Taa, ero yinhîrî tak on wara kekn̂e Kporin komo Moises ya, On wara tak kiir̂asî, Kaan warai me tak kenpesî Paraw ya. Awakno reha nasî amtapotarî yekatîmn̂e me, Araw ha.

2 Ero ke omtapotachonho ekatîmko Araw ya ahnoro. Noro tak mahrimesî Paraw n̂entarî me hara. Ixaw Yana komo men ahsîpînkakî arowon poi totohme so, kesî noro yîwya, Paraw ya.

3 Ow tko ceipuru wara wiir̂asî Paraw ropotarî, Karitî me oyehtopo wenpesî Exipsiu komo ya. Anarmerpan wiir̂asî cirihnî mko eserepokachome so.

4 Awanwekyaxe so Paraw. Ero ke tak Exipsiu komo wîwîrîmesî. Wîwîrîmesî ro mak Exitu poi oyanan komo yaatome tak owya. Mer̂pono pîn mîkyam oyanan komo, Ixaw Yana kom ha. Yîchei so rma waatîkesî.

5 Ero yimaw tak on wara kexe opoko Exipsiu komo, Kporin komo xa Mîk ham, kexe. Ero wa tak kexe yîwîrîmarî ke owya.

6 Ero ke Moises komo nîmtapowatken̂e Paraw yakro Kporin komo mtapotachonho yaw roro rma.

7 Poritomo me xatken̂e n̂examro Paraw yakro yîmtapowataw so, 80 cimn̂ipu xakn̂e Moises yewrutoponho. 83 cimn̂ipu xakn̂e Araw yewrutoponho hara. Ero wicakî xakn̂e n̂examro yewrutoponho ero yimaw.

8-9 Ero yinhîrî on wara kekn̂e hara Kporin komo Moises komo ya, Amn̂e Paraw yakro amtapowataw so on wara kesî noro awya so, Cirihnî ika ciicoko aponaro so oyehtome, kes awya so. Ero wa ketaw on wara kasko Araw ya, Awamoyin ar̂makî roowo pona Paraw wero ro. Ero wa ar̂makî okoyi me tak etakîtotome, kasko yîwya, kekn̂e. Ero wa kekn̂e Kporin komo yîwya so.

10 Ero ke Paraw yaka tak cetken̂e Moises komo Araw yakro. Kporin komo mtapotachonho yaw roro rma tî tamoyin nar̂mekn̂e Araw roowo pona. Paraw wero ro nar̂mekn̂e, noro maywen komo wero ro marha. Ar̂mache okoyi me takî tî n̂etakîcekn̂e.

11 Ero yipu yenîche Paraw ya tmaywen komo nan̂ikyakn̂e. Yuhnari yîhtînon̂e komo mîkyam nan̂ikyakn̂e, yaskomo komo marha. N̂examro xa marha tak okoyi me n̂iir̂atken̂e tamoyin kom hara. Erem yanme rma ero wa n̂iir̂atken̂e.

12 Yaake xatken̂e yaskomo komo. Ahnoro rma nar̂metken̂e tamoyin komo roowo pona. Okoyi me so xa marha n̂etakîcekn̂e ahnoro rma. Araw yamoyinînho tko n̂ermomyakn̂e n̂examro yamoyinînho ahnoro, tow suru, tow suru, kekn̂e.

13 Ero yinhîrî tak Paraw ropotarî ceipamyakn̂e xa hara. Ero ke yîmtapotarî komo yewetîra ro mak xakn̂e. Ero wa xakn̂e Kporin komo mtapotachonho yaw roro rma. Ero wa xakn̂e.

14 Ero yinhîrî on wara tak kekn̂e Kporin komo Moises ya, Ceipuru wara nasî Paraw ropotarî. Oyanan komo yahsîpînkara nasî kica.

15 Ero ke pahxaxa tak etocoko xa hara Paraw yaka. Tuuna yecihtaka cesî noro. Ero ke yîywapu etocoko iina. Tuuna yecihtaw tak momohcoko. Awamoyin arko, okoyi me n̂etakîcekn̂e ero rma.

16 On wara kasko yîwya, Kporin komo n̂en̂epetho ow awesamaka, ponaro naxe Ebrew komo Noro n̂en̂epetho ha. On wara kan̂e me oyen̂epew, Oyanan komo ahsîpînkakî pohnîntaka totohme so opoko ahwotachome so, kan̂e me oyen̂epei. Ero wara rma wîîkai awya. Ewetîra rma tko ka mehxe kica.

17 Ero ke on wara kes hara Kporin komo awya, tuuna yepu n̂etapesî oyanton tamoyin ke. Ero ke kamxuku me tak n̂etakîcesî kica tuunanhîrî. Ero wa wirpesî yîwya on wara kachome tak awya, Kporin komo me xa tak Mîk ham Moises komo yantoman̂e, kachome tak awya.

18 Ero ke ootî tak waihyas okwe eepu kwawnonho pen. Kowasî xa tak eepu. Ero ke Exipsiu komo wokru mera thakwa nasî, kasko yîwya, kekn̂e. Ero wa tî kekn̂e Kporin komo Moises ya.

19 Ero yinhîrî on wara takî tî kekn̂e hara Kporin komo Moises ya, On wara kasko Araw ya, Awamoyin ke cemyarke tak etapoyankakî tuuna yepoi. Eepu yepoi kasko, yatîhnî yepoi marha, wahrai komo yepoi meero kasko. Ero wa kasko tuuna yepoi kamxuku me etakîtotome tuuna ahnoro Exitu pono. Yîmîn yawno meero n̂etakîcesî een yawno, weewe yahtoxapu yawno, toopu akorokaxapu yawno marha. Ahnoro mak tak nasî kamxuku me, kasko yîwya, kekn̂e. Ero wa kekn̂e Kporin komo Moises ya.

20 Ero ke Kporin komo mtapotarî n̂ewehcatken̂e. Tamoyin nanîmyakn̂e Araw. Iike tak tuuna yepu n̂etapekn̂e Paraw wero ro rma, maywen komo wero ro marha. Etapache tak kamxuku me n̂etakîcekn̂e kica tuuna eepu kwawno ahnoro.

21 Ero ke tak ootî pen waihyakn̂e okwe eepu kwawno pen. Kowakn̂e tak kica eepu. Ero ke thakwa tî Exipsiu komo wokru mera xakn̂e. Kamxuku tak xakn̂e miya ro makî, Exitu poko hak okwe.

22 Ero wa xa marha tko n̂iir̂atken̂e hara yaskomo komo, Exipsiu komo erem yanme. Ero ke ceipuru wara xa hara n̂ehtîkekn̂e Paraw ropotarî. Moises komo mtapotarî nanwekyakn̂e xa hara kica. Ero wa xakn̂e Kporin komo mtapotachonho yaw roro rma.

23 N̂etaknamekn̂e mak tak Paraw. Tîmîn yaka mak cekn̂e hara. Moises mtapotarî ponarora ro mak xakn̂e okwe.

24 Ero yinhîrî tak on wara tî xatken̂e Exipsiu komo, eepu yecihtaw so nahcetken̂e kir̂wan yanîmtome tuuna. Erîhnî me thakwa tî xakn̂e eepu kica.

25 Ero yinhîrî 7 ro n̂enmayakn̂e kamxuku me eepu ciitoponho Kporin komo ya. Ero wicakî n̂enmayakn̂e.