Taa, ero yinhîrî on wara takî tî xakn̂e hara Xose, tîîm yekaci takî tî n̂encekn̂e. Namotoyasî tak okwe aamo, kacho tî n̂encekn̂e. Ero yipu yentache takî tî tîîm yenso cekn̂e. Tumumuru komo marha tî naar̂akn̂e Manases, Eprain komo.

2 Taa, esama yaw rma exitaw Xose, noro mohtopo takî tî n̂encekn̂e yîîm. Amumuru mokyasî Xose ha, kacho tî n̂encekn̂e. Entache takî tî n̂ekaricekn̂e. Tîhkaw takî tî nawomyakn̂e kama po rma.

3 Taa, Xose mokuche on wara tî kekn̂e Xako yîwya, Ai okopuci, on wara wîîkes awya, pahxa Kaan n̂esenpekn̂e owya Karitî ro xa. Rus po oyexitaw n̂esenpekn̂e Kanan po oyexitaw ha. Owakretopo n̂ekatîmyakn̂e owya.

4 On wara kekn̂e owya, Okopuci, on wara wîîkes awya, cepamsom me xa tak kiir̂asî. Awepamthîrî komo wepamnoyasî amn̂e mer̂pora ro mak. On roowo wîmyasî awepamthîrî komo yeken me. Eroromero eken komo me nasî, kekn̂e Kaan owya.

5 Ero ke on wara wîîkesî amumuru komo poko, Eprain poko, Manases komo poko. Amumuru me rma re n̂ewruyatken̂e n̂examro tan awexitaw Exitu po. Oona omokunaw ka n̂ewruyatken̂e. N̂examro tak wiir̂asî omumuru me rma. Huben komo wara rma wiir̂asî, Simeaw komo wara rma ha. Ero wa wiir̂asî amumuru komo omumuru me rma.

6 Anarî komo na n̂ewruyatu amn̂e amumuru komo xa hara. N̂examro reha naxe amumuru me tak ha. Omumuru mera tak naxe n̂examro pahxaro cewrusom komo reha. Poturme ewruxapu komo yanan me mak takî reha n̂esetacaxe n̂examro. Poturme ewruxapu komo rowon raconho marha nahsîyaxe ceken komo amn̂e.

7 On wara thakwa wîxakn̂e okwe, Kanan po oyexitaw rma ka ohcinho pen waihyakn̂e okwe Hakew pen ha. Patan poi omokyataw waihyakn̂e esama yaw rma. Eprata pahnoke oyexitaw waihyakn̂e. Berenî rma mîn Eprata. Ero ke thakwa wahruyakn̂e okwe iito rma Eprata yesamarî yakumyaw, kekn̂e tî. Ero wa tî kekn̂e Ixaw Xose ya.

8 Ero yinhîrî Xose mumuru komo takî tî n̂een̂akn̂e Ixaw. Onoke mîkyam? kekn̂e tî yîwya.

9 Omumuru komo moxam ha apa, kekn̂e tî Xose tîîm ya. Tan oyexitaw omumuru komo nîmyakn̂e Kaan owya. N̂examro rma moxam ha, kekn̂e tî. Ai ha, kekn̂e tî yîîm. Eeko xiya ha. N̂examro wakretopo wekatîmyas, kekn̂e tî. Ero wa tî kekn̂e Ixaw.

10 Ewuhra thakwa tko tî xakn̂e Ixaw. Kir̂wan̂he tî enîhra xakn̂e okwe. Ero ke tumumuru komo takî tî n̂ekyakn̂e Xose yîhyaka. Ekîche so tak n̂examro nahsîyakn̂e Ixaw, n̂ewcokekn̂e marha tî.

11 On wara tî kekn̂e Ixaw Xose ya, Omumuru Xose yenîhra was okwe, wîîkekn̂e pahxa. Awenpo rma ha tko Kaan owya. Amumuru komo meero n̂enpes owya okre, kekn̂e tî.

12 Ero yinhîrî tumumuru komo takî tî nahsîyakn̂e Xose, tîîm yenawnonho. Ero yinhîrî takî tî nutupenwakn̂e Xose cesewnaposo ro.

13 Ero yinhîrî tumumuru komo tî naar̂akn̂e xa hara tîîm yaka ahsîtome yîwya. Eprain tî naar̂akn̂e kari n̂ixa tîîm yamorî wece powa n̂ixan wece. Manases tî naar̂akn̂e poowa me hara, tîîm yamorî wece, kaari n̂ixan wece ha. Ero wa tî naar̂akn̂e Xose. Tîîm mîtkoso tî naar̂akn̂e.

14 Ero ke taporî takî tî n̂ehyatkekn̂e Ixaw tparî komo tîpîrî yahsîtome. Anan̂i xan ke tko tî nahsîyakn̂e. Eprain tî nahsîyakn̂e kaari n̂ixan ke. Ero wa tî nahsîyakn̂e mahtîkîthîrî rma. Manases tî nahsîyakn̂e poowa n̂ixan ke hara potuthîrî ha. Ero wa tî yîhtîpîrî komo nahsîyakn̂e. Tanme ro rma tî ero wa nahsîyakn̂e.

15-16 Ero wa ahsîche Xose wakretopo tî n̂ekatîmyakn̂e Ixaw. On wara tî kekn̂e, Moxam amumuru komo wakre xe wasî Kaan ya kar̂pamxan komo cik ha. Ponaro xa xakn̂e pooco Abraaw, ponaro marha xakn̂e apapa Isake Noro ya rma moxam wakre xe wasî. Onahman̂enho Mîk mehxa ro. Oroto rma onahmesî. Noro ya rma moxam akronoma xe wasî. Ancu ya marha akronoma xe was, owîrîmapora ro mak xakn̂e noro rma moxam nakronomape hara. Oyosoken me rma tko moxam n̂esosotocowpe pooco pen yosoken me marha, apapa pen yosoken me marha. Mer̂pora marha n̂epamcowpe moxam Kanan rakataw rma, kekn̂e tî. Ero wa tî Xose mumuru komo wakretopo n̂ekatîmyakn̂e.

17 On wara tko tî xakn̂e Xose, Eprain tîpîrî yahsîrî tî n̂een̂akn̂e, kaari n̂ixan ke ahsîrî. Ahwora tko tî n̂een̂akn̂e. Ero ke tîîm yamorî tî nahsîyakn̂e. Eprain tîpîrî poi tow xe tî xakn̂e. Manases tîpîrî pona ciri xe tî xakn̂e hara.

18 On wara tî kekn̂e tîîm ya, Pîra apa, moso xa potuthîrî. Moso tîpîrî pona xa matko cirko kaari n̂ixan ha, kekn̂e tî.

19 Tumumuru tko tî nanwekyakn̂e hara yîîm. Pîra okopuci, kekn̂e tî. Owero ro rma yîhtîpîrî komo wahsîyasî. N̂epamyasî rma re potuthîrî mer̂pora cehso ro. Mer̂pora rma re naxe noro yepamtho komo amn̂e. Mahtîkîthîrî tko nas amn̂e potuthîrî yopono me hara. Noro yepamtho tak naxe hara mer̂pora ro mak. Mîk hak rowon pono me tak naxe n̂examro yepamtho komo. Ero wara naxe mahtîkîthîrî yepamtho amn̂e, kekn̂e tî.

20 On wara marha tî n̂examro wakretopo n̂ekatîmyakn̂e hara Xako, On wara kexe Ixaw Yana komo amn̂e tînwakreporî komo ya, Kir̂wan̂he xa awakre xe so wasî Kaan ya. Eprain komo wakresî, Manases komo marha wakresî, ero wa xa marha awakre xe so wasî yîwya, kexe, kekn̂e tî. Ero wa tî n̂examro wakretopo n̂ekatîmyakn̂e, Eprain tî n̂iir̂akn̂e Manases yopono me.

21 Ero yinhîrî on wara tî kekn̂e hara Ixaw Xose ya hara, Kwaihyasî tak okwe. Awakro rma tko nasî Kaan ha. Noro rma awar̂asî aporin pen komo yewtontho pona hara.

22 Asakî wîmyasî awya roowo raconho awepamthîrî komo yeken me. Awakno komo yepamtho ya wîmyasî cewn̂e so mak roowo raconho n̂examro yepamtho komo yeken me hara. Onahsîtho rma mîn wîmyasî awya so. Amohew pen komo yekenho wahsîyakn̂e. N̂examro pen wen̂epekn̂e kacipara imo ke, oyuhre ke marha. Ero wa n̂examro pen wen̂epekn̂e ekenhîrî komo yahsîtome owya. Ero rma wîmyasî awepamthîrî komo ya hara, kekn̂e tî. Ero wa tî kekn̂e Ixaw Xose ya.