Ero yinhîrî takî tî on wara xakn̂e Iraw, Ciru pono komo kayaritomon, tmaywen komo tî n̂en̂epekn̂e Tapi yaka, tîmtapotarî yekatîmn̂e komo. Mîîmo ciin̂e ro komo marha tî n̂en̂epekn̂e, toopu ciin̂e ro komo, weewe ciin̂e ro komo marha. Ero wa tî en̂epeno n̂iir̂akn̂e noro Tapi yaka yîmîn ciin̂e komo. Setru yepu marha tî narpekn̂e yîhyaka yîmîn me ciisom.

2 Ero yimaw takî tî on wara kekn̂e Tapi tîhnaw, Yaaro xa, Ixaw Yana komo kayaritomon me oriye ham Kporin komo, kekn̂e tî. Anarî komo yopono me tî noro n̂esekaiporekn̂e Tapi. Ero wa xakn̂e Kporin komo Tapi poko tîyanan komo kayaritomon me exirî ke, Ixaw Yana komo kayaritomon me ha. Ero wa tî xakn̂e Tapi.

3 Taa, ero yimaw anarî komo xa hara tî nahsîyakn̂e Tapi cipici komo Xerusaren pona tmokuche. Ero ke yaake n̂he takî tî n̂ewruyatken̂e yumumuru komo xa hara, emsîrî komo marha.

4-7 On wara tî xakn̂e yumumuru komo yosotî, Xerusaren po ewruxapu komo yosotî, Samua, Sobabe, Natan, Saromaw, Iba, Erisua, Ewperece, Noka, Nepeke, Xapia, Erisama, Eriata, Eriperece, ero wa tî xakn̂e yumumuru komo yosotî, Xerusaren po ewruxapu komo.

8 Taa, ero yinhîrî takî tî on wara kacho tî n̂encetken̂e Piristew komo, Tapi takî tî nîhkapetken̂e Ixaw Yana tîkayaritomon komo me, etpoyino pîn kayaritomon me tak ha, kacho tî n̂encetken̂e. Ero ke Tapi wece tî mokyatken̂e. Mohtopo komo tko tî n̂encekn̂e Tapi. Ero ke sowtatu komo tî naar̂akn̂e Piristew komo yakro etar̂maxi.

9 Ero yimaw takî tî Hepain Woskaran pono komo waparî me tî cetken̂e Piristew komo okwe.

10 Ero ke Kaanî mtapotarî tî ka n̂encekn̂e Tapi. On wara tî kekn̂e yîwya, Ai Apa, Piristew komo yakro etar̂maxi kîwce? Iina owtoche n̂examro pen mar̂mape owya? kekn̂e tî yîwya. On wara tî n̂eyukyakn̂e Kporin komo, Nhnk, etoko rma n̂examro waparî me. N̂examro pen tak war̂mapesî rma awya so, kekn̂e takî tî.

11 Ero ke Baaw Perasin pona tî cekn̂e Tapi. Iito takî tî Piristew komo nar̂mekn̂e. Ar̂mache on wara tî kekn̂e Tapi, Tuuna wahkotoxapu exitaw anarimaw twahkototoponhîrî nar̂mesî, ero wa xa marha owaparî me mohxapu komo nar̂mapo Kporin komo owya, kekn̂e tî. Ero ke iitono roowo takî tî nosohcetken̂e Baaw Perasin me.

12 Iito rma tko tî ponaro cehtopo komo me enporixaputho mko nînomyatken̂e Piristew komo. Ero ke ero mko tî nakn̂ipekn̂e Tapi tîsowtatun komo ya. Ero wa tî nakn̂ipekn̂e.

13 Ero yinhîrî takî tî iitono komo waparî me xa hara tî mokyatken̂e Piristew komo, woskara pono komo waparî me.

14 Ero ke Kaanî mtapotarî xa hara tî ka n̂encekn̂e Tapi. On wara tko tî kekn̂e Kaan yîwya, Tohra ka ehcoko Piristew komo yar̂maxi. Mamricoko makî tko yîmkai so. Iito nai amorera yepu. En̂exa tak n̂examro wece yuu yuu, kacoko, wece so etocoko.

15 Iito rma ka awexitaw so tîtosom wara tak mencexe amorera yepu chere tîtosom wara, yarihtari tîtosom wara ha. Ero wa encetaw awya so etocoko tak Piristew komo waparî me. Ero yimaw Kaan totopo mîhtînoyaxe, Piristew komo waparî me totopo ha, kekn̂e tî.

16 Ero ke Kaanî mtapotarî yaw roro rma tî cekn̂e Tapi. Ero ke takî tî Piristew komo nar̂metken̂e xa hara Tapi komo. N̂examro pen tparaxkaro tî cetken̂e Xibeon poi Xese pona roro. Ero wa tî Piristew komo nar̂metken̂e.

17 Ero ke miyan komo ya rma takî tî n̂esekaiporekn̂e Tapi, mîk hak rowon pono komo ya. Kporin komo rma tî cerahsom me ciino n̂iir̂akn̂e Tapi pona. Mîk hak rowon pono komo ahnoro tî n̂iir̂akn̂e cerahsom me noro pona. Ero wa tî ciino n̂iir̂akn̂e Kporin komo.