Ero yinhîrî tak on wara kekn̂e xa hara Kporin komo Moises ya, Paraw yaka etoko xa hara. On wara kasko yîwya, On wara kesî Kporin komo awya, oyanan komo ahsîpînkakî opoko ahwotaxi totohme so, kasko yîwya.

2 Ahsîpînkara rma awexitaw on wara kîwîrîmexe so hara, pororî tak wen̂epesî arowon pona. Mer̂pono pîn wen̂epesî arowon poko hakî, kasko yîwya.

3-4 Eepu kwai tak mokyaxe pororî mer̂pono pînî ro mak. Amîn yaka n̂ewomyasî awîntopo yaka. Awetîrapotopo pona meero cexe kica. Amaywen komo mîn yaka marha cesî. N̂examro pona nahronasî. Puruma yuputopo yaka meero n̂ewomyasî kica. Atutumru komo yaka marha nahronasî, puruma ciitopo yaka. Apoko ro mak n̂ehtîkexe, amaywen komo poko marha, awanton komo poko marha, etpoyino pîn poko kica, kasko yîwya, kekn̂e Kporin komo Moises ya.

5 Ero yinhîrî on wara tak kekn̂e Kporin komo Moises ya, On wara kasko Araw ya, Awamoyin ke cemyarke etapoyankakî xa hara. Tuuna yepu yepoi kasko, aporî yepoi marha, yatîhnî yepoi marha. Ero wa kasko en̂exa pororî mohtome Exitu pona, kekn̂e yîwya.

6 Ero ke takî n̂etapoyankekn̂e Araw tuuna yepoi, Exipsiu komo yepoi. Ero wa kache pororî takî mokyakn̂e mer̂pono pînî ro mak kica. Roowo pen nawronohketîkekn̂e kica.

7 Ero wara xa marha tko n̂iir̂atken̂e yaskomo kom hara. Erem ke pororî n̂ekpetken̂e Exitu pona.

8 Ero yinhîrî Moises komo takî nan̂ikyakn̂e Paraw. On wara kekn̂e yîwya so, Amtapotacoko Kporin komo yakro. On wara kasko yîwya, Pororî en̂epeko Paraw yai, noro maywen komo yai marha, kasko men yîwya. Pororî toche ayanan komo tak wahsîpînkesî Kporin komo ya tîmsom yakn̂iso totohme so tak, kekn̂e yîwya so.

9 Taa, on wara mak wîîkes awya, kekn̂e Moises yîwya, ahcemaw xa kîmtapowa apoko, amaywen komo poko marha? Pororî cma re mîwaikesî Apa, yîmîn komo yawnonho pen, eepu kwaw mak tak ehtome, wîîke ahcemaw ha? Amoro xa ero yekatîmn̂e me esko, kekn̂e Paraw ya.

10 Pahxaxa amtapotacoko, kekn̂e yîwya. Taa, kekn̂e Moises, amtapotarî yaw roro rma wîîkesî. Ero yimaw xa pororî waihkesî Kporin komo on wara kachome tak awya, Anarî exihra ro mak nasî Kporin komo warai, ponaro amna yehtopo warai ha, kachome awya. Ero ke amtapotarî yaw roro rma pororî waihkesî.

11 Amîn yai so tak pororî pen cesî, amaywen komo mîn yai marha. Eepu kwaw mak tak nasî, kekn̂e Moises Paraw ya.

12 Ero yinhîrî takî Moises komo tak cetken̂e Paraw yai. Enmapuche takî Kporin komo yakro nîmtapowakn̂e Moises. Apa kah yawno, kekn̂e, pororî cma re mîwaikesî Paraw yîwîrîman̂enho, kekn̂e yîwya.

13 Ero ke Moises mtapotarî yaw roro rma tak pororî waihkekn̂e Kporin komo. Mîîmo yawnonho pen waihyakn̂e, ewto pononho pen, mararî pononho pen ahnoro.

14 Tukuhkaw so takî pororî yokoputho n̂enmekyatken̂e. Kowakn̂e ro makî kica Exipsiu komo rowon poko hakî.

15 On wara tko xakn̂e Paraw, tîwîrîman̂enhîrî waipuche tîropotarî n̂iir̂akn̂e ceipuru wara xa hara kica. Moises komo yanwekn̂e me tak xakn̂e hara. Ero wa xakn̂e Kporin komo mtapotachonho yaw roro rma.

16 Ero yinhîrî tak on wara tak kekn̂e Kporin komo Moises ya, Ai Moises, on wara kasko Araw ya, Roowo pupuntho tak etapakî hara awamoyin ke oyomo me etakîtotome. Miya rma n̂etakîcesî Exitu poko hakî, kasko yîwya, kekn̂e Kporin komo.

17 Ero ke tamoyin ke cemyarke tak n̂etapoyankekn̂e Araw. Roowo tak n̂etapekn̂e iike. Ero yimaw tak oyomo me n̂etakîcekn̂e kica roowo pupuntho. Tooto poko tak xakn̂e, iyoh komo poko marha. Ero wa n̂etakîcekn̂e roowonhîrî oyomo me. Miya rma n̂etakîcekn̂e Exitu poko hakî.

18 Ero yinhîrî tak yaskomo komo nukukmetken̂e hara. Oyomo me akîhto xe xatken̂e roowonhîrî ceremru komo yanme. Pîra tak ha okwe. Etakîtopora tak xakn̂e yîwya so. Oyomo ken̂e thakwa xatken̂e tooto komo, iyoh komo marha.

19 Ero ke on wara tak ketken̂e yaskomo komo Paraw ya, Kaan xa moso nakîhce ham kopi oyomo, ketken̂e. Wara rma ceipuru wara xa hara Paraw n̂iir̂akn̂e tîropotarî. Moises komo yanwekn̂e me rma xakn̂e kica. Kporin komo mtapotacho yaw roro rma xakn̂e.

20 Ero yinhîrî on wara kekn̂e Kporin komo Moises komo ya, Enmapuche etocoko hara Paraw yaka. Enmarî yakro ro rma etocoko. Tuuna yecihtaka cesî ero yimaw. Noro yenîche on wara kacoko yîwya, Ai Paraw, on wara kesî Kporin komo awya, Oyanan komo ahsîpînkakî opoko ahwotachome so, kes awya, kacoko yîwya.

21 Oyanan komo yahsîpînkara rma awexitaw werewere tak wekpesî awewrucpen̂e komo. Mer̂pono pînî ro mak wekpesî. Ayanan komo yewrucpen̂e me ro mak nasî. Exipsiu komo mîn yaka n̂ewomyasî mer̂pono pîn werewere. Mîîmo pen nawronohketîkesî kica, roowo pen marha yiipo ececetotopo komo.

22 Werewere mokyataw acheka so anarî me wiir̂asî Kosen, oyanan yewtonî kom ha. Werewere pen exihra nasî iito yîhyaw so. Ero wa wiir̂asî yîrowon komo on wara kachome tak awya, Kporin komo xa nai ham tan orowon po rma, kachome tak awya, kacoko yîwya.

23 Oyanan komo wiir̂asî amaywen komo warahra. Werewere ken̂e xa wiir̂asî amaywen komo reha. Iiken̂ehra reha wiir̂asî oyanan komo, kacoko yîwya, kekn̂e Kporin komo Moises komo ya.

24 Ero ke ero wara rma n̂iir̂akn̂e Kporin komo. Werewere takî mokyakn̂e mer̂pono pînî ro mak kica. Paraw mîn yaka rma n̂ewomyakn̂e, maywen komo mîn yaka marha. Exitu poko hakno komo mîn yaka n̂ewomyakn̂e. Roowo yîwîrîman̂e me xakn̂e kica werewere, mer̂pora ro mak exirî ke.

25 Ero wa exitaw takî Moises komo nan̂ikyakn̂e xa hara Paraw. On wara kekn̂e yîwya so, Taa, etocoko tak amyamro Ixaw Yana komo. Ponaro awehtopo komo ya tîmsom akn̂itatko rma. Moro na makî tko etocoko Exitu pona rma, kekn̂e yîwya so.

26 Okwe, kekn̂e hara Moises yîwya. Exitu po rma Kaan ya tîmsom me akn̂ipîra ro mak cexpore nasî amna yok puntho. Kicicme ro mak nas amna yoku Exipsiu komo ya. Noro yipu pun yakn̂iyataw n̂examro wero ro, amna men waihkexe tantono komo toh ke oko.

27 Osorwaw kaamo amna cesî pohnîntaka. Iito tak amna nakn̂iyasî tokuthîrî pun amna Porin ya tîmsom me. Noro mtapotarî rma amna n̂ewehcasî, kekn̂e Moises Paraw ya.

28 Taa, kekn̂e takî Paraw yîwya so, kahsîpînkexe so rma pohnîntaka awtotome so. Iito tak Aporin komo Kaan ya tîmsom makn̂iyaxe, ponaro awehtopo komo ya tîmsom ha. Mooxe xa tko tohra ehcoko. Taa, Aporin komo yakro amtapotacoko opoko, kekn̂e. Ero wa kekn̂e Paraw Moises komo ya.

29 Taa, kekn̂e Moises yîwya, ahyai kîwces hara. Owtoche tak Kporin komo yakro kîmtapowasî werewere yen̂epetome tak ahyai, amaywen komo yai marha. Pahxaxa n̂en̂epesî. On wara tko wîîkes awya, amna yemîknopîra ro mak tak men esko. Awahsîpînkara so wasî. Aporin komo ya tîmsom yakn̂iso tohra ro mak ehcoko, kahra tak esko amn̂e, kekn̂e yîwya.

30 Ero wa kache Paraw yai takî cekn̂e Moises. Kporin komo yakro takî nîmtapowakn̂e werewere yen̂epetopo poko.

31 Ero ke Moises mtapotarî yaw roro rma tak werewere n̂en̂epekn̂e Kporin komo. Paraw yai n̂en̂epekn̂e, maywen komo yai marha. Cewn̂e n̂hema exihra ro mak tak xakn̂e.

32 Wara rma ceipuru wara xa hara tîropotarî n̂iir̂akn̂e Paraw. Ixaw Yana komo yahsîpînkara rma xakn̂e kica. Ero wa xakn̂e kica.