Taa, ero yinhîrî takî tî iito xakn̂e Repi yepamtho, kîîrî. Noro takî tî cipici nahsîyakn̂e Repi yepamtho wosînî rma. Noro warai tî nahsîyakn̂e cipici.

2 Ero yinhîrî takî tî yipici n̂etahsîyakn̂e. Kîîrî me ciki tî n̂ewruyakn̂e. Tupunporem me ciki tî n̂een̂akn̂e yîson. Ero ke takî tî noro ciki n̂eyamyakn̂e 3 nuun̂i.

3 Ero yinhîrî takî tî eyamrî yarohra tak xakn̂e. Ero ke tîmxîkrî yen takî tî kahyakn̂e yîson. Tuuwa warai tî kahyakn̂e rikomo yecenarîno ciki. Kapuche takî tî nahkoromekn̂e maan̂i warai ke xuxuxu kahra ehtome. Ero yaka takî tî n̂enkayakn̂e tîmxîkrî. Eepu kwaka takî tî n̂aar̂akn̂e. Ero kwaka tî n̂iir̂akn̂e wanturu warai cheka.

4 Ero yinhîrî takî tî rikomo yepeka n̂ecececekn̂e mooxe n̂he ha re entome, Ahce wa na nai oyepeka amn̂e, kachome tî.

5 Ero yinhîrî takî tî Paraw yemsîrî tî mokyakn̂e eyehso ecihtaka. Yaake tî xatken̂e noro maywen komo wooxam komo. Ecihtari tî cetken̂e maywen komo. Ero yimaw takî tî rikomo yen n̂een̂akn̂e Paraw yemsîrî wanturu warai chew. Ero ke takî tî tanton n̂en̂epekn̂e ehso.

6 Rikomo yen yekîche tî nahrunkekn̂e Paraw yemsîrî. Rikomo ciki takî tî n̂een̂akn̂e. Nîwracekn̂e thakwa tî rikomo ero yimaw. Ockon̂e, kekn̂e tî Paraw yemsîrî. Ebrew xîkrî ham moso, kekn̂e tî.

7 Ero yimaw rikomo yepeka takî tî mokyakn̂e Paraw yemsîrî yaka. On wara tî kekn̂e yîwya, Yiixe awexitaw Ebrew wosin wan̂ikyasî rikomo wokpan̂e me awanme, kekn̂e tî.

8 Taa, an̂ihta ha ke, kekn̂e tî Paraw yemsîrî yîwya. Ero ke rikomo yonî rma tî nan̂ikyakn̂e.

9 Mokuche tak on wara tî kekn̂e Paraw yemsîrî yîwya, Moso ciki arko amîn yaka. Iito tak wokpakî. Wokpatopo yepetho tak wîmyas awya amn̂e, kekn̂e tî. Ero ke rikomo tî naar̂akn̂e yîsonî rma. Wokpekn̂e roro tî. Ero wa tî xatken̂e n̂examro.

10 Ero ke takî tî por̂mamyakn̂e rikomo. Por̂mamche n̂he tak yîson naar̂akn̂e Paraw yemsîrî yaka. Noro mrerî me tak xakn̂e. Moises me tak nosohcekn̂e. On wara tî kekn̂e noro poko ciki, Tuuna kwai moso cik wanîmyakn̂e. Ero ke Moises me wosohcesî, kekn̂e tî. Ero wa tî kekn̂e.

11 Ero yinhîrî takî pahkî exiche Moises tak n̂etîtîkekn̂e. Ero yinhîrî tîyanan komo yenso tak cekn̂e. Tawsîn̂em yaan̂e me roro exirî komo n̂een̂akn̂e. Iito exitaw Ebrew pen nîhyokyakn̂e Exipsiu cerewre ro mak oco. Moises wero ro rma nîhyokyan̂e.

12 Ero ke yarpa so n̂esewyar̂akn̂e Moises. Exihra cma tî re xakn̂e enîn̂e. Ero ke tak Exipsiu pen tî waihkekn̂e Moises. Waihkache axawa nahcekn̂e eyamtopo. Ero yaka n̂eyamyakn̂e noro pen yokoputho.

13 Ero yinhîrî takî anarî kaamo po xa hara cekn̂e Moises tîyanan komo yenso. Iito cexitaw cetar̂maxmu komo tak n̂een̂akn̂e xa hara kîrkomo asak ha, Ebrew komo re okwe. Ero ke on wara kekn̂e Moises tpoyino yemetanmekn̂e ya, Ahce kacho noro metape kica? kekn̂e yîwya.

14 On wara tko n̂eyukyakn̂e Moisesî mtaka, Onok ma re awir̂e ke amna kayaritomon me, amna yen̂ekan̂e me ha? Owaika xe marha na mai hara Exipsiu pen wa xa marha, kekn̂e yîwya. Ero yentache tak n̂eraswakn̂e Moises. Kopi, kekn̂e, n̂esence ham okwe Exipsiu pen waihkachonho owya, kekn̂e tak.

15 Ero yinhîrî Paraw takî tî n̂encekn̂e Exipsiu pen waihkachonho yîwya. Ero ke Moises pen makîrha takî tî waihka xe xakn̂e. Ero ke n̂emahciyakn̂e tak Moises. Miya ro makî tî cekn̂e mooxe Micianita komo cheka. Iitono ro me cekn̂e. Iina cepatakache rma takî tî tuuna mîtkoso tî n̂eremekn̂e ahtoxapu mîtkoso ha.

16 Iito xakn̂e tîmsom pokono ro, Micianita. Noro yemsîrî komo tî xatken̂e 7. N̂examro mokyatken̂e tuuna yanîmso oper̂a wokru yen yarîhtotome, tîîm yok wokru me ha.

17 Ero yimaw rma tko mokyatken̂e anarî kom hara, oper̂a yenîn̂e kom rma. N̂examro takî tî wooxam komo n̂en̂epetken̂e okwe. Moisesî tko tî wooxam komo nakronomekn̂e. Iyoh komo tî wokpekn̂e.

18 Tîîm komo yaka toche so hara, Heuew yaka on wara tî kekn̂e noro yîwya so, Okopuci komo, ahce kacho mîmohcow hara yohno oroto? kekn̂e tî yîwya so.

19 On wara tî ketken̂e emsîrî komo, Iito n̂eexi Exipsiu. Noro cma amna nakronoma tuuna yewyometaw rma oper̂a yenîn̂e komo ya. Tuuna nanmo marha kok wokru, ketken̂e tî tîîm komo ya.

20 Ahto ma nai ke noro? kekn̂e tî yîîm yîwya so. Ahce kacho mînomcow ekîhra? An̂ihtatko. Eseresmatamko ha tî, katatko yîwya, kekn̂e tî yîwya so.

21 Ero ke tak Moises cekn̂e Heuew yaka. Yîhyawno me tak xakn̂e cerepore. Cemsîrî tak nîmyakn̂e noro Moises ya yipici me, Sipora tî xakn̂e noro yosotî.

22 Ero yinhîrî takî tî Sipora n̂ewruyakn̂e Moises mumuru ciki. Noro ciki takî Moises nosohcekn̂e Xehson me. On wara tî kekn̂e yîîm, Anarî ro ow. Anarî yana komo chew makî wasî tan, kekn̂e. Ero ke Xehson me tî nosohcekn̂e tumumuru ciki. Ero wa tî nosohcekn̂e.

23 Ero yinhîrî pahkî exiche kayaritomo takî tî waihyakn̂e Exitu pononho pen. Ero yimaw Ixaw Yana komo tî nîwracetken̂e etowîn me ro mak Exipsiu komo yanton me cexirî ke so. Nîwracetken̂e ro makî tî okwe. Ero ke tî yîwratarî komo n̂encekn̂e Kaan.

24 Ero wa tî xakn̂e Kaan, yîwratarî komo tî n̂encekn̂e. Ero ke tîmtapotachonhîrî takî tî nîhtînoyakn̂e hara. Kwakrexe so amn̂e, kekn̂e tî Abraaw ya, Isake ya marha, Xako ya marha, ero wa kachonho tî nîhtînoyakn̂e.

25 Ero ke Ixaw Yana komo takî tî n̂een̂akn̂e Kaan. Ponaro so tî xakn̂e. Ero wa tî xakn̂e.