Ero ke Paraw yaka takî tî cekn̂e Xose. On wara tî kekn̂e yîwya, Apa, on wara wîîkes awya, apapa tak mokye Kanan poi. Kosen po tak nai oroto. Oyakno komo marha mohce. Toh komo n̂ehce paaka, oper̂a komo. Cemyawno komo marha n̂ehce ahnoro, kekn̂e tî. Ero wa tî kekn̂e Xose Paraw ya.

2 On wara tî xakn̂e Xose Paraw yaka tîcetaw, takno komo tî naar̂akn̂e 5 mak. Moxam oyakno kom ha, kekn̂e tî Paraw ya.

3 N̂examro yenîche on wara tî Paraw kekn̂e yîwya so, Ai, ahce pokono amyamro? kekn̂e tî yîwya so. On wara tî n̂eyukyatken̂e, Tok yenîn̂e amna apa, oper̂a yenîn̂e. Ero poko amna xakn̂e mehxa ro. Ero poko marha xatken̂e amna porin pen kom hara, ketken̂e tî yîwya.

4 On wara marha tî ketken̂e Paraw ya, Exitu pona esekenmaxi cma re amna mokye. Rooma poko ro mak amna xakn̂e Kanan po. Amna yok nahrî exihra marha xakn̂e iito. Ero ke on wara kes amna awya apa, Kosen pona cma re cexi xe nas amna, ketken̂e tî yîwya.

5-6 On wara tî kekn̂e Paraw Xose ya, Mohce ham aamo komo, awakno komo. Ero ke awanme ro mak enko eken komo, Miya rma nasî Exitu, roowo ha. Ero ke kir̂wan xa enko aamo yeken, awakno komo yeken marha. Kosen pono enko. Taa, takîhsom exitaw awakno komo poyino, n̂examro cirko oyok yenîn̂e me, kekn̂e tî. Ero wa tî kekn̂e Paraw Xose yakno komo ya.

7 Ero yinhîrî tîîm takî tî naar̂akn̂e Xose, Xako ha. Paraw ya enposo tî naar̂akn̂e. On wara tî kekn̂e Xako Paraw ya, Kaan ya xa awakre xe wasî, kekn̂e tî.

8 Ero yinhîrî on wara tî kekn̂e Paraw Xako ya, Atî wicakî nai awewrutoponhîrî? kekn̂e tî yîwya.

9 On wara tî n̂eyukyakn̂e Xako, 130 cimn̂ipu mak nasî roowo pore oyetaritoponho. Asak mak nasî cimn̂ipu, oyewrutoponho okwe. Ahwora kenmayakn̂e roro okwe mehxa ro. Oporin pen komo reha pahkî n̂he xatken̂e oyopo. Yaake cimn̂ipu xakn̂e n̂examro yewrutoponho, roowo pore etaritoponhîrî komo, kekn̂e tî Xako Paraw ya.

10 Ero wa kache on wara tî kekn̂e xa hara Xako Paraw ya, Kaan ya xa awakre xe wasî, kekn̂e xa hara tî. Ero wa kache tî cekn̂e hara Xako, Paraw yakro tîmtapotache.

11 Ero yinhîrî tîîm yeken takî tî n̂een̂akn̂e Xose, takno komo yeken marha. Roowo tî n̂een̂akn̂e kir̂wanî ro Exitu pono. Hameses pono tî n̂een̂akn̂e. Ero wa tî n̂een̂akn̂e tîyanan komo yeken Paraw mtapotachonho yaw roro rma.

12 N̂examro marha tî nurmekn̂e Xose, tîîm komo, takno komo marha. Ahnoro kîrkomo ya tî nîmyatkekn̂e iyuru yîhyawno komo yecenarî so. Ero wa tî iyurmano n̂iir̂akn̂e Xose.

13 Taa, ero yimaw takî tî Exitu pono komo yuru exihra ro makî tî xakn̂e okwe. Atîhtara ro makî tî xakn̂e mararîn kom okwe. Kanan pono komo mararîn marha tî ero wa xakn̂e. Ero ke rooma poko makî tî xatken̂e okwe ahnoro.

14 Ero ke takî tî Xose yaka cetken̂e tînahrî komo yaponso. Noro tî nahsîtîkekn̂e yupurantanthîrî komo ahnoro yînahrî komo yepemachonho. Exitu pono komo purantantho tî nahsîyakn̂e, Kanan pono komo purantantho marha. Ero wa tî nahsîyakn̂e puruma yepetho. Paraw mîn yaka tî naar̂akn̂e.

15 Ero ke takî tî puranta n̂enahcakn̂e okwe Exipsiu komo purantantho, Kanan pono komo purantantho marha. Ero ke Xose yaka takî tî cetken̂e xa hara Exipsiu komo. On wara tî ketken̂e yîwya, Tuuru xe cma re nas amna. Amna pen thakwa waihyas okwe tînahrî exihtorî ke. Ahce kacho amna waihya amîtwono rma. Amna purantantho thakwa n̂enahce okwe amna nahrî yepetho, ketken̂e tî yîwya.

16 On wara tî n̂eyukyakn̂e Xose, Ai ha, apurantan komo n̂enahce ham. Ero ke awokuthîrî komo tak ehcoko hara awru komo yepetho me hara. Ero yipu pona tak wîmyasî awru komo, kekn̂e tî yîwya so.

17 Ero ke tokuthîrî komo takî tî n̂ekyatken̂e Xose yaka. Iyuru komo takî tî nîmyakn̂e ero pona. Kawaru pona tî nîmyakn̂e, oper̂a pona marha, paaka pona marha, buhu pona marha. Noro yipu pona tî iyurmano n̂iir̂akn̂e Xose ero cimn̂ipu po.

18 Taa, ero tak n̂enahcakn̂e. Ero yinhîrî tak anarî cimn̂ipu po takî tî mokyatken̂e xa hara Exitu pono komo Xose yaka. On wara tî ketken̂e yîwya, Apa amna n̂esekatîmyas awya kir̂wantaw. On wara nas amna, amna purantantho exihra ro thakwa mak nas okwe. Ahyaw marha thakwa nas amna yokutho. Ero ke ahce na komo exihra ro thakwa mak nas amna yaw amna nahrî yepetho. Amna pun mak nasî, amna yeken marha. Ero mak tak nas amna nahrî yepetho me tîmsom ha, ketken̂e tî yîwya.

19 Ahce kacho amna waihya amîtwo rma? Amna men waihyas okwe. Pohnî me thakwa n̂ehtîkes amna yekenho amn̂e. Ero ke cma re amna mahsîyasî Paraw yanton me. Amna yekenho marha ahsîko. Ero wa amna ahsîko amna yuru yepetho me hara. Paraw yanton me mak tak nas amna. Yîwyan me marha tak nas amna yekenho. Ero wa amna yahsîche awya puruma yatho tîmko amna ya waipîra amna yehtome, pohnî me exihra marha ehtome amna yekenho, ketken̂e tî yîwya.

20 Ero ke ekenhîrî komo takî tî nahsîtîkekn̂e Xose ahnoro Exipsiu komo yekenho. Paraw rowon me takî tî nahsîyakn̂e. Ahnoro tî nîmtîketken̂e cekenhîrî komo yîwya tînahrî komo yepetho me. Ero wa tî nîmyatken̂e rooma poko xa cexirî ke so. Ero ke roowo takî tî nahsîtîkekn̂e Paraw ahnoro Exitu pono.

21 Exitu pono komo takî tî nîmînmekn̂e ewto pona so. Ero wa tî nîmînmekn̂e Exitu pono komo ahnoro. Exitu rowon wokpan yakanî ro komo meero tî ero wa n̂iir̂akn̂e, xiyan yakanî ro komo, miyan yakanî ro komo marha.

22 Yaskomo yewton makî tî ahsîra xakn̂e Xose. N̂examro nahman̂e me rma tko tî xakn̂e Paraw pahxanînhîrî rma. Paraw nîmîtho makî tî nahyatken̂e. Ero ke cewton komo tîmîhra tî xatken̂e n̂examro turu komo yepetho me.

23 Taa, ero yinhîrî on wara takî tî kekn̂e Xose Exitu pono komo ya, Taa, owî reha kahsîyatken̂e so awru komo yepetho me. Awewton komo marha wahsîyakn̂e. Paraw yanme mak kahsîyatken̂e so. Ero ke noro yanton me tak maxe. Ero ke on naatî yatho wîmyas awya so. Anatîrî komo me ciicoko.

24 Ero raconho tko ehcoko roro amn̂e, anatîrî komo yepetache tak 5 saku exitaw ero yeperîrî, anarînhîrî tîmcoko Paraw ya. 4 saku reha nas anatîrî komo me ciisom. Anahrî komo me marha nasî, ahyawno komo nahrî me, amxîkrî komo nahrî me, noro yipu komo nahrî me nasî ero Paraw ya tîmîhnî. Ero wa tîmcoko roro anatîrî yeperîrî raconho Paraw ya, kekn̂e tî. Ero wa tî kekn̂e Xose Exitu pono komo ya.

25 On wara tî n̂eyukyatken̂e Exitu pono komo, Amna yecehton̂e amoro, waipîra amna ciin̂e ha. Ero ke amna pînîn yaw rma cma re masî. Paraw yanton me rma tak amna nasî, ketken̂e tî Xose ya.

26 Ero ke ero wa kacho takî tî mewrekn̂e Xose Exitu pono komo n̂ewetîrî me. Eroromerono me tî mewrekn̂e. On wara kacho tî mewrekn̂e, 5 saku exitaw ahyaw so anatîrî komo yeperîrî, cewn̂e saku tîmcoko Paraw ya. Yaskomo rowon yahsîra reha tî xakn̂e Paraw. Ero wa kacho rma tî nai tmewreso oroto. Ero wa tî nai.

27 Taa, ero yinhîrî takî tî iito rma xakn̂e Ixaw Exitu po rma Kosen po ha. Epamrî komo marha tî xatken̂e iito rma. Yaake tî xakn̂e ewton komo. N̂epamyatken̂e xa takî tî mer̂pora ro mak. Ero wa tî xatken̂e Ixaw yepamrî komo.

28 Pahkî n̂he tî xakn̂e Xako Exitu po rma kapu. 17 cimn̂ipu rma tî xakn̂e iito. Ero yimaw takî tî yaake xakn̂e cimn̂ipu noro yewrutoponho, 147 tî xakn̂e.

29 Ero yimaw takî tî pahnoke xakn̂e Ixaw waihtopo. Ero ke tumumuru takî tî nan̂ikyakn̂e, Xose ha. On wara tî kekn̂e yîwya, On wara wîîkes awya okopuci, ooxe awexitaw opetî ahsîko yaaro xa amtapotachome oyakro. On wara xa kasko on̂entarî me, Kir̂wan̂he awin̂e me mak was apa, awemîknon̂e pîn me ro mak wasî. Awaipuche awokoputhîrî yahrura wasî tan Exitu po, kasko on̂entarî me.

30 Exitu poi xa matko waar̂asî apunthîrî amn̂e Kanan pona hara. Iina tak wahruyasî aporin pen yokoputho yawxaka rma, kasko owya yaaro xa ha, kekn̂e tî. Taa, kekn̂e tî Xose yîwya, amtapotarî wewehcas amn̂e. Ero wa kiir̂as amn̂e awaipuche amtapotachonhîrî yaw roro rma, kekn̂e tî.

31 Yaaro xa kasko owya cemaro pîn me ro makî, kekn̂e tî yîîm yîwya. Taa, kekn̂e tî Xose yîwya, yaaro xa tan wîîkes awya, cemaro pîn me ro mak, kekn̂e tî. Ero wa tî kekn̂e tîîm ya. Ero wa kacho yentache takî tî Ixaw nutupenwakn̂e hara tîkaman po rma. Ero wa tî xakn̂e.