Taa, on wara tî xatken̂e Piristew komo, Ixaw Yana komo yakro tî n̂etar̂metken̂e. N̂emahciyatken̂e tko tî Ixaw Yana komo okwe. Waihyatken̂e rma mer̂pono pîn okwe Ixaw Yana pen komo Xiwboa Yîpîn po.

2 Sau poko ro marha tî mokyatken̂e Piristew komo, yumumuru komo poko ro marha. Yumumuru pen komo tî waihketken̂e okwe. Xonatas, Abinatabe, Mawkisua, ero wa tî xakn̂e yumumuthîrî pen komo yosotî.

3 Ero yinhîrî takî tî Sau yakro takî tî n̂etar̂metîketken̂e. Sau penî rma tî wetken̂e waiwî ke. Cerewre ro makî tî wetken̂e okwe.

4 Ero ke on wara tî kekn̂e Sau tukurun yaan̂e ya, Akaciparan ke ow paraxkakî owaikachome. Waipîra ka oyexitaw n̂examro men mokyatu anpikan komo ahce wa na oriso okwe, kekn̂e tî. Paraxkara rma tko tî xakn̂e yukurun yaan̂e cerahtîmrî ke. Ero ke kacipara takî tî nahsîyakn̂e Sau. Ero poturu po rma takî tî n̂epîrkekn̂e cetwaikachome tanmero rma okwe. Ero wa tî xakn̂e Sau pen okwe.

5 Ero yinhîrî on wara tî kekn̂e yukurunthîrî yaan̂e, Twaihso tak nas apapa pen okwe, Sau pen, kekn̂e tî. Ero ke noro pen meero tî n̂epîrkekn̂e tîkaciparan poturu pona cetwaikachome noro rma hara.

6 Ero wa tî waihyatken̂e Sau pen, yumumuthîrî pen komo, ahnoro yîhyawno pen komo okwe. Iito re rma tî waihyatken̂e okwe.

7 Ero yinhîrî takî tî anarî komo takî tî n̂encetken̂e sowtatu komo yemahcitoponho. Capahno pono komo tî mîkyam n̂encetken̂e, Ixaw Yana kom ha. Sau pen tak nasî twaihso okwe, yumumuthîrî pen komo meero okwe, kacho marha tî n̂encetken̂e. Ero wa kacho yentache cewtonthîrî komo poi takî tî n̂emahciyatken̂e. Ero yinhîrî takî tî ewtonthîrî komo pona mokyatken̂e Piristew komo esekenmaxi.

8 Enmapuche takî tî îh pona tî cetken̂e Piristew komo waihkaxapu pen komo yemyawnonho yaaso. Ero wa aar̂ataw Sau pen yokoputho tî n̂een̂atken̂e, yumumuthîrî komo yokoputho marha tî. Xiwboa Yîpîn po rma tî xakn̂e.

9 Ero ke noro pen yemyawnonho marha tî naar̂atken̂e, yukurunthîrî marha tî, yîhtîpîthîrî marha tî. Ahwotacoko, waihye Ixaw Yana komo kayaritomon pen, kacho yekaiporen̂e komo tî n̂en̂epetken̂e tpoyino komo chere ekatîmtome. Ponaro cehtopo komo mîn yaw so marha tî n̂ekatîmyatken̂e.

10 Ponaro cehtopo komo mîn yaka marha tî nakriyatken̂e Sau pen kuruntho, ececen̂anthîrî marha. Takon mîn yaka tî namhosocetken̂e yîhtîpîthîrî.

11 Ero yinhîrî takî tî Sau pen yokoputho ciitoponho tî n̂encetken̂e Xabes Xireace pono komo.

12 Ero ke iitono komo takî tî cetken̂e kîrkomo ahnoro, karitî komo. Sau pen yokoputho tî nahsîyatken̂e, yumumuthîrî pen komo yokoputho marha. Xabes pona tî naar̂atken̂e. Iyochîrî komo tî nahruyatken̂e weewe yapomyaka, Xabes pono yapomyaka. Ero yinhîrî takî tî eseresmara xatken̂e 7 kaamo. Ero wa tî xatken̂e Xabes pono komo.

13 Ero wa tî Sau pen waihyakn̂e okwe. Kporin komo yewetîra cexirî ke tî waihyakn̂e. Kporin komo mtapotachonho tî ewetîra xakn̂e, yaskomo mtapotarî marha tî n̂encekn̂e, Ahce wara wai amn̂e? kekn̂e tî yîwya.

14 Kporin komo mtapotarî yentaxi tohra tî xakn̂e. Ero ke wa noro pen waihkekn̂e Kporin komo rma. Noro pen maywenînho komo takî tî n̂iir̂akn̂e Tapi maywen me hara, Xese mumuru maywen me ha. Ero wa tî n̂examro n̂iir̂akn̂e Kporin komo.