Ero yinhîrî takî tî tîmîn xa hara n̂iir̂akn̂e Tapi yaake, ewto pona, Tapi pen Yewton, kacho pona. Kaan yamatan yeken marha tî naiwekn̂e. Iina tî roona n̂iir̂akn̂e ero mîn me.

2 On wara tî kekn̂e Tapi, Mîk hak narîrî mera ro mak nai ham Kaan yamatan. Repita komo mak naxe aan̂e me. N̂examro tî n̂iir̂akn̂e Kporin komo tîyamatan yaan̂e me. Tîmîn yenîn̂e me marha n̂examro n̂iir̂akn̂e eroromerono me, kekn̂e tî.

3 Ero yinhîrî takî tî Ixaw Yana komo ahnoro nan̂ikpekn̂e xa hara Tapi Xerusaren pona. Amohcoko Kporin komo yamatan yekrî yenso, ekenî ro waiwai ero pona ekrî ha, kekn̂e tî yîwya so.

4 Araw yepamtho komo marha tî nan̂ikpekn̂e, Repita komo ahnoro tî.

5 Koace yepamtho komo tî nan̂ikpekn̂e. Uriew tî xakn̂e n̂examro yantoman̂e me. 120 tî mîkyam xatken̂e noro maywen komo, iyanan komo rma.

6 Merari yepamtho komo marha tî nan̂ikpekn̂e. Asaias tî xakn̂e n̂examro yantoman̂e me. 220 tî mîkyam xatken̂e noro maywen komo, iyanan komo rma.

7 Xehson yepamtho komo marha tî nan̂ikpekn̂e. Xoew tî xakn̂e n̂examro yantoman̂e me. 130 tî mîkyam xatken̂e noro maywen komo, iyanan komo rma.

8 Erisapan yepamtho komo marha tî nan̂ikpekn̂e. Semaias tî xakn̂e n̂examro yantoman̂e me. 200 tî mîkyam xatken̂e noro maywen komo, iyanan komo rma.

9 Ebron yepamtho komo marha tî nan̂ikpekn̂e. Eriew tî xakn̂e n̂examro yantoman̂e me. 80 tî mîkyam xatken̂e noro maywen komo, iyanan komo rma.

10 Usiew yepamtho komo marha tî nan̂ikpekn̂e. Aminatabe tî xakn̂e n̂examro yantoman̂e me. 112 tî mîkyam xatken̂e noro maywen komo, iyanan komo rma.

11 Satoke marha tî nan̂ikpekn̂e Tapi, Abiata marha. Kaan yaka cewomsom mîkyam xatken̂e. Repita komo marha tî nan̂ikpekn̂e. On wara tî xakn̂e n̂examro yosotî, Uriew, Asaias, Xoew, Semaias, Eriew, Aminatabe, ero wara tî nan̂ikyakn̂e.

12 On wara tî kekn̂e Tapi yîwya so, Oyakno komo, on wara wîîkes awya so, ayanan komo yantoman̂e komo amyamro, Repita komo yantoman̂e rma. Ero ke Kporin komo ponaro xa tak ehcoko ayanan komo yakro rma. Ero wa ehcoko Kporin komo yamatan yehtome awya so, ponaro Ixaw Yana komo yehtopo yamatan ha. Ekenî ro pona ehcoko, on̂iritho pona ha.

13 Yihcirî me ekyataw ekîhra mîxatken̂e amyamro. Ero ke waihkano n̂iir̂akn̂e Kporin komo okwe. Ero wa tî kiir̂atken̂e so yîmtapotarî yentara kexirî ke so, Ahce wa xa amna n̂ekya? kacho yentara amna xakn̂e yîmtapotarî ha, kekn̂e tî yîwya so.

14 Ero ke on wara takî tî xatken̂e tîmsom pokono komo, Repita komo marha, n̂etakir̂wametken̂e takî tî. Ero wa tî n̂etakir̂wametken̂e Kporin komo yamatan yaatome Xerusaren pona, ponaro Ixaw Yana komo yehtopo yamatan yaatome ha.

15 On wara takî tî n̂aar̂atken̂e Repita komo, Weewe xîkrî ke cecehke tî naar̂atken̂e tmotaw so. Moises pen tî n̂ekatîmyakn̂e Kporin komo mtapotachonho ero yaw roro rma tî n̂aar̂atken̂e.

16 Ero yimaw takî tî Tapi nîmtapowakn̂e Repita komo yakro, antoman̂e komo yakro. On wara tî kekn̂e yîwya so, Awakno komo poyino ciicoko yaake, cewanomaxmu me. Anarî komo antomacoko raatî yorkacho poko, pioraw warai, ahpaci mko, car̂ar̂a kan̂e komo, ero warai poko waano naacowpe cewanomaxmu komo yakro rma. Tahwore xa naacowpe, kekn̂e tî yîwya so.

17 Ero ke on warai tî n̂etahcatken̂e Repita komo, Eman, Xoew mumuru mîkî. Noro yanan marha tî n̂etahcatken̂e Asape, Berekias mumuru mîkî. Merari yepamtho marha tî n̂etahcatken̂e tîyanan komo rma, Etan tî osotî. Kusaias mumuru tî mîk xakn̂e.

18 N̂examro maywen komo takî tî n̂etahcatken̂e hara tîyanan komo rma, Sakarias, Bene, Xaasiew, Semiramoce, Xeiew, Uni, Eriabe, Benaia, Maaseias, Macicias, Eriperew, Mikneias, Obece-Eton, Xeiew, ero wara. Metata yenîn̂e me tî n̂examro n̂iir̂atken̂e.

19 On poko marha tî xatken̂e cewanomaxmu komo, Eman, Asape, Etan, car̂ar̂a kan̂e poko tî xatken̂e, bronse ciixapu poko.

20 On warai komo tî nantometken̂e pioraw warai pokono me hara, Sakarias, Asiew, Semiramoce, Xeiew, Uni, Eriabe, Maaseias, Benaia, ero wara. Aramoce me tî waano naar̂atken̂e n̂examro.

21 Anarî komo tî nantometken̂e ahpaci pokono me hara, semen̂ice me n̂he aatome waano. On wara xakn̂e n̂examro yosotî, Macicias, Eriperew, Mikneias, Obece-Eton, Xeiew, Asasias, ero wara. Waano yihcin̂e me tî xatken̂e n̂examro.

22 On wara tî xakn̂e Kenanias, Repita komo yîhcamhokan̂e me tî xakn̂e noro waano poko. Ero wa tî n̂iir̂atken̂e noro takîhso exirî ke waano poko.

23 Taa, tîyanan komo marha tî nantometken̂e Kaan yamatan yeken metatan yentopo poko hara, Berekias, Ewkana, ero wara tî xakn̂e metata yenîn̂e komo yosotî.

24 Tîmsom pokono komo marha tî n̂iir̂atken̂e tuu kan̂e me hara. Kaan yamatan poturme tîtosom komo mîkyam men̂eketken̂e, tuu kan̂e me cehsom kom ha. Seban̂ias, Xosapa, Netanew, Amasai, Sakarias, Benaia, Eriese, ero warai komo tî n̂iir̂atken̂e ero pokono me. Anarî komo xa hara tî nantometken̂e Kaan yamatan yeken metatan yenîrî poko, Obece-Eton, Xeias, ero wa.

25 Ero yinhîrî takî tî cetken̂e Tapi komo, Ixaw Yana poritomon komo, sowtatu yantoman̂e komo, 1.000 komo yantoman̂e kom ha. Kporin komo yamatan yehso tî cetken̂e, yîmtapotarî yen yehso ha. Obece-Eton mîn yawnonho tî n̂ekyatken̂e. Tahwore ro makî tî n̂ekyatken̂e.

26 Kaanî rma tî Repita komo nakronomekn̂e tîyamatan yarîrî poko. Ero ke wahra mak arîche tokuthîrî komo pun takî tî nakn̂iyatken̂e Kporin komo ya tîmsom me. Bui pun tî nakn̂iyatken̂e 7, kahn̂eru pun marha tî nakn̂iyatken̂e 7 xa marha. Ero wara tî nakn̂iyatken̂e.

27 Riin̂u kahxapu yaw tî xakn̂e Tapi poono yaw, ahnorono yaw ha. Ero warai yaw marha tî xatken̂e Repita kom hara, Kaan yamatan yaar̂ataw. Ero yaw xa marha tî xakn̂e waano yaan̂e komo, Kenanias marha, waano yihcin̂e ro ha. Eepoci yaw marha tî xakn̂e Tapi. Ero wa tî xakn̂e ponon komo.

28 Ero wa tî Kaan yamatan naar̂atken̂e Ixaw Yana komo, Kporin komo mtapotarî yen ha. N̂emtaraketken̂e, raatî n̂eceyatken̂e, car̂ar̂a kan̂e marha tî n̂îyorketken̂e. Waano marha tî naar̂atken̂e pioraw warai poko, ahpaci mko poko marha. Ero wa tî naar̂atken̂e.

29 Ero yinhîrî Tapi pen Yewtontho pona roro takî tî Kaanî mtapotarî yen naar̂atken̂e. Ero yimaw tî mehxa xakn̂e Mikaw, Sau pen yemsîtho. Mîîmo yewkanapan yaro tî mokrî komo n̂een̂akn̂e. Tapi marha tî n̂een̂akn̂e. Manîmrî tî n̂een̂akn̂e, raatî yorkarî marha tî. Ero ke noro takî tî nîwîrîyakekn̂e tîropotaw. Ero wa tî xakn̂e Mikaw okwe.