Taa, Ixaw pen mumutho komo yosotî tan wekatîmyasî, Exitu pona toxapu kom yosotî. Xako yakro rma tî cetken̂e yumumuru komo. Tîhyawno komo tî naar̂atken̂e. Ero wa tî cetken̂e Exitu pona.

2-4 On wara tî xatken̂e yumumuru komo yosotî, Huben, Simeaw, Repi, Xuta, Isaka, Seburon, Benxamin, Taan, Nahtari, Kace, Ase.

5 Ero wa tî xatken̂e Ixaw mumuru komo yosotî. 70 yakenon tî mîkyam xatken̂e Xako mumuru komo, parî komo meero. Exitu po rma tî xakn̂e Xose reha pahxa toxapunhîrî.

6 Ero yinhîrî Xose pen takî tî waihyakn̂e okwe. Aknonhîrî pen komo marha tî waihyatken̂e. N̂examro yecenarîno komo ahnoro tî waihtîketken̂e.

7 Ero yinhîrî tko tî n̂epamyatken̂e xa tak Ixaw Yana komo. N̂epamtîketken̂e ro mak mer̂pora ro mak cehso ro. Kar̂pe marha takî tî n̂ehtîketken̂e. Roowo tî nawronohketîketken̂e ro mak. Ero wa tî xatken̂e.

8 Ero yinhîrî anarî takî tî xakn̂e hara kayaritomo Exipsiu komo kayaritomon. Xose yenîn̂enho pîn tî mîk xakn̂e.

9 On wara tî kekn̂e noro tmaywen komo ya, Mer̂pora ro mak tak naxe Isaw Yana komo okyo. Kyopo so ro mak naxe kopi. Kar̂pe so marha n̂ehtîkexe kyopo so, kekn̂e tî.

10 Ero ke takîhso men ciicerî. Mer̂pora men n̂ehtîketu kopi. Anarimaw men kwaparî komo na mokyat amn̂e. Noro yipu komo men nakronometu kica Ixaw Yana komo. Kakro so n̂etar̂met ha men okwe. Kîhyai so tak cet okwe, kekn̂e tî. Ero wa tî kekn̂e Paraw tmaywen komo ya.

11 Ero ke takî tî Ixaw Yana pen komo napicketken̂e. Apickan̂e komo tî n̂iir̂atken̂e tpoyino komo. Iyopo so tî n̂examro pen napicketken̂e okwe. Tawsîn̂em narpetken̂e yîwya so. Ewto imo tî n̂irpetken̂e yîwya so. Piton tî n̂iir̂atken̂e, Hameses marha tî. Ero warai tî n̂iir̂atken̂e ewto komo, Paraw yemyawno yermonotopo kom ha. Ero wa tî Ixaw Yana komo napicketken̂e okwe.

12 On wara tko tî xatken̂e Ixaw Yana komo, iyopo so apicketîketaw so rma miya xe xa takî tî n̂epamtîketken̂e kopi. N̂epamtîketken̂e xa takî tî mer̂pora cehso ro. Ero ke n̂eserepoketken̂e xa takî tî Exipsiu komo Ixaw Yana komo poko.

13 Ero ke takî tî Ixaw Yana komo napicketîketken̂e miya xe xa tak. Ahri ka kekar̂ka okwe, kacho mera ro makî tî napicketken̂e kica. Ero wa tî xatken̂e Exipsiu komo Ixaw Yana komo poko.

14 Ero ke Ixaw Yana komo takî tî nahwoketken̂e ro mak okwe etowîn me ro mak tapickarî ke so. Roowo tî namnonopetken̂e yîwya so mîîmo me ciisom. Amnonoxapu yahkoromacho marha tî n̂irpetken̂e yîwya so. Mararî poko so marha tî napicketken̂e, ahce na poko tî napicketken̂e. Ekar̂kache so rma, Kacoko rma kr̂a, ketken̂e kica. Ero wa tî Exipsiu komo xatken̂e Ixaw Yana komo poko.

15 Ero yinhîrî Exipsiu komo kayaritomon takî tî nîmtapowakn̂e wooxam yewrunokan̂e komo yakro. Asakî tî xatken̂e ewrunokan̂e komo, Sipra, Pua, ero wa tî xakn̂e ewrunokan̂e komo yosotî.

16 On wara tî kekn̂e yîwya so, Ebrew komo yon yewrunohketaw awya so kîîrî na n̂ewruya. Kîîrî me ewruche waihkacoko. Woosî yewruche waihkara reha ehcoko, kekn̂e tî yîwya so.

17 Kaan ponarono tko tî mîkyam xatken̂e ewrunohkan̂e komo. Ero ke Exipsiu komo kayaritomon tî ewetîra xatken̂e. Kîîrî ciki tî waihkara rma xatken̂e.

18 Ero ke ewrunohkan̂e komo takî tî nan̂ikpekn̂e kayaritomo. On wara tî kekn̂e yîwya so, Ahce kacho ero wa matu kica? Kîîrî mren tî waihkara rma matu kica, kekn̂e tî yîwya so.

19 On wara ti n̂eyukyatken̂e ewrunohkan̂e komo, Kar̂pe naxe Ebrew wosîn komo. Exipsiu komo wosîn warahra naxe. Tanme ro so mak n̂ewruyaxe yîhyaka so amna mokuhnaw rma, ketken̂e tî yîwya.

20-21 Ero ke ewrunohkan̂e komo takî tî nakronomekn̂e Kaan kîîrî mren waihkara exirî ke so. Iin̂o komo takî tî Kaan nîmyakn̂e yîwya so, yîmxîkrî komo marha tî. Ero wa tî nîmyakn̂e yîwya so tponaro xa exirî ke so. Ero yinhîrî tî kar̂pe n̂ehtîketken̂e rma Ixaw Yana komo.

22 Ero yinhîrî on wara tî kekn̂e Paraw tmaywen komo ya, On wara men ciicoko Ebrew mren komo, kîîrî yewruche ar̂macoko kr̂a eepu kwaka. Woosî yewruche waihkara reha ehcoko, kekn̂e tî. Ero wa tî kekn̂e Paraw tmaywen komo ya miyan komo ya rma.