Ero yinhîrî tmaywen komo takî tî nukuknomekn̂e Tapi, sowtatu komo. Antoman̂e komo marha tî n̂iir̂akn̂e, 1.000 komo yantoman̂e komo, 100 komo yantoman̂e komo marha tî.

2 Yukuknomache takî tî sowtatu komo tî nîraconkekn̂e. Tehsa wicakî tî n̂iir̂akn̂e Xoabe nantomarî me, anarî komo tî n̂iir̂akn̂e Abisai nantomarî me tehsa wicakî xa marha. Xoabe yakno tî mîk xakn̂e Abisai, Seruia mrerî ha. Anarî komo xa hara tî n̂iir̂akn̂e Itai nantomarî me tehsa wicakî xa marha. Kace pononho mîk xakn̂e Itai. Ero wa tî sowtatu komo nîraconkekn̂e. Ero yinhîrî on wara tî kekn̂e kayaritomo sowtatu komo ya, Awakro so rma kmokyasî, kekn̂e tî.

3 On wara tko tî ketken̂e sowtatu komo, Pîra, mokuhra men esko amoro. Anarimaw na amna n̂emahciya. Ero wa amna yemahciyataw amna ponarora mak natu. Anarimaw amna waihya mer̂pono pînî ro mak, metace wicakî na okwe. Ero wa amna waihyataw eserepokara rma nat okwe. Apoko xa n̂eserepoketu. 10.000 exitaw amna, amna poko meero eserepokara natu, amoro mak masî eserepokacho komo me xa. Ero ke tan ewto imo po mak esko amoro. Xehxa mak amna mahworesî, ketken̂e tî yîwya.

4 Taa, kekn̂e tî Tapi, amyamro ha tko. Awanme so mak tan wai ham. Ero ke ewto potaw tî n̂ecececekn̂e Tapi sowtatu me cehsom komo cetaw. 100 me so tî cetken̂e, 1.000 me so marha tî cetken̂e. Ero wa tî cetken̂e etar̂maxi.

5 On wara tî Xoabe komo ya kekn̂e kayaritomo, Abisai ya, Itai ya, Kar̂pamxan pînîn yaw cma re maxe, Absaraw pînîn yaw ha. Waihkara cma re maxe yiixe oyexirî ke, kekn̂e tî. Ahnoro sowtatu komo tî n̂encetken̂e ero wa ketaw Tapi antomano rin̂e komo ya.

6 Ero ke cetken̂e takî tî Tapi maywen komo Ixaw Yana komo yakro etar̂maxi. Comota po tî n̂etar̂metken̂e Eprain yepamtho komo rowon pono po.

7 Ixaw Yana sowtatun pen komo tî narmetken̂e Tapi maywen komo. Iyopo so tî xatken̂e. Mer̂pono pîn tî waihyatken̂e ero kaamo po, 20.000 yakenon tî okwe.

8 Miya so tî n̂etakpayatken̂e sowtatu komo cetar̂metaw so. Comota chere ro tî cetken̂e. Mer̂pora tî waihyatken̂e comota yanme kacipara imo ke waihkaxapu komo yopo.

9 Ero yimaw etar̂metaw so Absaraw tî cekn̂e muuru mkaw. Tapi maywen yakro tî n̂esepor̂atken̂e mer̂pono pîn komo yakro. Iito tî xakn̂e kahpar̂u yepu porin, ceknakem. Cixke tî xakn̂e peremru. Ero yapomyari tî cekn̂e muuru, Absaraw yaan̂e. Absaraw tîpîrî tî n̂etakîknoyakn̂e eknataka oko. Iito rma tî n̂etînomyakn̂e thakwa noro pen tamhosokye mak okwe. Cekn̂e rma tî muuru, aan̂enhîrî.

10 Ero yimaw iito xa takî tî cekn̂e anarî sowtatu Tapi maywen. Absaraw pen takî tî n̂een̂akn̂e etamhosotoxapu. Ero ke Xoabe ya tî n̂ekatîmyakn̂e. Absaraw wenwo mînto. Tamhosokye nasî kahpar̂u yepu poko, kekn̂e tî yîwya.

11 On wara tko tî kekn̂e Xoabe ekatîmn̂enhîrî ya, Okyo, menwo makî? Ahce kacho iito rma paraxkara mîxakn̂e roowo pona cepîrkaxi ro. Noro pen waihketaw awya ow wîmrî awya 10 sikru prata ciixapu, awan̂apotun marha, kekn̂e tî.

12 Yîmtaka tko tî n̂eyukyakn̂e ekatîmn̂enhîrî, 1.000 sikru yahsîyataw meero owya kayaritomo mumuru waihkara ro mak wasî. Amna n̂entarî me rma kekn̂e kayaritomo awya, Abisai ya marha, Itai komo ya, Kar̂pamxan men waihkara ro mak ehcoko, kekn̂e awya so.

13 Owya waihketaw cetwaikaxmu me rma wasî ow hara kopi. Ahce wa na kehtopo yeyamra ro mak wa tasî kayaritomo ya esehtînopîn me. Amoro rma ow mîponanîmcesî waihketaw owya, kekn̂e tî.

14 On wara tko tî kekn̂e Xoabe, Tan mak awakro exihra ro mak wasî kica, kekn̂e tî. Ero ke raapu tî nahsîyakn̂e osorwaw, kawno pîn cecehkem. Ero ke takî tî Absaraw pen paraxkekn̂e ewantaw kahpar̂u yepu poko cetahsîso exitaw rma, karpe rma ka exitaw.

15 Iito marha tî xakn̂e Xoabe kurun yaan̂e komo, 10 ha. N̂examro takî tî Absaraw wamcetken̂e. Emapona tî paraxketken̂e. Ero wa tî Absaraw pen tî waihketken̂e.

16 Ero yinhîrî tuu kekn̂e takî tî Xoabe. Ero ke Ixaw Yana komo weken̂emekîra takî tî xatken̂e Tapi maywen komo. Ero wa tî yîtîtmamnono n̂iir̂akn̂e Xoabe.

17 Absaraw pen yokoputho tî nar̂metken̂e ewtarî yaka comota pono yaka. Toopu tî n̂enmekyatken̂e ahrutopo me tak. Ero yinhîrî takî tî Ixaw Yana komo n̂emahciyatken̂e tîmîn komo yaka hara.

18 On wara tî ka xakn̂e Absaraw waipîra ka cexitaw, toopu tî nanîmyakn̂e piiri, kawno ha. Kayaritomo woskaran po tî nanîmyakn̂e. Tponaro ehtome so poyino komo tî nanîmyakn̂e. On wara tî kekn̂e, Omumuru exihra nas okwe oyosotî ponaro ehtome so opoyino komo amn̂e, kekn̂e tî. Ero ke toopu nanîmyakn̂e. Ero takî tî nosohcekn̂e tosotî me rma. Ero ke Absaraw Topun, kacho me rma nasî oroto. Ero wa nasî.

19 Taa, ero yinhîrî on wara tî kekn̂e Aimasî, Satoke mumuru, Owto xe cma re wasî kayaritomo yaka ketar̂matoponhîrî komo yekatîmso yîwya. Aaxatî pînînhîrî pen komo tak waihka Kporin komo okre, ka xe wasî yîwya, kekn̂e tî.

20 Pîra, kekn̂e tî Xoabe, amoro pîn mîîcesî oroto. Anarimaw na ahce na yekatîmso mîîce. Kehtoponhîrî komo yekatîmso tohra masî oroto kayaritomo mumutho pen waihîrî ke, kekn̂e tî yîwya.

21 Ero yinhîrî takî tî Kusita nan̂ikyakn̂e Xoabe. On wara tî kekn̂e yîwya, Kayaritomo yaka etoko amoro. An̂enthîrî ekatîmko yîwya, kekn̂e tî. Ero yentache nutupenwakn̂e noro Xoabe yamrinaka. Ero yinhîrî tî cekn̂e kar̂pe kayaritomo ya ekatîmso.

22 Ero yinhîrî kekn̂e xa hara tî Aimasî Xoabe ya, Ahce wa kyam na tatu amn̂e. Wara rma owto xe cma re wasî Kusi yepamtho wenari, kekn̂e tî. Ahce kacho awto xe mai okopuci? kekn̂e tî Xoabe. An̂ekatîmrî yîhtînopîra masî, kekn̂e tî.

23 Wara rma owto xe xa wasî, kekn̂e tî Aimasî. Taa, etok ha, kekn̂e takî tî Xoabe. Ero ke Aimasî takî tî cekn̂e woskara pore. Kusita tî n̂îyoponkekn̂e.

24 Ero yimaw rma tî ceremaxi xakn̂e Tapi iito. Asakî tî xakn̂e metata. Ero yotaw tî xakn̂e Tapi. Ero yimaw tmohsom yekahton̂e tî kainakn̂e metata yahruru pona. Ewto wacan potarî yepoi tî n̂ecececekn̂e. Cesewyar̂ataw rma takî tî kar̂pe tmohsom n̂een̂akn̂e. Cewn̂e makî tî n̂een̂akn̂e.

25 Ero ke tî tmohsom n̂ekatîmyakn̂e kayaritomo ya. Ai ha, kekn̂e tî kayaritomo. Cewn̂e cexirî ke kahworetopo yekatîmso na mokya, kekn̂e tî. Kar̂pe xa tî mokyakn̂e meyehra cehso ro.

26 Ero yinhîrî anarî takî tî n̂een̂akn̂e hara tmohsom, kar̂pe tmohsom xa hara. Ero ke tî n̂ekatîmyakn̂e metata yenîn̂e ya. On wara tî kekn̂e, Anarî xa hara mokyasî cewn̂e xa marha. Ai ha, kekn̂e tî kayaritomo, noro marha na mokya kahworetopo yekatîmso, kekn̂e tî.

27 On wara tî kekn̂e tmohsom yekahton̂e, Yihcirî me tmohsom ween̂asî Aimasî wara, Satoke mumuru wara, kekn̂e tî. Kir̂wan mîkro Aimasî. Kahworetopo yekatîmso wa mokya ham, kekn̂e tî kayaritomo.

28 Ero yinhîrî mokyakn̂e takî tî Aimasî. On wara tî kekn̂e kayaritomo ya, Apa, kakronomacow so ham Kaan, kekn̂e tî yîwya. Nutupenwakn̂e takî tî cesewnaposo ro. On wara marha tî kekn̂e, Kir̂wan̂he nai ham Kporin komo ponaro awehtopo ha. Awaika xatînhîrî pen komo tak waihkapo amaywen komo ya apa, kekn̂e tî.

29 On wara tî kekn̂e kayaritomo yîwya, Kar̂pe rma nai kar̂pamxan Absaraw ha? kekn̂e tî. Apohana, kekn̂e makî tî Aimasî. Xoabe oyen̂epew, Kusita marha n̂en̂epew. Ero yimaw wara hakî kano wenwo. Camkî mak wenwo. Ahce wa na n̂ehcow, kekn̂e tî.

30 Taa, tan makî ka esko opanaw, kekn̂e tî kayaritomo yîwya. Ero ke kayaritomo panaw takî tî n̂ecececekn̂e Aimasî.

31 Ero yinhîrî tak tî Kusita mokyakn̂e hara. On wara tî kekn̂e, apa, okayaritomon amoro, awahworetopo tan wekatîmyas awya. Awepanpo tak Kporin komo okre. Awar̂ma xatînhîrî pen komo tak waihkapo ha, kekn̂e tî.

32 On wara tko tî kekn̂e kayaritomo yîwya, Waipîra rma na nai kar̂pamxan Absaraw ha? kekn̂e xa hara tî. On wara tî n̂eyukyakn̂e Kusita Noro pen wara exi xe so wasî aaxatî pîn komo, awaika xatî komo ahnoro, kekn̂e. Ero wa tî kekn̂e Kusita kayaritomo ya.

33 Ero wa kacho yentache tak n̂eserepokekn̂e xa takî tî kayaritomo. Mîîmoci yaka takî tî kainakn̂e metata yepoyino yaka. Tîcetaw rma nîwracekn̂e. On wara tî kekn̂e tîwratarî me, Okwe, okwe, okwe, omumutho ciki Absaraw okwe. Omumutho okwe, omumutho okwe, Absaraw okwe. Owî xa matko re kwaihîrî awemtaka hara. Okwe omumutho ciki Absaraw okwe, kekn̂e tî. Ero wa tî kekn̂e Tapi tîwratarî me.