Taa, ero yinhîrî on wara tak xakn̂e Moises, tîtamru yoku yenîn̂e me xakn̂e, Xetîro yoku yenîn̂e me. Tîmsom pokono mîk xakn̂e, Micianita. Noro yoku yenîn̂e me xakn̂e Moises, oper̂a yenîn̂e me. Axawa imo mapitaka roro iyoku naar̂akn̂e. Iito xakn̂e îîpî Orebe osotî. Kaan yesenpotopo mîn xakn̂e îîpî.

2 Iito exitaw Moises, Kporin komo yancun tak n̂esenpekn̂e yîwya. Wehto chew n̂esenpekn̂e. Peen xakn̂e iito onomto warai. Ero poko tî n̂etahsîyakn̂e wehto. Wehto rma n̂een̂akn̂e Moises, peen pokono. Ecakîra rma tko xakn̂e peen kopi.

3 Ero ke on wara kekn̂e Moises, Ahce mîn hara kopi? Ahce wa nai hara peen, n̂etahsîya rma ha re, ecakîn me rma kopi. Meyehra ka kîwcesî enso, kekn̂e.

4 Meyehra Moises mokrî n̂een̂akn̂e Kporin komo. Ero ke peen yarihtarî chei Kaan kekn̂e yîwya, Ai, Moises, Moises, kekn̂e, Ahce? kekn̂e Moises.

5 Meyehra mokuhra men esko, kekn̂e Kaan yîwya. Ahtarî ka mohkakî. Owyanî ro mak on roowo yiipo mas ero, kekn̂e yîwya.

6 On wara marha kekn̂e yîwya, Ponaro aporin pen Ow ha, ponaro Abraaw yehtopo, ponaro Isake yehtopo, ponaro Xako yehtopo, ponaro noro yipu komo yehtopo Ow ha, kekn̂e yîwya. Ero yipu yentache n̂esewyahruyakn̂e tak tî Moises. N̂eraswakn̂e Kaan wece enî xera.

7 On wara marha kekn̂e Kporin komo, Oyanan komo ween̂asî Exipsiu komo napickarî. Yîtîhkan me ro mak napickexe antoman̂e komo. Yîwratarî komo wencesî. Ahwora exirî komo ponaro wasî, kekn̂e.

8 Ero ke kah yai tak kmoko apickan̂enhîrî komo yai towso, Exipsiu komo yai. Exitu poi tak waar̂asî anarî komo rowon pona hara. Kir̂wan xa mîn, takwekem ha. Paaka mownu pen nasî iito mer̂pora ro mak, wen pen marha. Kananew komo rowon mîn ha. Etew komo, Amohew komo, Peresew komo, Epew komo, Xebusew komo, n̂examro rowon marha mîn. Ero pona waar̂as oyanan komo.

9 Ixaw Yana komo yîwratarî wencesî. Emetanmekno rirî ween̂asî Exipsiu komo ya.

10 Ero ke on wara wîîkes awya, amoro tak etoko Paraw yaka. Noro yaka ken̂epesî oyanan komo yown̂e me. Ixaw Yana komo tak maar̂asî Exitu poi, kekn̂e tî Kporin komo Moises ya.

11 Okyo, kekn̂e tak Moises. Onok warai me ow meen̂a hara Apa, Paraw yaka tîtosom me ma re ow meen̂a? Ixaw Yana komo yaan̂e me ma re ow meen̂a Exitu poi? kekn̂e Moises Kaan ya.

12 Awakro rma wa kmokyas Ow, kekn̂e hara Kaan yîwya. On wara tak maxe amn̂e, on îh po xa Kaan poko maxe amn̂e. Ero ke tak on wara mîîkesî, Kaan yanme xa ham moxam waar̂a, mîîkesî, kekn̂e Kaan yîwya.

13 On wara kekn̂e hara Moises Kaan ya, Apa, on wara na natu Ixaw Yana komo yîhyaka so owcetaw ekatîmso, Ponaro aporin pen komo yehtopo oyen̂epekn̂e ahyaka so, ketaw owya, On wara na oyeyukyatu, Ai ha, onoke xa Noro yosotî? ketu na owya. Ero wa ketaw owya ahce wa wîîke yîwya so? kekn̂e.

14 On wara n̂eyukyakn̂e Kaan, Oyanme ro mak cehsom xa Ow ha. Ero ke on wara kasko Ixaw Yana komo ya, Cehsom ro xa, kacho Mîk, Noro oyen̂epekn̂e ahyaka so, kasko yîwya so.

15 On wara marha kasko Ixaw Yana komo ya, Kporin komo xa oyen̂epekn̂e ahyaka so, ponaro aporin pen komo yehtopo rma. Ponaro Abraaw yehtopo, ponaro Isake yehtopo, ponaro Xako yehtopo, Noro xa oyen̂epekn̂e ahyaka so. Cehsom ro xa Ow, kacho mîn oyosotî eroromerono. Ero wa kacho me xa Ow mîhtînoyaxe amn̂e miya roro esepamkaxapu komo ahnoro, kasko yîwya so.

16 Ero ke etoko yîhyaka so rma. Ixaw Yana poritomon komo enmeko. On wara kasko yîwya so, Kporin komo xa n̂esenpekn̂e owya, ponaro aporin pen komo yehtopo rma. Ponaro Abraaw yehtopo, ponaro Isake yehtopo, ponaro Xako yehtopo, Noro rma n̂esenpekn̂e owya. On wara kekn̂e owya, Ahyaka so tak kmoko. Awemetanmecho komo ween̂asî Exipsiu komo ya, kesî Kaan awya so, kasko yîwya so.

17 On wara wîîkekn̂e pahxa awya so, Exipsiu komo yai kowyaxe so awemetanmekn̂enhîrî komo yai. Kaar̂axe so tak Kananew komo rowon pona hara. Iito marha naxe Etew komo, Amohew komo, Peresew komo, Epew komo, Xebusew komo. N̂examro rowon pona kaar̂axe so. Paaka mown pen nasî iito mer̂pora makî, ween pen marha. N̂examro rowon pona kaar̂axe so omtapotachonho yaw roro rma, kasko yîwya so. Ero wa kasko amn̂e Ixaw Yana poritomon komo ya.

18 Ero wa kache tak awya amtapotarî n̂ewehcaxe. Ero ke tak etocoko amoro Ixaw Yana poritomon komo yakro. Exipsiu komo kayaritomon yaka etocoko. On wara kacoko yîwya, Kporin komo n̂esenpoi amna ya ponaro Ebrew komo yehtopo. Ero ke amna cma re cesî pohnîntaka Noro ya tîmsom yakn̂iso, ponaro amna yehtopo ya tîmsom ha. 3 kaamo amna cesî mooxe n̂he, kacoko yîwya.

19 Awahsîpînkara so rma tko wa nasî Exipsiu komo kayaritomon. Pîra ro mak ha ka okwe. Tamokaritî yanme meero awahsîpînkara so nasî.

20 Ero ke kar̂pe oyehtopo wenpesî yîwya. Exipsiu komo wemetanmekyasî cirihnî cirirî ke owya. Ero wa emetanmekno riche owya awen̂epexe so takî Paraw.

21 Awcetaw so tak tawake wiir̂asî Exipsiu komo apoko so. Ero ke emyawnomra tohra maxe.

22 On wara n̂ehcowpe awosîn komo, tîmîtwono komo yemyawnonho naponcowpe porokuthîrî komo, prata ciixapu, ooru ciixapu marha. Poono marha naponcowpe. Ero yipu ke tak amxîkrî komo porenomacoko. Pononthîrî komo marha amrupocoko yîwya so. Ero wa Exipsiu komo memyawnonkexe, kekn̂e. Ero wa kekn̂e Kaan Moises ya.