Ero yinhîrî tak Ixaw Yana komo ahnoro tak n̂esenmekyatken̂e Siro po. Iina tak n̂iir̂atken̂e Kporin komo yakro Kesentacho kom ha. Ero yimaw Ixaw Yana komo waparî me tmohsom komo exihra ro mak tak xakn̂e.

2 Anarî komo tko ceken yahsîra rma ka xatken̂e Ixaw Yana kom ha. 7 tribu rma xatken̂e tîrowon yahsîn̂e pîn komo rma ha ka.

3 Ero ke on wara kekn̂e Xoswe Ixaw Yana komo ya, Pahkî maxe aweken komo yahsîra rma ka. Anahsîri komo rma re nîmye Kporin komo awya so. Ponaro aporin pen komo yehtopo Mîk nîmye. Ahcemaw xa tak mahsîyatu aweken kom ha?

4 Ero ke kîrkomo etacicoko osorwaw so. Tribu komo poko hakî etacicoko osorwaw so. Ero wa etacicoko. Etacixapu komo tak wen̂epesî roowo yukuknoman̂e me. Roowo kuknon tak mewretu yîhtînotome tak kîwya so. Ero yinhîrî tak ohyaka mohcowpe hara.

5 7 me tak nîraconkacowpe n̂examro rowon, ahsîn ha ka. Tînahsîthîrî komo po rma n̂ehcowpe Xuta komo suu n̂ixan po. Ero wa xa marha n̂ehcowpe Xose yepamtho kom hara. Tîrowon komo po marha n̂ehcowpe nohce n̂ixan po hara. Anarî komo nahsîrî mak tak roowo yîraconkacoko 7 me.

6 Ero yinhîrî tak 7 raconho kuknon mewretîkache awya so ehcoko xiya ohyaka. Men̂ekacho tak war̂mesî anahsîrî komo yîhtînotome kîwya so. Kporin komo Kaan yepatai rma war̂mesî.

7 Cekenî ro yahsîra reha naxe Repita komo. Awarara so reha naxe n̂examro. Kporin komo ya tîmsom poko mak naxe n̂examro. Ero rma nasî yînahsîrî komo me. Taa, Kace komo, Huben komo, Manases komo raconho, n̂examro reha nahsîyatken̂e ceken komo pahxa rma. Xotaw yeco pono nahsîyatken̂e resce n̂ixan ha. Moises penî rma nîmyakn̂e yîwya so Kporin komo yanton pen ha, kekn̂e. Ero wa kekn̂e Xoswe.

8 Ero ke cetken̂e tak roowo kuknoman̂e komo. Torî me so on wara kekn̂e Xoswe yîwya so, Ahsîn ka entatko roowo ha. Ero kuknon tak mewrecoko karita poko. Ero yinhîrî tak amohcoko hara ohyaka. Tan wasî Siro po Kporin komo yeepatai. Men̂ekacho tak war̂mesî arowon komo yîhtînotome tak kîwya so, kekn̂e.

9 Ero ke cetken̂e tak yukuknoman̂e komo. Roowo raco mko nukuknometken̂e. Cewyaro so mewretken̂e yukuknomacho karita poko. 7 yîraconhîrî mewretken̂e. Ahnoro ewto mko mewretken̂e. Mewretîkache tak n̂etîrametken̂e hara Xoswe yaka cetarî komo yaka Siro pona hara.

10 Ero yinhîrî men̂ekacho tak nar̂mekn̂e Xoswe Siro po Kporin komo yeepatai. Ero yanme tak yîrowon komo n̂ekamyakn̂e Ixaw Yana komo ya, tribu komo ya.

11 Benxamin komo rowon ka nîhtînoyatken̂e men̂ekacho yar̂macho ke. N̂examro rowon nîhtînoyatken̂e anarî komo rowon yotaw. Mehxa nasî Xose komo rowon, xehxa nasî Xuta yepamtho komo rowon hara.

12 Ero ke Benxamin komo rowon wokpan wekatîmyasî nohce n̂ixan ha ka. N̂examro wokpan n̂ihciyasî Xotaw yecihtaw. En̂exa tak cesî Xer̂ko panari nohce n̂ixa. En̂exa cesî oesce yaw roro îîpî cheka. En̂exa cesî Bece Apen yaxawan pona.

13 En̂exa cesî Rus panari suu yaw roro ha. (Betew rma mîn Rus). En̂exa cesî Ataroce Ata pona. Îîpî pono mîn Ataroce Ata, Bece Oron xehxa nasî suu n̂ixa, uuman xehxa ha.

14 En̂exa Bece Oron îh poi ces hara wokpa poku kaxi suu yaw roro. Ero rma nasî yîrowon komo wokpan me oesce n̂ixan hara. Kiriace Baaw pona cesî (Kiriace Xearinî rma mîn). Xuta komo yewton mîn Kiriace Baaw. Ero wa nasî yîrowon komo wokpan oesce n̂ixan ha.

15 En̂exa cesî wokpan komo suu n̂ixan hara. Kiriace Xearin poi cesî resce yaw roro tuuna pîtho kwaka, N̂ehtoa kwaka ha.

16 En̂exa wokpa cesî Inon Mumuru yewkuru kwaka. Ero yecihtaw nasî îîpî, ero yamrinaka cesî wokpa. Tooto imo yewkuru mehxa nasî nohce n̂ixa. Inon yewkuru yaw roro cesî Xebusew komo yewton panari suu n̂ixa. En̂exa cesî En Hoxew pona.

17 En̂exa poku kes hara wokpa nohce yaw roro. En Semes pona cesî Xeriroce pona. Îîpî yawnutopo yemtakan mîn Xeriroce, Atumin yemtacho ha. En̂exa wokpa cesî Boan pona, toh pona. Huben pen mumutho mîk xakn̂e Boan.

18 En̂exa cesî Araba yamrinari nohce n̂ixa. En̂exa cesî Araba pona roro.

19 En̂exa cesî Bece Okra panari nohce n̂ixa. En̂exa cesî Yîmîtî Ken̂arî kwaka, yukuhya kwaka, nohce n̂ixan kwaka ha. Xotaw yetahsîtopo kwaka xa n̂enahcasî n̂examro rowon wokpan. Ero wa nasî Benxamin komo yeken wokpan, suu n̂ixan ha.

20 Xotaw marha nasî n̂examro wokpan me resce n̂ixan ha. Ero wa nas ahnoro Benxamin komo rowon wokpan, mehxan, xehxan marha. Iito re tak n̂esekenmetken̂e noro re me cehsom komo.

21-24 Taa, on wara xakn̂e Benxamin komo yewton, Xer̂ko, Bece Okra, Emeke Kesis, Bece Araba, Semarain, Betew, Apin, Para, Opra, Keparî Amonai, Opn̂i, Kaaba. 12 mîn xakn̂e ewto mko yînahsîrî komo. Ewtoci mko marha nahsîyatken̂e ewto mîtwono mko ha.

25-28 On wara marha xakn̂e ewto mko yînahsîrî kom hara, Xibeaw, Hama, Beeroce, Mispa, Sepira, Mosa, Heken, Ihpew, Tarara, Sera, Erepe, Xebus (Xerusarenî rma mîn ha.) Xibea, Kiriace, ero wara. 14 mîn xakn̂e ewto mko yînahsîrî komo. Ewtoci mko marha nahsîyatken̂e ewto mîtwono kom ha. Ero wicakî xakn̂e Benxamin komo nahsîrî, roowo ha.