On wara kekn̂e hara Moises Ixaw Yana komo ya, On wara naxe Kporin komo mîn yenîn̂e komo, tîrowonî ro yahsîra ro mak naxe. Repita komo mîkyam tîmsom pokono komo. Ixaw Yana komo rma re nahsîyaxe tîrowonî ro komo. Pîra reha naxe Repita komo. Kporin komo ya tîmsom n̂ekyaxe poyino komo. Ero raconho nakn̂iyaxe Kaan ya tîmsom me. Ero raconho hara nasî Repita komo yotî me, yînahrî komo me marha, wokru komo me marha.

2 Tîyanan komo yakro rma ahsîra naxe tîrowon komo. Kporin komo xa nasî n̂examro nahsîrî. Ero wara rma kekn̂e Noro yîwya so.

3 Bui na n̂ekyatu Ixaw Yana komo anarimaw, oper̂a na n̂ekyatu anarimaw. Kporin komo ya tîmsom me n̂ekyatu. Noro yipu yekyataw Kporin komo mîn yenîn̂e komo yotî me nîmcowpe apothîrî, iyohyathîrî marha, wethîrî marha.

4 Puruma yeperîrî raconho marha tîmcoko yîwya so, yihcirî me potuxapu raconho ha. Sepata yeperîrî raconho marha tîmcoko, ero warai tîmcoko. Uupa yukun raconho marha tîmcoko yîwya so, aseci raconho marha. Awoku pocitho raconho marha tîmcoko, oper̂a pocitho ha. Yihcirî me awotoxapu tîmcoko.

5 Repita komo xa nahsîyakn̂e Aporin komo Kaan tantonî ro komo me. Epamthîrî marha nahsîyakn̂e. Anarî komo yahsîra xakn̂e anarî tribu poyino komo. Repita komo mak n̂iir̂akn̂e tîwya tîmsom yakn̂in̂e me. Kporin komo mîn poko mak n̂etapickexe. Miya roro ero warai pokono me naxe.

6-7 Anarimaw on wara na nai anarî Repita, cewtonthîrî nahsîpînke meyeno ha, Ixaw Yana komo chewno ha. En̂exa tak mokya Kporin komo nahsîtho pona, ewto pona. Kaan yanme rma na n̂îhtînoyatu iina cesekenmacho komo. Iina tmokuche so n̂etapickacowpe Kaan yanmen poko. Kporin komo Kaan ya tîmsom pokono mîkro, kacho me tak n̂expe tpoyino komo wara xa marha, Repita komo wara. Kporin komo yantonî ro me naxe. Ero ke n̂examro encoko iyanan komo wara xa marha, Kaan mîn yawno pokono ro komo wara xa marha.

8 N̂examro wara xa marha nahsîpe tootî Ixaw Yana komo n̂ekîtho poi, tînahrî komo marha. Ero yipu nahsîpe cekenhîrî yepetho yakro rma, kekn̂e Moises yîwya so.

9 On wara marha kekn̂e yîwya so, Amn̂e Aporin komo Kaan nîmrî pona mepatakexe. Iina awepatakache so iitononhîrî komo yehtopo yukukmara ro mak men ehcoko. Kicicme ro mak nasî n̂examro yehtoponho.

10-11 On warai yenî xera ro mak nasî Kporin komo achew so, tîmxîkrî yakn̂in̂e yenî xera nasî. Tumumuthîrî, cemsîthîrî, ero warai yakn̂in̂e yenî xera nasî. Erem pokono yenî xera nasî, worokyam yentan̂e, Kîhroponoman̂e mîn ha, kan̂e, worokyam yosom, waihkacho pokono, yaskomo, waixapu pen komo yan̂ikn̂e. Ero warai komo yenî xera ro mak nasî achew so.

12 Kicicme ro mak naxe ero yipu pokono komo Kporin komo ya. Ero wa naxe Kanan pono komo. Ero wa exirî ke so n̂examro nar̂mapesî Aporin komo Kaan awya so.

13 Kicicitho mîkro, kacho me exihra ro mak men ehcoko Aporin komo Kaan ya.

14 On wara naxe iitono komo, ekenhîrî komo mahsîyaxe n̂examro ha, erem pokono mtapotarî yentan̂e me naxe, worokyamu mtapotarî yentan̂e me marha. Ero yipu poko xa marha ehcoko amyamro hara yiixe awexitaw so, kahra ro mak nasî Aporin komo Kaan awya so.

15 Taa, on wara tak nasî Aporin komo Kaan amn̂e, anarî tak n̂iir̂asî aweronoman̂e komo me hara, apoyino komo rma. Owarai rma Mîk n̂iir̂asî. Noro xa tak mencexe.

16 Amtapotachonhîrî komo rma n̂ewehcasî Kaan. On wara mîîketken̂e pahxa owya Orebe Yîpîn yamrinaw kexitaw so cesenmeso, Kporin komo Kaanî mtapotarî yenta xera ro mak tak nas amna. Entache xa hara amna mak waihyas okwe. Ero yipu yenî xera marha nas amna wehto, porinî ro. Amna mak waihkes okwe, mîîketken̂e.

17-18 Ero ke on wara kekn̂e Kporin komo owya, Kir̂wan̂he nasî yîmtapotarî komo. Amn̂e n̂examro weronoman̂e xa hara wiir̂asî anarî hara awarai rma ha re. N̂examro poyino rma ero warai me wiir̂asî. Yîmtaka wiir̂asî omtapotarî. Omtapotarî tak n̂ekatîmtîkesî yîwya so, Ero wa kacho ekatîmko, kacho n̂ekatîmtîkesî, omtapotarî ha, kekn̂e owya.

19 Anarî komo rma na omtapotarî yentara natu. Kaanî mtapotarî xa tan wekatîmyas awya so, kacho yentara natu. Ero wa exitaw so n̂examro men wen̂ekesî.

20 Anarimaw anarî na nai aweronoman̂e kom ha tî. Kporin komo mtapotarî xa tan, nîîke na. Oyanmera ro mak ero wa nîîke. Anarimaw hara na noro yipu n̂ekatîmya anarî mtapotarî, ponaro anarî komo yehtopo mtapotarî ha. Ero warai aweronoman̂e komo waihkacoko men.

21 On wara tko na mîîketu, Ahce wa amna nîhtînoya ekatîmn̂e komo mtapotarî, Kporin komo mtapotarî pîn mexe mîn n̂ekatîmya ham okwe, kachome amna ya yaarono pîn poko? mîîketu na.

22 On wara ehcoko yîmtapotarî komo poko, Entacoko ka, ero wa men nas amn̂e, kesî Kporin komo awya so, kacho yîwya. Ero wa kacho yaw roro exihra rma exitaw amn̂e, Kporin komo mtapotarî pîn mîn n̂ekatîmye ham, kacoko. Tanme ro mak n̂ekatîmye ham okwe, kacoko. Ero ke noro yipu pona erasîra ro mak ehcoko, kekn̂e. Ero wa kekn̂e Moises Ixaw Yana komo ya.