Taa, on wara wîîkes awya so, kakîhtotoponhîrî komo tan wekatîmyas awya so. Pahxa ahce na exihra ro mak exitaw kaapu nakîhcekn̂e Kaan. Roowo marha tî nakîhcekn̂e.

2 On wara tî ka xakn̂e roowo akîhtoxapu rma ha ka, îîpî exihra tî ka xakn̂e, tuuna yepu marha, weewe marha, tooto marha, ero warai komo tî exihra ka xakn̂e. Ahce na komo exihra ro makî tî ka xakn̂e. Yiiponomra ro makî tî xakn̂e roowo. Tuuna imo rma tî re xakn̂e miya ro mak, yatîhnî me mak ha tko. Awarpape makî tî xakn̂e tuuna ymo ahnoro. Taa, ero yimaw takî tî Kaan Yekatî n̂etar̂akn̂e ero yipu yepore, tuuna imo yepore ha.

3 Taa, ero yimaw on wara tî kekn̂e Kaan, Katpan tak n̂esenpope ha, kekn̂e tî. Ero wa kache katpape takî tî xakn̂e okre ahnoro.

4 Ero yinhîrî takî tî katpan n̂een̂akn̂e Kaan tîn̂irithîrî. Kir̂wan̂he ro makî tî n̂een̂akn̂e okre. Awarpape rma tî re xakn̂e amn̂e n̂he makî tî. Amn̂e takî tî n̂enmayakn̂e hara. Ero wara takî tî xakn̂e.

5 Ero yimaw takî tî katpan nosohcekn̂e Kaan. Enmarî tan ha, kekn̂e tî katpan poko. Awarpan marha tî n̂osohcekn̂e. Kokmamrî reha on hara, kekn̂e tî ero poko hara. Ero yimaw takî tî kokmamyakn̂e. Amn̂e takî tî n̂enmayakn̂e hara. Ero wa tî xakn̂e. Yihcirî tî ka mîn xakn̂e kaamo.

6 Ero yinhîrî on wara tî kekn̂e hara Kaan, tuuna yotakanmacho tak n̂expe hara. Mehxa n̂expe tuuna, xehxa n̂expe tuuna hara, kekn̂e tî. Ero wa tî kekn̂e Kaan.

7 Ero wa tî Kaan nakîhcekn̂e tuuna yotakanmacho. Ero yepoi takî tî xakn̂e tuuna. Ero yapomyaw marha tî xakn̂e tuuna hara. Ero warai me roro takî tî xakn̂e.

8 Ero yimaw marha tuuna yotakanmacho takî tî nosohcekn̂e hara Kaan. Kaapu mîn ha, kekn̂e ero poko hara. Ero wa tî nosohcekn̂e. Taa, ero yimaw takî tî kokmamyakn̂e hara. Amn̂e takî tî n̂enmayakn̂e hara. 2-înhîrî tî mîn xakn̂e enmarî ha.

9 Ero yinhîrî on wara tî kekn̂e Kaan, Iina re tak n̂esenmekpe tuuna. Miyanî rma n̂esenmekpe kah yapomyawno ahnoro. Roowo marha tak n̂esenpope hara, kekn̂e hara tî. Ero wa kache takî tî ero yaw roro rma tak xakn̂e.

10 Ero wa exiche takî tî turpem nosohcekn̂e hara Kaan roowo me. Tuuna marha tî nosohcekn̂e tuuna imo me. Ero wa tî nosohcekn̂e. Ero yipu takî tî n̂een̂akn̂e Kaan. Kir̂wan̂he tî n̂een̂akn̂e okre.

11 Ero yinhîrî on wara tî kekn̂e hara Kaan, Cuupu tak natîhtape roowo po. Naatî natîhtape cepetaxmu me ha. Weewe marha natîhtape cepetaxmu me hara. Ero warai me re cepamsom me natîhtape. Ero warai tak natîhtape roowo po, kekn̂e tî. Ero ke takî tî natîkwakn̂e ero yipu komo rma ahnoro ha.

12 Ero ke tatîhtaxmu takî tî natîkwakn̂e. Naatî natîkwakn̂e ero warai me re cepamsom. Weewe marha natîkwakn̂e ceperkem, ero warai me re cepamsom marha. Atîhtache ero komo takî tî n̂een̂akn̂e Kaan. Kir̂wan̂he tî n̂een̂akn̂e okre.

13 Taa, ero yimaw takî tî kokmamyakn̂e xa hara. Amn̂e takî tî n̂enmayakn̂e xa hara 3-nhîrî me.

14 Ero yinhîrî on wara tî kekn̂e hara Kaan, katpareno rin̂e komo tak n̂ehcowpe hara kah rataw. Enmapuche n̂esenpope anarî, kokmamche tak anarî komo n̂esenpocowpe hara. Iito tak n̂ehcowpe ahce wa na tooto yehtopo kuknon me. Cimn̂ipu kuknon me marha n̂ehcowpe, katpan komo kuknon me ha. Enmarî kuknon me marha n̂ehcowpe, aanu kuknon me marha. Ero warai me n̂ehcowpe katpareno rin̂e kom ha, kekn̂e tî Kaan.

15 Roowo katparen̂e me n̂ehcowpe kah rataw, kekn̂e tî. Ero wa tî kekn̂e Kaan. Ero ke ero wara rma takî tî xakn̂e.

16 Asakî tî nakîhcekn̂e porin komo roowo katparen̂e komo. Anarî tî nakîhcekn̂e kenmanokan̂e, kîkatparen̂e xa. Anarî tî nakîhcekn̂e hara wara n̂he mak kîkatparen̂e. Ero wa tî Kaan nakîhcekn̂e katpareno rin̂e komo, porin kom ha. Xir̂ko komo marha tî nakîhcekn̂e hara. Ero wa tî nakîhcekn̂e Kaan.

17 Ero yipu komo tî Kaan nakîhcekn̂e kah rataka. Roowo katparen̂e me tî n̂iir̂akn̂e iina.

18 Kenmanokan̂e me tî n̂iir̂akn̂e, kokmamchen me marha. Ero wa tî n̂iir̂akn̂e katpape ehtome, awarpape marha ehtome esemtakan me hara. Ero wa ehtome tî nakîhcekn̂e. Ero yipu yakîhtotîkache kir̂wan̂he tî n̂een̂akn̂e tînakîtothîrî.

19 Taa, ero yimaw takî tî kokmamyakn̂e xa hara. Amn̂e tî n̂enmayakn̂e hara 4-nhîrî me tak ha.

20 Ero yinhîrî takî tî on wara kekn̂e hara Kaan, Tuuna tak n̂expe cewrusom wara. Ootî ke cewrusom me n̂expe, wayawaya me, kwaci me, ahnoro yukwawno me. Ero yipu me n̂epampe mer̂pora ro mak cehso ro. Taa, tarin̂em komo marha tak n̂ehcowpe roowo yepore tarinîmsom me, kah ratari tîtosom me so ha, kekn̂e tî Kaan.

21 Porin komo marha tî nakîhcekn̂e Kaan, ootî imo komo. Ahnoro tî nakîhcekn̂e yukwaw cetarisom kom ha. Mer̂pono pînî ro makî tî nakîhcekn̂e noro yipu kom ha. Ero warai me re cepamsom me makî tî nakîhcekn̂e. Tarin̂em komo marha nakîhcekn̂e tapokem kom ha. Ero warai me re cepamsom me marha tî noro yipu komo nakîhcekn̂e. Akîhtoche kir̂wan̂he tî Kaan n̂een̂akn̂e tînakîtothîrî.

22 Ero yinhîrî takî tî tînakîtothîrî wakrekn̂e Kaan. On wara tî kekn̂e poko so, Mer̂pora cepamsom me tak n̂ehcowpe. Ero wa n̂epamcowpe yukwawno komo tuuna imo tawronohkatîkaxi ro. Tarin̂em komo, amyamro marha epamcoko roowo po hara, kekn̂e tî Kaan.

23 Taa, ero yimaw takî tî kokmamyakn̂e xa hara. Amn̂e takî tî n̂enmayakn̂e hara, 5-nhîrî me tak ha.

24 Ero yinhîrî takî tî on wara kekn̂e hara Kaan, Roowo marha tak cewrusom me n̂expe hara. Yaipî komo n̂etakîtocowpe hara, kamara komo, akri komo. Paaka komo marha n̂etakîtocowpe, sehrere me tîtosom komo marha, ahnoro mak. Ero warai me re cepamsom me n̂ehcowpe, kekn̂e. Ero wara tî kekn̂e Kaan. Ero ke yîmtapotarî yaw roro rma takî tî xakn̂e.

25 Ero wa Kaan nakîhcekn̂e yaipî komo, kamara komo, akri komo, noro yipu komo ahnoro. Ero wa xa marha tî nakîhcekn̂e sehrere me tîtosom kom hara. Ero warai me re cepamsom me tî nakîhcekn̂e. Akîhtoche takî tî kir̂wan̂he n̂een̂akn̂e.

26 Ero yinhîrî takî tî on wara kekn̂e hara Kaan, Tooto tak takîhtocerî kwarai me so rma. Akîhtoche tak kîwya so ootî komo yosom me tak n̂ehcowpe, ahnoro yukwawno komo yosom me ha. Tarin̂em yosom me marha n̂ehcowpe, paaka komo yosom me marha. Roowo yosom me marha n̂ehcowpe, sehrere me tîtosom komo yosom me marha. Ero wa n̂ehcowpe tooto komo, akîhtoche kîwya so, kekn̂e tî.

27 Ero ke takî tî tooto nakîhcekn̂e Kaan. Twarai me rma tî nakîhcekn̂e, Kaan warai me rma. Kîîrî me tî nakîhcekn̂e, woosî me marha tî.

28 Akîhtoche takî tooto takî tî wakrekn̂e Kaan. On wara tî kekn̂e yîwya so, Cepamsom me tak ehcoko. Mer̂pora tak epamcoko roowo tawronohkatîkaxi ro. Roowo yosom me tak ehcoko. Ootî komo yosom me marha ehcoko, tarin̂em komo yosom me, yaipî komo yosom me, kamara komo yosom me, akri komo yosom me, miyan komo yosom me rma ehcoko roowo pore cetarisom komo yosom me ha.

29 On wara marha tî kekn̂e Kaan tooto komo ya, Naatî marha wîmyas awya so cepetaxmu komo. Miyan komo rma wîmyas awya so roowo poko hakno komo. Weewe komo marha wîmyas awya so cepetaxmu kom ha. Anahrî komo me wa wîmyasî.

30 Yaipî ya marha ero yipu wîmyasî tatîhtaxmu komo, paaka ya marha, kawaru ya marha. Noro yipu komo nahrî me wîmyasî ero yipu kom ha. Tarin̂em komo ya marha wîmyasî, sehrere me tîtosom komo ya marha, karitî me cehsom komo ya wîmyasî miyan komo ya rma. Ero yipu wîmyasî yînahrî komo me, kekn̂e tî Kaan. Ero ke ero wa takî tî xakn̂e tatîhtaxmu komo, yînahrî komo me tî xakn̂e.

31 Ero yimaw takî tî Kaan n̂een̂akn̂e tînakîtothîrî ahnoro. Kir̂wan̂he ro makî tî n̂een̂akn̂e. Ero yinhîrî takî tî kokmamyakn̂e xa hara. Ero yinhîrî n̂enmayakn̂e xa hara 6-înhîrî me tak ha.