Ero yinhîrî Natan takî tî n̂en̂epekn̂e Kporin komo Tapi yaka. Ero ke yîhyaka cekn̂e. On wara tî kekn̂e yîwya, Ai apa, on wara wîîkes awya, On wara xatken̂e ewto pono komo, asakî xatken̂e. Anarî xakn̂e cemyawnoi xa, anarî reha xakn̂e emyawnomnî me reha okwe.

2 Mer̂pora ro mak xakn̂e cemyawnoyem yoku, oper̂a komo, paaka komo.

3 Iyokumra reha xakn̂e okwe emyawnomnî. Cewn̂e mak xakn̂e iyoku oper̂a xîkrî, woosî ciki, epethîrî pona ahsîxapu. Noro ciki tî por̂mamnoyakn̂e tîmîn yaw rma tîmxîkrî komo yakro. Nînahmekn̂e tînaputhîrî yakwenho ke rma. Tututumuru yawno poi rma tî wokpekn̂e. Cenaw rma tî nîwînîkrekn̂e ciki. Cemsîrî wara ro mak n̂iir̂akn̂e.

4 Ero yinhîrî pawana tak mokyakn̂e cemyawnoyem yaka. Ero ke iyotî yetaka xe xakn̂e. Tooku tko nîmcekn̂e waihkara, oper̂a komo, paaka komo. Noro yipu waihkara xakn̂e tpawanarî yotî me. Emyawnomnî yokutho xa matko nahsîyakn̂e okwe, waihkekn̂e tak tpawanarî yotî me, kekn̂e tî. Ero wa tî kekn̂e Natan Tapi ya.

5 Ero wa kacho yentache nîrwonakn̂e xa takî tî Tapi cemyawnoyem poko. On wara tî kekn̂e, Ero wa iyohkano rin̂enho nasî twaihkapore. Yaaro xa tan wîîkesî, Kporin komo nasî waipîn me kacho wara rma.

6 4 oper̂a xîkrî tîmpore men nas hara waihkaxapu yemtakaimacho. Ero wa men tîmpore nasî emyawnomnî yoku waihkan̂enho kicicme exirî ke, emyawnomnî pînîn yawra ro mak exirî ke, kekn̂e tî.

7 On wara tko tî Natan n̂eyukyakn̂e, Noro rma amoro, cemyawnoyem poko wekatmo noro. On wara kesî Kporin komo, ponaro Ixaw Yana komo yehtopo, Ixaw Yana komo kayaritomon me kîhkapekn̂e. Sau pen ya awaikapora wîxakn̂e.

8 Awantoman̂enhîrî pen yananînho wîmyakn̂e awya. Yihcinhîrî komo yenîn̂e me marha kiirî. Ixaw yana komo marha wîmye awya Xuta yepamtho komo yakro rma. Ero warai komo ke kwakrei. Wahra mak owakresî Kporin komo, ketaw rma awya ero yopo wîmrî ha re awya.

9 Ahce kacho Aporin komo ya apanatanmetopo komo meen̂akn̂e ero pîntho me. Kicicme tî awen̂a okwe. Urias pen mîwaikekn̂e kacipara imo ke, Etew pen ha. Amonita komo kaciparan ke rma mîwaikekn̂e. Yihcinhîrî tak mahsîyakn̂e apici me kica.

10 Ero yanme tak awepamrî pen komo waihyaxe amn̂e emapona. Miya roro waihyaxe okwe kacipara imo ke rma. Ero wa waihyaxe noro pîntho me oyenîrî ke awya, Urias pen cinho yahsîrî ke awya ha, nîîke Kporin komo awya, kekn̂e tî.

11 On wara marha kesî Noro awya, amxîkrî komo rma wiir̂as amn̂e awîrîman̂e me okwe. Ahcinhîrî komo wîmyasî anarî ya amîtwono ya rma. N̂examro yenaka n̂etakriyasî noro katpanaw rma kica.

12 Kicicme mîxakn̂e amoro en̂epa me. Ixaw Yana komo n̂enîrî me rma tko ero wa wiir̂asî ahcinhîrî komo, katpanaw rma, kes awya, kekn̂e tî.

13 Ero wa kacho yentache tak on wara tî Tapi n̂eyukyakn̂e, Kicicme wehxe kica Kporin komo poko, kekn̂e tî. On wara tî kekn̂e Natan yîwya, Taa, kicicme awehtoponhîrî takî tî nîhcamnoi Kporin komo. Waipîra tî mai.

14 On wara tko naxe Kporin komo xatî pîn komo awehtoponhîrî yentan̂e komo, kicicme so tak nîmtapowaxe ro mak kica Noro poko apoyero rma. Ero ke amumuthîrî pen ciki takî tî waihya ewruxan ciki, kekn̂e tî. Ero wa tî kekn̂e Natan Tapi ya.

15 Ero yinhîrî takî tî tîmîn yaka cekn̂e hara Natan. Ero yimaw takî tî rikomo pen ciki namotorekn̂e, Urias pen cinho yenawnonho ha. Kar̂pera xa takî tî xakn̂e okwe.

16 Ero ke Kporin komo yakro tî nîmtapowakn̂e Tapi cerewre ro mak tumumuru yakir̂wamacho poko. Eseresmara ro makî tî xakn̂e. Tîmîn yaka tî cekn̂e. Roowo pona takî tî n̂etîrapekn̂e pahkî. Ero wa tî xakn̂e cenmakaxi ro okwe.

17 Ero yinhîrî poritomo komo tî mokyatken̂e yîhyaka yîhyawno komo rma. Oyakno, ketken̂e tî, tawompore nasî, ceseresmapore marha, ketken̂e tî yîwya. Awomura tko tî xakn̂e, eseresmara marha tî xakn̂e akro so.

18 7 ro enmapuche takî tî waihyakn̂e okwe rikomo pen. Tapi ya ekatîm xera tko tî xatken̂e maywen komo, yumumuthîrî waihtoponho yekatîm xera. On wara tî ketken̂e, Kar̂pe rma ka exitaw ciki tîtkace cma ha re yîwya. Mawomyasî cma re, meseresmesî takî cma re, tîtkace. Kentara so ro mak xakn̂e. Ahce wa xa tak na nai tumumuthîrî pen waihtoponho yekatîmyataw hara yîwya? N̂esetape tak na okwe, ketken̂e tî.

19 Tmaywen komo tko tî n̂een̂akn̂e Tapi, ehtura esentarî komo tî n̂een̂akn̂e. Ero ke, Waipo ham rikomo pen ciki, kekn̂e tîhnaw rma. Waipo tak na rikomo? kekn̂e tî yîwya so. Nhnk, waipo tak okwe, ketken̂e tî yîwya.

20 Ero wa kacho yentache nawomyakn̂e tak puknow wa ehxapunhîrî. N̂eyehyakn̂e takî tî, n̂ekapekn̂e marha tî, kir̂wan tak namruyakn̂e tponon. Ero yinhîrî Kporin komo mîn yaka takî tî cekn̂e. Iito tî Kporin komo yehtopo poko tî nahwowakn̂e. Ero yinhîrî tîmîn yaka takî tî cekn̂e hara. Onahrî tak ehcoko, kekn̂e tî tmaywen komo ya. Ekîche tak yîwya so n̂eseresmekn̂e takî tî. Ero wa tî xakn̂e Tapi.

21 Ero ke on wara tî ketken̂e noro maywen komo yîwya, Apa, ahce kacho ero wa mai hara? Waipîra ka exitaw rikomo ciki eseresmara mîxakn̂e. Mîwracekn̂e mak okwe. Oroto amumuthîrî pen waipo okwe. Waipuche tak mawom hara, meseresmesî marha. Ahce kacho ero wa mai ke? ketken̂e tî yîwya.

22-23 On wara tî kekn̂e Tapi, Waipîra ka exitaw rikomo eseresmara wehxe, kîwracekn̂e mak. On wara wîîkai, Ahce wa na nai Kporin komo. Opînîn yaw tko na nai anarimaw. Rikomo waihkara rma na nai, wîîkai. Oroto twaihso thakwa tak nasî. Ero ke ahce kacho eseresmara wai? Wenpake ha ma re? Pîra ro mak. Yîhyaka xa matko kîwces amn̂e. Noro reha mokuhra ro mak nasî ohyaka, kekn̂e tî. Ero wa tî kekn̂e Tapi.

24-25 Ero yinhîrî cipici takî tî nahworekn̂e Tapi, Baceseba. Yîhyaka tî cekn̂e, enaka tî n̂etakriyakn̂e. Ero ke takî tî n̂ewruyakn̂e xa hara yipici yîmrerî ciki xa hara. Saromaw me tî nosohcetken̂e. Noro xe ciki tî xakn̂e Kporin komo. Yiixe cexirî ke weronomano rin̂e tî n̂en̂epekn̂e Tapi yaka, Natan ha. On wara kacho tî n̂ekatîmyakn̂e yîwya, Amumuru ciki osohtoko Xecicias me, kacho tî. Ero ke ero wa tî nosohcekn̂e Tapi Kporin komo yanme.

26 Taa, meye rma tî ka xakn̂e Xoabe. Haba pono komo yakro rma tî n̂etar̂mekn̂e Amonita komo yakro. Ewto raconho tî ka nahsîyakn̂e kayaritomo yewtonî ro. Ero wa tî xakn̂e noro reha.

27 Ero yinhîrî tîmtapotarî yekatîmn̂e komo tî n̂en̂epekn̂e Xoabe Tapi yaka. On wara kekn̂e, Haba pono komo yakro ketar̂mai. Tuuna wahsîye, n̂examro nakwatho.

28 Ero ke ahnoro tak an̂ihko sowtatu komo. N̂examro tak eeko oona Haba wamtotome xa tak, ahsîtome marha. Anarimaw owî rma na ewto wahsîya. Ero wa oyexitaw oyosotî ke rma na nosohcetu ewto, kekn̂e. Ero wa kacho yekatîmn̂e tî n̂en̂epekn̂e Tapi yaka.

29 Ero ke ahnoro takî tî nan̂ikyakn̂e Tapi sowtatu komo. Haba pona tî cekn̂e, iitono komo yakro etar̂maxi. Ewto takî tî nahsîyakn̂e.

30 N̂examro kayaritomonînho tî nahsîyakn̂e. Noro xapikantho tî nahsîyakn̂e ooru ciixapu. Tawsîn̂em tî mîn xakn̂e xapika, 34 kiru wicakî tî xakn̂e awsîn okyo. Toopuci enporixapu mko ke tporenoi tî xakn̂e cepethîkem ke okre. Ero takî tî n̂iir̂atken̂e Tapi tîpîrî pona hara. Iitono komo yemyawnonho marha tî nahsîyakn̂e Tapi mer̂pono pînî ro mak.

31 Iitononhîrî komo marha tî naar̂akn̂e anana. N̂examro tî napickekn̂e sahsamacho poko, roowo yahtotopo poko, yawaka poko, kawau yamnonotopo poko, ero warai poko tî napickekn̂e. Ero wa tî miyan komo rma napickekn̂e Amon yepamtho komo, mîn hak ewto pono komo. Ero yinhîrî Xerusaren pona takî tî cekn̂e hara Tapi. Sowtatu komo marha tî cetken̂e hara iina ahnoro. Ero wa tî cetken̂e.