Taa, ero yinhîrî takî tî kaamo me xakn̂e hara cwotu yimawnonho. Kayaritomo komo totopo ro me takî tî xakn̂e kaamo yimaw, etar̂maxi totopo me. Ero ke ero yimaw tî Xoabe takî tî n̂en̂epekn̂e xa hara Tapi Amonita komo yakro etar̂machome xa hara. Tîsowtatun komo marha tî n̂en̂epekn̂e noro yakro, Ixaw Yana kom ha. Ero wa tî n̂en̂epekn̂e. N̂examro takî tî Amon yepamtho pen komo nar̂metken̂e xa hara. Haba takî tî wamcetken̂e ewto ha. Iito rma tko tî xakn̂e Tapi Xerusaren po rma.

2 On wara tî xakn̂e Tapi anarî kaamo po, kokon̂i exitaw nîhcekn̂e etakrixapunhîrî. Tîmîn meretwo takî tî n̂etar̂akn̂e. En̂exa takî tî wooxam n̂een̂akn̂e ceyehsom. Cenporem tî mîk xakn̂e wooxam.

3 Ero yinhîrî tmaywen takî tî n̂en̂epekn̂e Tapi wooxam yosotî yentaxi. Entache on wara tî kekn̂e maywen, Baceseba tî mîk noro yosotî Erian yemsîrî ha. Urias pici tî mîkî, Etew pic ha, kekn̂e tî.

4 Ero yinhîrî takî tî tmaywen komo tî n̂en̂epekn̂e xa hara Tapi wooxam yan̂ihso. Ero ke Tapi yaka tî mokyakn̂e. Noro yenaka tî n̂etakriyakn̂e kica. Cetakirwamaxi tî xakn̂e wooxam ero yimaw. Ero yinhîrî cekn̂e hara tîmîn yaka, Tapi yenawnonho.

5 N̂etahsiyakn̂e tko tî wooxam ero yimaw. Ero ke on wara kacho yekatîmn̂e tî n̂en̂epekn̂e Tapi yaka, Tarke wasî, kacho ha.

6 Ero yentache on wara kacho yekatîmn̂e takî tî n̂en̂epekn̂e Tapi hara Xoabe yaka, Urias en̂epeko xiya, Etew, ha. Ero ke Urias tî n̂en̂epekn̂e Xoabe Tapi yaka.

7 Noro mokuche on wara tî kekn̂e Tapi yîwya, Ahce wa nai Xoabe? Ahce wa natu sowtatu komo? Ahce wa nai Amonita komo yakro awetar̂macho komo, kekn̂e tî. Ero warai poko tî n̂esencekn̂e Urias yakro.

8 Ero yinhîrî on wara tî kekn̂e Tapi yîwya, Taa, etoko tak amîn yaka. Iito tak ehtakorokakî, kekn̂e tî. Ero ke kayaritomo mîn yai tî cekn̂e Urias. Toche rma takî tî yîhyaka cma tî re iyotî narpekn̂e Tapi.

9 Tîmîn yaka tko tî tohra xakn̂e Urias. Kayaritomo mîn potaw rma tî n̂enmayakn̂e. Tapi maywen komo yakro tî nîwînîkyakn̂e iito.

10 Ero yinhîrî on wara tî ketken̂e Tapi maywen komo yîwya, Tohra n̂eexi Urias tîmîn yaka, ketken̂e tî. Ero ke Urias tî nan̂ikyakn̂e xa hara Tapi. On wara tî kekn̂e yîywa, Ai oyakno, mooxe toxapunhîrî mîmokye. Ahce kacho amîn yaka tohra mai kopi? kekn̂e tî.

11 On wara tî Urias n̂eyukyakn̂e, Roona yaw mak nasî Kporin komo yamatan. Ixaw Yana komo marha naxe roona yaw so, Xuta yepamtho komo marha. Oyantoman̂e Xoabe n̂enmayasî woskara po mak. Asowtatun komo marha naxe iito. Ero ke ahce wa ha re kîwce omîn yaka eseresmaxi, wooku yeeso, opici yenaka etakriso marha? Ero wa exirî ke so n̂examro omîn yaka tohra ro mak wasî. Yaaro xa tan wîîkesî, kekn̂e tî. Kar̂pe mas amoro waipîra, ero wa kacho wara rma nasî omtapotarî, tohra ro mak wasî, kacho.

12 Ero ke on wara takî tî kekn̂e Tapi yîwya, Taa, tan ka enmakî cewn̂e ro xa. Pahxaxa tak ken̂epesî Xoabe yaka hara. Ero ke iito rma tî kokmamyakn̂e xa hara Urias. Enmapuche iito rma tî ka xakn̂e.

13 Noro tî n̂erewusmekn̂e Tapi, kawaxiyem marha tî n̂erpekn̂e yîwya wenîmtome kica. Kokon̂i exiche tko Tapi maywen yakro makî tî n̂etakriyakn̂e Urias. Iito mak nîwînîkyakn̂e xa hara. Tîmîn yaka tî tohra ro mak xakn̂e.

14 Enmapuche karita takî tî mewrekn̂e Tapi Xoabe yakan. Yîhyaka tî narpekn̂e Urias ya.

15 On wara kacho tî mîn mewrekn̂e karita, Moso men Urias cirko sowtatu komo poturme. Kar̂pe xa n̂etar̂mexe, iina cirko. Ero yinhîrî etocoko amyamro hara yîhyai. Ero wa tînomcoko noro pen waihkachome tak Amon komo ya, kacho tî mewrekn̂e okwe.

16 Ero ke ero wara tî n̂iir̂akn̂e Xoabe. Amonita komo yewton wece tî cetken̂e Ixaw Yana komo iitono komo waparî me. Ero yimaw takî tî Urias n̂iir̂akn̂e karitî komo yecen̂e xa Amonita komo yecen̂e ha.

17 Ero yinhîrî ewto pono komo takî tî n̂epataketken̂e etar̂machome Ixaw Yana komo yakro. Ero wa etar̂metaw so anarî komo tî waihyatken̂e Tapi maywenînho pen komo okwe. Urias pen marha tî waihyakn̂e okwe, Etew pen.

18-20 Ero yinhîrî takî tî tîmtapotarî yekatîmn̂e tî n̂en̂epekn̂e Xoabe Tapi yaka. Ketar̂matoponhîrî komo ekatîmtîkakî ahnoro, kekn̂e tî yîwya. On wara marha takî tî kekn̂e ekatîmn̂e ya, Ketar̂matoponhîrî komo yekatîmtîkache kayaritomo ya noro tak na nîrwona. On wara na nîîke awya, Ahce kacho ewto pahnoke xa mîîtoce okwe ar̂mano riso? Waaca pono komo men wa nar̂metu waiwî kwaparî me meyehra xa kîwcetaw so.

21 Onoke xa Abimereke pen waihkekn̂e Xerubesece mumutho pen? Wooxam makî tî nar̂mekn̂e toopu puruma yaposokacho waaca meretîn̂i. Noro pen po tî nar̂mekn̂e waparî. Tebes po tî waihkekn̂e. Ahce kacho waaca mîtkoso xa mîîtoce okwe?, nîîke ha na awya. Ero wara ketaw awya on wara eyuhko, On wara marha wîîkes awya, amaywen pen Urias marha nasî twaihso, etew pen, kasko yîwya, kekn̂e tî. Ero wa tî tîmtapotarî n̂ekatîmyakn̂e Xoabe Tapi ya.

22 Ero ke cekn̂e takî tî ekatîmn̂e Xerusaren pona. Tapi ya tî n̂ekatîmtîkekn̂e Xoabe mtapotachonho.

23 On wara tî kekn̂e Tapi ya, Amna yopo ka xatken̂e ewto pono komo. Amna yar̂maxi mohce ewto poi. Ero yinhîrî tko n̂examro amna n̂en̂epekn̂e hara ewto potaka.

24 Ero yimaw tko waiwî takî nar̂metken̂e anarî komo waaca pono komo. Amna wetken̂e okwe. Anarî komo tak waihyatken̂e okwe amaywenînhîrî pen komo. Amaywen pen marha waihyakn̂e okwe Urias pen, Etew pen, kekn̂e tî. Ero wa tî n̂ekatîmyakn̂e Xoabe mtapotarî yekatîmn̂e.

25 On wara makî tko tî kekn̂e Tapi yîwya, On wara kasko Xoabe ya. Ahwokara esko kmaywen komo waihtoponho poko. Mîk hak mak waihyatu sowtatu komo cetar̂metaw so. Kar̂pe n̂he xa matko ar̂mano ciicoko xa hara ewto pono komo yar̂machome, yîmînthîrî komo yakn̂itome marha, kasko yîwya. Ero wa kasko Xoabe ya ahworetome, kekn̂e tî. Ero wa tî kekn̂e Tapi Xoabe mtapotarî yekatîmn̂enho ya.

26 Ero yinhîrî on wara takî tî xakn̂e Baceseba, ciin̂onhîrî pen waihtoponho tî n̂encekn̂e. Ero ke yîpînîn yaw tî nîwracekn̂e.

27 Yîpînîn yaw yîwratachonhîrî yîtîhkache tak tîmîn yaka takî tî n̂ekyakn̂e Tapi. Cipici me takî tî nahsîyakn̂e. Ero yinhîrî takî tî n̂ewruyakn̂e Tapi mumuru ciki. Kir̂wan̂he enîhra ro makî tko tî xakn̂e Kporin komo Tapi yehtoponho ha.