Taa, on wara takî tî Moises n̂eyukyakn̂e Kporin komo, Ai Moises, oroto tak meen̂asî Paraw yemetanmekrî owya. Kar̂pe xa oyehtopo ke rma noro pen wemetanmekyasî. Ero yinhîrî Ixaw Yana komo tak n̂en̂epesî tîrowon poi. Etocoko kr̂a, kesî tak, kekn̂e tî.

2 On wara marha tî kekn̂e Kaan Moises ya, Aporin komo Ow ha.

3 Abraaw pen ya kesenpekn̂e, Isake pen ya marha, Xako pen ya marha. N̂examro ya oyesenpetaw Kaan Mîkro, Karitî ro, kacho me mak ka ohtînoyatken̂e. Aporin komo me tko ohtînopîra ka xatken̂e.

4 On wara wîîkekn̂e yîwya so, Kananew komo rowon wîmyasî awya so aweken komo me. Yaaro xa tan wîîkesî, wîîkekn̂e yîwya so. Kanan po rma re ka xatken̂e n̂examro pawana me mak, anarî yana komo chew mak xatken̂e.

5 Kokon̂oro tak Ixaw Yana komo mtapotarî wentai, okwe, okwe, kacho yîwya so. Ahsîpînkan me thakwa mak n̂examro napickexe Exipsiu komo. Ero ke n̂examro porin pen komo ya wîîkekn̂e ero wa kachonho ponaro rma wasî.

6 Ero ke on wara kasko Ixaw Yana komo ya, On wara kesî Kaan awya so, Aporin komo xa Ow ha, kesî. Ayopo so awapickexe so Exipsiu komo. Awahsîpînkan̂e pîn komo mîkyam okwe. Ow xa tko kahsîpînkapexe so yîwya so. Kowyaxe so rma kar̂pe oyehtopo ke. N̂examro pen wemetanmekyasî ro mak awowtome so tak.

7 Oyanan me xa tak kahsîyaxe so. Ponaro awehtopo komo me marha wasî. On wara mîîkexe ero yimaw, Kporin komo xa Mîk ponaro kehtopo komo. Noro rma kahsîpînkapoce so Exipsiu komo ya, kyopo so kapickan̂enhîrî komo ya ha, mîîkexe.

8 Meyeno pona tak kaar̂axe so roowo pona. On men wîmyas amn̂e roowo awepamthîrî komo ya, wîîkekn̂e Abraaw pen ya, Isake pen ya, Xako pen ya, ero rma tak wîmyasî awya so awekenî ro me. Aporin komo xa Ow ha, kesî Kporin komo awya so, kasko yîwya so, kekn̂e. Ero wa tî kekn̂e Kaan Moises ya.

9 Taa, ero wara kacho rma tî re n̂ekatîmyakn̂e Moises Ixaw Yana komo ya. Yîmtapotarî yentan̂e pîn wara rma tko tî xatken̂e ahwora ro mak cexirî ke so, tîyopo so apickaxapu me exirî ke so. Ero wa tî xatken̂e.

10-11 Ero yinhîrî on wara tî kekn̂e hara Kporin komo Moises ya, Etoko Paraw yaka xa hara, Exipsiu komo kayaritomon yaka. On wara kasko xa hara yîwya, Ixaw Yana komo ahsîpînkakî arowon poi totohme so, kasko, kekn̂e tî.

12 On wara tko tî n̂eyukyakn̂e Moises, Kporin komo ya kekn̂e, Ixaw Yana komo rma oyentara naxe. Ahce wa thakwa re oyence Paraw hara? Takîhso yîmtapotanî ro mak ow, kekn̂e tî.

13 Wara rma Moises komo yakro rma nîmtapowakn̂e Kaan, Araw komo yakro. Ixaw Yana komo poko nîmtapowakn̂e, Paraw poko marha, Ixaw Yana komo aacoko rma Exitu poi, kekn̂e. Ero wa kekn̂e Kporin komo Moises komo ya.

14 Taa, Ixaw Yana komo yenîn̂e komo tan wetahcasî, tîyanan komo yenîn̂e kom ha. On wara tî xakn̂e Huben pen mumutho komo yosotî, Enoke, Paru, Esîron, Kahmi. Cepamthîrî komo yantoman̂e me tî xatken̂e n̂examro. Huben tribun me rma tko tî xatken̂e ahnoro.

15 On wara tî xakn̂e Simeaw pen mumutho komo yosot hara, Xemuew, Xamin, Oace, Xakin, Soa, Sau. Kananew yemsîrî tî mîk xakn̂e Sau nocwan. Ero wa tî xatken̂e Simeaw pen mumutho komo. Cepamthîrî komo yantoman̂e me tî xatken̂e n̂examro. Simeaw tribun me rma tko tî xatken̂e ahnoro.

16 On wara tî xakn̂e Repi pen mumutho komo yosotî hara, Xehson, Koace, Merari. Ero wa tî xatken̂e yumumuthîrî komo yosotî. Taa, Repi pen yewrutoponho tî xakn̂e 137 cimn̂ipu. Ero yimaw takî tî noro pen waihyakn̂e.

17 On wara tî xakn̂e Xehson mumuru komo yosotî hara, Ribn̂i, Simei. N̂examro yepamtho komo xatken̂e Repita me.

18 On wara tî xakn̂e Koace pen mumutho kom hara, Anraw, Isa, Ebron, Usiew. Ero wa tî xatken̂e noro mumuru komo. Taa, Koace yewrutoponho takî tî xakn̂e 133 cimn̂ipu. Ero yimaw takî tî noro pen waihyakn̂e.

19 On wara tî xatken̂e Merari mumuru komo, Mari, Musi. Ero wa tî xatken̂e noro mumuru komo. N̂examro yepamtho komo xatken̂e Repita me. Ero wa tî xatken̂e Repi pen yepamtho komo.

20 Taa, on wara tî xakn̂e Anraw, Koace mumuru, tîîm yepeka tî nahsîyakn̂e cipici me. Xokebeci tî xakn̂e noro yosotî. Noro takî tî n̂ewruyakn̂e asakî ro kîîrî re ciki. Araw, Moises, ero wa tî xatken̂e yîmrerî komo, Anraw mumuru kom ha. Pahkî tî xakn̂e Anraw yewrutoponhîrî, 137 cimn̂ipu ha tî. Ero wicakî exiche ewrutoponhîrî waihyakn̂e takî tî.

21 On wara tî xatken̂e Isa mumuru kom hara, Kore, N̂epeke, Sikri. Ero wa tî xatken̂e Isa mumuru komo.

22 On wara tî xatken̂e Usiew mumuru komo hara, Misaew, Ewsapan, Sitîri. Ero wa tî xatken̂e Usiew mumuru komo.

23 Ero yimaw cipici takî tî nahsîyakn̂e Araw, Eriseba tî osotî. Aminatabe me yemsîrî tî mîk xakn̂e, Nason yepeka ha. 4 ro tî noro n̂ewruyakn̂e Araw mumuru komo ciki, Natabe, Abiu, Ereasa, Itama. Ero wa tî xatken̂e Araw mumuru kom ha.

24 On wara tî xatken̂e Kore mumuru kom hara, Asi, Ewkana, Abiasape. Ero wa tî xatken̂e Kore mumuru komo. N̂examro xatken̂e Kore yanan komo.

25 Taa, on wara tî xakn̂e Ereasa, Araw mumuru ha, Putiew yemsîrî tî nahsîyakn̂e cipici me. Noro takî tî n̂ewruyakn̂e, kîîrî, Ereasa mumuru ciki. Pin̂easa tî xakn̂e yumumuru yosotî. Ero wa tî xatken̂e Repita yenîn̂e komo, etîyananî re kom ha.

26 Ero wa nasî Araw yanan komo, Moises yanan komo yosotî. Kporin komo mtapotarî yentan̂enho rma mîkyam. On wara tî Kporin komo kekn̂e yîwya so, Ixaw Yana komo aacoko Exitu poi, kekn̂e.

27 N̂examro rma tak on wara ketken̂e Paraw ya, Exipsiu komo kayaritomon ya, Ixaw Yana komo amna naar̂asî xexa Exitu poi, ketken̂e yîwya. Ero wa kan̂e komo mîkyam xatken̂e Moises komo Araw yakro.

28-29 On wara tî ka kekn̂e Kporin komo Moises ya iito Exitu po, Aporin komo xa Ow ha. Ero ke on wara wîîkes awya, Paraw ya ekatîmko omtapotarî ahnoro, kekn̂e yîwya.

30 On wara tko tî Moises n̂eyukyakn̂e, Takîhso yîmtapotan mak ow ha. Ero ke ahce wa thakwa re omtapotarî n̂ence Paraw? kekn̂e. Ero wa tî kekn̂e Moises Kporin komo ya.