Taa, on wara xakn̂e Manases komo nahsîrî hara ceken komo me. Men̂ekacho ke nîhtînoyatken̂e yînahsîrî komo. Xose pen mumutho mîk xakn̂e Manases, poturu ha. Manases pen mumutho xakn̂e Maki, poturu hara. Xireace yîîm pen mîk xakn̂e Maki. On wara xakn̂e Maki yepamtho komo rowon, Xireace nîmyatken̂e yîwya so eken komo me, Basan marha. Ero wicakî nîmyatken̂e yîwya so sowtatu me xa exirî ke so n̂examro.

2 Ero ke anarî komo nahsîrî tan wekatîmyas hara Manases komo raconho nahsîrî ha. On wara xatken̂e Manases pen mumutho kom hara, kîrkom ha, Abiese, Ereke, Asîriew, Siken, Epe, Semita. N̂examro yepamtho komo tak n̂ekenmetken̂e hara.

3 On wara tko xakn̂e Seropeace pen, Epe pen mumutho. Epe pen xakn̂e Xiriace pen mumutho hara, noro pen xakn̂e Maki pen mumutho hara, noro pen xakn̂e Manases pen mumutho hara. Taa, Seropeace pen mumuru exihra ro mak xakn̂e okwe. Emsîrî komo mak xatken̂e. On wara xakn̂e emsîrî komo yosotî, Mara, Noa, Okra, Miwka, Cihsa.

4 N̂examro tak cetken̂e Ereasa yaka, Kporin komo yaka cewomsom yaka ha, Xoswe yaka marha cetken̂e, Nun pen mumutho yaka, anarî komo yaka marha cetken̂e antomano rin̂e komo yaka. On wara ketken̂e yîwya so, Ai, apa komo, on wara tî kekn̂e Kporin komo Moises pen ya, Seropeace pen yemsîtho komo ya tîmcoko yîrowonî ro komo amn̂e. Iyanan komo ya mîmyaxe ero wara rma tîmcoko yîwya so hara, kekn̂e Kporin komo yîwya, ketken̂e yîwya so. Ero ke n̂examro yeken tak nîmyakn̂e Xoswe. Yîîm pen yaknonho mumuru komo ya nîmyakn̂e ero mîtwono rma nîmyakn̂e yîwya so hara wooxam komo ya.

5 Taa, 10 nahsîyatken̂e roowo raconho mko Manases komo, ceken komo me. Xiriace marha nahsîyatken̂e, Basan marha. Xotaw yeco pono mîn nahsîyatken̂e. Iitono nahsîyatken̂e Manases komo ceken komo me.

6 Ero wicakî nahsîyatken̂e n̂examro, wooxam komo ya ahsîrî ke marha ceken kom ha. Manases mumutho yemsîrî komo nahsîyatken̂e roowo yumumuru komo yakro rma. Xiriace nahsîyatken̂e anarî komo reha Manases kom ha.

7 On wara nasî Manases komo rowon wokpan, Ase komo rowon wokpan poi cesî Mikmeta pona. Siken xehxan mîn Mikmeta, resce n̂ixa. En̂exa tak suu yaw roro cesî wokpan komo En Tapua pono komo chere.

8 Manases komo rowon po rma xakn̂e Tapua wokpa yaw. Iitono komo mararîn xakn̂e Manases komo rowon po rma. Ewto reha xakn̂e Eprain yepamtho komo yewton me tak, Tapua xa.

9 En̂exa tak wokpa cesî suu yaw roro rma Kana yewkuru kwaka. Etîchere rma xakn̂e Eprain komo yewton, Manases komo yewton yakro. Wokpa reha cesî aporî kwaka. Nohce n̂ixa xakn̂e Manases komo rowon ha. En̂exa cesî wokpa tuuna imo kwaka roro.

10 Suu n̂ixan nasî Eprain komo rowon. Nohce n̂ixan nasî Manases komo rowonî reha. Manases komo rowon cesî tuuna imo kwaka. Mehxa nohce n̂ixa yîrowon komo wokpan cesî Ase yepamtho komo wokpan porero. Mehxa xa hara resce n̂ixa yîrowon komo wokpan cesî Isaka komo wokpan porero hara.

11 Anarî komo marha nahsîyatken̂e Manases cewton komo, Isaka rowon pono rma, Ase yepamtho rowon pono marha. Bece Sean, Ibrean, Toro pono komo, Entoro pono komo, Taanake pono komo, Mexito pono komo. Ero komo tî mîn nahsîyatken̂e cewton komo me. Ewtoci mko marha nahsîyatken̂e ewto mîtwono komo. Osorwawno rma mîn nahsîyatken̂e tîrowon komo me, îh ken̂arî re.

12 Wara rma iitono komo yen̂epera thakwa xatken̂e Manases yepamtho komo Kananew kom ha. Tanî rma nas amna, ketken̂e cerewre ro mak.

13 Pahkî exitaw Ixaw Yana komo kar̂pe n̂he tak n̂ehtîketken̂e. Ero yimaw tak Kananew komo napicketken̂e epeman me. Tanton komo me mak n̂iir̂atken̂e. En̂epetîkara rma xatken̂e okwe. Ero wa xatken̂e.

14 Ero yinhîrî on wara ketken̂e Xose yepamtho komo Xoswe ya, Ahce kacho amna ya mîmce cewn̂e mak roowo raconho amna yeken me? Yaake nas amna okwe. Amna wakrekn̂e xa ham Kporin komo amna yepamrî ke, ketken̂e.

15 Taa, kekn̂e Xoswe, yaake rma mat ham. Wahra na nai îh ken̂arî Eprain komo nahsîtho. Ero ke etocoko comota pona n̂he Peresew komo cheka, tooto imo komo cheka marha. Iitono tak amacoko awewton komo me amararîn komo me marha, kekn̂e.

16 On wara tko n̂eyukyatken̂e Xose yepamtho komo, Wahra rma tko nasî îîpî ken̂arî. Kananew komo naxe woskara po reha. Tarara yosom komo mîkyam, pehu ciixapu yosom komo kopi. Ero wa naxe Bece Sean pono komo, yîmîtwono komo marha. Ero wa marha naxe Xisirew woskaran pono kom hara, ketken̂e Xoswe ya.

17 Yîmtaka so tko n̂eyukyakn̂e Xoswe on wara, Eprain komo ya kekn̂e, Manases komo ya marha, Yaake rma wa maxe, kar̂pe marha. Cewn̂e mak arowon komo ahsîra maxe.

18 Îh ken̂arî rma tko mahsîyaxe comota ha. Ero rma amacoko awewton komo me, miyanî rma ahsîtîkacoko. Yaaro rma mîîkexe. Tarara yosom me rma re naxe Kananew komo, pehu ciixapu yosom me ha. Kar̂pe rma re naxe. Wara rma iyopono me tko maxe amyamro. Ero ke en̂epecoko, kekn̂e. Ero wa kekn̂e Xoswe Xose yepamtho komo ya.