Taa, ero yinhîrî on wara tî kekn̂e Xoabe, Seruia mrerî, Absaraw ponaro xa nai ham kayaritomo, kekn̂e tî tîropotaw.

2 Ero ke wooxam takî tî nan̂ikpekn̂e Tekoa pono. Yuhnari yîhtînon̂e tî mîk xakn̂e wooxam. Noro mokuche on wara tî kekn̂e yîwya, On wara cma re wîîkes awya aaci, tîwrataxmu wara esenpoko. Tîwrataxmu ponon yaw esko, ehkapera marha esko. Pahkî tîwrataxmu wara esenpoko ayananînhîrî pen pînîn yawno wara.

3 Ero wa rma tak etoko kayaritomo yaka. On wara kasko yîwya, kekn̂e tî. Tîmtapotarî tî n̂ekatîmyakn̂e yîwya kayaritomo ya yîn̂ekatîmrî hara. Ero wa tî kekn̂e Xoabe wooxam ya Tekoa pono ya.

4 Ero ke ero wa kacho yaw roro tî cekn̂e wooxam kayaritomo yaka. Yîhyaka tîtoche tî n̂esewnapekn̂e kayaritomo mamaka. On wara tî kekn̂e yîwya, Apa, owî cma re makronomesî, kekn̂e tî.

5 Ahce wa mehxe? kekn̂e tî yîwya. On wara tî kekn̂e wooxam, Iin̂o waixapu ow ha. Yaaro tan wîîkesî. Oyin̂o pen waihyakn̂e okwe.

6 Asakî tî xakn̂e omrerî. Mararî po exitaw so tko tî n̂etar̂metken̂e okwe. Yîrwoxinkan̂e komo tî exihra xakn̂e iito. Ero ke taknonhîrî pen tî waihkekn̂e akno rma.

7 Taa, kokon̂oro takî oyin̂o pen yananînho komo mohce ahnoro oyemetanmeso xa hara okwe. On wara kexe owya, Amna ya tîmko amrerî taknonhîrî pen waihkan̂enho. Noro tak amna waihkes hara taknonhîrî pen waihkachonho yepetho me. Aan̂onhîrî pen yemyawnonho yahsîn̂e meero amna waihkesî, kexe owya okwe. Noro pen waihketaw yîwya so oyeceton̂e exihra tak nas okwe. Oyin̂o retawno exihra marha nas okwe, osoken marha exihra, kekn̂e tî.

8 Taa, kekn̂e tî Tapi, amîn yaka etok hara. Omtapotarî wekatîmyasî ayanan komo ya. Noro mrerî waihkara ro mak men ehcoko, wîîkesî yîwya so, kekn̂e tî.

9 Nîmtapowakn̂e rma tko ka wooxam. On wara tî kekn̂e xa hara, On wara mak wîîkes awya apa, nîrwonatu na oyin̂o pen yananînho komo amtapotarî yentache. Ero wa exitaw so opona mak cirko kicicme omrerî yehtoponho, oyanan komo pona marha. Apona rma cirihra ro mak n̂ehcowpe kicicme ehtoponhîrî, kekn̂e tî.

10 On wara tî n̂eyukyakn̂e Tapi, Onoke na yîmtapowataw awakro kicicme, ohyaka tak eeko. Ow tak wîtwermesî aweira ro mak tak ehtome, kekn̂e tî.

11 On wara takî tî kekn̂e wooxam, Apa, Aporin komo Kaan ponaro cma re masî waixapu pen yepanîn̂e porohkachome, omrerî waihkara ehtome, kekn̂e tî. Taa, kekn̂e tî Tapi yîwya, yaaro tan wîîkesî, Kporin komo nasî waipîn me, kacho wara rma nasî omtapotarî yaaro xa. Cewn̂e ciki amrerî poci yehcamnopîra ro mak nasî, kekn̂e tî Tapi yîwya.

12 On wara takî tî kekn̂e wooxam, Apa, omtapota xe rma cik wasî awakro, kekn̂e tî. Taa, kasko rma, kekn̂e tî.

13 On wara tî kekn̂e wooxam, Apa, ahce kacho Kaan yanan komo yemetanmetopo mîhtînoya hara amoro? Aweponanîmtotopo wara rma mîmtapota oroto. Enko, anporokathîrî an̂ikîra masî.

14 Kwaipuche so pakahra ro mak wa taxe hara. Tuuna wara mak taxe roowo pona yukmamxapu wara. Anmîn me nas hara tuuna yukmamxapu. Ero wa xa marha taxe kwaipuche so, enpakan me ro mak taxe hara. Waipîn komo tko waihkara nasî Kaan. Ahce wa na nîhtînoya Noro tînporokathîrî komo yan̂ihtome tîhyaka hara. Eroromero kporohkara nasî.

15 Ero wa kaxi mak kmoko apa, oyerasperî ke mak opoyino komo ya. Ero ke on wara wîîkai, Kayaritomo yakro kîmtapowa ham. Anarimaw na omtapotarî n̂ewehca rma, wîîkai.

16 Omtapotarî menta waihkaxapu yepanîn̂e porohkacho poko reha. Ow mukurunpe, amna yemetanmekn̂e mîporoke amna waihkara ehtome. Amna waihketaw thakwa Kaan nîmîtho ahsîra rma thakwa nas amna omrerî yakro. Ero ke Noro yipu mîporoke ham okre.

17 Ero ke amtapotarî ponaro tak wasî, eserepokara tak wasî. Kaan yancun wara rma kencesî. Camkîra kîhtonon̂e amoro ha. Kir̂wan̂he cehsom mîkro mîîkesî anarî poko, kicicme cehsom mîkro mîîkesî kicicitho poko hara. Ero ke awakronoma xe xa wasî Kporin komo ya, ponaro awehtopo ya, wîîkesî, kekn̂e tî.

18 Ero wa kacho yentache on wara takî tî kekn̂e kayaritomo wooxam ya, Aaci, kîmtapowasî cik awakro. Aropotaka cma re eyamra ro mak masî omtapotarî yeyuhtopo, kekn̂e tî. Taa, kasko ka apa, kekn̂e tî wooxam.

19 On wara tî kekn̂e kayaritomo, Xoabe yanme tko na mîmoko, kekn̂e tî. Ai ha, kekn̂e tî wooxam, ahce wa thakwa re amtapotarî wanwekya. Amtapotarî yai etaknamara tasî kaari men wara, poowa men wara marha. Anarmen yîhtînopîra ro mak tasî amtapotarî yanwekî xe kexitaw. Nhnk, noro rma wa oyantoma ahyaka omohtopo poko. Noro rma tîmtapotarî n̂ekatmo owya awya cekatîmsom.

20 Ero wa nîîkai Xoabe owya kir̂wan̂he tak awehtome amumuru poko. Takîhso yîhtînon̂e xa tko amoro. Kaan yancun wara rma masî, camkîra cehsom amoro ahnoro roowo poko hakno komo yehtopo poko, kekn̂e tî. Ero wa tî kekn̂e wooxam Tapi ya.

21 Ero yinhîrî on wara takî tî kekn̂e kayaritomo Xoabe ya, Taa, amtapotarî wewehcasî. Ero ke etoko aparî ka, Absaraw ka, kekn̂e tî.

22 Ero yentache n̂esewnapekn̂e takî tî Xoabe Tapi mamaka. Ero wa ham okre, kekn̂e tî yîwya. Oroto tak on wara wîîkesî, Kir̂wan̂he wai ham kayaritomo ya, wîîkesî. Ero wa wîîkesî omtapotarî yewetîrî ke awya, kekn̂e tî. Ero wa tî kekn̂e Xoabe.

23 Ero yinhîrî Xesu pona takî tî cekn̂e Xoabe. Absaraw tî n̂ekyakn̂e Xerusaren pona.

24 On wara tko tî kekn̂e kayaritomo, Tîmîn yaka mak tompe. Oyenso mokuhra ro mak n̂expe, kekn̂e tî. Ero ke tîmîn yaka makî tî cekn̂e Absaraw. Kayaritomo yenso tohra tî xakn̂e.

25 On warai tî mîk xakn̂e Absaraw, kîîrî yenporî ro makî tî mîk xakn̂e. Cenporem komo rma re n̂etahcatken̂e Ixaw Yana komo. Absaraw xa tî n̂etahcatken̂e anarî komo yopo cenporem me xa tak exirî ke. Anarme exihra ro mak tî xakn̂e yupun yîhtîpîrî n̂ixa rono, yîhtarî ponarono rma.

26 Tîhpoci tî nawocekn̂e cimn̂ipu yenatîxera. Awsînîmtîkarî ke tî nawocekn̂e. Awsîn nukuknomekn̂e. 2,3 kiru wicakî tî xakn̂e yîhpoci yawsîn okyo, kayaritomo yawno wicakno kiru wicakno ha.

27 Osorwaw tî xakn̂e noro mumuru. Cewn̂e makî tî xakn̂e emsîrî, Tama tî osotî. Cenporem tî mîk xakn̂e noro yemsîrî.

28 Iito rma tî re xakn̂e Absaraw Xerusaren po. Kayaritomo yenso tohra tî xakn̂e okwe.

29 Ero yinhîrî Xoabe takî tî nan̂ikpekn̂e Absaraw kayaritomo yaka cen̂epetome. Tohra tko tî xakn̂e Xoabe Absaraw yaka. Ero yinhîrî nan̂ikpekn̂e xa hara Absaraw. Nanwekyakn̂e xa hara tî Xoabe yîhyaka tohra.

30 Ero ke on wara takî tî kekn̂e Absaraw tanton komo ya, On wara wîîkes awya so, Xoabe mararîn nasî moroto omararîn mîtwo rma. Sepata nasî iito yînatîrî. Ero kr̂a akn̂itatko, kekn̂e tî okwe. Ero ke Xoabe natîrî tî nakn̂iyatken̂e Absaraw yanton komo.

31 Ero yinhîrî Absaraw yenso takî tî cekn̂e Xoabe. On wara tî kekn̂e yîwya, Ahce kacho onatîrî nakn̂ice awanton komo kica? kekn̂e tî.

32 On wara tî Absaraw n̂eyukyakn̂e, On wara wîîkes awya, kan̂ikpoi cma re. Awen̂epe xe wîxakn̂e kayaritomo yaka on wara kachome yîwya, Ahce kacho Xesu poi kmokyakn̂e ha ke, nîîke tî awya Absaraw. Wara n̂he wasî iito rma oyexitaw, nîîke tî awya, kacho yekatîmtome awya ha. Kayaritomo yenso owto xe men wasî. Kicicme oyexitaw yîwya owaikape noro rma, kekn̂e tî Xoabe ya.

33 Ero ke kayaritomo yaka takî tî cekn̂e Xoabe. Absaraw mtapotachonho tî n̂ekatîmyakn̂e yîwya. Ero wa kacho yentache Absaraw takî tî nan̂ikpekn̂e kayaritomo. Yîhyaka tîtoche n̂esewnapekn̂e takî tî kayaritomo mamaka. Ero yinhîrî tumumuru takî tî n̂ewcokekn̂e. Ero wa tî xakn̂e kayaritomo, Absaraw poko.