On wara marha kekn̂e Moises Ixaw Yana komo ya, Awoh komo mîwaiketu anarimaw so bui ha na, oper̂a na anarimaw. Aporin komo Kaan ya tîmsom me na mîwaiketu. Ero wa tîmyataw tupunporem mak tîmcoko. Yupunpontho tîmîhra ehcoko yîwya. Kicicme ro mak nasî yîwya noro yipu tîmtopo kica.

2-3 On wara marha wîîkes awya so anarî poko hara, on wara na nai anarimaw awewton komo pono, Aporin komo Kaan nîmîtho pono, kicicme na nai Kporin komo Kaan ya. Kîîrî na nai ero wara, wooxam ha na anarimaw. Kaanî mtapotarî yaw rorohra na nai, Oyewehcataw awya so kakronomexe so, kacho yaw rorohra. Yîmtapotarî yewetîra na nai, Ponaro anarî komo yehtopo poko ahwotara ro mak ehcoko, kacho yewetîra nai. Oporin xa amoro, kesî anarî ro komo ya. Kaamo ya rma nîîke ero wara anarimaw, nuun̂i ya na, xir̂ko komo ya ha na.

4-5 Ero wa ehtopo komo na mencetu. Entache etocoko takîhso entaxi, Yaaro xa na, kachome awya so. Ixaw Yana rma mîk kicicitho poko xa nasî kica, kacho na mencetu. Yaarono me xa yîhtînopuche awya so kicicme ehxapu tak aacoko awewton komo potaka rma. Kîîrî aacoko, wooxam marha. Iina tak waihkacoko toh ke.

6 Asakî na nai noro yipu yenîn̂enho, osorwaw ha na anarimaw, ero wicakî enîn̂enhîrî exitaw mak waihkacoko. Cewn̂e mak exitaw enîn̂enhîrî noro mtapotarî yanme waihkara ehcoko.

7 Waihketaw yihcirî me ka enîn̂enhîrî komo nar̂macowpe toopu, waihkacho ha. Ero yinhîrî ahnoro tak poyino komo nar̂macowpe hara waihkachome. Ero wa kicicme cehsom twaihkapore nasî apoyinonhîrî pen komo rma, kekn̂e. Ero wa kekn̂e Moises Ixaw Yana komo ya.

8 On wara marha kekn̂e noro yîwya so, Camkî tko na matu cesen̂ekaxmu yentan̂e komo anarimaw. Camkî na matu kicicme apoyino komo yehtopo poko, waihkano rin̂enho poko rma ha na. Camkî marha na matu noro yipu panarecho poko hara. Camkî marha na matu ahce na poko ceseseyusom komo poko. Ero wa awexitaw so etocoko amyamro cesen̂ekaxmu yentan̂e komo Aporin komo Kaan yewton pona.

9 Omîn yenîn̂e komo yaka etocoko, Repita komo yaka marha. Cesen̂ekaxmu yentan̂e ro yaka marha etocoko iitono yaka. N̂examro ya esekatîmcoko awesen̂ekacho komo. Ero ke n̂examro tak n̂etahcaxe cen̂ekaxmu yehtopo. Kicicme ehxapu mîkro kica, kexe. Kir̂wanî rma mîkro, kexe anarimaw. Ero wa cesen̂ekaxmu komo yehtoponho n̂etahcaxe entache.

10 Iitono komo mtapotarî yaw roro rma men ehcoko, Kporin komo yewton pono komo mtapotarî yaw roro ha. Yîmtapotarî xa ewetîcoko.

11 Apanatanmekyaxe so tak. Kicicme cehsom panarecho marha n̂etahcaxe. Ero ke yîmtapotachonhîrî komo yaw roro rma cen̂ekaxmu ciicoko. Kaari men wara etowra ehcoko, poowa men wara marha etowra ehcoko.

12-13 Anarimaw on wara na nai anarî apoyino komo, tîmsom pokono mtapotarî yewetîra na nai okwe. Kporin komo mîn yentopo pokono ro me nasî noro mtapotarî yewetîra na nai. Cesen̂ekaxmu komo yentan̂e ro mtapotarî marha na ewetîra nai. Ero ke noro yipu komo yewetîn̂e pîn men waihkacoko. Ero wa etakir̂wamacoko amyamro Ixaw Yana komo kicicitho komo exihra ehtome so achew so. Ero yinhîrî tak noro yipu pen waihkachonho tak n̂encexe apoyino komo ahnoro. Ero ke twerî tak naxe. Cesen̂ekaxmu komo yentan̂e ro komo yanwekn̂e pîn me tak naxe. Ero wa naxe, kekn̂e. Ero wa kekn̂e Moises Ixaw Yana komo ya.

14 On wara marha kekn̂e Moises yîwya so, Amn̂e Aporin komo Kaan nîmîtho pona awtoche so, iitononhîrî komo yewtontho tak mahsîyaxe. Iina tak mesekenmexe. Ero wa awesekenmache so on wara na mîîketu, Kîkayaritomon komo tak cirpore nasî. Tkayaritomoye so naxe anarî rowon pono komo, kîmîtwono kom ha. Ero ke kîkayaritomon ciicerî kîwyam hara, mîîketu na.

15 Ero wa ketaw awya so Aporin komo Kaan nmen̂ekatho mak ciicoko akayaritomon komo me. Apoyino komo mak ciicoko. Anarî yana cirihra ro mak ehcoko, apoyino pîn komo.

16 Akayaritomon komo ciriche on wara n̂expe noro, mer̂pora ahsîra n̂expe tooku kawaru. Exitu pona en̂epeno cirihra marha n̂expe kawaru yahsîn̂e komo. On wara kekn̂e Kporin komo awya so, Iina xa marha tohra tak ehcoko Exitu pona hara, kekn̂e.

17 On wara marha cexpore nasî akayaritomon komo, mer̂pora ahsîra marha n̂expe cipic hara. Mer̂pora cipici yahsîche yîropotarî tak men n̂etaknames okwe Kporin komo ponarora tak ehtome okwe. Mer̂pora ahsîra marha n̂expe prata, ooru marha.

18 On wara marha n̂expe noro kayaritomo me cexiche, on apanatanmetopo komo mewrepope karita poko. Omîn yenîn̂e komo yaw nasî apanatanmetopo mewrexapu, Repita komo yaw, ero rma xa mewrepope tîn̂enîrî.

19 Mewreche tîhyaka rma n̂irpe. Ero tak n̂enpe kaamo po roro. Miya roro n̂enpe twaihtopo pona roro. Ero wa n̂enpe Tporin Kaan ponaro xa tak cehtome. Ero wa n̂enpe on apanatanmetopo yewetîn̂e me xa tak cehtome.

20 Ero wara n̂enpe roro takno komo yopono me esehtînopîra marha cehtome, kpanatanmetopo poko eponarononkara cehtome marha. Kaari men wara etowra cexpore nasî, poowa men wara marha etowra cexpore nasî. Ero wa exitaw pahkî xa nasî kayaritomo me, pahkî marha naxe epamthîrî kom hara kayaritomo me Ixaw Yana komo poko. Ero wara naxe kpanatanmetopo yewetîn̂e me roro exitaw so, kekn̂e. Ero wa kekn̂e Moises Ixaw Yana komo ya.