Taa, ero yinhîrî tak tî Paraw yaka cetken̂e Moises komo Araw yakro. On wara takî tî ketken̂e yîwya, On wara kesî Kporin komo awya, ponaro Ixaw Yana komo yehtopo, Oyanan komo men ahsîpînkakî pohnîntaka totohme so, iito eseresmachome so, opoko ahwotachome so marha, kes awya, ketken̂e tî.

2 On wara tko tî n̂eyukyakn̂e Paraw yîmtaka so, Onoke Mîk hara Kporin komo awya so? Noro mtapotarî ma re wewehca Ixaw Yana komo yahsîpînkachome owya? Kporin komo ponarono pînî ro mak ow ha ke. Ixaw Yana komo yahsîpînkara ro mak wasî, kekn̂e tî yîwya so.

3 Ketîketken̂e rma tko tî Moises komo yîwya. On wara ketken̂e, Ponaro naxe Ebrew komo Noro rma n̂esenpoi amna ya. Ero ke amna cma re mahsîpînkesî. Mooxe n̂he amna cesî esama yaw 3 kaamo moxenon. Pohnîntaka amna cesî. Iito takî tokuthîrî pun amna nakn̂iyasî Kporin komo ya tîmsom me, ponaro amna yehtopo ya tîmsom me ha. Tohra amna exitaw amna na n̂eper̂anwa. Anarimaw amna waparî na mokya. Ero ke cma re amna men̂epes ha, ketken̂e tî yîwya.

4 On wara tko tî n̂eyukyakn̂e Exipsiu komo kayaritomon, Ahce kacho ero wa matu Moises, Araw komo? Amtapotarî komo yanme etapickara tak naxe apoyino komo kica. Etocoko hara etapickaxi.

5 Mer̂pora ro mak tak naxe iitono komo. Awanme so tak n̂epokarexe mak kica etapickara, kekn̂e. Ero wa tî kekn̂e okwe Paraw yîwya so.

6-7 Ero yinhîrî tak tî ero po rma on wara kekn̂e Paraw Ixaw Yana yantoman̂e komo ya, antoman̂e yenîn̂e komo ya marha, Puruma yeceputho ekîhra tak ehcoko Ixaw Yana komo yaka kawau yakro esmacho. Tanme ro mak tak tocowpe ero yipu yenmeso.

8 Yaake rma tko namnonocowpe kawau, kokon̂oro namnonoyatken̂e ero wicakî rma. Ero xawyakan n̂he tak na mamnonoyatu, kahra ro mak ehcoko yîwya so. Nuwun̂uwatu mak ham. Ero ke wa kexe, Amna en̂epeko tokuthîrî pun yakn̂itome ponaro amna yehtopo ya tîmsom me, kexe.

9 Emyarîtocoko n̂he xa matko pahkî n̂he etapickachome so. Cemaro ponarora tak n̂ehcowpe, kekn̂e tî. Ero wa tî kekn̂e Paraw Ixaw Yana yantoman̂e komo ya.

10-11 Ero ke Ixaw Yana komo yaka takî tî cetken̂e antoman̂e komo, antoman̂e yenîn̂e komo yakro rma. On wara tî ketken̂e yîwya so, On wara kesî Paraw awya so, Puruma yeceputho tîmîhra tak was awya so. Ero ke etocoko amyamro puruma yeceputho yeposo. Yaake rma tko amnonocoko kawau. Yaake mamnonoyatken̂e kokon̂oro ero wicakî xa marha amnonocoko rma kaamo po roro, nîîke Paraw, ketken̂e tî yîwya so.

12 Ero ke miya so takî tî n̂etakpayatken̂e Ixaw Yana komo puruma yeceputho yeporîrî poko. Exitu mapitaka roro tî cetken̂e. Yîhkotonhîrî ciki makî tî n̂een̂atken̂e puruma yeputho kotonho. Ero rma tî n̂enmekyatken̂e.

13 Ixaw Yana komo tko tî n̂erekanmekyatken̂e antomano rin̂e komo kar̂pe n̂he etapickachome so. Yaake n̂he amnonocoko ha ke kawau, ketken̂e tî yîwya so. Kokon̂oro puruma yeceputho exitaw yaake mamnonoyatken̂e ero wicakî xa marha amnonocoko hara kaamo po roro, ketken̂e tî yîwya so.

14 Tpoyino komo yenîn̂e me tî xatken̂e anarî komo Ixaw Yana komo rma. Paraw maywen komo tî ero warai me n̂iir̂atken̂e. N̂examro pen meero takî tî nîhyokyatken̂e apickano rin̂e komo. Ahce kacho an̂irithîri komo wicakî xa marha amnonopîra mehcow hara kica. Kokon̂oro asakî n̂he mak mamnonoyatken̂e, oroto ero wicakî xa marha miicow hara kica. Yaake rma men amnonocoko kawau, ketken̂e tî yîwya so.

15 Ero ke yîhyoxapunhîrî komo takî tî cetken̂e Paraw yaka, Ixaw Yana yenîn̂e kom ha. On wara tî ketken̂e yîwya, Ahce poyero amna mîhyokpe oco?

16 Puruma yeceputho tîmîhra tak naxe amaywen komo amna ya. Ero wicakî rma tko amnonocoko kawau kokon̂oro miir̂atken̂e ero wicakî xa marha, kexe amna ya okwe. Amna tak nîhyokyaxe oco. Amaywen komo xa matko naxe kicicme kica, ketken̂e tî yîwya.

17 Muwun̂waxe mak kica, kekn̂e tko tî Paraw yîwya so. Muwun̂waxe mak kica. Ero ke wa mîîkexe, Amna en̂epeko tokuthîrî yakn̂itome Kporin komo ya tîmsom me, mîîkexe kica, kekn̂e tî yîwya so.

18 Ero ke etapickatatko ha. Puruma yeceputho tîmîhra rma nas omaywen awya so. Yaake rma tko amnonocoko ha kokon̂oro mamnonoyatken̂e ero wicakî xa marha ciicoko kaamo po roro, kekn̂e tî yîwya so.

19 Ero wa kacho yentache ahwora ro mak takî tî xatken̂e Ixaw Yana yenîn̂e komo. Pahxa mamnonoyatken̂e ero wicakî xa marha amnonocoko hara kaamo po roro, karî ke thakwa nahwoketken̂e.

20 Paraw yai takî tî cetken̂e. Esama yaw tak n̂esepor̂atken̂e Moises komo yakro, Araw komo yakro. Esamarî komo yaw rma tî n̂examro momokyatken̂e.

21 On wara tî ketken̂e yîwya so, Kporin komo xa awehtopo komo yenîn̂e me nasî. Noro rma awen̂ekacowpe so. Amtapotarî komo yanme tak amna xera ro mak nasî Paraw, noro maywen komo marha. Amna waihka xatî wara rma tak naxe okwe, ketken̂e tî. Ero wa tî ketken̂e Ixaw Yana yenîn̂e komo Moises komo ya.

22 Ero wa kacho yentache Kporin komo yakro tak tî nîmtapowakn̂e Moises. On wara kekn̂e yîwya, Apa kah yawno, ahce kacho cesemetanmesom me mak miir̂a opoyino kom okwe? Ahce kacho ow mantomai moxam yaatopo poko ha?

23 Paraw yakro rma re kîmtapotai. Kporin komo nantomatho ow, wîîkai. Omtapotarî yanme rma tko Ixaw Yana komo n̂emetanmetîkesî ro mak tak okwe. Ayanan komo yahsîpînkapora ro mak masî yîwya okwe, kekn̂e. Ero wa tî kekn̂e Moises Kporin komo ya.