Ero yinhîrî takî tî on wara xatken̂e Ixaw Yana komo, Tapi yaka tî cetken̂e ahnoro Ebron pona. On wara tî ketken̂e yîwya, On warai kîwyam, ero re mîn kupun komo, ero re marha mîn kyochîrî komo.

2 Pahxa Sau pen exitaw ha ka kayaritomo me, amoro xa Ixaw Yana komo sowtatun maar̂akn̂e, mekyakn̂e hara. On wara marha tî kekn̂e Kporin komo awya, ponaro awehtopo tî Mîk kekn̂e, Oyanan komo yenîn̂e me tak mas amn̂e, kayaritomon komo me ha, kekn̂e tî awya, ketken̂e tî yîwya.

3 Ero ke ahnoro takî tî mokyatken̂e Ixaw Yana poritomon komo kayaritomo yaka Ebron pona. Ero ke n̂examro kayaritomon me cehtopo poko takî tî nîmtapowakn̂e Tapi n̂examro yakro. Noro yewetîn̂e me cehtopo komo poko marha tî nîmtapowatken̂e n̂examro hara. Kporin komo tî n̂etahcatken̂e yaaro xa tîmtapotachonhîrî komo yentachome. Ero yinhîrî takî tî Ixaw Yana komo kayaritomon me Tapi nîhkapetken̂e. Kporin komo mtapotachonho yaw roro rma tî nîhkapetken̂e, Samuew mtari tî kekn̂e ero wa kachonho yaw roro rma. Ero wa tî Tapi n̂iir̂atken̂e.

4 Ero yinhîrî takî tî Xerusaren pona takî tî cekn̂e Tapi. Ixaw Yana komo marha tî cetken̂e noro yakro ahnoro ha. Xebus kacho rma tî mîn xakn̂e Xerusaren. Xebusew komo yewton tî mîn xakn̂e.

5 On wara tî ketken̂e Xebusew komo Tapi ya, Oona men mokuhra ro mak maxe ewto pona, ketken̂e tî yîwya. Wara rma Siaw takî tî nahsîyatken̂e Tapi komo, ewto tî nahsîyatken̂e. Iitono tî nahsîyatken̂e sowtatu wacan. Tapi pen Yewtontho, kacho me takî tî xakn̂e ewto raconho, Siaw kacho ha.

6 Ero ke on wara tî kekn̂e Tapi tmaywen komo ya, Xebusew komo yar̂maxi tîtopore rma nasî. Onoke xa poturu me nîîce Xebusew komo yar̂maxi? Poturme toxapu tak wiir̂asî sowtatu komo yantoman̂e me, kekn̂e tî. Ero ke takî tî Xoabe cekn̂e poturme, Seruia mrerî. Ero ke noro takî tî n̂iir̂akn̂e Tapi sowtatu yantoman̂e me.

7 Ero yinhîrî takî tî sowtatu wacan yaka n̂esekenmekn̂e Tapi. Ero ke, Tapi pen Yewtontho me takî tî ero nosohcetken̂e.

8 Ero yinhîrî mîîmo mko tî n̂irpekn̂e Tapi sowtatu wacanî mkai, tmamritîkaxi ro tî n̂irpekn̂e. Miiro mîtwono mko ka n̂irpekn̂e miyanî mko rma ha. Mehxanî mko reha tî nakir̂wamekn̂e Xoabe mîîmo mko ha.

9 Ero yinhîrî takî tî cekaiporesom me takî tî n̂ehtîkekn̂e Tapi. Kporin komo tî xakn̂e akronoman̂e me roro, Kantoman̂e kom ha.

10 Taa, Tapi sowtatun yantoman̂e komo tan wetahcasî, karitî komo yantoman̂e kom ha. N̂examro tî xatken̂e tahwore Tapi poko, kayaritomo me exirî poko. Ero wa xa marha tî xatken̂e Ixaw Yana komo ahnoro. Kayaritomo me xa noro ciri xe so xatken̂e. Kporin komo kekn̂e pahxa ero wara rma tak tî ciri xe so xatken̂e.

11 Taa, n̂examro yantoman̂e komo tak wetahcasî, karitî komo xa, Tapi maywen kom ha. Xasobeaw tî xakn̂e, Akmoni pono. Antomano rin̂e komo poturu tî mîk xakn̂e. Waapanhîrî pen komo waihkan̂enho tî mîk xakn̂e. Yaake tî waihkekn̂e, 300. Paraxkekn̂e tîrahnu ke kokmamra ka exitaw.

12 Noro xawyakan takî tî xakn̂e hara Ereasa, Toto mumuru, Aoi pono mumuru ha. 3 komo poyino rma tî mîk xakn̂e karitî komo poyino.

13 Pas-Tamin po tî xakn̂e noro Tapi yakro. Iina tî n̂esenmekyatken̂e Piristew komo Ixaw Yana komo waparî me. Iito tî xakn̂e mararî, sepata yewtî. Ero po tî n̂etar̂metken̂e. N̂emahciyatken̂e tko tî Ixaw yana komo. Piristew komo pona tî n̂eraswatken̂e.

14 3 komo rma tko tî n̂ecececetken̂e mararî rakataw rma. Piristew komo tî nukurunketken̂e, waihketken̂e marha tî. Ero wa tî Ixaw Yana komo nukurunpekn̂e Kporin komo. Twaparî komo yopono me n̂examro n̂iir̂akn̂e. Ero wa tî nukurunpekn̂e.

15 Taa, yaake tî xatken̂e karitî yantoman̂e komo, 30 ha. Noro yipu komo poyino tî cekn̂e Tapi yaka, 3 makî tî. Ewtarî yaw tî xakn̂e Tapi, Aturaw pono yaw. Ero ke tî iina cetken̂e yîhyaka. Mer̂pora tî xatken̂e Piristew sowtatun komo ero yimaw meyehra rma. Hepain woskaran po tî xakn̂e etarî komo.

16 Ero yimaw tî Tapi xakn̂e cetkurunpetopo yaw ewtarî yaw ha. Beren po tî xatken̂e Piristew sowtatun komo yaake.

17 Ero yimaw twokru xe xa tî xakn̂e Tapi tuuna xe. On wara tî kekn̂e, Owokru yekn̂e xe was okre tuuna. Ahtoxapu xe xa was okre, Beren potawno xe ha, kekn̂e tî.

18 Ero ke cetken̂e takî tî n̂examro 3 komo, karitî komo. Beren pona tî cetken̂e Piristew sowtatun yetarî pore rma kopi. Tuuna tî nanîmyatken̂e ahtoxapu yai, Beren potawno yai ha. Anmîche Tapi yaka takî tî naar̂atken̂e. Erîhra rma tko tî xakn̂e Tapi. Nukmamyakn̂e makî tî Kporin komo ya tîmsom me.

19 On wara tî kekn̂e, Kaan ya rma tî kekn̂e, Apa kah yawno, on men erîhra ro mak wa wasî. Moxam kamxukru wara rma nasî kopi. Twaihîrî komo yaro rma tî tocow on yehso kopi. Waihcerî ha re okwe. Kamxukuthîrî komo wara rma nasî kopi, kekn̂e tî. Ero ke tî erîhra xakn̂e. Ero wa tî xatken̂e 3 komo, karitî kom ha.

20 Taa, anarî komo xa hara tî xatken̂e karitî komo rma ha re. N̂examro yaan̂e tî xakn̂e Abisai, Xoabe yakno. Pahxa waapa tî mokyatken̂e mer̂pono pîn, 300 ha tî. N̂examro pen tî waihkekn̂e ahnoro noro tîrahnu ke. Ero wa tî xakn̂e Abisai. Ero ke takrono yopono me takî tî n̂esekaiporekn̂e.

21 Asakî tî xakn̂e Abisai yakrono. N̂examro yopono me tko tî n̂esekaiporekn̂e noro. Ero ke n̂examro yaan̂e me tî xakn̂e. Yihcirî me wetaci osorwawno komo n̂examro yecenarîno mera rma tko tî xakn̂e. Ero wa tî xakn̂e Abisai.

22 Taa, anarî xa hara tî xakn̂e karitî, Benaia tî osotî. Xoiata mumuru tî mîk xakn̂e, Kabseew pono mumuru. Karitî tî mîk xakn̂e Benaia yîîm. On wara xakn̂e Benaia, emapona roro tî tîyopono komo nar̂mekn̂e. Anarimaw Moabita yepamtho tî xakn̂e asakî kîrkomo. Karitî komo tî mîkyam xatken̂e, reaw warai komo rma kopi. N̂examro pen tî waihkekn̂e Benaia. Anarimaw xa hara tî ewtarî yaw tî xakn̂e reaw. N̂eepe tî mokyakn̂e ero kaamo po rma. Wara rma tî ewtarî yaka nîhcekn̂e noro reaw waihkachome.

23 Exipsiu pen marha tî waihkekn̂e porin kopi. Kawno tî mîk xakn̂e, 2,3 metru wicakî tî. Noro yemyaw tî xakn̂e raapu, porinî ro mak. Poono kahtopo wicakno tî mîn xakn̂e kopi. Benaia yemyaw tî xakn̂e watmatho mak. Exipsiu yemyawnonho tko tî nowyakn̂e raapu. Osomunhîrî pen tî waihkekn̂e iike rma.

24 Noro yipu tî mîk xakn̂e Benaia, Xoiata mumuru. Ero ke takrono komo yopono me tî n̂esekaiporekn̂e, osorwawno komo yopono me ha.

25 30 komo yopono me meero tî n̂esekaiporekn̂e. Yihcirî me osorwawno wetaci n̂examro xawyakan me makî tko tî xakn̂e. Noro rma tî Tapi n̂iir̂akn̂e tukurunpen̂e ro komo yantoman̂e me. Ero wa tî xakn̂e Benaia.

26 Anarî komo marha tan wetahcasî sowtatu komo yosotî, karitî komo yosotî. On wara tî xatken̂e noro yipu komo, Asaew, Xoabe yakno mîk ha, Ew-Anan, Toto mumuru mîk, Beren pono mumuru,

27 Samoce, Arorî pono, Eres, Peron pono,

28 Ira, Ikes mumuru, Tekoa pono, Abiese, Anatoce pono,

29 Sibekai, Usace pono, Irai, Ao pono,

30 Maarai, Netopata pono, Erece, Baana mumuru, Netopata pono mumuru xa marha,

31 Itai, Hibai mumuru, Xibea pono, Benxamin yepamtho ha, Benaia, Piraton pono,

32 Urai, aporî kwawno, Kaas pono kwawno, Abiew, Ahbace pono,

33 Asmapece, Baaruma pono, Eriaba, Saawbona pono,

34 Asem mumuru komo, Xison pono kom ha, Xonatas, Sake mumuru, Ararî pono mumuru,

35 Aiaw, Sakarî mumuru, Ararî pono mumuru, Eripaw, Uru mumuru,

36 Epe, Mekera pono, Aias, Peron pono,

37 Esîro, Kahmeru pono, Naarai, Esbai mumuru,

38 Xoew, Natan yakno, Miba, Akri mumuru,

39 Sereke, Amonita, Naarai, Beeroce pono. Xoabe kurun yaan̂e ro tî mîk xakn̂e Naarai, Seruia mrerî kurun yaan̂e ro ha.

40 Ira, Itîri pono, Karebe, Itîri pono marha,

41 Urias, Etew yana, Sabace, Arai mumuru,

42 Acina, Sisa mumuru, Huben̂ yepamtho. Huben yepamtho komo yantoman̂e tî mîk xakn̂e Sisa. 30 tî xatken̂e noro yakrono komo, sowtatu komo.

43 Anan, Maaka mumuru, Xosapa, Micna pononho.

44 Usias, Asterace pono, Sama, Xeiew komo, Otaw mumuru komo tî mîkyam xatken̂e, Aroerî pono mumuru kom ha.

45 Xeciaew, Sinhi mumuru, Xoa, Xeciaew yakno, Tesbe pono komo tî mîkyam xatken̂e.

46 Eriew, Maapa pono, Xeribai, Xosapias komo, Ewnaaw mumuru tî mîkyam xatken̂e, Icma, Moabita.

47 Eriew, Obece komo, Xaasiew komo, Mesoba pono komo tî mîkyam xatken̂e. Ero wa tî xatken̂e Tapi sowtatun komo, karitî komo xa.