Taa, ero yinhîrî îîpî meretîn̂i tak cekn̂e Tapi morona mak. Iito exitaw Siba takî tî mokyakn̂e yîhyaka, Mepibosece yanton. Buhu tî n̂ekyakn̂e yîhyaka asakî, keremacho ke tîmkawnoyem ha. Yîmkaw so tî xakn̂e puruma aixapu 200, uupa yeperîrî yuturpamnoxapu, 100 amnonoxapu, piiku yeperîrî yuturpamnoxapu, 100 marha amnonoxapu, uupa yukun 1 een, ero wa tî n̂ekyakn̂e buhu mkaw.

2 Siba yenîche on wara tî kekn̂e Tapi yîwya, Ai, mîmoko ha? Ahce kacho onî yipu mek ha? kekn̂e tî. On wara tî kekn̂e Siba, Buhu weekî yiipo awtotopo, awakrono komo totopo marha. Puruma weekî kar̂pamxan komo yuru, naatî yeperîrî marha yînahrî komo me. Uupa yukun weekî ekar̂kaxapu komo wokru. Axawa imo pore awetar̂ataw so n̂ekar̂ket ha na anarî komo, kekn̂e tî.

3 Taa, ahto nai awantoman̂enhîrî parî? kekn̂e takî tî Tapi. Xerusaren po rma nai, kekn̂e tî Siba. On wara nîîka noro, Oroto tak tkayaritomon me oriyatu Ixaw Yana komo. Pooco pen retawno me tak oriyatu kayaritomo me, nîîka, kekn̂e tî.

4 Ero ke on wara takî tî kekn̂e kayaritomo Siba ya, On wara wîîkes awya Siba, Mepibosece rowontho tak nas arowon me. Noro yemyawnonho marha tak nas awemyawno me, kekn̂e tî. Taa, kutupenwasî amamakan me xa apa, kekn̂e tî Siba yîwya. Okayaritomon amoro. Tawake awexi xe wasî opoko, kekn̂e tî. Ero wa tî kekn̂e Siba kayaritomo ya.

5 Taa, ero yinhîrî takî tî Bawrin pahnoke cekn̂e Tapi, kayaritomo ha. Iito exitaw Sau pen yananînho takî tî mokyakn̂e ewto poi. Simei tî xakn̂e noro yosotî. Xera mumuru tî mîk xakn̂e. On wara tî kekn̂e Tapi ya tmokyataw, Kaan nîwîrîmarî me xa tak awexi xe kr̂a wasî, kekn̂e tî. Emapona roro tî ero wa kekn̂e kica.

6 Tohkara marha tî nar̂mekn̂e Tapi wece oko, noro maywen komo wece marha oko. Iito rma tî re xatken̂e sowtatu komo, kayaritomo kurunpen̂e komo marha. Tapi panaw tî xatken̂e xehxa mehxa wara. Wara rma tî tohkarara nar̂mekn̂e.

7 Kicicme ro makî tî nîmtapowakn̂e Tapi poko. On wara tî kekn̂e, Miya kr̂a etok ha, miya kr̂a etok ha. Waapa mak amoro kica. Noro pîntho ro mak amoro kica.

8 Sau pen yananînho wapatho amoro yakeno wapatho okwe. Noro pen yekenho na tak mîxakn̂e kayaritomo me hara kica. Oroto tak anwaikathîrî komo n̂epanîyasî Kporin komo. Amumuru tak n̂iir̂asî kayaritomo me awekenhîrî na, Absaraw ha. Ero wa tak metwîrîmesî kicicme awehtopo yanme rma kica, kekn̂e tî. Ero wa tî kekn̂e Simei Tapi ya okwe.

9 Ero wa kacho yentache on wara takî tî kekn̂e Abisai, Seruia mrerî, kayaritomo ya tî kekn̂e, Ahce kacho noro nîmtapowa awîrîmacho poko? Kayaritomo xa amoro kopi. Xaparitho mak noro kica waixaputho mak ha. Owto xe cma re wasî yîpîmkotoso kr̂a, kekn̂e tî.

10 Pîra ro mak, kekn̂e tî Tapi yîwya. Owarahra ro mak maxe amyamro Seruia mrerî komo. Owîrîmacho poko nîmtapotape rma. Tapi yîwîrîmacho poko amtapotakî, kekn̂e na Kporin komo rma yîwya. Ero ke, Ahce kacho ero wa mîmtapowa kica, kahra ro mak taxe yîwya, kekn̂e tî.

11 On wara marha tî kekn̂e Tapi Abisai ya, tmaywen komo ya ahnoro, Omumuru mîk Absaraw opunu rma. Noro yipu rma owaika xe nasî. Soroso owaika xe nasî moso, Benxamin yepamtho. Ero ke n̂expe, owîrîmacho poko rma nîmtapotape. Kporin komo rma kekn̂e yîwya, Noro yîwîrîmacho poko amtapotakî, kekn̂e ham yîwya. Ero ke ero wa nîmtapowasî.

12 Nîmtapotape rma noro oyesemetanmetopo poko. Yîmtapotarî tko na n̂ence Kporin komo. Ero ke oyakronome xa matko na oroto, esemetanmekîra rma oyehtome, kekn̂e tî.

13 Ero ke cetken̂e rma tî Tapi komo, tmaywen komo yakro. Esama yaw tî cetken̂e. Ecento roro rma tî cekn̂e Simei îîpî katîhwo roro. Kicicme rma tî nîmtapowakn̂e roro tîcetaw, tohkarara marha tî nar̂mekn̂e roro Tapi wece, roowo pupuntho marha tî.

14 Ecihtaka takî tî cetken̂e kayaritomo, wenari tîtosom komo yakro. N̂ekar̂ketken̂e tî, ero ke tî iito n̂epokaretken̂e. Ero wa tî xatken̂e Tapi komo.

15 Taa, ero yimaw takî tî Absaraw n̂epatakekn̂e Xerusaren pona. Ahnoro Ixaw Yana komo tî mokyatken̂e noro yakro kîrkomo. Aitopew marha tî mokyakn̂e noro yakro.

16 Ero yimaw takî tî Usai cekn̂e Absaraw yaka, Ahkita mîk noro. Tapi yakrono tî mîk xakn̂e. On wara tî kekn̂e Absaraw ya, Ai, pahkî awexi xe wasî kayaritomo me waipîra. Pahkî awexi xe wasî kayaritomo me waipîra, kekn̂e tî asakî ro.

17 Ai ha, kekn̂e takî tî Absaraw yîwya. Ero wa ma mai ke, yiixe awehtoponhîrî yai metowya ha? Ahce kacho tohra mîxakn̂e yiixe awehtoponhîrî yakro? kekn̂e tî yîwya.

18 On wara tî n̂eyukyakn̂e Usai, Pîra, kayaritomo me awir̂a ham Kporin komo. Ixaw Yana komo ahnoro ero warai me awir̂a ham. Ero ke yin̂irithîrî komo maywen me xa wasî amaywen me ha. Miya roro wasî amaywen me.

19 On wara marha wîîkesî, aamo maywen me ka wîxakn̂e. Ero ke yumumuru maywen me tak was hara, amaywen me ha, kekn̂e tî. Ero wa tî kekn̂e Usai Absaraw ya.

20 Ero yinhîrî takî tî Aitopew mtapotarî n̂encekn̂e Absaraw. Ai apa, amna tak akîhreko ha. Ahce wa tak amna nai? kekn̂e tî yîwya.

21 On wara tî Aitopew n̂eyukyakn̂e, On wara wîîkes awya, wooxam komo yenaka etakriko ha ke, aamo pici warai komo yenaka. Tanî rma nînomyakn̂e tîmîn yenîn̂e me n̂examro yenaka etakriko ha. Ero wa awetakritoponhîrî tak n̂encetu amn̂e Ixaw Yana komo ahnoro. Nîrwonasî xa tak yîîm tumumuru poko, ketu tak. Ero yinhîrî kar̂pe n̂he tak n̂ehtîketu amaywen komo, kekn̂e tî.

22 Ero ke mîîmo me takî tî roona n̂iir̂atken̂e kayaritomo mîn meretîrî pona. Ero yaka takî tî n̂etakriyakn̂e Absaraw tîîm pici wara cehsom komo yenaka kica. Ixaw Yana komo wero ro rma tî n̂etakriyakn̂e kica.

23 On wara tî xatken̂e Ixaw Yana komo Aitopew poko, kakîhren̂e ro me xa tî noro nîhtînoyatken̂e. Kaanî mtapotarî wara rma tî n̂encetken̂e yîmtapotarî. Ero wa tî n̂encekn̂e Tapi, ero wa xa marha tî n̂encekn̂e Absaraw hara. Ero wa tî n̂encetken̂e.