaro kehtopo kom ha. Roowo poko hak nasî yîn̂en̂ekathîrî komo.

15 Yîmtapotachonhîrî ponaro ehcoko miya roro, Kakronomexe so oyewehcataw awya so, kachonho. Ero wa n̂ehcowpe awepamthîrî komo meero miya rorono komo. 1.000 me ehretawnomaxapu komo n̂ewetîrî rma mîn ha.

16 Abraaw pen yakro tî nîmtapowakn̂e Kporin komo noro yakronomacho poko. Isake ya marha tî kekn̂e ero poko. Cehtopo rma tî n̂etahcakn̂e yaaro xa entachome yîwya.

17 Xako ya marha tî kekn̂e ero poko rma. Noro panatanmetopo poko tî nîmtapowakn̂e. Ixaw, kacho mîk noro ya tî kekn̂e, Oyewehcataw awya so kakronomexe so, kachonho ha. Esemîknopîn me ro makî tî ero wa kekn̂e.

18 On wara tî kekn̂e Ixaw ya, On roowo wîmyas awya aweken komo me Kanan ha. Wukuknomesî anahsîrî komo me, kekn̂e tî yîwya.

19 Ero wa tî kekn̂e Kporin komo aporin pen komo ya asakî makî ka exitaw so. Mer̂pora exihra ro makî tî ka xatken̂e. Anarî yana komo chewno me makî tî ka xatken̂e ero yimaw.

20 Cetken̂e rma re aporin pen komo mîk hak rowon pono komo chewnonho, anarî rowon pono komo cheka hara. Anarî yana komo chewnonho marha tî cetken̂e anarî cheka so hara anarimaw so.

21 Ero wa cetaw so tî nukurunpekn̂e Kporin komo n̂examro yemetanmekîra ehtome so tooto komo. Anarimaw so kayaritomon komo rma tî n̂eeyakn̂e tîyanan komo yemetanmekrî poyero.

22 On wara tî kekn̂e kayaritomo komo ya, Onîhkapetho komo mîkyam, Ixaw Yana komo. Ero ke yîwîrîmara ro mak men ehcoko. Opoko weronomano rin̂e komo mîkyam. Ero ke emetanmekîra ro mak ehcoko, kekn̂e tî yîwya so.

23 Ero ke ewanomacoko Kporin komo n̂entarî me. Roowo poko hakno komo amyamro ewanomacoko. Kukurunpen̂e komo Mîk okre, kacoko enmar̂atîxera.

24 Kir̂wanî ro me Noro yehtopo ekatîmcoko mîk hak rowon pono komo ya. Keserepokacho me so yin̂irithîrî ekatîmcoko anarî yana komo ya ahnoro ya.

25 Kyopono ro xa Mîk Kporin komo. Noro poko tahwotapore ro mak nasî. Ponaro cehtopo ro komo poko twerî rma re naxe anarî komo. Twerî kehtopo komo ro xa Mîkî Kaan ero yiputho komo yopo ro mak.

26 Ponaro cehtopo komo n̂iir̂axe anarî yana komo. Ero pîntho mak mîn yin̂irithîrî komo. Ero warai pînî reha Mîk Kporin komo. Kaapu yakîhton̂enho xa Mîk ha.

27 Noro mîtwono komo n̂een̂axe kyopono ro me Noro yehtopo, kayaritomo me ehtopo marha. Noro yeken po nasî kar̂pe kehtopo. Tahwore kehtopo marha nas iito.

28 On wara wîîkes awya so anarî yana komo ya, Kporin komo yehtopo ekatîmcoko. Kir̂wan̂he ehtopo ekatîmcoko, kar̂pe ehtopo marha.

29 Ahwotacoko Kporin komo yosotî poko. Yaaro rma mahwowaxe Noro yosotî poko kir̂wanî ro me exirî ke. Yîwya tîmsom eeko amokyataw so yîhyaka. Cenpore xa tasî kir̂wanî ro me kexitaw so. Ero ke ero wara rma ehcoko Noro poko awahwowataw so.

30 On wara wîîkes awya so roowo poko hakno komo ya, twerî xa ehcoko yîhyaka awcetaw, tatan̂e mak etocoko yîhyaka. Apotmîkî ciiso xa nasî roowo, anana etakan me ro mak.

31 Kah yawno komo, on wara wîîkes awya so hara, ahwotacoko tak ha. Tahwore ehcoko amyamro hara roowo pono komo. On wara kacowpe mîk hak rowon pono komo, Kayaritomo me xa nasî Kporin komo, kacowpe.

32 N̂ewtunîmpe tuuna imo meero. Yukwawno komo marha kacowpe. Mararî mko marha nahwotacowpe, iipo so atîhtaxapu marha.

33 Ero yimaw tak weewe mko tak nahwowasî comota pono mko. Kporin komo poko nahwowasî. Noro rma mokyasî roowo pono komo yen̂ekaxi. Ero ke nahwowaxe.

34 Kir̂wan̂he xa mai ham okre, kacoko Kporin komo ya. Kir̂wan̂he exirî ke ero wa kapore nasî. Kîpînîn yaw nasî Noro eroromero.

35 On wara marha kapore nasî Kporin komo ya, Apa, amna kurunpen̂e ro Amoro. Ero ke amna yukurunpeko. Amna enmeko iina re. Amna towko Xenciu komo yai. Ero wa amna towîche kir̂wanî ro me awetacas amna. Tahwore xa amna n̂ekatîmyasî kir̂wanî ro me awehtopo.

36 Kir̂wan̂he xa mai ham okre, kapore roro xakn̂e mehxa ro rma yihcitopo ken̂ehra rma. Miya roro marha kapore nasî yîtîhkan me ro mak. Ero wa kapore nasî Kporin komo ya, ponaro Ixaw Yana komo yehtopo ya, kacho mîn xakn̂e waano. Ero wa kacho mîn xakn̂e Tapi wanorî. Waano yentatîkache, Ero wa ham okre, ketken̂e takî tî Ixaw Yana komo ahnoro. Kporin komo poko nahwowatken̂e. Ero wa tî xatken̂e.

37 Ero yinhîrî cekn̂e hara Tapi. Iito rma tî xakn̂e Asape takrono komo yakro. Kporin komo mtapotarî yen mîtwo rma tî xatken̂e roro enmar̂atîxera. Cemyarke tî xatken̂e ero yenîrî poko, ahce wa na ciitopo poko.

38 Iito marha tî xakn̂e Obece-Eton. Iyanan komo marha tî xatken̂e noro yakro, 68. Iito marha tî xakn̂e anarî hara Obece-Eton, Xetutun mumuru ha. Oosa marha tî xakn̂e iito. Kaan mîn metatan yenîn̂e me tî xatken̂e n̂examro reha.

39 Xibeon po reha tî xakn̂e Satoke, Kaan yaka cewomsom. Iito marha tî xatken̂e noro yakno komo, tîmsom pokono me cehsom komo. Kporin komo mîn yaw tî xatken̂e, îh pono yaw.

40 N̂examro tî xatken̂e Kaan ya tîmsom yakn̂itopo poko. Akn̂itopo ro pona tî nakn̂iyatken̂e. Pahxaxaro so tî nakn̂iyatken̂e, kokon̂i so marha. Pahxa tî Ixaw Yana komo nantomekn̂e Kporin komo ahce na yakn̂itopo poko ero yaw roro tî xatken̂e Satoke komo.

41 N̂examro yakro tî xatken̂e Eman, Xetutun komo. Anarî komo marha xatken̂e akro so, ero pokono me men̂ekaxapu komo. Ero pokono me etacixapu komo mîkyam xatken̂e. On wara kan̂e me roro tî xatken̂e. Kir̂wan̂he xa Kaan nai ham okre. Eroromero nasî kîpînîn yaw so, kan̂e me roro ha. Ero pokono me tî xatken̂e n̂examro.

42 Ero wa ketaw yîwya so raatî yecen̂e me tî xakn̂e Eman, Xetutun komo. Tîyorkaxmu poko marha tî xatken̂e, car̂ar̂a kan̂e poko marha tî. Ero yipu poko xatken̂e Kaan wanorî yaatopo yakrono me. Kaan mîn metatan yenîn̂e me tî xatken̂e Xetutun mumuru komo reha.

43 Ero yinhîrî tî cetken̂e hara Ixaw Yana komo tîmîn komo yaka. Tapi marha tî cekn̂e tîmîn yaka tîhyawno komo yakronomaposo Kaan ya. Ero wa tî cetken̂e.