On wara marha kekn̂e Moises Ixaw Yana komo ya, Amn̂e tak Kanan pono komo nar̂mapesî Kporin komo awya so. N̂examro yekenho nîmyasî awya so. Ewtonthîrî komo po tak maxe, yîmînthîrî komo yaw so ha.

2 Ero wa awexitaw so tak 3 etacicoko ewto arowon komo rakatawno, Aporin komo nîmyasî awya so ero rakatawno ha.

3 Esama marha yînankacoko ero komo ponan. Ero yinhîrî arowon komo wokpamacoko osorwaw ehtome yîraconhîrî komo. Ero wa arowon komo wokpamacoko, Aporin komo Kaan nîmyasî aweken komo me ero ha. Ero wa ciicoko waihkano rin̂enho yemahcitopo me ewto pona meyeno pîn pona.

4 On wara na nai apoyino komo amn̂e, tpoyino pen na waihke anarimaw. Waihkache yukurun me ciixapu pona n̂emahciya, ewto pona, waipîra cehtome. Twen̂ekarî na xakn̂e tpoyino waihketaw. Twaihkapore nasî kica, kan̂e pînî ro mak noro yipu komo.

5 On wara na natu anarî komo anarimaw, comota pona na cetu weewe yamaxi tpoyino komo yakro. Anarimaw weewe yametaw yawaka n̂emoske. Tpoyino na n̂etape twaihso ro okwe. Ero ke noro pen wapatho n̂emahciya tak etacixapu pona, ewto pona waipîra cehtome. Ero wa nai ewto komo, waihkano rin̂enho yukurunpetopo me.

6-7 Mooxe xa exitaw ewto, yukurunpetopo, waixa pen yananînho na n̂epor̂a esama yaw. Waihke tak na okwe. Twaihkaxmu mera cehsomu rma na mîk waihke okwe, Noro men waihkes amn̂e, kan̂e pînînhîrî na mîk ha. Noro yipu waihkara ehtome waihkaxapu pen yepanîn̂e, 3 etacicoko ewto yukurun me cehsom kom ha, wîîkes awya so.

8 On wara na mat amn̂e, apanatanmetopo komo na mewehcatu watohra ro mak. Aporin komo xe na matu. Noro yehtopo yaw roro na matu. Ero wa awexitaw so arowon komo n̂enmamnoyasî Noro porin me cehso ro. Ero wara rma kekn̂e aporin pen komo ya. Yaaro xa kekn̂e yîwya so, cemaro pîn me ro mak. Yîwya so kekn̂e ero wicakno rma na nîmya awya so.

9 Kporin komo mtapotarî na mewetîtîketu awya so wekatîmyasî oroto ero. Aporin komo Kaan xe marha na matu. Noro yehtopo yaw rorono me marha na matu. Ero wa awexitaw so 3 xa hara etacicoko ewto komo, ero warai me xa marha ehtome so.

10 Ero wa etacicoko kir̂wan̂he ehtome arowon komo, Aporin komo Kaan nîmrî awya so aweken komo me. Ero warai etacicoko tohnaw waihkano cirihra ro mak awehtome so okwe. Tohnaw waihkano ciriche rma awya so tooto wapatho me men awen̂axe so okwe Kporin komo.

11 On wara tko na nai apoyino anarimaw, tpoyino xera na nai okwe. Ero ke esama yakumyaw wapancesî yiixera cehtopo. Noro mokuche waihkesî thakwa okwe. Ero yinhîrî waihkache n̂emahciyasî tak noro yipu meero ewto pona, kukurun me ciixapu pona.

12 Ero wa emahciche noro yipu on wara n̂ehcowpe noro yewton pono komo poritomo kom ha. Emahcixapu wecan komo n̂en̂epecowpe ehtome noro yewton pona. Ekîche yîwya so waixa pen yepanîn̂e ya rma nîmcowpe waihkachome tak.

13 Yîpînîn yawra ro mak men ehcoko. Kicicme exihnî waihkan̂enho men twaihkapore nasî. Noro yipu achewra so ro mak cirpore nasî esemetanmekîra awehtome so Ixaw Yana komo, kekn̂e Moises yîwya so.

14 On wara marha wîîkes awya so, kekn̂e Moises yîwya so, amn̂e arowon komo pona awtoche so, Aporin komo Kaan nîmîtho pona, awekenî ro komo tak mahsîyaxe. Wokpa na nai iito pahxan pen komo n̂iritho. Arowon komo kuknon me na nai iito. Ero wa exitaw iito rma n̂expe wokpa anana ewyetakara ro mak.

15 On wara marha wîîkes awya so, kekn̂e Moises, on wara na mat amn̂e, kicicme xa apoyino komo yehtopo na mencetu. Ero wa xakn̂e noro kica, kacho na mencetu. Kicicme ehtoponhîrî n̂ekatîmya enîn̂enhîrî awya so. Cewn̂e mak exitaw enîn̂enhîrî noro mtapotarî yanme mak, Kicicme n̂ex ham, kahra ehcoko. 2 tko na natu ekatîmn̂e komo, 3 na natu anarimaw. Ero wicakno komo mtapotarî yanme tak, Kicicme n̂ex ham, kacoko rma.

16-17 Anarimaw tohnaw ro mak ekatîmn̂e n̂ekatîmya tpoyino yehtoponho. Ero wa ekatîmyataw asakno roro rma aacoko Kaan yewton pona. Tîmsom pokono komo yaka aacoko, cesen̂ekaxmu yentan̂e ro komo yaka marha, ero wa ciixapu komo yaka.

18-19 Ero ke kicicme ehtopo n̂entatîkacowpe entan̂e ro komo takîhso xa. Cemaro me na n̂encetu ekatîmn̂e mtapotarî. Tohnawno me mak na n̂encetu tîyanan pokono, yîmtapotarî, Kicicme n̂ehxe, kacho ha. Ero wa encetaw yîwya so noro xa matko panarecoko kicicme ehtopo yekatîmn̂e, tohnaw ekatîmn̂e ha. Tîyanan yemetanmekpo xe xakn̂e ero wa xa marha panarecoko noro, tohnaw ekatîmn̂enhirî ha. Ero wa etakir̂wamacoko kicicitho ken̂ehra tak awehtome so.

20 Noro panarechonho tak n̂encetu apoyino komo ahnoro. N̂eraswatu tak ero wa exihra ro mak tak cehtome so n̂examro hara.

21 Tohnaw ekatîmn̂enhîrî komo pînîn yawra ro mak ehcoko. On wara xa ehcoko, waihkano ciri xatînhîrî waihkacoko hara, ewkano ciri xatînhîrî ewkacoko hara, amokano ciri xatînhîrî amokacoko hara, yîhtakano ciri xatînhîrî yîhtakacoko hara. Ero wa xa ehcoko, kekn̂e. Ero wa kekn̂e Moises Ixaw Yana komo ya.