On wara tî kekn̂e hara Moises Kaanî mtaka, Oyewetîra rma tko na natu kica Apa, omtapotarî na nanwekyatu. Esenpora mexe xakn̂e Kporin komo awya, ketu na owya, kekn̂e tî Moises.

2 On wara tî n̂eyukyakn̂e Kporin komo, Ahce mîn awemyaw ha? kekn̂e. Amoyi on, kekn̂e tî.

3 Ar̂makî ka roowo pona, kekn̂e tî Kaan yîywa. Ero ke roowo pona nar̂mekn̂e. Okoyi me tak tî n̂etakîcekn̂e amoyinthîrî rma. Ero ke tî n̂emahciyakn̂e Moises.

4 On wara tko tî kekn̂e hara Kaan yîywa, Ahsîko hara awamorî ke rma. Matkîrî poko ahsîko, kekn̂e tî. Ero ke tamorî ke rma tî okoyi nahsîyakn̂e Moises. Ahsîche amoyi me tak tî n̂etakîcekn̂e hara.

5 On wara tî kekn̂e hara Kaan, Ero wa cirko wero ro so amtapotarî ponaro tak ehtome so, Kporin komo xa n̂esenpoi ham yîywa, kachome tak apoko. Ponaro kporin pen komo yehtopo Mîk ha. Ponaro Abraaw yehtopo, ponaro Isake yehtopo, ponaro Xako yehtopo, Noro xa n̂esenpoi ham awya, kexe tak awya ero wa ciriche awya, kekn̂e tî Kaan yîywa.

6 On wara marha tî kekn̂e Kaan Moises ya, Taa, on wara kasko hara, awamorî yumunko aponon yaka, kekn̂e tî. Ero ke tî ero wa numunukyakn̂e tamorî. Tamorî mohkache hara tumutwe tak tî xakn̂e repra ken̂e. N̂eepe wara ro mak tî xakn̂e tumutwe xa.

7 Ero yinhîrî on wara tî Kaan kekn̂e hara yîywa, Yumunko xa hara awamorî aponon yaka hara, kekn̂e tî. Ero ke tamorî numunukyakn̂e hara. Mohkache hara kir̂wan̂he tak tî xakn̂e hara eeco wara rma.

8 On wara tî kekn̂e Kaan yîywa, Awewetîra exitaw so yihcirî me cirihnî ciitopo yeen̂ataw, awewecatu tak na ponan hara yeen̂ataw tak cirihnî ciitopo.

9 Anarimaw amtapotarî yewetîra rma na natu, an̂enpothîrî ponarora marha na natu, asakno rorono ponarora rma okwe. Ero wara exitaw so on wara tak esko hara, tuuna tak anîmko eepu kwawnonho. Anmîche yukmamko roowo pona. Yukmamyataw tak kamxuku me n̂etakîcesî roowo po, kekn̂e tî. Ero wa tî kekn̂e Kaan Moises ya.

10 On wara tko n̂eyukyakn̂e tî Moises, Apa on wara wîîkes awya, Takîhso yîmtapotanî ro mak ow. Mehxa ro rma yîmtapotapon ow. Kir̂wan̂he yîmtapotara rma was oroto awakro omtapowataw. Pohcirî wara yîmtapotanî ro mak ow. Yamorono on on̂utho okwe, kekn̂e tî.

11 On wara tko tî n̂eyukyakn̂e Kporin komo, Onoke xa tooto mtarî nakîhcekn̂e awya? Onoke yîmtapotan komo nakîhce, panahnî komo marha, cewkem komo marha, ewuhnî komo marha? Ow pîn katî noro yipu komo wakîhce awya?

12 Ero ke etoko rma. Awakro rma wa kmokyasî, kir̂wan̂he wiir̂asî amtarî. Amtapotarî poko kakîhresî. Ero wa kasko, ero wara, ero wara, wîîkes awya, kekn̂e tî Kaan yîwya.

13 Apa kah yawno, kekn̂e hara tî Moises, Anarî cma re men̂epesî ow pîn, kekn̂e. Ero wa tî kekn̂e okwe Moises Kporin komo ya.

14 Ero kacho yentache Kporin komo takî tî nîrwonakn̂e Moises poko. On wara tî kekn̂e yîwya, Nai ha re awakno Araw. Repita mîk ha. Kir̂wan̂he tîmtapotaxmu mîk ha. Oroto rma mokyasî noro awenso. Tawake nasî awenîche.

15 Taa, amoro tak mekatîmyasî yîwya omtapotarî. On wara tî kasko, mîîkesî yîywa. Tîmtapotaxmu me xa kiir̂axe so, amoro, noro marha. Ero poko ehcoko, wîîkesî marha awya so.

16 Noro nasî amtapotarî mahriman̂e me. Amtarî wara rma nasî. Kaan yemtakan me mas amoro hara yîwya.

17 Amoyi nas awemyaw ero marha arko. Iike rma tak kar̂pe oyehtopo menpesî, kekn̂e. Ero wa tî kekn̂e Kporin komo Moises ya.

18 Ero yinhîrî tak tî Moises n̂etîramekn̂e tîtamru yaka Xetîro yaka. Noro yenîche tak on wara tî kekn̂e yîywa, Taam, owto xe cma re wasî Exitu pona oyanan komo yenso. Natu rma na oyanan komo waipîra rma? kaxi owto xe wasî, kekn̂e yîwya. Taa, kekn̂e tî Xetîro Moises ya, etok ha. Esemetanmekîra awto xe wasî, kekn̂e. Ero wa tî kekn̂e Xetîro Moises ya.

19 Ero yimaw on wara tî kekn̂e hara Kporin komo Moises ya Micianita komo rowon po rma ka exitaw, Etoko takî Exitu pona hara. Twaihso tak naxe ahnoro awaika xatînhîrî pen komo, kekn̂e tî.

20 Ero ke cipici tak tî nakriyakn̂e Moises buhu mkahsî. Tumumuru komo marha nakriyakn̂e Exitu pona tîtotome so. Kaan yamoyin marha naar̂akn̂e cemyaw.

21 On wara tî kekn̂e xa hara Kaan Moises ya noro torî me, Exitu pona awepatakache so cirihnî ciitopo enpoko men Paraw ya. Awya wenpoi ero yipu enpoko ahnoro yîwya. Yîropotarî tko wiir̂asî ceipuru wara. Ero ke Ixaw Yana komo yen̂epera rma nasî.

22 On wara marha kasko Paraw ya, On wara kesî Kporin komo awya, Omumuru warai mîkyam Ixaw Yana komo poturme ewruxapu warai, kasko yîywa.

23 Ero ke on wara wîîkes awya, omumuru en̂epeko miya opoko ahwotachome so. En̂epera awexitaw amumuru pen waihkes Ow ha, poturme ewruxapunhîrî pen, kasko yîywa, kekn̂e tî. Ero wa tî kekn̂e Kporin komo Moises ya.

24 Taa, esama yaw tî cetken̂e Moises komo. Kosope n̂etakriyatken̂e. Etakritopo to exitaw so Kporin komo tî n̂esenpekn̂e Moises ya. Moses waihka xatî wara tî n̂esenpekn̂e.

25 Kporin komo yenîche on wara tî xakn̂e Siipora, Moises pici, toopuci tî nahsîyakn̂e tîyokem, maria warai. Ero yipu ke tak tî tîmrerî nanpikekn̂e. Yîhcîpîthîrî tak tî nar̂mekn̂e Moises yamrinaka. On wara tî kekn̂e yîywa, Oyin̂o rma re amoro, tkamxukrem ha tko kica, kekn̂e tî yîywa.

26 Ero wa exiche Moises yai takî tî cekn̂e hara Kporin komo. Noro toche on wara tî kekn̂e xa hara Moises pici yîwya, Kamxukrem wara masî kîîrî mren komo yanpikan̂e me awexirî ke, kekn̂e. Ero wa tî kekn̂e yipici yîwya.

27 Ero yimaw on wara tî kekn̂e Kporin komo Araw ya hara, Etoko tak pohnîntaka Moises potpona, kekn̂e. Ero ke cekn̂e takî tî. Moises tak n̂epor̂akn̂e îîpî yamrinaw Kaan yesenpotopo yamrinaw rma. Takno yenîche tî n̂ewcokekn̂e.

28 Ero yinhîrî tak tî Kporin komo mtapotacho n̂ekatîmtîkekn̂e Moises Araw ya, cen̂epen̂enhîrî mtapotacho ha. Cirihnî men cirko amn̂e, kacho marha tî n̂ekatîmtîkekn̂e yîwya.

29 Taa, Exitu pona cepatakache so Ixaw Yana poritomon komo tak tî nan̂ikyatken̂e Moises, Araw komo.

30 Mohtîkache so tak Araw takî tî n̂ekatîmyakn̂e Kporin komo mtapotarî yîwya so. Moises ya kekn̂e Kaan ero wa kachonho. Cirihnî marha tî n̂iir̂akn̂e wero ro so, Kaan yanme xa mai ham, kachome yîwya so. Ero yipu tî n̂enpekn̂e poritomo komo ya.

31 On wara tî kekn̂e Araw yîwya so, Kporin komo mokye tak awenso so, Ixaw Yana komo yenso. Awemetanmekrî komo n̂een̂e Exipsiu komo ya, kekn̂e. Ero wa kacho yentache taki tî nutupenwatken̂e. Kir̂wan̂he xa mai ham Apa, ketken̂e Kaan ya. Ero wa tî ketken̂e.