On wara marha kekn̂e Moises Ixaw Yana komo ya, Abibe ponaro ehcoko nuun̂i ponaro. Ero po roro eseresmacoko Kwatotoponhîrî komo kukmacho me Aporin komo Kaan yanme. Ero po Abibe po awekyatken̂e so Exitu poi. Kosope awekyatken̂e so.

2 Ero ke on wara ciicoko awotî Komo, Kwatotoponhîrî kukmacho me tonosom, ero nuun̂i po awokuthîrî komo waihkacoko Aporin komo Kaan ya tîmsom me. Oper̂a waihkacoko, paaka na anarimaw. Cewton me Kaan nmen̂ekatho po waihkacoko.

3 Noro pun ton̂etaw awya so wahrututpamnoxapu tokuhra ehcoko ero yetahru. 7 kaamo wahrututpamnî mak tohcoko. Awesemetanmekyatawno komo wara rma tohcoko. Cerekan̂e xa mîmokyatken̂e Exitu poi. Ero ke ero warai tohcoko ero yimaw roro Exitu poi amohtoponhîrî komo ponaro rma awehtome so. Miya roro ero ponaro ehcoko awaitopo komo pona roro.

4 Wahrututpamnotopo exihra ro mak men n̂expe ahyaw so ero yimaw 7 kaamo wicakî. Arowon komo poko hak exihra n̂expe. On wara marha ciicoko awotî kom hara Kporin komo ya tîmxapunhîrî, yihcirî kaamo po tonotîkacoko kokmamche rma. Ero yakwenho yîmtora ro mak ehcoko enmachome ahyaw so.

5-6 Mîn hak ewto po waihkara ehcoko Kwatotoponhîrî komo kukmacho me tonosom. Mer̂pora nas amn̂e Aporin komo Kaan nîmîtho awya so ewto mko. Ero mko po tko waihkara ehcoko. Cewton me Kporin komo nahsîyasî amn̂e tosotî yeken me, ero po mak waihkacoko. Iito mak Kwatotoponhîrî komo me tonosom waihkacoko kokmamyataw. Exitu poi amohtoponhîrî komo yimaw xa waihkacoko.

7 Yupucoko tak, tonocoko marha. Aporin komo cewton me yînahsîthîrî po mak tonocoko. Enmapuche tak etocoko amîn komo yaka hara.

8 Ero yinhîrî tak 6 kaamo wahrututpamnî mak tohcoko awru komo. 7-nhîrî po tak esenmecoko Aporin komo Kaan poko. Ero po etapickara ehcoko, kekn̂e. Ero wa kekn̂e Moises Ixaw Yana komo ya.

9-10 Taa, on wara marha wîîkes awya so, kekn̂e hara Moises, anatîrî komo puruma yakpîche eeputhîrî mîhkocexe maria ke. Yihcirî me xa yîhkototopo n̂ixa ro yukuknomacoko kaamo 7 tominku hara. 7 tominku yenatîche ahwotacoko xa hara. Tominku komo Yukuknomaxapu po ahwotacoko Aporin komo Kaan poko. Ero yimaw anatîrî komo yeperîrî raconho tîmcoko yîwya. Awanme ro so mak yîhtînocoko anîmrî komo yîwya. Mer̂pono pîn ke na awakretu so Aporin komo Kaan anatîrî komo yeperîrî ke. Ero wa awakreche so mer̂pora n̂he tîmcoko yîwya.

11 Aporin komo Kaan yewton po ahwotacoko. Amyamro ahwotacoko, amumuru komo, awemsîrî komo, awanton komo, kîîrî, wooxam, Repita komo, awewton pono komo, anarî yana komo, yîmîhnî komo, iin̂omnî komo, ero warai komo yakro ahwotacoko awewton pono komo yakro. Noro n̂etahcasî ewto tosotî yeken me iina ahwotacoko.

12 Pahxa antonano me awehtoponhîrî komo ponaro ehcoko miya roro. Exitu po mîxatken̂e iitono yanton me so. Ero ke apanatanmetopo komo ponaro men ehcoko, oroto wîîkes awya so ero ponaro ehcoko.

13 Taa, ero yinhîrî Mîîmoci Yaw Awenmacho komo nas hara awahwotacho me xa hara. Puruma yatho potutîkache awya so, uupa yukun ciitîkache marha ero yimaw tak mîîmoci yaw enmacoko 7 kaamo.

14 Ahwotacoko ero yimaw. Ero wa ehcoko amyamro, amumuru komo, awemsîrî komo, awanton komo, kîîrî, wooxam, Repita komo, achewno komo, yîmîhnî komo, iin̂owaixapu komo, ero warai komo yakro tahwore ehcoko awewton pono komo yakro.

15 Ero yimaw Aporin komo Kaan poko ahwotacoko 7 kaamo, cewton me Kporin komo nmen̂ekatho po ahwotacoko. Aporin komo Kaan awakrexe so anatîrî komo yepetacho ke, mer̂pora epetacho ke ha. Ahnoro awemyawno komo poko ehn̂an me awir̂axe so. Ero ke yaaro rma mahwowaxe.

16 On wara ehcoko, osorwaw ro etocoko kîrkomo ahnoro Aporin komo Kaan yewton pona, yînahsîthîrî pona. Ero wa ehcoko yicimn̂ipuntaxera. Wahrututpamnî Tohtopo yimaw etocoko iina, 7 Tominku Yukuknomache ero yimaw marha, Mîîmoci Yaw Kenmatopo Komo yimaw marha. Ero yimaw so ahwotaxi awcetaw so Kporin komo yewton pona emyarîra tohra ehcoko.

17 Mîn hakî ke awakrexe so Aporin komo Kaan. Ero ke yînmîthîrî raconho rma aacoko yîwya tîmsom me hara. Mer̂pono pîn ke awakreche so mer̂pora n̂he aacoko yîwya tîmsom.

18 On wara marha wîîkes awya so, kekn̂e Moises, cesen̂ekaxmu yentan̂e komo yîhtînocoko. Anîhtînoputhîrî komo tak ciicoko ero pokono ro me awewton komo poko hakî so, Aporin komo Kaan nîmîtho poko hakî. Tribu komo rowon poko hakî so ciicoko. Ciriche tak cesen̂ekaxmu yentacho pokono me n̂ehcowpe. Takîhso mak ehtopo komo nîhtînocowpe ha.

19 Ero ke on wara wîîkes awya so cesen̂ekaxmu komo yentan̂e me ciixapu komo ya, Yaarono mera yîhtînono cirihra ro mak men ehcoko. Ececenarî re mak encoko cesen̂ekaxmu komo. Kir̂wan̂he wîhtînoyasî moso yehtopo yiixe oyexirî ke, kahra ehcoko anarî komo poko. Epethîrî ahsîra marha men ehcoko en̂ekaxapu yentara awehtamci komo. Kir̂wan komo yewkukman̂e mîn kica en̂ekaxapu yentara kehtamci komo. Takîhsom komo yaknaman̂e me kiir̂axe so ero wara kehtamci komo.

20 Kir̂wan̂he mak ehcoko miyan komo poko rma, kicicme exihra ro mak ehcoko. Ero wa ehcoko pahkî awehtome so aweken komo po, Aporin komo Kaan nîmrî po ha.

21 Amn̂e Aporin komo Kaan ya tîmsom yakn̂itopo yakîhcetaw awya so, ero mîtkoso cirihra ro mak ehcoko weewe, tatîhtaxmu. Ponaro awehtopo komo me cirihra ehcoko ero yipu arowon komo pona, awya so Kporin komo Kaan nîmyas awya so ero pona.

22 Toopu marha cirihra ehcoko piiri ponaro awehtopo komo me. Ero yipu xera ro mak nasî Aporin komo Kaan. Ero wa nasî.