Ero yinhîrî on wara takî tî xakn̂e Absaraw, tarara takî tî nahsîyakn̂e kawaru narîrî. Kawaru marha nahsîyakn̂e yihxikn̂e. Kîrkomo marha tî nantomekn̂e 50, tpoturme tîtosom kom ha.

2 Pahxaxaro so tpakaxmu me tî xakn̂e Absaraw. Xerusaren yesamarî yakumyaw tî n̂ecececekn̂e roro metata pahnoke. Iina tî mokyatken̂e kayaritomo ya en̂ekapono rîn̂e komo, Oyemetanmekn̂e komo cma re men̂ekesî, kan̂e kom ha. Iito exitaw so noro yipu komo yakro tî nîmtapowakn̂e Absaraw. On wara tî kekn̂e yîwya so, Ai oyakno, ahtono amoro? kekn̂e roro yîwya so. Ero wa kacho tî n̂eyukyatken̂e, tîtribun tî n̂etahcakn̂e. Noro yipu ow ha, ketken̂e tî yîwya.

3 On wara takî tî kekn̂e roro Absaraw yîwya so emetanmetopo yentache, Ai ha okwe. Yaaro rma re mîîkesî, awemetanmekyat ham okwe. Kayaritomo maywen tko exihra nas awemetanmekn̂e yen̂ekan̂e.

4 Cesen̂ekaxmu komo yentan̂e me oriche awya so ahnoro rma wencesî emetanmexapu komo yehtopo, cesen̂ekaxmu mtapotarî ha. Yaaro xa tak awemetanmekn̂e komo panaresî owî reha, kekn̂e roro tî noro yipu komo ya.

5 Anarimaw so anarî komo tî mokyatken̂e Absaraw yaka ahce wa na kaxi yîwya. Amrinaka tî n̂esewnapetken̂e mamakan wara. Ero wa esewnapetaw amorî komo takî tî nahsîyakn̂e Absaraw, n̂ewcokekn̂e marha takî tî.

6 Ero wa tî xakn̂e roro Absaraw Ixaw Yana komo poko kayaritomo ya cesen̂ekaposom komo poko. Ero wa tî n̂iir̂akn̂e tpoko rma enpamnotome Ixaw Yana komo, kayaritomo xera n̂he marha ehtome so okwe.

7-8 Taa, 4 cimn̂ipu tî ero wa xakn̂e okwe. Ero wicakî pahkî exiche on wara takî tî kekn̂e Absaraw kayaritomo ya, Apa, owto xe tak wasî Ebron pona. Kaan yakro omtapotachonho yaw roro rma tak tîmsom tîmî xe wasî iito. Pahxa kîmtapowakn̂e Kporin komo yakro, awanton me mak was amn̂e apa, wîîkekn̂e. Xesu po oyexitaw rma ero wa wîîkekn̂e, Siria po oyexitaw ha. Apa kah yawno, owî cma re maar̂as hara Xerusaren pona. Iina oyarîche awya awanton me mak tak was amn̂e, wîîkekn̂e. Ero ke iina tak owto xe wasî Ebron pona, kekn̂e tî.

9 Taa, kir̂wan̂he wencesî awtotopo, mîîce ham, kekn̂e tî yîwya kayaritomo. Ero ke Ebron pona takî tî cekn̂e Absaraw.

10 Ero yinhîrî tîmtapotarî yekatîmn̂e komo takî tî n̂en̂epekn̂e Absaraw miya so rma, Ixaw Yana komo chere ro ahnoro tribu komo chere ro. On wara kacoko Ixaw yana komo ya, kekn̂e tî yîwya so, Amn̂e tuu kacho takî tî mencexe. Ero yentache tak awya so on wara tî kacoko, Absaraw tak nai kayaritomo me ham Ebron po, kacoko. Ero wa kacho yekatîmn̂e komo tî n̂en̂epekn̂e.

11 Ebron pona tîcetaw Absaraw kîrkomo tî naar̂akn̂e 200. On wara makî tî kekn̂e yîwya so, Kporin komo ya tîmsom wakn̂iyasî mînto Ebron po. Ero ke iina cma re mîmokyaxe, kekn̂e makî tî yîwya so. Ahce kacho na kaar̂atu so iina, ketken̂e makî tî n̂examro.

12 Ero yinhîrî takî tî Aitopew tî nan̂ikpekn̂e Absaraw, Xiro pono ha. Cewton po rma tî xakn̂e. Tapi yakîhren̂enho tî mîk xakn̂e. Ero ke noro takî tî cekn̂e Absaraw yaka. Ero wa tî n̂epamyatken̂e Absaraw maywen komo. Tapi yai cetowsom komo tî n̂epamyatken̂e yîhyaka okwe.

13 Ero yimaw ekatîmn̂e takî tî mokyakn̂e Tapi yaka. On wara tî kekn̂e yîwya, Absaraw ponaro xa tak n̂ehtîkexe okwe Ixaw Yana komo kîrkomo, kekn̂e tî.

14 Ero yipu yentache tmaywen komo takî tî nan̂ikyakn̂e Tapi. Akro xatken̂e Xerusaren po n̂examro nan̂ikyatken̂e. On wara tî kekn̂e yîwya so. Kaikatko. Cemahcipore men nasî. Tanî rma kexitaw so kwaihketu so men okwe Absaraw. Cewn̂e n̂hema kîmtora so men wa nai ha. Oroto rma kaikatko. Yohno men mokyasî. Ewto pono komo ahnoro waihkesî kacipara imo ke tanî rma kexitaw so, kekn̂e tî.

15 On wara tî n̂eyukyatken̂e kayaritomo maywen komo, Taa, amaywen me mak nas amna. Amtapotarî amna n̂ewehcasî, ketken̂e tî.

16 Ero ke takî tî cekn̂e kayaritomo. Tîhyawno komo tî naar̂akn̂e. Cipici wara cehsom komo makî tî nînomyakn̂e tîmîn yaw mîîmo yenîn̂e me. 10 tî nînomyakn̂e.

17 Ero ke takî tî cekn̂e kayaritomo. Maywen komo marha tî cetken̂e noro wenari ahnoro. Mooxe n̂he tîtoche so nîtîtmamyatken̂e takî tî.

18 Iito exitaw so tak Tapi yeepatari tî cetken̂e ahnoro noro sowtatun komo. Keretew komo, Peretew komo, Kace pononho komo marha tî cetken̂e Tapi yeepatari. Pahxa n̂he Kace poi mokyataw Tapi iitono komo tî mokyatken̂e noro yakro Ixaw Yana komo cheka. 600 tî mîkyam mokyatken̂e. N̂examro marha tî cetken̂e Tapi yeepatari.

19 Ero wa cetaw so on wara tî kekn̂e Tapi Itai ya, Kace pononho ya, Ai oyakno ahce kacho amna yakro mîmokya? Mîîce hara na kayaritomo yaka. Anarî yana amoro. Awekenhîrî poi en̂epexapu thakwa amoro.

20 Kokon̂oro mak mîmokye. Amna ma re awar̂atu so? Amna mak wa n̂etar̂asî ahna na okwe. Ero ke etok hara. Apoyino komo arko hara. Apînîn yaw so exi xe wasî Kporin komo. Yîmtapotachonhîrî yaw roro awakronoma xe wasî yîwya, kekn̂e tî.

21 On wara tko tî kekn̂e Itai kayaritomo ya, Pîra apa. Ahto so na awexitaw iito xa marha was ow hara. Awaitopo to awexitaw iito wasî awakro. Waipîra awehtopo to na awexitaw iito marha was awakro. Yaaro xa tan wîîkesî, Kporin komo nasî waipîn me, kacho wara rma nasî omtapotarî. Kayaritomo amoro apa, kar̂pe marha mas Amoro waipîra, kacho wara rma nasî omtapotarî. On wara wîîkesî, ahto so na awexitaw iito rma was ow hara. Kar̂pe awexitaw kar̂pe xa marha wasî awakro. Awaiyataw ow marha kwaihyasî awakro, kekn̂e tî.

22 Taa, kekn̂e tî Tapi yîwya, kaikatko rma. Ero ke cekn̂e rma tî Itai, aporî tî wacekn̂e. Tmaywen komo tî naar̂akn̂e, yîmxîkrî komo marha tî.

23 Nîwracetken̂e takî tî esama iitono komo ahnoro Tapi komo cetaw Xerusaren poi. Ketîron Yaporî tî wacekn̂e kayaritomo. Ahnoro noro yakro tîtosom komo tî wacetken̂e. Axawa imo yesamarî yaw tî cetken̂e.

24 Satoke marha tî cekn̂e Tapi yakro, Repita komo marha noro yakrono komo. Kaan yamatan tî naar̂atken̂e yîmtapotarî yen ha. Moro na arîche Kaan yematan takî tî n̂ir̂mikyatken̂e. Ero mîtwo tî n̂ecececekn̂e Abiata ewto poi mohtîkano rirî mîtwo.

25-26 Ero yinhîrî on wara takî tî kekn̂e kayaritomo Satoke ya, Kaan yamatan arko hara ewto pona. Kir̂wan̂he oyexitaw Kporin komo ya oyekyas hara. Ero yimaw tak Noro yamatan ween̂asî xa hara, yîmîn marha ween̂asî. Anarimaw on wara na nîîke opoko, Ahwora wasî apoko kica, nîîke. Ero wa ketaw owya tan wasî. Tanme ro mak oripe, wîîkesî, kekn̂e tî.

27 On wara marha tî kekn̂e kayaritomo Satoke ya, Kaan n̂enporî yenîn̂e tko na amoro. Ero ke eserepokara etok hara ewto pona. Amumuru arko awakro Aimasî. Xonatas marha arko Abiata mumuru ha. Abiata yakro etocoko. Amumuru komo aacoko awakro so, kekn̂e tî.

28 Tuuna watotopo na men kîtîtmamyasî axawa imo yesamarî yaw. Amtapotarî yekatîmn̂e momokyas ow iito, Ero wa men nîhtînoyasî Absaraw, kan̂e ha, kekn̂e tî. Ero wa tî kekn̂e Tapi Satoke ya.

29 Ero ke Satoke komo cetken̂e Xerusaren pona hara Abiata yakro. Kaan yamatan tî naar̂atken̂e iina hara. Iito takî tî xatken̂e Xerusaren po.

30 Ero yinhîrî takî tî cekn̂e xa hara Tapi. Oripera Yîpîn tî nawnukyakn̂e. Tîwrataro tî cekn̂e, tîhtîwomke marha, yîhtara marha. Akro tîtosom komo marha tî cetken̂e tîhtîwomke. Tîwrataro marha tî cetken̂e n̂examro îîpî yawnukyataw. Ero wa tî cetken̂e.

31 Ero yimaw on wara kacho tî n̂encekn̂e Tapi, Aitopew marha nasî Absaraw maywen me, kekn̂e tî. Ero yentache on wara takî tî kekn̂e Tapi Kaan ya, Apa kah yawno, on wara cma re wîîkes awya, Aitopew mtapotarî cma re maknamesî camkîno me tak ha, wîîkes awya, kekn̂e tî.

32 Îîpî meretkoso takî tî cekn̂e Tapi, Kaan poko tahwotachonhîrî komo pona. Iito tî xakn̂e Uxai, Ahkita. Tapi yenso tî mokyakn̂e. Tahxaikaxi tî xakn̂e noro ponon. Roowo tî xakn̂e yîhtîpîrî poko.

33 On wara tî kekn̂e Tapi yîwya, Ai oyakno, oyakro awcetaw ow mak mecmamnoyasî.

34 Ewto pona xa matko awto xe wasî. Iina awtoche on wara mîîkesî Absaraw ya, Ai, kayaritomo, on wara wîîkes awya, amaywen me tak wasî. Pahxa aamo maywen me wîxakn̂e. Oroto tak amaywen me tak was hara, kasko yîwya. Ero wa ketaw awya Aitopew mtapotarî yentan̂e pîn me tak Absaraw miir̂asî, kekn̂e tî.

35 Iito rma naxe Satoke komo, Abiata komo. Kporin komo yaka tîtosom mîkyam. N̂examro ya ekatîmko kayaritomo mîn yawno komo mtapotarî.

36 Iito marha naxe n̂examro mumuru komo. Aimasî, Satoke mumuru, Xonatas, Abiata mumuru. N̂examro cma re men̂epesî ohyaka an̂entathîrî yekatîmn̂e, kekn̂e tî. Ero wa tî kekn̂e Tapi Uxai ya.

37 Ero ke Xerusaren pona takî tî cekn̂e Uxai. Ero yimaw xa marha tî Absaraw n̂epatakekn̂e iina. Ero wa tî cetken̂e esepotpona. Ero wa tî xatken̂e.