Taa, ero yinhîrî tak poritomo me tak xakn̂e Xoswe. Yaake cimn̂ipu tak xakn̂e noro yewrutoponho. Ero ke on wara kekn̂e Kporin komo yîwya, Poritomotho me tak mas okwe. Miya rma tko nasî anahsîrî komo aweken komo me.

2 On wicakî nasî ahsîn komo rma, Piristew komo yeken, Xesuru komo yeken marha.

3 Sio pona rorono hara Exitu xehxan resce n̂ixan ha. Ekron pona rorono marha nasî nohce n̂ixan pona rorono ha. Kananî rma mîn roowo. Ero pono komo kayaritomon komo naxe 5 ha. Piristew komo mîkyam. On wara nasî n̂examro yewton yosotî, Kasa, Astoce, Askaron, Kace, Ekron. Ero wicakî nasî Piristew kayaritomon komo yewton. Apeu komo rowon marha.

4 Suu yaw roro nasî Kananew komo rowon miya rma. Meara rowon marha nasî, Siton pono komo yewton mîn ero pona rorono ha. Apeke pona roro marha nasî. Amohew komo rowon yemyatwono mîn Apeke.

5 Xebarita komo rowon marha nasî. Ribanu marha nasî, ahnoro kaamo yepatakacho yaw rorono. Anahsîrî komo mîn ahnoro Baaw Kace pona rorono, Ehmon Yîpîn yexenaka rorono ha, Amace pona rorono marha. Ero wa nas anahsîrî komo rma.

6 Naxe marha îh pono komo, Ribanu pono kom ha, Misîrepoce Main pona rorono kom ha. Sitoniu komo rma mîkyam ahnoro. N̂examro war̂mapesî rma awya so Ixaw Yana komo ya. Yîrowonthirî komo men ekamko Ixaw Yana komo ya. Men̂ekacho yar̂marî ke yînahsîrî komo ekamko eken komo me, awya wîîkekn̂e pahxa ero wa kachonho yaw roro rma ekamko ha.

7 9 tribu mak tak nasî ahsîn̂e komo, Manases komo marha naxe ahsîn̂e komo me yîraco me mak. Ero wa naxe ahsîn̂e komo. Ero ke eken komo me ekamko yîwya so, kekn̂e Kporin komo Xoswe ya.

8 Pahxa rma tîrowon komo nahsîyatken̂e anarî kom hara, Manases yîraconhîrî kom hara. Huben komo marha nahsîyatken̂e tîrowon komo, Kace komo marha. Xotaw yeco pono nahsîyatken̂e n̂examro reha. Moises pen nîmîtho rma mîn nahsîyatken̂e.

9 On wicakî nahsîyatken̂e tîrowon komo, Aroe pona rorono, Ahnon yecihtawno pona rorono ha. Iito nasî ewto aporî yecihtaw. Ero pona rorono nahsîyatken̂e tîrowon komo. Meteba Woskaran marha nahsîyatken̂e Cimon pona rorono ha.

10 Sion pen yewtontho marha nahsîyatken̂e ahnoro Amohew pen komo kayaritomon pen yewtontho. Esbon pononho pen mîk xakn̂e. Noro pen rowontho nahsîyatken̂e Amon komo tîrowon komo me, wokpan pona rorono ha.

11 Xireace marha nahsîyatken̂e tîrowon komo me. Xesurew komo rowontho marha nahsîyatken̂e, Makatew komo rowontho marha. Ehmon Yîpîn marha nahsîyatken̂e, Basan marha Sawka pona rorono ha.

12 Ahnoro Oki pen rowontho nahsîyatken̂e, Basan pono komo kayaritomonho pen rowontho. Asakî xakn̂e noro pen yewtontho, Astaroce, Etîrei, ero wa xakn̂e noro pen yewtontho. Tooto imo yepamtho tî mîk xakn̂e. Asakî mak tak xatken̂e tooto imo komo noro pen waihyataw. N̂examro pen nar̂mekn̂e Moises pen. Yîrowonthîrî komo nahsîyakn̂e Ixaw Yana komo rowon me.

13 Xesurew komo yen̂epera tko xatken̂e okwe Ixaw Yana komo, Makatew komo yen̂epera marha xatken̂e okwe. Iito rma naxe n̂examro oroto Ixaw Yana komo chew rma. Ero wa naxe. Ero wa xakn̂e Manases yepamtho raconho komo rowon, Huben komo rowon marha, Kace komo rowon marha.

14 Repi yepamtho komo rowonî ro reha tîmîhra xakn̂e Moises pen. Takn̂isom komo nîmyaxe Kporin komo ya, ponaro Ixaw Yana komo yehtopo ya, ero rma nasî Repi komo nahsîrî me. Ero wara rma kekn̂e Kporin komo yîwya so.

15-16 On wara xa xakn̂e Huben komo rowon, Moises pen nîmîtho yîwya so ha, Aroe pona rorono mîn xakn̂e, Ahnon yecihtawno mîn xakn̂e Aroe. Ero yecihtaw nasî ewto ero marha nahsîyatken̂e. Meteba Woskaran marha nahsîyatken̂e ahnoro.

17-20 Ewto marha nahsîyatken̂e yaake, Esbon, ero mîtwono komo marha woskara pono kom ha, Cibon, Bamoce Baaw, Bece Baaw Meon, Xasa, Ketemoce, Mepace, Kiriatain, Sibma, Serece Saa, îh pono, woskara pono ha, Bece Peo, Piska Yîpîn, Bece Xesimoce.

21 Ahnoro ewto komo nahsîyatken̂e woskara pono kom ha. Sion pen rowontho nahsîyatken̂e ahnoro, Amohew pen komo kayaritomon pen rowontho ha. Esbon pononho mîk xakn̂e Sion pen. Noro pen nar̂mekn̂e Moises Micianita komo kayaritomon pen yakro rma. On wara xakn̂e Micianita kayaritomon pen yosotî komo, Epi, Heken, Suru, Uru, Heba. Kayaritomo komo rma re mîkyam xatken̂e Sion maywen me cehsom kom ha tko. Iitono komo mîkyam xatken̂e Sion rowon pono kom ha.

22 Mer̂pono pîn komo nar̂metken̂e Ixaw Yana komo, iitononhîrî pen komo. Baraw pen meero waihketken̂e Beo mumutho pen ha. Yaskomonhîrî tî mîk xakn̂e noro pen.

23 Taa, xehxa Huben komo rowon wokpan xakn̂e Xotaw Yepu hara. Ero wa xakn̂e Huben yepamtho komo yewton, ewtoci komo marha. Iitono re nahsîyatken̂e noro re komo.

24 Taa, on wara xakn̂e Kace komo rowon hara, Moises pen nîmîtho yîwya so hara,

25 Xase nahsîyatken̂e tîrowon komo me, Xireace pono marha nahsîyatken̂e ewto komo, Amon yepamtho komo rowon raconho marha nahsîyatken̂e Aroe pona rorono ha. Haba mîtwono mîn Aroe.

26 Esbon marha nahsîyatken̂e n̂examro miya rorono. Hamace Mispa pona rorono, Betonin pona rorono marha. Maanain marha nahsîyatken̂e Tebi rowon wokpan pona rorono ha.

27 On ewto komo marha nahsîyatken̂e woskara pono komo, Bece Aran, Bece Nimra, Sukoce, Sapon. Ahnoro Sion pen rowontho nahsîyatken̂e, Esbon pono komo kayaritomon pen rowontho ha. Xotaw rma xakn̂e yîrowon komo wokpan. Eeco po xakn̂e miya roro Kin̂erece n̂ikithon pona roro, resce n̂ixa.

28 Ero yipu nahsîyatken̂e. Ewto komo nahsîyatken̂e, ewtoci komo marha. Kace komo mîkyam nahsîyatken̂e ceken komo me. Iitono re nahsîyatken̂e noro re komo.

29 Taa, tîrowonî ro komo marha nahsîyatken̂e Manases komo yîraconhîrî kom hara. Moises pen nîmyakn̂e yîwya so. Iina re n̂esekenmetken̂e noro re me cehsom komo.

30 Yînahsîrî komo wokpan tan wekatîmyasî, Maanain poyerono nahsîyatken̂e. Ahnoro Basan nahsîyatken̂e tîrowon komo me. Oki pen rowontho mîn nahsîyatken̂e, Basan kayaritomon pen rowontho ha. Xai pono komo nahsîtîketken̂e ewto komo. 60 tî xakn̂e iitono ewto kom ha.

31 Xireace raconho nahsîyatken̂e. Astaroce marha nahsîyatken̂e, Etîrei marha. Oki pen yewtontho mîn xakn̂e, Basan pono kom ha. Iitono xa nahsîyatken̂e Maki yepamtho komo, Manases pen mumutho yepamtho kom ha. Maki yepamtho komo poyino komo mak iitono nahsîyatken̂e. Iito re n̂esekenmetken̂e noro re me cehsom komo.

32 Ero wa ewtomano n̂iir̂akn̂e Moises pen Moabe woskaran po cexitaw, Xotaw yeco po cexitaw. Xer̂ko yemtacho po xakn̂e resce n̂ixa, iito cexitaw ewtomano n̂iir̂akn̂e.

33 Repi yepamtho komo reha ewtomara xakn̂e Moises pen. Kporin komo xa nasî yînahsîrî komo, ponaro Ixaw Yana komo yehtopo ha. Ero wara rma kekn̂e yîwya so. Ero wa kekn̂e Kporin komo yîwya so.