On wara tî xatken̂e Ixaw Yana komo, ahnoro tî osotî komo xakn̂e tmewreso karita yaw, Ixaw Yana Kayaritomon Komo Yehtopo, kacho yaw ha. Iina re so tî mewretken̂e noro re komo yosotî. Taa, on wara tî xatken̂e Xuta yepamtho komo, n̂examro pen tî naar̂atken̂e waapa komo Babiron̂a pona. Kporin komo yewetîra exirî ke so ero wa naar̂atken̂e.

2 Ero yinhîrî takî tî n̂etîrametken̂e hara aaxapunhîrî komo. On warai komo tî ka mokyatken̂e yihcirî me Ixaw Yana komo, tîmsom pokono komo, Repita komo, n̂examro yanton komo, ero wara komo tî ka n̂etîrametken̂e. Cekenhîrî komo pona so tî n̂esekenmetken̂e hara.

3 On warai komo tî n̂esekenmetken̂e Xerusaren pona, Xuta yepamtho komo, Benxamîn yepamtho komo, Eprain yepamtho komo, Manase yepamtho komo, ero wara.

4 On wara tî xakn̂e n̂examro yosotî, Utai, Amiuce mumuru ha. Onhi xakn̂e noro mumuru hara, In̂hi xakn̂e noro mumuru hara, Bani tî xakn̂e noro mumuru hara. Peres pen yepamtho tî mîk xakn̂e Bani, Xuta pen mumutho yepamtho ha.

5 Siro pononho mumuru komo marha tî xatken̂e iito. Asaias tî xakn̂e n̂examro potutho. Noro mumuru komo marha tî xatken̂e iito.

6 Sera mumuru komo marha tî xakn̂e iito, Xeuew tî xakn̂e enîn̂e komo yosotî. 690 tî mîkyam xatken̂e Xuta yepamtho komo, Xerusaren pona esekenmaxapu komo.

7 Benxamin yepamtho komo marha tî xatken̂e iito. Saru, Mesuraw mumuru, noro mumuru tî xakn̂e hara Otapias, noro mumuru tî xakn̂e hara Asenua.

8 Iito marha tî xakn̂e Ibneias, Xeroaw mumuru. Era marha tî xakn̂e iito, Usi mumuru ha, Mikri parî ha. Mesuraw marha tî xakn̂e iito, Sepacias mumuru, Heuew parî, Ibnixas parî mumuru ha.

9 Ero wa tî xatken̂e Benxamin yepamtho komo Xerusaren pona esekenmaxapu komo. Karita yaw tmewreso nasî osotî komo. N̂examro tî xatken̂e tîyanan komo yaw so. N̂examro yantoman̂e me tî xatken̂e. 956 tî mîkyam xatken̂e ahnorono yukuknomacho. Ero wa tî xatken̂e.

10 On wara tî xatken̂e tîmsom pokono komo yosotî, Xetaias, Xeoiaribe, Xakin, ero wara.

11 Asarias, Iwkias mumuru ha. Noro tî xakn̂e Mesuraw mumuru, noro tî xakn̂e Satoke mumuru, noro tî xakn̂e Meraioce mumuru, noro tî xakn̂e Aitube mumuru. Ero wa tî xakn̂e Asarias porin pen komo yosotî. Tîmsom pokono komo yantoman̂e tî mîk xakn̂e Asarias.

12-13 Ataias marha tî xakn̂e iito. Noro tî xakn̂e Xeroaw mumuru, noro tî xakn̂e Pasuru mumuru, noro tî xakn̂e Mawkias muru. Ero wara tî xakn̂e Ataias porin pen komo yosotî. Masai marha tî xakn̂e iito. Noro tî xakn̂e Aciew mumuru, noro tî xakn̂e Xasera mumuru, noro tî xakn̂e Mesuraw mumuru, noro tî xakn̂e Mesiremici mumuru, noro tî xakn̂e Ime mumuru. Ero wara tî xakn̂e Masai porin pen komo yosotî. Tîyanan komo yantoman̂e me re tî xatken̂e n̂examro. 1.760 tî mîkyam xatken̂e iyanan komo re. Takîhsom tî mîkyam xatken̂e Kaan mîn yenîrî poko. Ero wa tî xatken̂e.

14 On wara marha tî xatken̂e Repita komo yosotî, Xerusaren pono komo yosotî, Semaias, noro tî xakn̂e Asube mumuru, noro tî xakn̂e Asîrikaw mumuru, noro tî xakn̂e Asabias mumuru. Merari pen yepamtho tî mîk xakn̂e Asabias.

15 Bakebaka marha xakn̂e iito, Eres, Karaw kom ha. Matan̂ias marha tî xakn̂e iito, n̂oro tî xakn̂e Mika mumuru, noro tî xakn̂e Matanias mumuru, noro tî xakn̂e Sikri mumuru, noro tî xakn̂e Asape mumuru.

16 Obacias marha tî xakn̂e iito. Noro tî xakn̂e Semaias mumuru, noro tî xakn̂e Karaw mumuru, noro tî xakn̂e Xetutun mumuru. Berekias marha xakn̂e iito. Noro tî xakn̂e Asa mumuru, noro tî xakn̂e Ewkana mumuru. Netopacita komo yewton po tî xatken̂e n̂examro. Ero wa tî xatken̂e Repita komo, Xerusaren pona esekenmaxapu komo.

17 Kaan mîn metatan yenîn̂e komo marha tî xatken̂e iito. N̂examro yosotî tan wetahcasî, Sarun, Akube, Tawmon, Aiman, ero wara. N̂examro yakno komo marha tî xatken̂e akro so. Sarun tî xakn̂e n̂examro yantoman̂e me.

18 Pahxa n̂he tî n̂examro xatken̂e Repita komo yetarî metatan yenîn̂e me. Kayaritomo yewomtopo yenîn̂e me takî tî xatken̂e hara, resce n̂ixan yenîn̂e me ha.

19 Sarun tî xakn̂e metatan yenîn̂e komo yenîn̂e me. Kore mumuru tî mîk xakn̂e Sarun, noro tî xakn̂e Ebiasape mumuru, noro tî xakn̂e Kora mumuru. Noro yanan komo tî xatken̂e Kaan mîn metatan yenîn̂e me. Koraita komo tî mîkyam xatken̂e. Kaan mîn metatan yenîn̂e me tî xatken̂e. Pahxa rma n̂examro porin pen komo tî xatken̂e Kaan mîn metatan yenîn̂e me hara.

20 Pahxa tî Pineias pen xakn̂e Kaan mîn metatan yenîn̂e komo yantoman̂e me. Ereasa mumuru tî mîk xakn̂e Pineias. Kporin komo rma tî xakn̂e Pin̂eias yakronoman̂e me.

21 Sakarias tî xakn̂e Kaan yakro Kesentacho komo metatan yenîn̂e me. Meseremias mumuru tî mîk xakn̂e Sakarias.

22 Yaake tî xatken̂e Kaan mîn metatan yenîn̂e komo, 212 ha. Karita yaw so tî osotî komo xakn̂e tmewreso ewton komo pono yaw so. Tapi penî mtapotachonho yanme tî mîkyam xatken̂e ero pokono komo me, Samuew penî mtapotachonho yanme marha, Kaan n̂enporî yenîn̂e ro mîk xakn̂e Samuew.

23 Ero ke Kaan mîn metatan yenîn̂e ro me ciixapu ro tî mîkyam xatken̂e n̂examro. Rona warai makî tî xakn̂e Kaan mîn.

24 On wara marha tî xatken̂e Kaan mîn metatan yenîn̂e komo, anarî komo tî xatken̂e resce n̂ixan yenîn̂e me, anarî komo tî xatken̂e oesce n̂ixan yenîn̂e me, anarî komo tî xatken̂e nohce n̂ixan yenîn̂e me, anarî komo tî xatken̂e suu n̂ixan yenîn̂e me. Ero wa tî xatken̂e.

25 Amn̂e xa so tî mokyatken̂e n̂examro yakno komo, enmayipu komo rma. Takno komo yakronomaxi tî mokyatken̂e. 7 kaamo tî xatken̂e akronomarî komo poko tîtotome so hara.

26 4 tî xatken̂e Kaan mîn metatan yenîn̂e yantoman̂e komo. Repita tî mîkyam xatken̂e. Kaan mîn yamtakpon yenîn̂e me marha tî xatken̂e n̂examro, Kaan purantan yenîn̂e me marha tî.

27 Kaan mîn mîtkoso rma tî tîmîn komo n̂iir̂atken̂e ero yenîn̂e me cehtome so. Ero metatan yahrunkan̂e me marha tî xatken̂e enmar̂atîxera.

28 Anarî komo tî xatken̂e paayu yenîn̂e me, tutum komo, weer̂a komo, ero yipu komo yenîn̂e me. Ekenî ro yai tî naar̂atken̂e, iina xa marha tî n̂ekyatken̂e hara. Nukuknometken̂e tî aar̂ataw ehcamnopîra ehtome.

29 Anarî komo tî xatken̂e aapo yenîn̂e me hara, weeyu, puruma akihxapu, wooku, katî, kotoporem, yînahrî komo poxuretopo, ero yipu yenîn̂e me tî xatken̂e n̂examro reha.

30 On pokono me tî xatken̂e anarî komo, tîmsom pokono mumuru komo, kotoporem yesman̂e me tî xatken̂e, katî yesman̂e me marha, tpoxwem ha.

31 On pokono me tî xakn̂e Sarun mumuru hara, potuthîrî, Macicias tî osotî. Repita tî mîk xakn̂e, Koraita ha. Puruma yaitopo yenîn̂e tî mîk xakn̂e, er̂poci po taisom yenîn̂e ha.

32 Anarî komo reha tî xatken̂e puruma yain̂e me Kaan mîn yaw cenposom yain̂e me. Sabatu po roro tî yaxan n̂iir̂atken̂e Kaan mîn yaka. Koace yepamtho tî mîkyam xatken̂e, Repita komo rma.

33 Anarî komo reha tî xatken̂e Kaan wanorî yaan̂e me hara. Repita komo marha tî mîkyam xatken̂e, tîyanan komo yantoman̂e me ha. Kaan mîn yamtakpon yaw tî n̂enmayatken̂e n̂examro. Ahce na pokono me exihra tî xatken̂e n̂examro waano poko roro cehtome so katpanaw, kosope marha.

34 Ero wa tî xatken̂e Repita komo, tîyanan komo yantoman̂e me tî xatken̂e. Ero pokono me marha tî xatken̂e n̂examro yepamtho kom hara miya rorono komo. Xerusaren pono tî mîkyam xatken̂e. Ero wa tî xatken̂e.

35 Taa, Sau yanan komo tan wekatîmyas hara, pahxa tî xakn̂e Xeiew, Xibeon pono tî mîk xakn̂e. Xibeon marha tî xakn̂e Xeiew mumuru yosot hara. Maaka tî xakn̂e Xeiew pici yosotî.

36-37 Abiton tî xakn̂e Xibeon mumuru yosotî, potuthîrî yosotî. Noro yakno komo tî xatken̂e hara, Suu, Kiis, Baaw, Nee, Natabe, Xeto, Aio, Sakarias, Mikroce, ero wara tî xatken̂e Xibeon mumuru komo.

38 Mikroce mumuru tî xakn̂e hara Simeaw tî osotî. Xerusaren pono komo marha tî mîkyam xatken̂e tîyanan komo mîtwo rma.

39 Kis tî xakn̂e Nee mumuru, Sau tî xakn̂e Kis mumuru hara. On wara tî xatken̂e Sau mumuru komo, Xonatas, Mawkisua, Abinatabe, Esbaaw, ero wara.

40 Meri-Baaw tî xakn̂e Xonatas mumuru. Mika tî xakn̂e Meri-Baaw mumuru hara.

41 On wara tî xatken̂e Mika mumuru komo, Piton, Mereke, Tareia, ero wara.

42-43 Akas mumuru tî xakn̂e Xaera. Xaera mumuru komo tî xatken̂e hara, Aremece, Asmapece, Sinhi, ero wara. Sinhi mumuru tî xakn̂e hara, Mosa tî osotî. Mosa mumuru tî xakn̂e hara, Bineia tî osotî, Hepaias tî xakn̂e noro mumuru hara. Ereasa tî xakn̂e noro mumuru hara, Asew tî xakn̂e noro mumuru hara.

44 Taa, 6 tî xatken̂e Asew mumuru komo. On wara tî xakn̂e n̂examro yosotî, Asîrikaw, Bokru, Ismaew, Seraias, Obacias, Anan, ero wara. Ero wara tî xatken̂e Asew mumuru komo.