Ero yinhîrî tî nîmtapowakn̂e xa hara Aitopew. On wara tî kekn̂e Absaraw ya, On wara oyexi xe wasî, sowtatu komo men̂eka xe wasî 12.000. Oroto rma men men̂eka xe wasî. Oroto kosope kîwcesî Tapi waparî me.

2 Noro wece yuu yuu wîîkesî cekar̂kaxi exitaw rma ka. Wekatkesî ro mak. Ero ke maywenînhîrî komo tak n̂emahciyaxe. Ero ke noro mak waihkesî kayaritomo pen mak.

3 Ero yinhîrî tak maywenînhîrî komo wekyasî xiya hara amaywen me so hara. Kayaritomonhîrî pen mak waihkesî waihka xe awehtopo mak. Noro waipuche maywenînhîrî komo ahnoro mokyaxe hara waipîra rma, kekn̂e. Ero wa tî kekn̂e Aitopew Absaraw ya.

4 Kir̂wan̂he tî Absaraw n̂encekn̂e Aitopew mtapotarî. Ahnoro Ixaw Yana poritomon komo tî kir̂wan̂he n̂encetken̂e.

5 On wara tko tî kekn̂e Absaraw, Usai tko an̂ihcoko, Ahkita. Yîmtapotarî marha centapore nasî, kekn̂e tî.

6 Usai mokuche tak Aitopew mtapotarî takî tî n̂ekatîmyakn̂e Absaraw yîwya. On wara tî kekn̂e yîwya, Ero wa noro nîîka amna yakîhrecho. Ero wa xa marha na mîîke amoro hara? Ero warahra yîhtînoyataw awya ekatîmko ka, kekn̂e tî yîwya.

7 On wara takî tî kekn̂e Usai Absaraw ya, Oroto tak takîhso yîmtapotara n̂eexi Aitopew.

8 Aamo rma wa meen̂asî, maywen komo marha. Karitî komo xa mîkyam kopi. Mayanaxe xa uhsu yîmxîkaxapu wara kopi. Enpamxapu mîk aamo waapa me cehtopo poko. Sowtatu komo yaw kokmamra nasî oroto.

9 On wara men nasî oroto, ceseyamso wa nasî ewtarî yaw, îîpî yexenanawno yaw, ahto ha na. Anarimaw noro xa na n̂ihciya amaywen komo yar̂marî poko. Ero wa ehtopo tak n̂encetu amaywen komo, Absaraw maywen pen komo waihkacow okwe, kacho tak n̂encetu.

10 Ero wa kacho yentarî ke n̂erahtîmtîkexe xa tak amaywen komo. Ero wa n̂eraswaxe erasînînhîrî komo rma, reaw warai kom ha. Waapa me xa aamo n̂een̂axe Ixaw Yana komo ahnoro. Erasîn me marha n̂een̂axe akrono kom hara.

11 Ero ke on wara xa wîîkes awya so, Ixaw Yana komo an̂ihcoko kîrkomo ahnoro. Mer̂pora naxe yukuknomarî yopo axawa wa tuuna imo yecihtawno wa. Ahnoro rma an̂ihcoko. N̂examro yakro rma etoko amoro rma aan̂e me.

12 Ero yimaw tak yuu yuu tîtkexe noro wece ahto so na exitaw. Noro pen yahsîso tîhcexe kar̂pe ro mak. Cicakî n̂etakîcesî roowo poko hakî ero wa taxe noro poko. Noro pen tak waihyasî, maywenînhîrî pen komo marha. Cewn̂e mak etîmtora ro mak tak nasî.

13 Ewto imo pona ewomche ruupu takî n̂ekyaxe Ixaw Yana komo mer̂pono pîn. Ewto pen tak cihxikyaxe eepu kwaka. Mîîmo penî mko cihxitîkexe exihra ro mak tak cehsoro. Toopu meero exihra ro mak tak nasî iito etîmkaw cehsom, kekn̂e tî. Ero wa tî kekn̂e Usai Absaraw ya.

14 Yîmtapotarî yentache on wara takî tî ketken̂e Absaraw komo, Ixaw Yana komo ahnoro, Usai mtapotarî xa nasî kakîhrecho me xa. Pîra n̂he nasî Aitopew mtapotarî, kakîhretopo mera n̂he nai, ketken̂e tî. Kporin komo yanme rma tî ero wa ketken̂e. Yaaro rma re kekn̂e Aitopew Absaraw yakîhrecho. Ewetîn̂e pîn me tko tî Absaraw n̂iir̂akn̂e Kporin komo noro pen waihkachome.

15 Ero yinhîrî takî tî on wara kekn̂e Usai Satoke ya, Abiata komo ya, On wara cexpore nasî, kekn̂e Aitopew Absaraw ya, Ixaw Yana komo poritomon komo ya marha. Ero wahra reha wîîka ow hara. On wara xa wîîka owî, kekn̂e tî. N̂ekatîmtîkekn̂e takî tî tîmtapotachonhîrî, Absaraw ya kekn̂e ero wa kacho.

16 Ero ke on wara kan̂e men en̂epeko Tapi yaka yohno, Tuuna watotopo to enmapîra men tî ehcoko, axawa imo pono yehtopo to. Watocoko men tî. Tohra awexitaw so tî ayopono komo tak men mokyaxe sowtatu komo mer̂pono pînî ro mak. Awermomn̂e wara ro mak naxe kopi, kan̂e en̂epeko, kekn̂e tî. Ero wa tî kekn̂e Usai Satoke ya.

17 Taa, Xerusaren po exihra xatken̂e Xonatas, Aimas komo. En Hoxew po makî tî xatken̂e. On wara tî ketken̂e, Ewto pona kîwtoche so keen̂atu so men okwe Absaraw maywen komo, kwaihketu so okwe. Iitono yanton mak en̂epecoko wooxam amna yaka Usai mtapotachonho yekatîmn̂e. Ero yinhîrî tak amna cesî ekatîmso kayaritomo ya, Tapi ya, ketken̂e tî. Ero ke ero wara rma tî cekn̂e iitono yanton ekatîmso yîwya so.

18 Yîwya so ekatîmyataw tko tî wooxam n̂een̂akn̂e kar̂pamxan. Ero ke Absaraw ya tî n̂ekatîmyakn̂e. Yohno tko tî cetken̂e Xonatas komo Bawrin pono yaka. Noro roron po tî xakn̂e ahtoxapu tuuna. Ero yaka takî tî n̂esenkayatken̂e ceseyamtome so mak.

19 Ero yinhîrî takî tî ewtarî nahruyakn̂e osom pici poono ke. Ahruru pona tî merurkekn̂e puruma yeperîrî. Ero ke, Iito natu eseyamxapu komo, kahra ro makî tî xatken̂e iitono komo.

20 Ero yinhîrî mokyatken̂e takî tî Absaraw maywen komo. Ahto natu Xonatas, Aimasa komo? ketken̂e tî eyamn̂e ya wooxam ya. On wara tî n̂eyukyakn̂e wooxam, Tuuna yaporî watocow, kekn̂e tî. Ero ke eposo cetken̂e Absaraw maywen komo. Enîhra rma tî xatken̂e. Ero ke Xerusaren pona tî n̂etîrametken̂e hara.

21 Absaraw maywen komo yetîramache tak ahtoxapu yai takî tî n̂epataketken̂e Xonatas komo. Tapi yaka tî cetken̂e Usai mtapotachonho yekatîmso. On wara tî ketken̂e yîwya, Oroto men tî etocoko. Tuuna tî watocoko. On wara tî Aitopew kekn̂e awar̂macho komo poko, ketken̂e tî. Aitopew mtapotachonho tî n̂ekatîmyakn̂e yîwya.

22 Ero ke Tapi takî tî cekn̂e tmaywen komo yakro mer̂pono pîn yakro. Xotaw Yepu tî wacetken̂e. Enmayataw tak xehxan po exihra ro mak tak tî xatken̂e Tapi maywen komo. Eeco po mak takî tî xatken̂e ahnoro. Ero wa tî xatken̂e.

23 Taa, on wara tî xakn̂e Aitopew, Omtapotarî ewetîra nat okwe, kekn̂e tî. Ero ke tooku mkahsî takî tî nakriyakn̂e ceremacho. Tîmîn yaka takî tî cekn̂e cewton pono yaka. Tumumuru komo takî tî nantomekn̂e tîmîn yenîrî poko. Ero wa antomache n̂exexewnukyakn̂e tak tî okwe. Ero wa tî waihyakn̂e Aitopew pen. Okoputhîrî tî nahruyatken̂e yîîmînhîrî pen yawxaka rma. Ero wa tî xakn̂e Aitopew pen.

24 Ero yinhîrî Maanain pona takî tî cekn̂e Tapi. Ero yimaw marha tî Xotaw Yepu wacekn̂e Absaraw kom hara. Ixaw Yana komo tî naar̂akn̂e ahnoro.

25 Ero yimaw on wara takî tî xakn̂e Absaraw, Amasa takî tî n̂iir̂akn̂e sowtatu yantoman̂e me Xoabe yekenho na. Itîra mumuru tî mîk xakn̂e Amasa. Ixaw Yana tî mîk xakn̂e yîîm ha. Abikaw tî xakn̂e noro pici Naas yemsîrî ha. Seruia yakno tî mîk xakn̂e Naas, Xoabe yon yakno.

26 On wara marha xatken̂e Absaraw komo, Ixaw Yana komo, Xireace pona takî tî cetarî komo n̂iir̂atken̂e.

27 Taa, Maanain pona Tapi toche mehxan komo takî tî cetken̂e yîhyaka. On warai komo tî mîkyam mokyatken̂e, Sobi, Naas mrerî. Haba pono tî mîk xakn̂e yîîm, Amonita komo yewton pono ha. Maki marha tî mokyakn̂e Abiew mumuru ha. Ro-Teba pono tî mîk xakn̂e Maaki. Bahsirai marha tî mokyakn̂e Xireace pono, Hoxerin pono xa ewto pono. Ero warai komo tî cetken̂e Tapi yaka.

28-29 Yîwîntopo komo tî n̂ekyatken̂e, etîrapotopo kom ha. Tutum marha tî n̂ekyatken̂e. Puruma yeperîrî marha tî n̂ekyatken̂e, sepata yeperîrî, puruma yeperîrî marha aposokaxapu, kumasa, weenu, paaka mownu yîkîtîtîrexapu, oper̂a, ceipamxapu marha paaka mownu. Ero warai tî n̂ekyatken̂e yînahrî komo, yîwîntopo komo marha. On wara tî ketken̂e, Nîromanatu men okwe Tapi maywen komo mînto axawa imo po, n̂ekar̂kexe marha, twokru xe marha natu, ketken̂e tî. Ero ke ero yipu tî n̂ekyatken̂e yîhyaka so. Ero wa tî n̂ekyatken̂e.