Taa, anarî komo tak wetahcas hara, Tapi yaka mohxapu komo. Sikrake po tî ka xakn̂e Tapi. Iina n̂emahciyakn̂e anarî komo etwaikapora cehtome Sau ya, Kis mumuru ya. N̂examro meero tî xatken̂e karitî komo yakrono me etar̂metaw so.

2 Krapa ke cemyarke tî mokyatken̂e. Kar̂me krapa yehsin̂e komo tî mîkyam xatken̂e, poowa me yehsîn̂e komo marha tî. Ero wa xa marha tî ececoka toopu yar̂man̂e me xatken̂e. Benxamin yepamtho komo tî mîkyam xatken̂e, Sau yanan komo rma.

3 Aiese tî n̂examro yaan̂e xakn̂e, Xoas tak, Semaa mumuru komo, Xibea pono mumuru kom ha, Xesiew, Perece, Asmapece mumuru komo tî mîkyam xatken̂e, Beraka, Xeu, Anatoce pono,

4 Ismaias, Xibeon pono. 30 komo rma tî mîk xakn̂e, n̂examro yaan̂e rma tî mîk xakn̂e. Xeremias, Xaasiew, Xoanan, Xosabace, Xeterata pono,

5 Erusai, Xer̂moce, Bearias, Semarias, Sepacias, Arupa pono mîk ha,

6 Ewkana, Isias, Asarew, Xoese, Xasobeaw komo. Kora yepamtho komo tî mîkyam xatken̂e.

7 Xoera, Sebacias komo. Xeroaw mumuru komo tî mîkyam xatken̂e, Xeto pono mumuru kom ha. Ero wa tî xatken̂e Benxamin yepamtho komo, Tapi yaka mohxapu komo.

8 Kace yepamtho komo marha tî mokyatken̂e Tapi yaka. Cetkurunpetopo yaw makî tî n̂enmayakn̂e Tapi ero yimaw, pohnîntaw mak ha. Karitî komo xa marha tî mîkyam xatken̂e. Sowtatu me cehtopo komo poko ehcamhokaxapu tî mîkyam xatken̂e, cecen̂an pokono ro komo, raapu pokono ro komo marha. Reaw yewken komo tî mîkyam xatken̂e kopi. Kar̂pe tîtosom komo marha mîkyam xatken̂e, kooso wara ro mak, îh pore tîtosom wara. Ero warai komo tî mîkyam xatken̂e Tapi maywen me mohxapu komo.

9 On wara tî xakn̂e n̂examro yosotî, poturme mokyakn̂e Ese, 2-înhîrî, Obacias, 3-înhîrî, Eriabe,

10 4-nhîrî, Mismana, 5-nhîrî, Xeremias,

11 6-înhîrî, Atai, 7-nhîrî, Eriew,

12 8-nhîrî, Xoanan, 9-nhîrî, Ewsabace,

13 10-înhîrî, Xeremias, 11-nhîrî, Macbanai, ero wara.

14 Kace yepamtho komo tî mîkyam xatken̂e, sowtatu yaan̂e komo. Yîxawyakan me tî xatken̂e anarî komo 100 komo yaan̂e me so mak. Iyopono me so tî xatken̂e anarî kom hara, 1000 komo yaan̂e me so ha.

15 Pahxa tî Xotaw Yepu wacetken̂e n̂examro. Yihcirî nuun̂i po tî wacetken̂e tukmaxi ro mak exitaw eepu, porin me ro mak. Watoche yîwya so woskara pono komo tî n̂en̂epetken̂e kr̂a. Resce n̂ixan komo tî n̂en̂epetken̂e, oesce n̂ixan komo marha. Ero wa tî xatken̂e Kace yepamtho komo.

16 Benxamin yepamtho komo marha tî mokyatken̂e Tapi yaka, Xuta yepamtho komo marha tî. Ero wa tî mokyatken̂e yîhyaka cetkurunpetopo yaw mak enmayataw rma noro.

17 N̂examro mokuche esepotpona tî cekn̂e Tapi n̂examro yakro. On wara tî kekn̂e yîwya so, Ai oyakno komo, Ahce wa na mîmohcow ohyaka? Tawake na mîmohcow omaywen me? Ero wa amokyataw so cewn̂an wara rma tasî etpoko tawake. Anarimaw na ooxatî pîn komo ya oyenpotome mak na mîmohcow? Waapa mera ro makî tko was ow. Ero ke ero wa amokyataw so Kaanî rma awen̂axe so, ponaro kporin pen komo yehtopo. Noro rma men oyepanpe, kekn̂e tî yîwya so.

18 Ero yimaw takî tî Kaan Yekatî mokyakn̂e Amasai ropotaka. Sowtatu yantoman̂e komo yantoman̂e xa takî tî mîk xakn̂e. On wara tî kekn̂e noro Tapi ya, Oyakno Tapi, on wara wîîkes awya, amaywen me tak nas amna. Xese mumuru amoro, awakronoman̂e me nas amna. Esemetanmekîra ro mak awexi xe nas amna. Ero wa xa marha awakronoman̂e komo exi xe so nas amna. Ero wa wîîkes awya Kaan exirî ke awakronoman̂e me, ponaro awehtopo ha, kekn̂e tî. Taa, ero wa kacho yentache tmaywen me takî tî n̂examro nahsîyakn̂e Tapi. Sowtatu yaan̂e me tî n̂iir̂akn̂e. Ero wa tî n̂examro n̂iir̂akn̂e.

19 Manases yepamtho komo marha tî n̂etowyatken̂e Sau yai Tapi maywen me tak cehtome so hara. Ero wa tî n̂etowyatken̂e Piristew komo yakro cetaw Tapi. Sau komo yakro etar̂maxi tî cetken̂e ero yimaw tî n̂etowyatken̂e yîhyaka. Piristew komo yakronomara rma tî xatken̂e Tapi komo. On wara tko tî ketken̂e Piristew kayaritomon komo, Kopi, Tapi na n̂etowya hara men Sau yaka, tîkayaritomonhîrî yaka hara. Ero wa cetowyataw kîpîmkocexe so men okwe, ketken̂e tî. Ero ke tî Tapi n̂en̂epetken̂e hara sowtatu komo yai.

20 Ero ke tî Sikrake pona n̂etîramekn̂e hara Tapi. Ero yimaw tî n̂examro mokyatken̂e Tapi yaka Manases kom ha. On wara tî xakn̂e osotî komo, Acna, Xosabace, Xeciaew, Mikaew, Xosabace, Eriu, Siretai, ero wara. Sowtatu komo yaan̂e tî mîkyam xatken̂e, Manases yepamtho komo yaan̂e, 1.000 so tî naar̂atken̂e.

21 Tapi takî tî nakronometken̂e waapa me mohxapu komo yar̂marî poko. Asakî makî so mokyatken̂e waapa me so, noro yipu komo yar̂marî poko Tapi nakronometken̂e. Erasîn komo tî mîkyam xatken̂e, sowtatu yaan̂e kom ha.

22 Ero yimaw mokyatken̂e roro tî sowtatu komo Tapi yaka noro maywen me cehtome so. Enmar̂atîxera tî mokyatken̂e. Mer̂pora takî tî xatken̂e Tapi sowtatun komo. Kaan sowtatun komo wara rma tî xatken̂e.

23 Taa, wukuknomesî tak sowtatu komo Tapi yaka mohxapu komo. Tukurui so mokyatken̂e sowtatu me cehsom komo. Ebron po exitaw tî Tapi yîhyaka mokyatken̂e. Sau maywenînho komo tî mîkyam n̂etowyatken̂e tak Tapi pona. Ero wa tî xatken̂e Kporin komo mtapotachonho yaw roro rma.

24 Xuta yepamtho komo tî mokyatken̂e 6.800. Tukurui so tî mokyatken̂e, cecen̂an ke cemyarke so, rah ke cemyarke so marha. Ero wa tî mokyatken̂e waapa me tîtosom wara.

25 Simeaw yepamtho komo marha tî mokyatken̂e 7.100. Karitî komo tî mîkyam xatken̂e, sowtatu me cehtopo poko ehcamhokaxapu komo.

26 Repi yepamtho komo marha tî mokyatken̂e 4.600.

27 Xoiata tî xakn̂e Araw yepamtho komo yaan̂e me. Noro yakro tî mokyatken̂e 3.700 kîrkomo.

28 Satoke marha tî mokyakn̂e, kar̂pamxanî n̂he, erasîn ha tko. Sowtatu yaan̂e komo re tî n̂ekyakn̂e noro, 22. Tîîm yanan komo tî mîkyam n̂ekyakn̂e.

29 Benxamin yepamtho komo xa hara tî mokyatken̂e 3.000. Sau yanan komo tî mîkyam xatken̂e. Pahxa n̂he tî ka on wara xatken̂e Benxamin yepamtho komo ahnoro ha re, Sau mumuru ponaro tî xatken̂e tîkayaritomon me. Ero yinhîrî takî tî n̂etowyatken̂e Tapi pona hara.

30 Eprain yepamtho komo marha tî mokyatken̂e 20.800. Erasîn komo marha tî mîkyam xatken̂e. Tîyanan komo n̂ekaiporetho tî mîkyam xatken̂e.

31 Manases yepamtho komo marha tî mokyatken̂e, poyinonhîrî komo mak. Tpoyino komo nmen̂ekatho komo tî mîkyam xatken̂e. Tapi yaka etocoko kayaritomo me noro ciiso, ketken̂e poyino komo yîwya so. 18.000 mîkyam xatken̂e.

32 Isaka yepamtho komo marha tî mokyatken̂e, 200 kayaritomo komo. Tanton komo yakro rma mokyatken̂e. Yuhnari yîhtînon̂e tî mîkyam xatken̂e, On yimaw xa ero wa cexpore nasî, kan̂e komo tî mîkyam xatken̂e Ixaw Yana komo ya.

33 Seburon yepamtho komo marha tî mokyatken̂e yîhyaka 50.000. Sowtatu me cehtopo komo poko ehcamhokaxapu xa tî mîkyam xatken̂e. Waiwî tî nar̂metken̂e pohcira. Cehcamhokaxi marha tî xatken̂e raapu poko, kacipara imo poko marha. Erasîn tî mîkyam xatken̂e. Emahcinî ro makî tî mîkyam xatken̂e cetar̂metaw so.

34 Nahtari yepamtho komo marha tî mokyatken̂e yîhyaka. 1.000 tî mokyatken̂e sowtatu yantoman̂e komo re. Akro so tî mokyatken̂e yînantomarî kom hara, 37.000. Tukurui so tî mokyatken̂e, cecen̂an ke cemyarke so tî mokyatken̂e, rah ke cemyarke so marha tî mokyatken̂e.

35 Taan yepamtho komo marha tî mokyatken̂e yîhyaka, 28.600. Emahcin komo marha tî mîkyam xatken̂e cetar̂metaw so.

36 Ase yepamtho komo marha tî mokyatken̂e yîhyaka, 40.000. Sowtatu me cehtopo komo poko ehcamhokaxapu tî mîkyam xatken̂e. Tukurui so marha mokyatken̂e n̂examro.

37 Xotaw yeco pono komo marha tî mokyatken̂e yîhyaka, Huben yepamtho komo, Kace yepamtho komo, Manases yepamtho poyinonho komo. 120.000 tî mîkyam mokyatken̂e. Tukurui so marha tî mokyatken̂e, tîkaciparai so, tîrahnui so, tuwuhreke so, ero wa so tî mokyatken̂e.

38 Ero wara tî mokyatken̂e Ixaw Yana komo Tapi yaka. Emahcin komo tî mîkyam xatken̂e cetar̂metaw so. Tapi ciiso tî mokyatken̂e, Ixaw Yana komo kayaritomon me ciiso ha. Anarî ponarora ro makî tî xatken̂e, kayaritomo me ciisom ponarora. Ahnoro Ixaw Yana komo tî xatken̂e Tapi ponaro, kayaritomo me ciitopo ponaro. Iito re makî tî noro nîhtînoyatken̂e.

39 Taa, Tapi yaw tî n̂enmayatken̂e n̂examro, 3 ro. N̂eseresmetken̂e tî, wooku marha tî n̂eer̂atken̂e. Tapi maywen komo rma tî ka erewsî n̂iir̂atken̂e tpoyino komo mokuhnaw.

40 N̂examro poyino komo marha tî erewsî n̂ekyatken̂e meyeno komo meero. Isaka yepamtho komo, Seburon yepamtho komo, Nahtari yepamtho komo, ero warai komo tî n̂ekyatken̂e erewsî. Buhu mkaw so tî n̂ekyatken̂e, kameru mkaw so, muura mkaw so, paaka mkaw so, ero wa tî n̂ekyatken̂e. Puruma tî n̂ekyatken̂e akihxapu, piiku yeperîrî amnonoxapu, uupa yukun, aseci, paaka, oper̂a, ero wara tî n̂ekyatken̂e erewsî. Mer̂pora tî n̂ekyatken̂e. Tahwore ro makî tî xatken̂e Ixaw Yana komo ero yimaw. Ero wa tî xatken̂e ha.