Ero yinhîrî takî tî on wara xakn̂e Tapi, sowtatu yantoman̂e komo yakro tî n̂esencekn̂e, 1.000 yantoman̂e komo yakro, 100 yantoman̂e komo yakro marha. Ero warai komo yakro tî n̂esencekn̂e. Sowtatu pîn yantoman̂e komo yakro marha tî n̂esencekn̂e.

2-3 Ero ke n̂esenmekyatken̂e Ixaw Yana komo esentachome so. On wara tî kekn̂e Tapi yîwya so, Oyakno komo on wara cma re wîîkes awya so, kir̂wan̂he exitaw awya so Ixaw Yana komo tan̂ihcerî ahnoro meyeno komo meero. Kir̂wan̂he exitaw marha Kporin komo ya, ponaro kehtopo komo ya tan̂ihcerî ha. Cewton po so marha natu tîmsom pokono komo, Repita komo marha. Anarimaw twoskaran po so na natu. N̂examro cma re tan̂ihcerî kîhyaka so. Mokuche so tak Kaan yamatan cehcerî kîhyaka so. Ero mîtwo yîmtapotara taxe Kaanî mtapotarî yentachome. Pahxanînhîrî rma ero mîtwo yîmtapotara taxe okwe, Sau pen yehtoponho n̂ixa ro rma okwe. Ahce wa katî mîhtînoyatu?, kekn̂e tî. Ero wa tî kekn̂e Tapi antomano rin̂e komo ya.

4 Taa, ero wa ham okre, ketken̂e tî esenmexapu komo. Kir̂wan̂he tî n̂encetken̂e Tapi mtapotarî.

5 Ero ke Ixaw Yana komo ahnoro takî tî nan̂ikpekn̂e Tapi. Sio pona rorono komo rma tî nan̂ikyakn̂e, Exitu pono pona rorono kom ha. Amace potarî pona rorono komo marha tî nan̂ikyakn̂e. Ero ke takî tî mokyatken̂e Kaan yamatan yekrî yenso. Kiriace Xearin poi ekrî ha.

6 Ero ke ahnoro Ixaw Yana komo tî cetken̂e Tapi yakro Baara pona. Kiriace Xearinî rma tî mîn xakn̂e Baara, Xuta komo yewton ha. Kaan yamatan wece tî cetken̂e, Kporin komo yamatan wece. Kporin komo yeken mîn xakn̂e yamata yahruru, kerubin yotawno me tî xakn̂e. Kporin komo yosotî yekatîmtopo me rma mîn xakn̂e Noro yamatan.

7 Ero yinhîrî takî tî Kaan yamatan naar̂atken̂e tarara yaw, yaxan yaw. Abinatabe mîn yai tî naar̂atken̂e. Asakî tî xakn̂e paaka kor̂man̂e, tarara yaan̂e kor̂man̂e. Usa, Aio, ero wa tî xakn̂e paaka kor̂man̂e yosotî.

8 Aar̂ataw tak nahwowatken̂e takî tî Tapi komo, Ixaw Yana komo ahnoro. Kar̂pe xa tî nahwowatken̂e. Waano naar̂atken̂e, raatî marha tî nîyorketken̂e ahpaci mko, mîn hak mak tîyorkaxmu mko. Car̂ar̂a kan̂e marha tî nîyorketken̂e, maraka marha. Cecesom marha tî n̂eceyatken̂e. Ero wa tî nahwowatken̂e Kaan poko.

9 Ero yimaw takî tî Kiton mîn yari cekn̂e tarara. Iito tî xakn̂e noro natîrî yatho yîpîpîtîkacho. Ero pore cetaw paaka tî n̂ehrokekn̂e okwe. Ero ke Kaan yamatan takî tî n̂ecehcekn̂e Usa tamorî ke.

10 Ero wa ahsîrî ke nîrwonakn̂e takî tî Kporin komo Usa poko. Ero ke noro pen tî waihkekn̂e okwe tîyamatan yahsîrî ke. Ero ke waihyakn̂e takî tî Usa pen okwe iito Kaan yamatan panaw rma.

11 Ero ke takî tî Tapi nîrwonakn̂e hara Usa pen waihkarî ke Kporin komo ya. Ero ke iitono takî tî nosohcetken̂e roowo, Usa Pen Waihkachonho, kacho me nosohcekn̂e. Ero wara rma tî n̂etahcatu iitono oroto roowo.

12 Ero ke takî tî n̂eraswakn̂e Tapi Kaan pona ero kaamo po rma. On wara tî kekn̂e, Ahce wa thakwa re Kaan yamatan wekya oyewton pona? kekn̂e takî tî.

13 Ero ke aatîkara rma tî xakn̂e Tapi cewton pona, Tapi pen Yewtontho, kacho pona. Iitono mîn yaka makî tî naar̂akn̂e, Obece-Eton mîn yaka. Kace pononho tî mîk xakn̂e Obece-Eton.

14 Iito rma tî xakn̂e Kaan yamatan 3 nuun̂i Obece-Eton yanan komo yaw, yîmîn komo yaw. Ero yimaw ehn̂an me ro mak takî tî noro n̂iir̂akn̂e Kporin komo. Ero wa xa marha tî noro yawno komo n̂iir̂akn̂e. Kir̂wan̂he marha tî n̂iir̂akn̂e n̂examro yemyawno ahnoro. Ero wa tî Obece-Eton komo nakronomekn̂e Kporin komo iito exitaw tîyamatan.