Ero yinhîrî on wara kacho tî n̂encekn̂e Xoabe, Nîwracesî ro mak kayaritomo Absaraw pînîn yaw, kacho.

2 On wara tî xatken̂e sowtatu komo Tapi maywen komo ahnoro. Tahwore ehxapunhîrî komo takî tî nîwracetken̂e hara. Kayaritomo tî nîwrace tumumuthîrî pen pînîn yaw, kacho tî n̂encetken̂e. Ero ke tî nîwracetken̂e n̂examro hara.

3 Ero ke marha tî cerahso mak mokyatken̂e ewto pona. Waapa yai emahcixapu komo nîhyapamyatu ero wa makî tî nîhyapamyatken̂e Tapi maywen komo Tapi pona.

4 N̂esewoponcekn̂e tî kayaritomo. Kar̂pe tî nîwracekn̂e. Okwe, omumuru ciki Absaraw okwe, Absaraw omumuru ciki okwe, omumuru cik okwe, kekn̂e tî tîwratarî me.

5 Ero yinhîrî kayaritomo yaka takî tî cekn̂e Xoabe. On wara tî kekn̂e yîwya, Apa, amaywen komo mîhyapamnoyasî ro mak kica. Akurunpecow cma re oroto, amumuru komo, awemsîrî komo, apici komo, apici warai komo, ero warai komo akurunpecow oroto. Akurunpen̂enhîrî komo mîkyam, noro yipu komo rma tko mîhyapamnoyasî amoro kica.

6 Aaxatî pîn komo xe rma kyam mai ham kopi, aaxatî komo xera reha mai ham okwe. On wara kan̂e wara masî kopi sowtatu yantoman̂e komo ya, yînantomarî komo ya marha, Noro pîntho me mak keen̂axe so, kan̂e wara masî kopi. Waipîra exitaw ketaw ha re Absaraw, amna ahnoro waihyataw, tawake re mai ham kopi.

7 Ero ke etoko tak ha men amaywen komo yahworeso. Ero wa kaxi tohra awexitaw amaywen komo exihra ro makî tak men nat okwe oroto kosope. Yaaro men tan wîîkesî, Kporin komo n̂entarî me men tan wîîkes awya. Ahworeno riso tohra awexitaw mesemetanmekyasî xa tak okwe. Mesemetanmekyakn̂e ha re emapona amrenai ro. Oroto tak mesemetanmekyasî xa tak okwe ahworeno riso tohra awexitaw, kekn̂e tî. Ero wa tî kekn̂e Xoabe kayaritomo ya.

8 Ero ke nawomyakn̂e takî tî kayaritomo. Ewto potaka takî tî n̂eremekn̂e. Ero yinhîrî sowtatu komo takî tî n̂encetken̂e. Kayaritomo tak nasî ceremaxi metataw, kacho tî n̂encetken̂e. Ero ke enso takî tî mokyatken̂e Ixaw Yana kom ahnoro. Cetarî komo yaka so emahcixapunhîrî mîkyam xatken̂e, Ixaw yana komo. Ero ke en̂exa tî mokyatken̂e hara kayaritomo yenso.

9 Taa, On wara takî tî xatken̂e Ixaw Yana komo ahnoro, tribu komo ahnoro, n̂eseseyukyatken̂e tî kayaritomo poko. On wara tî ketken̂e, Kîîxatî pîn komo yai kown̂enhîrî komo mîk kayaritomo. Piristew komo mamaw ehxapunhîrî meero kowyatken̂e so. Noro rma tak n̂emahciy hara Absaraw yai.

10 Absaraw cma re ka tîhkapetken̂e kîkayaritomon komo me. Noro penî tko waihye ketar̂machonhîrî komo to. Ero ke ahce kacho esentara matu kîkayaritomonhîrî komo ciitopo poko hara? ketken̂e tî. Ero wa tî ketken̂e Ixaw Yana komo.

11 Ero yinhîrî tîkaritan takî tî narpekn̂e Tapi Satoke yaka, Abiata komo yaka. Kporin komo yaka cewomsom komo tî mîkyam n̂examro yaka tî narpekn̂e. On wara kacho narpekn̂e, Oyakno komo, on wara cma re mîîkexe Xuta komo ya poritomo komo ya, On warai poko tî n̂esencetu Ixaw Yana komo reha, kîkayaritomonhîrî komo nasî tan̂ikpore hara kayaritomo mîn yaka xa hara, kacho poko. Ero wa yîmtapotarî komo wentai tan omîn yaw. Ahce kacho amyamro reha mecmamyatu oyan̂itopo poko hara?

12 Oyakno komo xa amyamro, opuntho rma, okamxukutho rma. Ero ke ahce kacho anarî komo mapitawno me mak mat hara ke oyan̂ihtopo poko hara? kacoko yîwya so kekn̂e.

13 Amasa ya marha tak omtapotarî ekatîmcoko on wara kacho ha, Opuntho rma amoro, okamxukutho ha. Ero ke sowtatu yantoman̂e me tak kiirasî Xoabe yekenho na. Yaaro tan wîîkesî. Owaika xe wasî Kaan ya yaaro kahra oyexitaw ero poko, kacoko men yîwya, kacho tî n̂ekatîmyakn̂e Satoke komo ya, Abiata yakro.

14 Ero wa kacho yekatîmrî ke takî tî Xuta komo naknamekn̂e tîîxatî me hara. Etîme re takî tî yiixe xatken̂e ahnoro. Ero ke on wara kacho takî tî n̂ekatîmyatken̂e yîwya hara, Amok hara apa amaywen komo yakro rma, kacho ha.

15 Ero ke cekn̂e hara tî kayaritomo esama yaw. Xotaw Yepu kwaka makî tî ka cekn̂e. Xuta komo tî mokyatken̂e Xiwkaw pona. En̂exa tî cetken̂e esepotpona kayaritomo yakro. Ero wa xatken̂e Noro yakro Xotaw Yepu watotome.

16 Simei marha tî mokyakn̂e, Xera mumuru, Bawrin pono ha. Benxamin yepamtho mîk xakn̂e. Cerekan̂e ro makî tî mokyakn̂e Simei Xuta komo yakro kayaritomo yenso.

17 Simei yakro tî mokyatken̂e mer̂pono pîn komo Benxamin komo, 1.000 tî. Siba marha tî mokyakn̂e akro so, Sau pen yawnonho komo yanton ha. Noro mumuru komo marha tî mokyatken̂e, 15, noro yanton komo marha tî mokyatken̂e, 20 hara. N̂examro marha tî mokyatken̂e kayaritomo yenso.

18 Ero yimaw takî tî Xotaw Yepu tî wacetken̂e kanawa yaw kayaritomo yawno komo watonmetome xehxan pona hara. Kayaritomo yakronomachome marha tî cetken̂e. Taa, kayaritomo mokuche xehxan po, on wara tî xakn̂e Simei, Xera pen mumutho, kayaritomo yamrinaka takî tî n̂esewnapekn̂e.

19 On wara tî kekn̂e yîwya, Apa, opona cma re cirihra masî kicicme oyehtoponho. Kokon̂oro Xerusaren poi mîîcekn̂e ero yimaw kicicme wîxakn̂e kica apoko. Wara rma ero wara oyehtoponho cma re mîhcamnoyasî.

20 Kicicme wîxakn̂e kica, wîîkesî tan ha yaaro. Oroto tko kmoko awenso apa. Anarî komo poturme kmoko, Xose komo poturme, kekn̂e tî.

21 On wara tko tî kekn̂e Abisai, Seruia mrerî, Twaihkapore rma tko na nai moso Simei. Kporin komo nîwîrîmarî me awexi xe kr̂a wasî, kan̂enho moso okwe, kekn̂e tî.

22 On wara tko tî Tapi n̂eyukyakn̂e, Anarme ro mak maxe amyamro Seruia mrerî komo owarara. Ooxatî pîn wara mak maxe kica. Oroto ma re Ixaw Yana komo tîtwaiketu awya so? Ixaw Yana komo kayaritomon pîn me na wai okwe, wîîke katî awya so? Pîra ro mak, kayaritomon komo me xa matko was hara oroto, kekn̂e tî yîwya.

23 Ero yinhîrî on wara takî tî kekn̂e kayaritomo Simei ya hara, Waipîra rma masî, kekn̂e tî. Yaaro xa wa wîîkesî cemaro pîn me ro mak ha, kekn̂e tî.

24 Mepibosece marha tî cekn̂e kayaritomo yenso. Sau pen parînho tî mik xakn̂e. Tîhtarî korokara ro makî tî xakn̂e, tponon marha tî korokara xakn̂e. Cetpoci tî akir̂wamara marha xakn̂e. Ero wa roro tî xakn̂e Xerusaren poi kayaritomo totoponho n̂ixa ro. Ero wara rma xakn̂e kir̂wan̂he noro mohtopo pona roro hara.

25 Xerusaren poi takî tî mokyakn̂e Mepibosece kayaritomo yenso. Noro yenîche on wara tî kekn̂e kayaritomo yîwya, Ai, Mepibosece, ahce kacho oyakro mokuhra mîxakn̂e? kekn̂e tî.

26 On wara tî kekn̂e Mepibosece, Apa, on wara thakwa was okwe yîhrepîra. Ero ke on wara wîîkekn̂e, Nai rma oyoku buhu. Noro wîmkayamuhcesî yîmkaw owtotome kayaritomo yakro, wîîkekn̂e cma re. Oyemîknoyakn̂e tko okwe oyanton.

27 Tohnaw ro mak oyehtopo n̂ekatîmyakn̂e awya apa. Kaan yancun wara ro mak keen̂asî. Ero ke amna tak cirko awanme ro mak.

28 Ahnoro pooco yepamtho xakn̂e cma re twaihkaxmu me. Ahnoro amna mîwaikarî ha re. Awakro ceseresmaxmu me xa matko ow miitîkekn̂e okre. Ero ke ahce kacho ma re, Ero xe wasî, ero xe wasî, wîîke awya, kayaritomo ya ha? kekn̂e tî.

29 On wara takî tî kekn̂e kayaritomo yîwya, N̂ex ha na. Ahce kacho miya rma mesekatîmtîke owya? On wara wîîkes awya so, Siba komo ya, Ececenarî re tak amararîn komo yîraconkacoko. Yîraconhîrî ahsîko amoro, yîraconhîrî nahsîpe noro hara, kekn̂e tî.

30 On wara tî kekn̂e Mepibosece, Ahnoro rma tko nahsîpe noro ha. Tawake rma wasî kir̂wan̂he amokrî ke hara kayaritomo me, kekn̂e tî. Ero wa tî kekn̂e Mepibosece kayaritomo ya.

31 Ero yimaw marha tî Bahsirai mokyakn̂e Hoxerin poi. Xireace pono mîk xakn̂e Bahsirai. Xotaw Yepu tî wacekn̂e kayaritomo yakro, takronoi ehtome n̂he wacetaw.

32 Poritomotho xa tî mîk xakn̂e Bahsirai. 80 cimn̂ipu tî xakn̂e ewrutoponhîrî. Kayaritomo yerewusman̂enho tî mîk xakn̂e Maanain po exitaw. Cemyawnoyem xa tî mîk xakn̂e.

33 On wara tî kekn̂e kayaritomo yîwya, Ai, apa, oyakro cma re mîmokyasî Xerusaren pona iitono ro me. Ow tak kerewusmes hara iito, kekn̂e tî yîwya.

34 On wara tko tî kekn̂e Bahsirai, Atararo cimn̂ipu ka na nai waipîra oyehtopo? Tohnaw mak na kîwce iina Xerusaren pona awakro.

35 80 cimn̂ipu tak nasî oyewrutoponho. Kicicitho mîn ha, kir̂wan mîn hara, wîîke ma re ahce na poko? Tpoxwem tan okre wîîke ma re onahrî poko, owokru komo poko ha? Cewanomaxmu komo ma re wence kîrkomo, wooxam komo? Pîra tak was okwe. Iito oyexitaw awewrucpen̂e me mak wasî kica.

36 Tuuna mak wacesî awakro Xotaw Yepu. Eeco poi tak kîwcesî moro na kyam mak. Xerusaren pona xa tohra rma wasî. Ahce kacho ero yipu ke ow mepeme?

37 Ow mak en̂epeko oyewton pona hara. Iito tak owaipu xe wasî Apapa pen yahrutoponho mîtwo rma, yememe pen yahrutoponho mîtwo marha. Moso tko Kiman amaywen ha. Noro na maar̂a yiixe awexitaw. Noro xa watope awakro apa. Noro na mîwakre awanme ro mak, kekn̂e tî.

38 Taa, kekn̂e tî kayaritomo, Kiman xa wacesî oyakro. Noro tak wakresî awanme rma. Yiixe awehtopo rma tko wîmyas awya, kasko mak owya, kekn̂e tî. Ero wa tî kekn̂e Tapi Bahsirai ya.

39 Ero yinhîrî kayaritomo maywen komo takî tî wacetken̂e Xotaw Yepu. Mapitaw so takî tî kayaritomo wacekn̂e. Watoche Bahsirai tî n̂ewcokekn̂e. On wara tî kekn̂e yîwya, awakronomape xa Kporin komo, kekn̂e tî. Ero yinhîrî tîmîn yaka takî tî cekn̂e hara. Ero wa tî Bahsirai cekn̂e.

40 Ero yinhîrî takî tî kayaritomo cekn̂e Xiwkaw pona. Kiman tî cekn̂e noro yakro. Kayaritomo yakro marha tî cetken̂e Xuta sowtatun komo ahnoro. Noro yakro marha tî cetken̂e Ixaw Yana sowtatun metaci wicakî mak.

41 Ero yinhîrî on wara takî tî ketken̂e Ixaw Yana komo kayaritomo ya, On wara amna kesî amna yakno poko Xuta komo poko, ahce kacho en̂epa me mak awehcow so kica, kayaritomo amoro? Ahyawno komo marha n̂ehcow, Tapi sowtatun komo marha. Awakro rma Xotaw watocow kica, kayaritomo yakro ha, ketken̂e tî.

42 On wara tko tî Xuta komo n̂eyukyatken̂e, Amna rma wa n̂eekî kayaritomo amna yananî ro me exirî ke. Ahce kacho mîrwonatu amna poko? Noro ma re amna n̂erewusmai awya so? Cemyawnonho ke ma re amna wakrei hara? Pîra ro mak, ketken̂e tî Xuta komo.

43 On wara tko tî Ixaw Yana komo n̂eyukyatken̂e hara, 10 tribu komo xa amna. Ero ke noro xe amna yehtopo nasî yiixe awehtopo komo yopo. Ero ke amna n̂ekrî me xa nasî noro, an̂ekrî komo mera n̂he nasî. Ahce kacho amna mîwîrîyaketu? Amna xa matko n̂ihciy, Kayaritomo cehcerî hara, kacho ha, ketken̂e tî. Ero wa tî n̂eseseyukyatken̂e Ixaw Yana komo Xuta komo yakro. Cerewre xa tko tî nîmtapowatken̂e Xuta komo Ixaw Yana komo yopono me. Ero wa tî n̂eseseyukyatken̂e.