Taa, ero yinhîrî on wara kekn̂e hara Kporin komo Moises ya, On wara marha kasko Ixaw Yana komo ya, Mîk hak warai cirihra ro mak ehcoko ponaro awehtopo komo me. Toopu cirihra ro mak ehcoko piiri ero warai me. Toopu wakîknopîra ro mak ehcoko ero warai me. Ero yipu cirihra ro mak ehcoko arowon komo pona. Mamakan me yutupentara ro mak ehcoko. Ow xa Aporin komo, ponaro awehtopo kom ha, kasko yîwya so.

2 On wara marha kasko yîwya so, Oyepokaretopo komo wukuknomai awepokaretopo komo me. Ero ke ero po so epokarecoko. Twerî marha ehcoko omîn poko. Aporin komo xa Ow ha.

3-4 Omtapotarî ponaro men ehcoko. Owya apanatanmetopo komo ewetîcoko ha. Ero wa awexitaw so tuuna wekmexpesî roro amararîn komo yatîkrecho. Tuuna yimaw roro wekmexpesî. Kir̂wan̂he n̂eperwasî anatîrî komo. Weewe marha n̂eperwasî cepetaxmu kom ha.

5 Pahkî maxe puruma yîpîpîtîkacho poko. Ero poko rma maxe uupa yeperîrî yewkukacho me cehso ro hara. Ero marha mewkukexe hara pahkî anatîrî komo ciitopo me cehso ro hara. Ero wa n̂eperwasî anatîrî komo. Ero ke tmaxmitaxi ro meseresmexe roro. Ero wara meseresmexe. Erasîra marha menmayaxe iito aweken komo po.

6 Eserepokan me ro mak kiir̂axe so iito. Awaparî komo pona erasîra ro mak metakriyaxe. Aweskan̂e komo marha wen̂epesî aweken komo poi. Kamara komo, okoyi komo, noro yipu komo wen̂epesî. Awaparî komo marha mokuhra ro mak naxe arowon komo pona.

7 Aaxatî pîn komo mîweken̂emekyaxe. Kacipara imo ke mîwaikexe.

8 5 mak awexitaw so 100 komo rma mîweken̂emekyaxe. 100 mak awexitaw so 10.000 komo rma mîweken̂emekyaxe. Aaxatî pîn pen komo waihyaxe kacipara imo ke anparaxkathîrî komo me. Ero wa kiir̂axe so aaxatî pîn komo yopono me omtapotarî yewehcataw awya so.

9 Tawake was apoko so. Yaake wîmyas awya so amxîkrî komo. Mepamyaxe xa tak okre. Omtapotarî ponaro marha wasî, Kwakrexe so men amn̂e, kacho ponaro.

10 On wara marha maxe, pahxan poko rma aweseresmetaw so yaxan n̂eperwas hara okre. Amîn komo n̂esekenkesî mak. Ero ke pahxan tak maar̂axe anana yaxan yenmetome ekenhîrî pona.

11 On wara marha was apoko so, omîn wiir̂asî acheka so. Kicicitho me awenîra so ro mak wasî.

12 Achewno komo me wasî. Ponaro xa awehtopo komo me wasî. Oyanan me xa maxe amyamro hara.

13 Aporin komo Ow ha, ponaro xa awehtopo kom ha. Exitu poi kekyatken̂e so iitono komo yanton mera tak awehtome so. Apîmtawno micitho yawoton̂e wara wîxakn̂e Ow hara piiri tak awetaritome so. Ero wa kakronometken̂e so. Ero ke ero wa kwakrexe so xa hara omtapotarî yewehcataw awya so, kekn̂e.

14-15 Anarimaw tko na on wara matu, oyewetîra na mat okwe. Owya apanatanmetopo ponarora na mat ha. Pîra kica, mîîketu omtapotarî poko. Poxumra ro mak mencetu owya apanatanmetopo komo. Oyewehcataw awya so kakronomexe so, kacho yai metowyatu kica.

16 Ero ke on wara kiir̂axe so, cerahsom me ro mak kiir̂axe so. Eper̂a yawno me tak kiir̂axe so, awakpororetopo komo yawno me. Kewkanoyaxe so ocoro awehtopo komo ke okwe. Awahwokan̂e me nasî aweper̂an komo okwe. Tohnaw marha anatîrî komo miir̂axe. Eperîrî nahtîkexe okwe aaxatî pîn komo.

17 Aaxatî pîn wara tak was Ow ero yimaw. Ero ke aaxatî pîn komo awar̂mexe so okwe, akayaritomon komo me tak naxe. Miya ro mak memahciyaxe aweken̂emekn̂e komo exihra rma exitaw so okyo. Ero wa kemetanmekyaxe so oyewetîra awexirî ke so okwe.

18 Ero wa awemetanmekîche so owya omtapotarî yentan̂e pîn me rma na mat okwe. Ero wa awexitaw so kemetanmekyaxe so xa hara. 7 ro kemetanmekyaxe so xa hara okwe.

19 Kar̂pen me so tak kiir̂axe so, Ow xa n̂e ro karitî, kan̂enhîrî. Ero ke anarme tak wiir̂asî kaapu awepoyino komo, kuripara wara ro mak wiir̂asî. Turpe ro mak wiir̂asî roowo aweken komo, bronse wara ro mak.

20 Tohnaw mak mekaricexe amararîn komo poko. Atîhtara nas okwe anatîrî komo. Epetara marha nasî weewe anatîrî kom hara. Ero wa nas okwe.

21 Ero yinhîrî oyanwekn̂e me rma awexitaw so on wara was hara apoko so, kemetanmekyaxe so xa hara 7 ro xa hara. Kicicme awexirî ke so rma ero wa kemetanmekyaxe so.

22 Aweskan̂e komo wen̂epesî acheka so, kamara komo, okoi komo. Noro yipu komo amxîkexe so, awohkexe so marha. Ero ke asak mak tak mehtîkexe. Exihra tak naxe awesamarî komo yaw tîtosom komo.

23-24 Ero yinhîrî on wara rma na matu opoko, panatara rma na mat okwe awemetanmetopo komo ke. Oyanwekn̂e me rma na mat okwe. Ero wa awexitaw so on wara was apoko so hara, Awanwekn̂e komo me tak was Ow hara. Kemetanmekyaxe so 7 ro xa hara okwe kicicme awehtoponhîrî komo yanme.

25 On wara kemetanmekyaxe so, awaparî komo tak wekmexpesî tîkaciparayem komo, oyepanîn̂e komo. Omtapotarî yanwekrî ke awya so oyepanîyaxe. Ewto imo pona na mesenmekyatu, iina rma tko wen̂epesî aweper̂an kom hara. Awaparî komo marha awahsîyaxe so.

26 Kurkexe so marha. On wara tak naxe wooxam komo wahra ro mak exirî ke awru komo, 10 yakenon wooxam komo nupur̂atu awru komo ero re yaw yuputopo yaw. Wahra so mak tak n̂ekamyaxe tunpuruthîrî komo. Awsîn ciki nukuknomexe wahra mak tîmtome awya so. Ero rma re mokyaxe awecenarîra so rma tko okwe.

27-28 Ero yipu ke awemetanmekîche so panahra rma na mat okwe. Oyanwekn̂e me rma na mat okwe. Ero wa awexitaw so on wara was apoko so hara, awemetanmekn̂e komo me was Ow hara. Kîrwonasî ro mak tak apoko so, Kicicme awehtoponhîrî komo poyero kemetanmekyaxe so 7 ro xa hara.

29 Rooma poko awexirî ke so amumuthîrî komo pun mon̂exe amyamro rma, awemsîthîrî komo pun marha. Ero wa kemetanmekyaxe so.

30 Anarî ro poko awehtoponhîrî komo war̂mesî îh pono. Iito so kotoporem makn̂iyaxe. Awya so akn̂itoponhîrî komo tko war̂mesî. Awokoputhîrî komo war̂mesî mîk hak warai me an̂irithîrî komo pona, karitî pîn pona rma. Aaxera so ro mak tak wasî ero yimaw.

31 Awewtonthîrî komo tak wiir̂asî pohnî me mak okwe. Ewtotho me mak tak wiir̂asî worokyam yakro amtapotachonhîrî komo, mîîmo kom ha. Kotoporem yakn̂iyataw awya so, Kir̂wan̂he nas okre, kahra ro mak wasî.

32 Pohnî me ro mak wiir̂asî arowonthîrî komo. Ero po tak naxe aaxatî pîn komo. N̂examro tak n̂eserepokexe arowonthîrî komo poko.

33 Anarî rowon pono komo cheka tak kakpayaxe so. Awenari so rma tko wen̂epesî kacipara imo ken̂arî komo awaparî komo me. Arowonthîrî komo tak nasî pohnî me ro mak ero yimaw. Ewtotho me tak nasî awewtonthîrî komo okwe.

34 Ero yimaw tak arowonthîrî komo n̂epokaresî yaake cimn̂ipu. Pahkî nasî pohnî me. Pahkî marha maxe aaxatî pîn komo chew. Ero yimaw xa n̂epokaresî arowonthîrî komo.

35 Epokarera ro mak nas arowon komo iipo awexitaw so. Ero ke pohnî me tak wiir̂asî epokaretome tak pahkî, epokarera ehtoponhîrî yecenarî rma.

36 Aaxatî pîn komo chew natu apoyinonhîrî komo, etîmtoxapu kom ha. Cerahsom me xa tak n̂examro wiir̂asî iito. Anarimaw katayarîtho mak n̂encexe ocowo narîtho mak. Ero yipu yentache n̂emahciyaxe tak okwe kacipara imo ke cemyarkem yenîchen wara rma. N̂epîrkexe tak okwe weken̂emekn̂e komo exihra rma exitaw.

37 Etpona so rma n̂ehrokexe cemahciyataw so. Kacipara imo ke cemyarkem yeen̂atawno wa n̂emahciyaxe weken̂emekn̂e exihra rma exitaw. Aaxatî pîn komo awar̂mexe so thakwa kar̂pera awexirî ke so okwe.

38 Mîwaiyaxe tak anarî rowon pono komo chew rma okwe. Awonon̂e komo wara nasî aaxatî pîn komo rowon.

39 Metîmcetu rma ciki re waipîn komo iito aaxatî pîn komo chew. Mekar̂ketîkexe iito okwe kicicme awehtopo komo poyero rma. Aamo pen komo yehtoponho poyero marha mekar̂kexe ero poko rma awexirî ke so. Ero yipu poyero mekar̂kexe.

40-41 On wara tko na nat amn̂e ekar̂katîkaxapu kom ha, kicicme cehtopo komo tak na n̂ekatîmyatu owya, kicicme tîîm komo yehtoponho marha. On wara na ketu, Ahyai amna n̂etowye kica. Awanwekn̂e me amna xakn̂e kica. Aaxatî pîn me amna xakn̂e kica. Ero poyero amna xatî pîn me mehxe Amoro hara. Amna xatî pîn komo cheka amna men̂epei, ketu tak na owya. Etanpikantho wa mak nasî yîropotarî komo. Wara rma na kicicitho me tak n̂esen̂atu. On wara na ketu, Yaaro rma amna memetanamekyasî Apa kicicme xa amna exirî ke, ketu tak na owya ero yimaw.

42 Ero wa ketaw yîwya so omtapotacho ponaro tak wasî. Xako ya wîîkekn̂e, Iisake ya marha wîîkekn̂e, Abraaw ya marha, ero wa kacho ponaro tak wasî. Awekenhîrî komo ponaro marha wasî.

43 Pohnî me thakwa mak nasî ekenhîrî komo. Yiipononhîrî komo exihra tak naxe iito. Ero ke tak cepokaresom me nasî ekenhîrî komo pohnî me cexirî ke. Wara rma kicicme cehtoponhîrî komo tak n̂ekatîmyaxe. Amtapotachonhîrî ponarora amna n̂ehxe kica, kexe. Awya tpanatanmetopo yenta xera ro mak xakn̂e amna kica, kexe owya.

44 Wara rma tîîxatî pîn komo chew rma exitaw so ahsîpînkara so rma wasî. Yiixatî pîn me ehtîkara marha wasî. Waihkatîkara wasî. N̂examro wakronomes amn̂e, kacho ponaro rma wasî. N̂examro Porîn Ow, ponaro xa ehtopo kom ha.

45 Yîpînîn yaw so rma wasî. Ero ke omtapotacho ponaro wasî. Yîîm pen komo ya wîîkekn̂e ero ponaro rma wasî. N̂examro wekyakn̂e Exitu poi anarî rowon pono komo wero ro. Ponaro n̂examro yehtopo me tak en̂exa wekyakn̂e. Aporin komo xa Ow ha.

46 Ero warai poko xa Ixaw Yana komo panatanmekyakn̂e Kporin komo. Ero wa ehcoko, kacho poko kekn̂e, Ero wa exihra ehcoko, kacho poko marha. Omtapotarî yewehcataw awya so kakronomexe so okre, kekn̂e marha. Sinai Yîpîn po ero wa kekn̂e Moises ya. Noro tak n̂ekatîmyakn̂e yîwya so hara. Ero wa Ixaw Yana komo panatanmetopo ponaro marha was Ow hara, kekn̂e. Ero wa kekn̂e Kporin komo. Ero wa xakn̂e.