1-2 Taa, ero yinhîrî on wara kekn̂e hara Kporin komo Moises ya. Sinai Yîpîn po rma on wara kekn̂e yîwya. On wara kasko Ixaw Yana komo ya, aweken komo wîmyas amn̂e awya so. Ero po awexitaw so amararîn komo meero n̂epokarepe Aporin komo yanme.

3 6 cimn̂ipu ka anatîrî komo ciicoko. Ero wicakî xa marha uupa yepu atîkronkacoko, eperîrî marha enmecoko.

4 7-nhîrî po tak amararîn komo n̂epokarepe Aporin komo yanme rma. Ero po anatîrî komo cirihra ro mak ehcoko. Uupa yepu atîkronkara marha ehcoko. Ero wara roro n̂epokarepe amararîn komo 7-nhîri cimn̂ipu po roro.

5 Tanme ro atîhtaxapu yeperîrî meero enmekîra ehcoko. Uupa marha na n̂eperwa atîkronkara ehxapu rma. Wara rma n̂expe, enmekîra ehcoko. Amararîn komo yepokaretopo mak mîn 7-nhîrî cimn̂ipu.

6-7 Ero po atîhtaxapu yeperîrî nasî anahrî komo me rma. Anarî komo nahrî me meero n̂expe. Awanton komo naxe kîrkomo, woosî komo marha, noro yipu komo nahrî me marha n̂expe. Amaywen komo marha naxe epethîrî pona cetapickaxmu komo. Achewno komo nahrî me marha n̂expe. Noro yipu komo nahrî me n̂expe. Awoh komo nahrî me meero n̂expe, enpamnî komo nahrî me marha. Noro yipu komo nahrî me n̂expe. Tanme ro so nahcowpe 7-nhîrî cimn̂ipu po epetaxapu. Ahce na eperwataw noro yipu komo nahrî me n̂expe.

8 Taa, on wara marha ehcoko, anarî yîhtînocoko hara cimn̂ipu Xubirew me tak. 6 cimn̂ipu yenatîche 7-nhîrî tak nas amararîn komo yepokaretopo me. Ero wara roro nasî. Ero ke 7 tak yukuknomacoko amararîn komo yepokaretopo. Ero wara yukuknometaw 49 tak nasî cimn̂ipu. Ero wa cimn̂ipu komo yukuknomacoko.

9 Ero wicakî cimn̂ipu yenatîche 50 tak nasî cimn̂ipu. 50-nhîrî po tak tuu kacoko raatî poko. 7-nhîrî nuun̂i po kacoko, 10-înhîrî kaamo po xa. Kicicme Awehtopo Komo Yahrutopo po rma tuu kacoko. Miya so kacoko aweken komo poko hakî so. Xubirew me tak nas ha, kacho me exirî ke ero wa tuu kacoko ero cimn̂ipu po.

10 Anarî me ciicoko ero 50-nhîrî cimn̂ipu, awantonînhîrî komo yahsîpînkacho me ciicoko. Ero ke ero wa kacoko arowon komo poko hakno komo ya. Awantonînhîrî komo yahsîpînkacho me tak nas ha, kacoko. Ero ke tak ahsîpînkacoko tanme ro totohme so cewton komo pona so hara, tîyanan komo cheka so hara, kacoko. Ero wa ehcoko Xubirew po, 50-nhîrî po.

11-12 Xubirew xa mîn 50-nhîrî cimn̂ipu, owyan xa. Amararîn komo cirihra ro mak ehcoko. Tanme ro epetaxapu marha enmekîra ehcoko. Uupa yeperîrî marha enmekîra ehcoko, uupa yepu marha atîkronkara ehcoko. Kaamo po roro mak axikwocoko anahrî komo. Ero yipu mak ahcoko, kaamo po roro axikwoxapu mak ha.

13 Ero po men awekenî ro pohra awexitaw so ero pona tak etîramacoko hara. Iito cekenke ehcoko xa hara.

14-16 Anarimaw amararîn komo poko mîwarawanwatu apoyino komo yakro rma. Epethîrî pona mîmyatu amararînthîrî komo yîwya. Anarimaw na noro mararîntho mahsîyatu epethîrî pona hara. Ero wa awarawanwataw so iyopono xa etacira ehcoko epethîrî. On wara xa epethîrî yîhtînocoko, yaake cimn̂ipu exitaw rma ka Xubirew me yicimn̂ipuntacho, mer̂pora n̂he etacicoko epethîrî. Yaake n̂he ka nasî cimn̂ipu anatîrî komo yepetacho. Ero ke mer̂pora n̂he nas epethîrî. Asakî cimn̂ipu mak exitaw Xubirew me yicimn̂ipuntacho tak asakî n̂he mak etacicoko epethîrî. Ero wa yukuknomacoko amararîn komo yepetho. Takîhso mak awarawantacoko.

17 Iyopono xa etacira ehcoko awepethîrî komo. Oponaro xa men ehcoko. Aporin komo Kaan Ow ha.

18 Omtapotarî men ewetîcoko apanatanmetopo komo owya. Ero wa awexitaw so erasîra menmayaxe aweken komo po.

19 Kir̂wan̂he xa n̂eperwasî anatîrî komo amararîn komo pono ha. Tmaxmitaxi ro meseresmexe okre. Rooma pokohra ro mak maxe.

20 On wara na mîîketu anarimaw, Ahce thakwa re tahyatu 7-nhîrî cimn̂ipu po? Knatîrî komo cirihra taxe okwe, eperîrî yenmekîra marha taxe, mîîketu ha na.

21 On wara tko wiir̂asî, kir̂wan̂he xa tak kakronomexe so. 6-nhîrî po mer̂pora ro mak tak wepetanmekyas anatîrî komo. 3 cimn̂ipu yecenarîno me rma n̂eperwasî. Ero wicakî xa n̂eperwasî 6-înhîrî cimn̂ipu po.

22 Ero ke 8-nhîrî po cimn̂ipu po tak anatîrî komo ciir̂ataw tînahke rma maxe. Pahxa epetaxapu rma ka mahyaxe 9-nhîrî pona roro. Ero po tak yaxan mahyaxe hara 8-nhîrî po ciixapu. Ero po mak tak n̂enahcasî pahxa ciixapu yeperîrî ha.

23 On wara marha ehcoko, aweken komo tîmyataw anarî ya epethîrî pona, eroromero tîmîhra ehcoko. Orowon mîn aweken kom ha. Orowon pona mohxapu mak amyamro. Ohyaw cenmaxmu mak amyamro.

24 Ero ke on wara ehcoko apoyino komo yekenho yahsîyataw, eroromero ahsîra ehcoko. Yîramantopo ponaro men ehcoko hara.

25 Anarimaw on wara na nai apoyino komo, yupurantamra thakwa na n̂ehtîke. Ero wa cexirî ke cekenhîrî tak nîmya anarî ya epethîrî pona. Ero wa exitaw roowo tîmn̂enho yanan na mokya roowo yepemaxi osomunhîrî yanme. Epemache tak yîwya osomunhîrî tak nahsîpe hara.

26 Anarimaw exihra na nai iyanan, epeman̂e ha. Yupurantamnînhîrî purantanî rma tko na n̂epamya hara. Ero wa exitaw noro rma tîrowonthîrî n̂epemape hara, nahsîpe hara.

27 On wara nîhtînope ero yipu yepetho, cimn̂ipu nukuknomape tîmtoponhîrî. Yaake cimn̂ipu exitaw tîmtoponhîrî epethîmra n̂he tak nasî roowo. Ero ke ero wicakî mak nîmpe epethîrî. Asak mak exitaw tîmtoponhîrî mer̂pora n̂he xa nîmpe. Ero wa cekenhîrî n̂epemape ahsîtome hara.

28 Epethîrî exihra rma tko exitaw yîhyaw ahsîn̂enhîrî rowon me rma ka nasî. Xubirew pona roro yîhyaw rma ka n̂expe. Xubirew po xa tak roowo nahsîpînkesî. Osomunhîrî tak nahsîpe hara ceken me hara.

29 Anarimaw on wara na nai apoyino hara ewto imo pono, twacayem pono. Tîmînthîrî na nîmya anarî ya epethîrî pona. Tîmîche epethîrî pona nahsîpe hara yiixe cexitaw. Cewn̂e cimn̂ipu makî tko ahsîtopo me nasî.

30 Ahsîra rma exitaw cewn̂e cimn̂ipu yenatîche, eroromero tak nasî ahsîn̂enhîrî yaw. Yîmîn me ro mak tak nasî, epamthîrî mîn me marha. Eroromero nasî yîhyaw so, Xubirew po meero yîramanpîra n̂expe hara osomunhîrî ya.

31 Ero warahra reha nasî mîîmo wacamnî pono reha. Mararî wara rma nasî. Epethîrî pona nahsîpe hara osomunhîrî yiixe cexitaw. Xubirew me exiche tak nahsîpe hara osomunhîrî.

32 Anarî me tko nasî Repita komo mîn, ewtonî ro komo pono ha. Tîmînthîrî komo na nîmyatu anarî komo ya epethîrî pona. Ero yinhîrî ahsî xe cexitaw so hara nahsîcowpe rma epethîrî pona. Pahxa tîmxapu meero nahsîcowpe hara yiixe cexitaw so.

33 Ero ke ero wa naxe Repita komo, tîmînthîrî komo yahsî xe cexitaw so hara nahsîcowpe rma epethîrî pona. Cewton komo pono ero wara nahsîcowpe hara. Xubirew me yicimn̂ipuntache tak epethîmra rma nahsîcowpe hara ahnoro tîmînthîrî komo. Ero wa nasî Repita komo mîn, yîwyanî ro me nasî Ixaw Yana komo chew.

34 N̂examro mararîn komo reha tîmîhnî me ro mak n̂expe anarî komo ya. Eroromero mak n̂expe yîhyaw so. Ero wa mak n̂expe Repita komo mararîn.

35 On wara marha wîîkes awya so, anarimaw yupurantamra na n̂ehtîke apoyino komo rma. Yînahrî komo yepetho exihra na nai yîhyaw so okwe. Ero wa exitaw so wakrecoko. Acheka so mohxapu komo mînahmexe, ahyari tîtosom komo marha mînahmexe. Ero wa xa marha apoyino komo wakrecoko hara amîtwono me rma ehtome so.

36-37 Anarimaw apurantan komo na mîmyatu apoyino ya ero poko ehtome mak ha ka, tîramansom me na mîmyatu. Ero wa tîmîche on wara kahra ehcoko yîwya, Onîmîtho tîmko hara amn̂e. Ero poko awehtoponhîrî yepetho marha tîmko owya, kahra ehcoko yîwya. Aporin komo ponaro xa men ehcoko, oponaro ha. Ero wa ehcoko amîtwono komo me rma ehtome apoyino komo. Yînahrî rma na mîmyatu yîwya epethîrî pona ero wa tîmî xe awexitaw so. Ecenarîno mak etacicoko, mer̂pora etacira ehcoko yînahrî yepetho ha.

38 Aporin komo xa Ow, ponaro awehtopo komo xa. Exitu poi awekn̂enhîrî komo Ow ha. En̂exa kekyatken̂e so Kanan tîmtome aweken komo me, Kaan xa Mîk ham, kachome marha awya so opoko. Ero wa kachome kekyatken̂e so en̂exa ha.

39 Anarimaw apoyino komo na n̂epurantanke xa okwe. Ero yimaw tak puranta pona tak n̂etîmya awya awanton me. Ero wa exitaw epethîmnî me mak apickara ehcoko. Awanton wara xa cirihra ehcoko.

40 Amaywen komo me mak ciicoko, epemacoko etapickatoponhîrî. Pawana miiraxe ero wa xa marha noro ciicoko, takîhso mak ha. Xubirew pona roro mak n̂etapickape amaywen me.

41 Ero po tak ahsîpînkacoko hara, yîmxîkrî komo marha ahsîpînkacoko. Ero wa ahsîpînkacoko tîyanan komo yaka totohme hara, ekenî ro pona totohme marha. Ero wa tak ehtome ahsîpînkacoko.

42 Oyanton komo xa mîkyam, Exitu poi on̂ekîtho kom ha. Ero ke antonano me apoyino komo tîmîhra ehcoko epethîrî pona.

43 Amaywen me exitaw so apoyino komo iyopo so antomara ehcoko. Opoko xa twerî men ehcoko Aporin komo poko.

44 Awanton komo rma na mahsîyatu yiixe awexitaw so anarî rowon pono komo mak, arowon komo mîtwono komo mak ha. Ero wa na mahsîyatu awanton komo me. Kîrkomo na mahsîyatu, wooxam komo marha. Noro yipu komo na mahsiyatu.

45 On yipu komo marha na mahsîyatu awanton komo me yiixe awexitaw so. Achewno xîkrî komo na mahsîyatu, aweken komo po rma ewruxapu kom ha. Awanton komo ro me na mahsîyatu.

46 Noro yipu komo mahsîyatu eroromero. Amxîkrî komo ya marha na mîmyatu ahsîtome so tak awaipuche. Apoyino komo reha antomara ehcoko iyopo so.

47 Anarimaw on wara na nai pawana me mohxapu acheka so, achewno ro mak ha na, tupurantai na n̂ehtîke. Ero yimaw apoyino na nai hara iito epurantankatîkaxapu okwe. Ero ke thakwa n̂etîmya achewno yanton me tak. Achewno yepamtho yanton me na n̂etîmya anarimaw.

48-49 Towsom me rma tko nasî noro yipu epethîrî pona. Iyanan komo na n̂epemetu towtome, yîtamru ha na, akno ha na anarimaw. Anarimaw noro purantanî rma na n̂epamya hara. Ero wa exitaw noro rma na n̂esepeme cetowtome tak.

50 On wara epethîrî tîhtînopore nasî, anto me ehxapunhîrî n̂esentape tahsîn̂enhîrî yakro. Ahce po xa ow mahsîye, kape. Atararo cimn̂ipu ka xakn̂e Xubirew me ehtopo? Ero wicakî pahkînon awanton me etapicketaw atî wicakî mepeme ha re. Ero wicakî xa marha nasî oyepetho, kape marha.

51-52 Ero ke pahkî ka exitaw Xubirew me ehtopo, mer̂pora n̂he nas epethîrî. Asak mak tak exitaw cimn̂ipu Xubirew me ehtopo, wahra n̂he mak nasî epethîrî.

53 Cewn̂e cimn̂ipu yenatîche tantoman̂e yaw, epethîrî pona cetapickaxmu wara rma n̂expe, Cewn̂e cimn̂ipu xa hara ketapicke anantomarî me, kape yiixe cexitaw. Ero wara roro kape cimn̂ipu yenahcataw roro. Noro yipu marha kir̂wan̂he nantomape. Aweroro so iyopo so antomara ro mak n̂expe antoman̂e.

54 Anarimaw etowra rma na nai epethîrî pona. Wara rma n̂etowpe xa tak Xubirew po. Tîmxîkrî komo yakro rma n̂etowcowpe. Ero wa n̂etowcowpe.

55 Oyanton komo xa moxam Ixaw Yana komo. Exitu poi wekyatken̂e so. Aporin komo xa Ow ha, ponaro xa awehtopo kom ha, kekn̂e. Ero wa kekn̂e Kporin komo Moises ya.