Taa, ero yinhîrî, pahkî n̂he exiche waihyakn̂e tak Amonita komo kayaritomon pen. Waipuche tak yumumuthîrî takî tî xakn̂e kayaritomo me hara, Anun tî osotî.

2 Ero yinhîrî on wara takî tî nîhtînoyakn̂e Tapi, Taa, tawake kesenpesî Anun ya, Naas pen mumutho ya. Tawake xakn̂e yîmînhîrî opoko, ero ke tawake kesenpesî yumumuthîrî poko hara, kekn̂e tî. Ero ke kîrkomo takî tî n̂en̂epekn̂e Tapi Anun yaka. Aamo pen pînîn yaw tî nai Tapi okwe awara xa marha, kaxi tî n̂examro n̂en̂epekn̂e. Ero ke cetken̂e takî Tapi maywen komo Amon yepamtho komo rowon pona.

3 Taa, Tapi n̂en̂epetho komo yepatakache Amon komo cheka on wara takî tî ketken̂e Amon yepamtho yantoman̂e komo tîkayaritomon komo ya, Anun ya, Aamonhîrî pen xatî me cehtopo ma re n̂enpe Tapi awya awahworen̂e komo yen̂eperî ke? Kerasman̂e me tko na n̂examro n̂en̂epei. Kewton komo yenso na mohce kar̂machome so amn̂e, ketken̂e tî.

4 Ero ke Tapi n̂en̂epetho komo takî tî nahsîyakn̂e Anun. N̂examro yetpoci tî nuhwetken̂e eecome so mak, iyohyarî komo rakataka kica. Pononthîrî komo marha tî nawotopekn̂e kawra cehso ro, mapirî komo toxa ro mak kica. Ero wa ciriche so n̂en̂epetken̂e hara.

5 Ero yinhîrî ero wa ciitoponhîrî takî tî n̂ekatîmyatken̂e anarî komo Tapi ya. Nîhyapamyatken̂e ro makî tî etpokaxapu komo. Ero ke n̂examro potpona tmaywen komo takî tî n̂en̂epekn̂e Tapi. On wara tî nîîke kayaritomo, ketken̂e yîwya so, Xer̂ko po ka enmacoko awetpoci komo yatîhtacho mîtwo. Ero yinhîrî tak amohcoko hara Xerusaren pona, nîîke tî kayaritomo, ketken̂e tî yîwya so.

6 Ero yinhîrî on wara takî tî ketken̂e Amonita komo, Kica nîîke men Tapi kpoko so tmaywen komo yemetanmekrî poyero kîwya so, ketken̂e tî. Ero ke Siriu komo takî tî nan̂ikyatken̂e sowtatu komo, takronoman̂e komo. Bece Heobe pono komo tî nan̂ikyatken̂e, Soba pono komo marha tî. N̂epemekn̂e tî mohtome so takronomaxi. 20.000 tî nan̂ikyatken̂e. Maaka pono komo kayaritomon marha nan̂ikyatken̂e. Yaake marha tî tmaywen komo noro n̂ekyakn̂e 1.000 ha tî. 12.000 marha tî nan̂ikyatken̂e Tobe pono kom hara. Ero wa tî sowtatu komo nan̂ikyatken̂e.

7 Sowtatu komo yan̂ihtoponho yentache tak Tapi ya Xoabe takî tî n̂en̂epekn̂e, sowtatu komo marha ahnoro.

8 Etar̂mano ritopo po cexitaw so tak Amon yepamtho komo takî tî n̂epanacetken̂e cewton komo potaka rma. Cewyaro tî xatken̂e Siriu komo, Soba pono komo, Heiobe pono komo, Tobe pono komo, Maaka pono komo. Ero wa tî xatken̂e n̂examro cewyaro cepanatoso so.

9 Ero yinhîrî mehxarpa tî Xoabe n̂een̂akn̂e twaparî komo, ceepatai tî n̂een̂akn̂e anarî komo, tîmkai tî n̂een̂akn̂e anarî kom hara kica. Ero ke karitî komo xa tî men̂ekekn̂e Ixaw Yana komo, sowtatu kom ha. N̂examro takî tî panahtopekn̂e Siriu komo wece cewru.

10 Men̂ekan komo reha tî n̂iir̂akn̂e takno maywen me hara Abisai maywen me. Noro takî tî n̂examro panahtopekn̂e cewyaro hara Amon yepamtho komo wece cewru.

11 On wara tî kekn̂e Xoabe takno ya, Oyopono me exitaw Siriu komo oyakronomaxi tak amohcoko amyamro. Amon yepamtho komo reha exitaw ayopono me ow tak kmokyasî awakronomaxi.

12 Kar̂pe xa cehcerî. Erasîn me ro mak cetar̂macerî n̂examro yakro. Kpoyino komo kurun me cehcerî, Ponaro kehtopo komo yewton kurun me marha. Tanme ro mak Kporin komo nîhtînope kakronomacho komo, kekn̂e tî. Ero wa tî kekn̂e Xoabe takno ya.

13 Ero yinhîrî sowtatu komo takî tî naar̂akn̂e Xoabe Siriu komo yakro etar̂maxi. Meyehra so mokuche n̂emahciyatken̂e takî tî Siriu komo Xoabe komo yai.

14 Siriu komo yemahcirî tko tî n̂een̂atken̂e Amonita komo. Ero ke tî n̂examro pen n̂emahciyatken̂e hara Abisai komo yai. Ewto pona tî cetken̂e. Ero wa tî xakn̂e etar̂mano ritoponho. Ero yinhîrî Xerusaren pona takî tî mokyakn̂e hara Xoabe Amonita komo yar̂man̂enho.

15 Ero yinhîrî on wara takî tî ketken̂e Siriu komo, Kyopo so n̂ehce kica Ixaw Yana komo. Kaikatko xa hara akro so etar̂maxi, ketken̂e tî. Ero ke tî sowtatu komo nan̂ikyatken̂e xa hara.

16 Siriu komo tî nan̂ikyatken̂e xa hara Atatese anarî kom hara, Ewpratesî Yepu mehxan kom ha. An̂ihxapu komo tî cetken̂e Eran pona. Sobake tî xakn̂e Atatese sowtatun komo yantoman̂e me. Mehxa mohxapu komo yantoman̂e me marha takî tî xakn̂e.

17 N̂examro yekaci yentache Tapi ya Ixaw Yana komo takî tî nan̂ikyakn̂e xa hara ahnoro kîrkomo. Mokuche so cetken̂e etar̂maxi xa hara. Xotaw Yepu tî wacetken̂e. Eran pona tî cetken̂e. Tapi komo yenîche tak n̂epanacetken̂e takî tî Siriu komo Tapi maywen komo yeepatai. N̂etar̂metken̂e takî tî Tapi sowtatun komo yakro.

18 N̂emahciyatken̂e tko tî Siriu komo Ixaw Yana komo yai. Siriu pen komo tî waihketken̂e Tapi maywen komo. 700 tarara yawno pen komo tî waihketken̂e. 40.000 tî waihketken̂e tîhtarî po tîtosom kom hara. Sobake pen meero tî waihketken̂e Atatese sowtatun komo yantoman̂enho pen. Iito rma tî waihketken̂e. Ero wa tî Siriu komo pen nar̂metken̂e Tapi sowtatun komo.

19 Ero yinhîrî on wara takî tî ketken̂e kayaritomo komo Atatese maywen kom ha, Okwe xa thakwa, kar̂macow so okwe Ixaw Yana komo, ketken̂e tî. Ero ke, Etar̂mara ro mak tak cehcerî, ketken̂e takî tî Tapi ya. Ero ke Ixaw Yana komo yewetîn̂e me takî tî xatken̂e. Ero yinhîrî Amonita komo yakronomara takî tî xatken̂e. Ero wa tî xatken̂e Siriu komo.