Taa, Xose yepamtho komo rowon wokpan tak wekatîmyas hara awya so. Xotaw yecihtai n̂ihciyasî, miya cesî Xer̂ko nakwarî yaka roro. Ewto mehxa nasî yînakwarî komo resce n̂ixa. En̂exa tak cesî axawa imo pore. Xer̂ko pore rma cesî îh ken̂arî pona, Betew pona roro.

2 Betew poi ces hara Rus pona. Ahkita komo yemyatwo roro cesî Ataroce pona hara.

3 En̂exa xa hara cesî oesce yaw roro Xapreci komo cheka hara. Bece Oron pona roro cesî uman pona roro ha. Xese pore cesî miya tuuna imo kwaka roro ha.

4 Ero yimaw tak tîrowon nahsîyatken̂e Xose yepamtho komo ceken komo me. Manases komo, Eprain komo marha, ero wa xatken̂e Xose yepamtho kom ha.

5 On wara nasî Eprain komo rowon wokpan, Ataroce Ata poi cesî resce n̂ixan, Bece Oron pona cesî, yaasîno pona ha.

6 En̂exa cesî tuuna imo kwaka roro. On wara nasî mehxan hara wokpa nohce n̂ixan ha, Mikmeta poi poku kesî resce yaw roro tak. Taanace Siro panari cesî Xanoa panari marha resce n̂ixa ha.

7 Xanoa poi tak cesî Ataroce pona, Naarace pona marha. Xer̂ko panari ces hara miya tak Xotaw yecihtaka roro.

8 Mehxa hara wokpa cesî Tapua poi oesce yaw roro Kana kwaka aporî kwaka. Ero yaw roro rma cesî tuuna imo kwaka roro. Ero wicakî xakn̂e Eprain yepamtho komo nahsîrî ceken komo me ha.

9 Manases yepamtho komo rowon po rma xakn̂e anarî ewto komo Eprain komo nahsîrî kom hara. Ewtoci ke tîmîtwonoi xakn̂e mîn ewto komo.

10 Xese po xatken̂e rma Kananew komo okwe Eprain komo rowon po. N̂examro yen̂epera xatken̂e okwe Eprain komo. Yîchew so rma naxe oroto okwe. Tanton komo me mak n̂iir̂axe Eprain komo, tapickaxmu me ha. Ero wa n̂iir̂axe.