Taa, Ixaw pen waipuche takî tî Xose n̂esewnapekn̂e tîîm pen yokoputho yepataka. Iito tî nîwracekn̂e. N̂ewcokekn̂e marha tî.

2 Ero yinhîrî tmaywen komo takî tî nantomekn̂e tîîm yokoputho kaperî poko. Kehceman̂e komo tî xatken̂e noro maywen komo. Noro yipu komo tî nantomekn̂e tîîm pen yokoputho kapetopo poko. Ero ke takî tî ero poko xatken̂e.

3 Pahkî tî xatken̂e ero poko, 40 kaamo tî. Okoputhîrî ciitopo ro yaw roro rma tî noro pen yokoputho n̂iir̂atken̂e ero wicakî kaamo. On wara marha tî xatken̂e Exipsiu komo, nîwracetken̂e tî n̂examro meero Ixaw pen pînîn yaw. 70 kaamo tî cewru komo naar̂atken̂e okwe.

4 Yîwratacho komo yîtîhkache takî tî Paraw yawno komo yakro tî nîmtapowakn̂e Xose. On wara tî kekn̂e yîwya so, Ooxatî me awexitaw so on wara cma re mîîkexe Paraw ya,

5 Ai apa, on wara tî kekn̂e Xose yîîm pen tumumuru ya, Kwaihyasî tak men okwe, kekn̂e tî. Oyokoputho yewtarî wahtopekn̂e meye Kanan po. Ero ke owaipuche iina men oyokoputho ahruko, kekn̂e tî yîwya. Iina wa kahruyas ha, kasko owya. Yaaro xa men kasko cemaro pîn me ro mak, kekn̂e marha tî yîwya. Ero ke Xose cma tî re men̂epe tîîm yokoputho yahrun̂e. Ahruche tî mokya hara oona, mîîkexe cma re Paraw ya, kekn̂e tî Xose yîwya so. Ero ke ero wa kacho tî n̂ekatîmyatken̂e Paraw ya.

6 Ero ke takî tî on wara kekn̂e Paraw Xose ya, Taa, etok ha, aamo pen yokoputho ahruta. Kanan pona awokoputhîrî wahruyas amn̂e Apa, kasko owya okopuci, yaaro men kasko towîhnî me ro mak ha, kekn̂e matko aamo awya. Ero ke, taa, mîîkekn̂e yîwya. Ero ke tak amtapotachonhîrî yaw roro tak ahruta ha, kekn̂e tî. Ero wa tî kekn̂e Paraw Xose ya.

7 Ero ke takî tî tîîm pen yokoputho yahruso cekn̂e Xose. Noro yakro tî cetken̂e Paraw maywenî ro komo ahnoro, yîmîn yawno komo marha poritomo kom ha. Ahnoro tî cetken̂e Exitu pono komo yenîn̂e kom ha.

8 Xose mîn yawno komo marha tî cetken̂e, akno komo marha tî. Yîîm pen yawnonho komo meero tî cetken̂e. Rikomo komo makî tî arîhra xatken̂e, toh komo, oper̂a komo, paaka komo, noro yipu komo tî arîhra xatken̂e. Kosen po rma tî nînomyatken̂e.

9 Tarara komo marha tî naar̂atken̂e anarî komo Paraw maywen komo. Kawaru mkaw so marha tî cetken̂e anarî kom hara. Mer̂pono pîn tî mîkyam xatken̂e Xose yakrono komo.

10 Taa, Atace pona takî tî cetken̂e Xotaw yeco pona. Puruma yîpîpîtîkacho tî mîn xakn̂e Atace. Iito cexitaw so takî tî nîwracetken̂e xa hara tî Xako pen pînîn yaw. Kar̂pe tî n̂îwracetken̂e, ahwon me marha tî. Apapa pen pînîn yaw tîwratapore nasî 7 kaamo, kekn̂e tî Xose yîwya so. Ero ke tî ero wa xatken̂e.

11 Taa, Kanan pono komo takî tî n̂een̂atken̂e Atace po tîwrataxmu komo. Okyo, nîwracexe ro mak Exipsiu komo. Yîwratacho komo ro xa mîn ham, ketken̂e tî. Ero ke anarî me takî tî nosohcetken̂e iitono puruma yatîhkacho. Abew Misrain me takî tî nosohcetken̂e hara. Ero ke takî tî ero wara rma n̂etacaxe oroto. Xotaw yeco pono mîn ha.

12 Ero wa tî nîwracetken̂e. Ero yinhîrî takî tî on wara xatken̂e Xako pen mumutho komo, tîîm penî mtapotachonho yaw roro rma takî tî okoputhîrî nahruyatken̂e.

13 Noro yokoputho tî naar̂atken̂e Kanan pona. Yîwratacho komo yîtîhkache takî tî nahruyatken̂e îîpî yexenawno yaka ewtarî yaka. Makpera pono yaka tî nahruyatken̂e Manîre mîtwono yaka. Iitono tî nahsîyakn̂e Abraaw pen, Ehron yeken mîtwono, Etew yeken mîtwono ha. Okopu yahrutopo me tî noro pen nahsîyakn̂e. Iina tî nahruyatken̂e Ixaw pen yokoputho. Ero wa tî nahruyatken̂e.

14 Ero yinhîrî tîîm pen yahruche takî tî Exitu pona n̂etîramekn̂e hara Xose. Akno komo marha tî n̂etîrametken̂e, Exitu pono komo marha tî. Ahnoro tî n̂etîrametken̂e hara Xose yîîm pen yahrutopo yenso toxapunhîrî komo.

15 Taa, ero yinhîrî takî tî on wara ketken̂e Xose yakno komo n̂examro re mak, Apapa pen thakwa waihye okwe. Ero ke men kîîxera so men nai Xose. N̂esepanîya men cemetanmetoponhîrî poyero kîwya so, ketken̂e tî.

16-17 Ero ke tîmtapotarî komo yekatîmn̂e komo takî tî n̂en̂epetken̂e Xose yaka, on wara kan̂e komo tî n̂en̂epetken̂e, On wara kekn̂e apapa pen amna ya twaipînaw ha ka, On wara kacoko Xose ya amn̂e, Awemetanmekyatken̂e kica awakno komo rma. Wara rma cetîrwoxinkaxmu me cma re masî n̂examro poko, kacoko yîwya, kekn̂e apapa pen. Ero ke on wara amna kes awya, Kaan yanton amna, ponaro apapa pen yehtopo yantonî rma. Ero ke kicicme amna yehtoponho yîhcamnon̂e me cma re masî, kacho tî n̂ekatîmyakn̂e Xose ya. Taa, ero yipu yentache takî tî nîwracekn̂e Xose. Ero wa tî xakn̂e takno komo mtapotarî yentache.

18 Ero yinhîrî akno komo rma takî tî cetken̂e Xose yaka. N̂esewnapetken̂e takî tî noro yamrinaka. On wara tî ketken̂e yîwya, Awanton xa amna, ketken̂e tî yîwya.

19 Erasîra ehcoko, kekn̂e tko tî Xose yîwya so. Kaan pînî rma ow ha.

20 On wara mîxatken̂e, oyemetanmekî xe rma re mîxatken̂e. Kaanî tko oyen̂epekn̂e oona kir̂wan̂he ciino rin̂e me, waipîra so ciino rin̂e me ha. Ero ke ero wara rma ciino n̂iir̂as oroto. Mer̂pono pîn komo naxe waipîra so oona omokrî ke.

21 Ero ke erasîn me mak ehcoko. Knahmexe so rma wa ha, amxîkrî komo meero, kekn̂e tî yîwya so. Ero wa tî n̂examro n̂erepotanmekyakn̂e. Tawake tî nîmtapowakn̂e akro so. Ero wa tî xakn̂e Xose takno komo poko.

22 Taa, iito rma tî xatken̂e Xose komo Exitu po rma, takno komo yakro rma. 110 cimn̂ipu takî tî xakn̂e Xose yewrutoponho.

23 Tumumuru parî komo tî n̂een̂akn̂e Xose, Eprain parî komo. Manases parî komo marha tî n̂een̂akn̂e Maaki xîkrî komo. Manases mumuru tî mîk xakn̂e Maaki. Noro xîkrî komo ciki tî nahsîyakn̂e hara Xose cenaka.

24 Ero yinhîrî on wara tî kekn̂e Xose takno komo ya, Kwaihyasî tak ha. Amn̂e awar̂axe so Kaan on poi Exitu poi Kanan pona hara. On wîmyasî aweken komo me roowo, kekn̂e tî kporin pen komo ya pahxa. Abraaw pen ya tî kekn̂e ero wa, Isake pen ya marha, Xako pen ya marha. Yaaro xa tî kekn̂e towîhnî me ro mak. Ero ke iina awar̂axe so amn̂e ha.

25 Awakronomexe so Kaan ero wa awehtome so. Ero ke awar̂ataw so oyocho men aacoko awakro ro so. Taa, ayochîrî amna naar̂as ha, kacoko men owya. Yaaro men kacoko owya cemaro pîn me ro mak, kekn̂e tî yîwya so. Ero ke ero wa tî ketken̂e yîwya.

26 Ero ke takî tî Xose pen waihyakn̂e. 110 cimn̂ipu tî xakn̂e ewrutoponhîrî. Waipuche takî tî noro yokoputho kapetken̂e hara. Ero wa ciriche takî tî okoputho yenî ro yaka tî nahruyatken̂e. Ero ke iito rma tî ka xakn̂e noro pen yokoputho Exitu po rma kapu. Ero wa tî xakn̂e. Iina mak nai ekatîmtopo.