Taa, ero yinhîrî takî tî tumumuru komo nan̂ikyakn̂e Xako ahnoro. On wara tî kekn̂e yîwya so, Okopuci komo oona ka amohcoko. Awehtopo komo tan wekatîmyas awya so. On wara naxe awepamthîrî komo amn̂e, kacho wekatîmyasî awya so.

2 Omumuru komo amyamro Xako mumuru kom ha. Ero ke amohcoko ohyaka. Aamo komo xa ow ha Ixaw rma ha. Omtapotarî yentaxi amohcoko.

3 Okopuci Huben, awya ka wîîkesî, omumuru komo potutho amoro. Kar̂pe oyehtopo amoro, kar̂pe oyehtopo yihcitoponho ha. Takîhsom xa amoro, karitî marha.

4 Tuuna wara tko masî xukrape okwe. Ero wara masî opici yenaka awetakrirî ke kica. Ero wa ow mîwîrîmekn̂e okwe aamo rma. Ero ke awakno komo yopono me exihra masî.

5 Taa, Simeaw poko kîmtapowas hara, akno poko marha kîmtapowasî Repi poko. Etîme re naxe n̂examro. Waihkano ritopo nasî n̂examro mîn komo yaw.

6 N̂examro yesencetaw amn̂e esentara reha was akro so. N̂examro yakro oyesenmekî xera ro mak wasî tîwîrîyakaxmu me oyenîra ehtome so tooto komo. Tîrwonataw so waihkano n̂iir̂atken̂e. Paaka pen yîhraknu micin nawocetken̂e tanme ro so mak.

7 Kicicme ro mak nasî yîrwon komo. Riiwoxe ro mak xatken̂e okwe. Waihkano n̂iice tîrwon komo yanme rma. Ero ke iito re exihra ro mak naxe amn̂e epamthîrî komo. N̂examro wakpayasî Xako yepamtho komo chere, Ixaw Yana komo chere ha.

8 Okopuci Xuta, apoko kîmtapowas hara. Kîrwan̂he xa nasî Xuta yepamtho komo okre, kexe amn̂e awakno komo yepamtho. Aaxatî pîn komo mahsîyaxe amn̂e yîpîmîrî komo poko. Awakno komo nutupenwaxe amn̂e amamaka.

9 Reaw xîkrî mak moso Xuta. Awotowathîrî yonon̂enho wara mawomyas amoro okopuci. Reaw wara marha metamruyasî. Cetîraposom wara marha masî kamara wara. Reaw wara rma masî etkurunkan wara kopi.

10 Kayaritomo yamoyin yahsîn̂e komo naxe awepamthîrî poyino miya roro. Amn̂e tak kayaritomo mtapotarî yekatîmn̂e me cehsom mokyasî Xuta yepamtho rma. Noro xa tak nasî miyan komo n̂ewetîrî me rma amn̂e.

11 Tooku n̂imiyasî buhu uupa yepu poko. Buhu xîkrî n̂imiyasî tpoxwem me cepetaxmu poko xa. Tponon korokai uupa yukun kwaka rma. Kamxuku warai rma mîn uupa yukun. Ero kwaka rma tponon korokai.

12 Cewkarasasai nasî wooku ke. Tumutwe xa marha nasî iyorî paaka mown ke. Ero wa nasî Xuta yepamtho komo amn̂e.

13 Taa, on wara wîîkesî Seburon poko hara, noro yeken nasî tuuna imo yecihtaw. Iito rma nasî yukuhya noro nakwarî me. Iina mokyaxe kanawa mko. Meye nas amn̂e noro rowon wokpan Siton rowon wokpan porero rma. Ero wa nasî noro amn̂e.

14 Isaka yehtopo wekatîmyas hara, karitî mîk Isaka buhu mak. Tanme ro mak n̂eremesî noro buhu wara tînarîrî yotaw, asak hakno yotaw.

15 Tpoxwe n̂een̂akn̂e cesekenmacho. Naatî yewtî mexan xa tan okre, kekn̂e ceken yenîche. Tanme ro rma nutupenwakn̂e tawsîn̂em yanîmtome tmotaka, aatome tak. Antonano me mak naxe noro yepamtho komo amn̂e.

16-17 On wara nasî Taan hara amn̂e, tîyanan komo panatanmekn̂e me nasî Ixaw Yana tribun me cexirî ke. Okoyi warai rma mîk esama yakumyawno warai. On wara nas okoyi anarimaw, kawaru tarî n̂eskesî. Eskache kawaru nahronasî. Tîmkawnonhîrî pen nar̂mesî tîmkai okwe. Ero wa kiin̂e okoyi anarimaw. Noro yipu warai rma mîkro Taan, kekn̂e tî. Ero wa tî kekn̂e Ixaw, tumumuru komo yehtopo tî n̂ekatîmyakn̂e.

18 On wara marha tî kekn̂e Ixaw, Apa kah yawno, awya amna yakir̂wamacho ponaro xa wasî, kekn̂e tî. Ero wa tî kekn̂e Xako tumumuru komo poko.

19 Ero yinhîrî takî tî Kace yehtopo n̂ekatîmyakn̂e hara. On wara tî kekn̂e, Kace pen nar̂mexe amn̂e sowtatu komo. Ero yinhîrî takî tar̂man̂enhîrî pen komo nar̂mesî noro hara pahkî exiche.

20 Taa, on wara nasî Ase hara amn̂e, tpoxwem ro mak mîn noro n̂iritho erewsî. Tpoxwem ke yînahmano n̂iir̂asî. Kayaritomo nahrî warai rma n̂etakes okre.

21 On wara nasî Nahtari hara amn̂e, kooso warai me rma nasî, etamxiponkaxapu warai me. Kir̂wanî ro me xa nîmtapowasî noro amn̂e.

22 On warai reha mîk Xose hara, naatî peremru warai mîk ceperkem warai. Tuuna mîtwono warai xa mîk ha ahtoxapu mîtwono. Noro peremru cesî waaca yepore. Ero yipu warai rma mîk Xose.

23-24 Noro pen nahwoketken̂e ro mak tuwuhrekem komo. Waiwî nar̂metken̂e noro wece oko. Noro xera ro mak xatken̂e okwe. Kar̂pe rma tko xakn̂e noro yaporî hara krapa yesîtome. Kaanî rma tko noro yaporî karihcekn̂e. Ero wa n̂iir̂akn̂e ponaro Xako yehtopo rma, Karit ha. Oper̂a yenîn̂e Mîk ero wa n̂iir̂akn̂e. Toopu imo Mîkro, Ixaw Yana komo kurunpetopo, kacho Mîk ero wa Xose n̂iir̂akn̂e.

25 Ponaro aamo yehtopo Mîk awakronomes amn̂e. Ero wa xa awakresî Kaan, Karitî ro xa ha. Kah yawno ke awakresî, yuhnawno ke marha awakresî. Awosîn komo marha wakresî. Tîmxîtaxmu me xa n̂iir̂asî, tmanahcewkrem me marha.

26 Kaan nwakretho xa ow, aamo ha. Oporin pen komo rma re wakrekn̂e, miya xe xa tak owakrekn̂e, aamo ha. Tukuhkawno wara nasî owakrechonho, kawno wara xa. Îîpî wicakî ro mak nasî owakrechonho yîwya, eroromerono wicak ha. Ero yipu ke xa marha awakrecho n̂iir̂asî Kaan ahtîpîrî pona. Awarokorî wara rma nas awakrecho. Ero wara Xose wakresî Kaan, mooxe xakn̂e takno komo yawhra, noro wakresî.

27 Taa, on wara nasî Benxamin hara, robu wara rma nasî, twotohton̂em wara. Pahxaxaro ka totowathîrî non̂esî. Kosope tak totowathîrî n̂ekamyas hara, kekn̂e tî. Ero wa tî nîmtapowakn̂e Ixaw. Ero wa maxe amn̂e, kacho tî n̂ekatîmyakn̂e.

28 Ero wa nat amn̂e Ixaw mumuru komo, ahnoro tribu komo, 12 kom ha. Ero wa tî tumumuru komo wakretopo n̂ekatîmyakn̂e yîîm. Ero wa xa nas awyanî ro awakretopo ro kom ha, kekn̂e tî yîwya so tumumuru cirihtîkaxi ro. Ero wara tî kekn̂e.

29 On wara marha tî kekn̂e Ixaw yîwya so, Oporin pen komo yaka tak kîwcesî. Owaipuche oyokoputho tak men ahrucoko oporin pen komo yawxaka rma. Mîn yaka ow ahrucoko îîpî yamrinawno yaka. Ehron yeken panaw nasî, Etew yeken panaw, ero yaka.

30 Makpera pono mîn, Manîre mîtwono pono. Epethîrî pona tî nahsîyakn̂e Abraaw tîyanan komo yokoputho komo yahrutopo me. Ehron yeken mîtwono mîn nahsîyakn̂e, Etew yeken mîtwono.

31-32 Iina tî nahruyatken̂e Abraaw pen yokoputho, Sara pen yokoputho marha, yihcinhîrî pen yokoputho. Iina xa marha tî Isake pen yokoputho nahruyatken̂e hara, Hebeka pen yokoputho marha tî, yîhcinhîrî pen yokoputho. Iina xa marha Ria pen yokoputho wahruyakn̂e hara. Etew yepamtho komo yeken mîtwo nasî ewtarî, îîpî yexenaw. Abraaw pen nahsîtho po nasî. Iina xa marha ow ahrucoko hara amn̂e, kekn̂e tî. Ero wa tî kekn̂e Ixaw tumumuru komo ya.

33 Ero wara tî tumumuru komo nantomekn̂e Xako tahrutopo poko rma. Ero wa kache takî kama pona takî tî n̂etîrapekn̂e hara. Waihyakn̂e takî tî okwe. Tporin pen komo yaka takî tî cekn̂e. Ero wa tî xakn̂e Xako pen.