On wara marha kekn̂e Moises Ixaw Yana komo ya, Taa, 7 ro yicimn̂ipuntache awepethîkachonhîrî komo tak yîhcamnocoko. Ow epemakî, kahra tak ehcoko awepethîkan̂enhîrî komo ya. Ero wara ehcoko 7 ro yicimn̂ipuntache xa hara, ero yinhîrî ero wa ehcoko xa hara miya roro.

2 On wara xa wîîkes awya so ero poko, anarimaw apoyino komo na awepethîketu so Ixaw Yana rma. Noro yipu ya awepethîketaw awepethîkachonhîrî yîhcamnocoko 7 ro yicimn̂ipuntache. Ow men epemakî, kahra tak ehcoko ero po 7-nhîrî po. Apoyino komo me exirî ke ero wa kahra ehcoko. Ayananî ro komo me na nai anarimaw. Ero ke ero wa kahra ehcoko. Kporin komo yanme awepethîkachonhîrî komo yîhcamnotopo me tak nasî. Ero ke yîhcamnocoko mak tak.

3 Anarimaw anarî yana na awepethîketu so apoyino pîn kom ha. Noro yipu ya, Ow epemakî, mîîketu rma na yîhcamnopîra. Awakno komo ya reha awepethîkachonhîrî komo yîhcamnocoko mak tak.

4 Amn̂e tko arowon komo po awexitaw so, Aporin komo Kaan nîmyas awya so ero po awakronomexe so xa tak Noro okre. Ero ke yupurantamnî komo exihra ro mak tak nai okre apoyino kom ha.

5 Ero wa awakronomexe so Aporin komo Kaan Noro yewehcataw mak awya so, apanatanmetopo komo wekatîmyas awya so oroto ero yewetîtîketaw mak ha.

6 Tîmtapotachonhîrî yaw roro rma wa awakronomexe so Aporin komo Kaan. Mîk hak rowon pono komo yemyaka mîmyaxe apurantan komo mer̂pono pîn komo ya. Awemyaka so ahsîra ro makî reha maxe amyamro hara yupurantan komo. Mîk hak rowon pono komo kayaritomon me tak maxe. Akayaritomon komo mera mak naxe n̂examro reha. Ero wa maxe.

7 Anarimaw tko na nai yupurantamnî awakno komo, ahtono ewto pono kom ha na. Arowon komo pono rma mîk Aporin komo Kaan nîmyasî ero pono ha. Ero wa exitaw, Tanme ro mak n̂expe, kahra ro mak ehcoko. Amemnî me ro mak ehcoko apoyino komo poko, esemetanmekyataw so.

8 Wakren̂e komo me xa matko ehcoko. Yiixe ehtopo tîmcoko emyaka so amemnî me ro mak.

9 On wara na matu anarimaw, kicicme na mesehtînoyatu aropotaw so. On wara na mîîketu yupurantamnî poko, Pahnoke tak nas okwe 7-nhîrî cimn̂ipu, kepethîkachonhîrî yîhcamnotopo ha. Ero ke yiixe ehtopo tîmîhra wasî, mîîket ha na, mamenaxe mak kica. Ero ke tak nîwrace noro pen. Okwe, owakre xera nasî, nîîke tak noro Kporin komo ya apoko so. Ero wa awexitaw so kicicme ro mak nasî Kaan ya.

10 Wakrecoko xa matko, amemra ro mak tîmcoko yiixe ehtopo. Wîmyas okwe, kan̂e pîn me wakrecoko. Wakretaw awya so Aporin komo Kaan awakronomexe so hara amn̂e. Ehn̂an me ro mak awir̂axe so ahce na poko awexitaw so.

11 Yupurantamnî komo tko naxe arowon komo po miya rorono me. Ero ke amemnî me ro mak ehcoko. Awakno komo wakrecoko yupurantamnî kom ha, cesemetanmesom komo. Ero wa ehcoko arowon komo pono poko, kekn̂e. Ero wa kekn̂e Moises Ixaw Yana komo ya.

12 On wara marha kekn̂e Moises Ixaw Yana komo ya, Anarimaw apoyino komo rma na mahsîyatu awanton me so epethîrî pona. Ebrew rma mîk mahsîyatu kîîrî ha na, wooxam ha na. Ahsîche 6 cimn̂ipu mak apickacoko. 7-nhîrî po tak ahsîpînkacoko hara tanme ro mak totohme hara.

13-14 Ahsîpînketaw awya so emyawnomnî me en̂epera ehcoko. Awokuthîrî komo tîmcoko yîwya yaake n̂he, anatîthîrî yeperîrî marha tîmcoko yîwya puruma, sepata kom ha. Wokpacoko marha uupa yukun ke hara. Kporin komo awakrexe so ero wa xa marha awantonînhîrî komo wakrecoko hara.

15 Awehtoponhîrî komo poko yîtwen̂ekarîntara men ehcoko. Exipsiu komo yantonînho amyamro. Ero wa ehxapunhîrî awowyatken̂e so Aporin komo Kaan. Ero ke awya so wîîkesî oroto, Awantonînhîrî komo wakrecoko, wîîkesî.

16 Anarimaw on wara na nîîke awanton, Ahyai owto xera ro mak wasî, nîîke. Ero wa nîîke aaxe cexirî ke, ahyawno komo xe cexirî ke marha. Esemetanmekîra na nai ahyaw. Ero ke marha na cetow xera nai ahyai.

17 Ero wa exitaw awanton komo kuwikuwi ciki ahsîko. Ero yipu ke awanton panayatpocoko kuwikuwi ke ametatan komo yecepu pona rma. Ero wa panayatpocoko awanton komo me ehtome twaihtopo pona roro. Ero wa kîîrî panayatpocoko, wooxam marha.

18 On wara tko ehcoko tîto xatî komo poko reha, Moso yahsîpînka xera thakwa was oyanton okwe, kahra ehcoko. Ahsîpînkacoko rma 6 cimn̂ipu etapickaxapu. Asak hakno awanton yecenarî rma etapickaxapu mîk, epethîrî pona cetpickaxmu yecenarî. Ero wa ahsîpînketaw awya so awakronomexe so tak Aporin komo Kaan. Ehn̂an me awir̂axe so ahce na poko awexitaw so, kekn̂e. Ero wa kekn̂e Moises Ixaw Yana komo ya.

19 On wara marha kekn̂e yîwya so, Aporin komo Kaan ya tîmsom me ciicoko awoh komo xîkrî. Poturme ewruxapu mak ero wa ciicoko, kîîrî me ewruxapu mak ha. Ero wa ciicoko paaka xîkrî, oper̂a xîkrî marha. Paaka apickara ehcoko poturme ewruxapu. Oper̂a poci awotora marha ehcoko poturme ewruxapu poci.

20 Noro yipu komo pun tonocoko mak Aporin komo Kaan yewton po, yînahsîthîrî po xa. Yicimn̂ipuntaxera ero wa tonocoko amyamro, ahyawno komo marha.

21 Anarme na nai awoh komo anarimaw, yîhrepîra na nai, ewuhra na nai, ahce wa so na nai kir̂wan̂he exihra. Ero wa exitaw yupunthîrî tîmîhra ro mak ehcoko Aporin komo Kaan ya.

22 Noro yipu pun mon̂exe awewton komo po rma yiixe awexitaw so. Kicicme exihnî komo nonocowpe, kicicme ehxapu komo marha. Kooso mon̂exe pixkaru komo, ero wa xa marha awoh komo pun tonocoko awanme ro so.

23 Kamxukre tko tonohra ehcoko. Roowo pona kr̂a yukmamcoko kamxukuthîrî tuuna mukmamyaxe ero wa xa marha, kekn̂e. Ero wa kekn̂e Moises Ixaw Yana komo ya.