Taa, Kanan rowon nahsîyatken̂e Ixaw Yana komo ceken komo me. On wara xatken̂e ekamn̂e komo, Ereasa, Kporin komo yaka cewomsom, Xoswe, Nun mumutho ha, tribu yantoman̂e komo, Ixaw Yana komo yantoman̂e kom ha, noro yipu komo xatken̂e yîrowon komo yekamn̂e me.

2 Taa, xatken̂e rma anarî tribu komo. 9 rma ka xatken̂e tribu komo. Ero wicakî xatken̂e tribu komo cekenî ro komo yahsîn̂e pîn kom ha. Noro yipu komo tak cekenî ro komo nahsîyatken̂e Kanan pono ha. Men̂ekacho nar̂metken̂e yînahsîrî ro komo yîhtînotome. Moises pen ya kekn̂e Kporin komo ero yaw roro rma nahsîyatken̂e.

3 Pahxa rma ceken komo nahsîyatken̂e anarî tribu komo reha, 2 komo, tribu poyinonho marha. Moises pen nîmyakn̂e yîwya so Xotaw yeco po ka exitaw so, resce n̂ixa exitaw so ha. Repita komo yekenî ro tîmîhra reha xakn̂e anarî komo yekenmetaw ha.

4 On wara tko xatken̂e Xose pen yepamtho komo, asak hakno tribu me xatken̂e n̂examro reha. Xatken̂e Manases komo, Eprain komo marha. Ero wa xatken̂e Xose yepamtho kom ha. Tîrowon yahsîra xatken̂e Repita komo reha. Cewton komo rma re nahsîyatken̂e ceken me so. Woskara komo marha nahsîyatken̂e ha re toh komo nahmachome paaka komo, kahn̂eru kom ha. Ero yipu mak nahsîyatken̂e Repita komo.

5 Taa, Ixaw Yana komo ya reha Kanan rowon n̂ekamyatken̂e. Kporin komo kekn̂e Moises pen ya ero yaw roro rma n̂ekamyatken̂e. Ero wa n̂ekamyatken̂e.

6 Ero yinhîrî tak Xuta komo mokyatken̂e Xoswe yaka. Xiwkaw po exitaw mokyatken̂e. Karebe marha mokyakn̂e n̂examro yaan̂e me, Xepon̂e pen mumutho, Kenesew komo yepamtho ha. On wara tak kekn̂e Karebe Xoswe ya, Ai oyakno, pahxa Kporin komo nîmtapowakn̂e kpoko so Kates Bahneia po kexitaw so. Apoko kekn̂e, opoko marha. Ero rma mencekn̂e.

7 40 cimn̂ipu mak xakn̂e oyewrutoponho ero yimaw. Ero yimaw oyen̂epekn̂e Moises pen, Kporin komo yantonînho pen. Kates Bahneia poi oyen̂epekn̂e Kanan rowon yenso. Ero yinhîrî tak ekaci komo wekatîmyakn̂e opoyino komo ya. Oropotaw wîhtînoyakn̂e ero wara rma wekatîmyakn̂e yîwya so.

8 Anarme tko n̂ekatîmyatken̂e oyakno komo, oyakro toxapunhîrî komo. Kpoyino komo nahwoketken̂e kica anarme ekatîmrî ke so. Ero warahra reha wîxakn̂e ow. Oporin Kaan mak wewehcakn̂e xa anwekîra ro makî.

9 Ero wa oyexirî ke on wara kekn̂e Moises pen owya, Amn̂e tak arowon mahsîyasî anapikîthîrî rma. Awepamthîrî komo meero nahsîyaxe eroromerono me. Ero wa mahsîyaxe Oporin Kaanî mtapotachonho yewetîtîkarî ke awya, kekn̂e owya. Yaaro xa wîîkes awya, cemaro pîn me ro mak, kekn̂e owya.

10 Ero ke waipîra rma or̂mexpekn̂e Kporin komo tîmtapotachonhîrî yaw roro rma. 45 cimn̂ipu tak nasî ero wa kachonho Moises pen ya. Ero wicakî waipîn me oriyasî Ixaw Yana komo yetar̂ataw axawa imo pore. Ero ke tan wasî waipîra rma. 85 cimn̂ipu tak nasî oyewrutoponho oroto.

11 Moises pen ya oyen̂epetoponho yimaw wîxakn̂e kar̂pe ero wara rma was oroto. Sowtatu me tîtosom me wîxakn̂e ero yimaw kar̂pe, ero wara rma was oroto. Tmohsom me marha was hara kar̂pe.

12 Ero ke tantono îîpî cma re mîmyas owya. Ero mahsîyasî amn̂e, kekn̂e Kporin komo owya, ero rma cma re mîmyasî owya. Amoro rma mencekn̂e Enake yepamtho komo yehtopo. Iito men naxe Enake yepamtho komo kopi. Porinî ro mak mîn n̂examro yewton kopi. Twacaye so nasî, kacho mencekn̂e. Oyakronome rma na Kporin komo. Ero ke Enake yepamtho komo na wen̂epe yîmtapochonhîrî yaw roro rma, kekn̂e. Ero wa kekn̂e Karebe Xoswe ya.

13 Ero ke Xoswe tak nîmtapowakn̂e Karebe Xepon̂e wakrecho poko, Kporin komo ya wakrecho poko. Ebron tak nîmyakn̂e yîwya eken me.

14 Ero ke Ebron tak nasî Karebe yeken me, Xepon̂e pen mumutho yeken me, Kenesew pen mumutho yeken me ha. Ero nahsîyakn̂e Kporin komo yewetîtîkarî ke.

15 Pahxa anarî me xakn̂e Ebron yosotî. Kiriace Ahba xakn̂e osotî ero yimaw. Ahba pen yosoke xakn̂e. Yukurumîkno xa mîk xakn̂e Ahba pen tpoyino komo yopo, Enake yepamtho komo yopo. Ero wa xakn̂e. Taa, ero yimaw tak etar̂mara xatken̂e Kanan pono komo. Ero wa xatken̂e.