Ero yinhîrî on wara tak kekn̂e Kporin komo Moises ya, Etoko xa hara Paraw yaka. On wara men kasko xa hara yîwya, On wara kesî awya Kporin komo, ponaro Ebrew Yana komo yehtopo, Oyanan komo men ahsîpînkakî opoko ahwotachome so, kasko yîwya.

2-3 Ahsîpînkara awexitaw, awanton me so rma ciir̂ataw awya on wara tak tî awir̂atu so Kporin komo, ceper̂ai xa tî n̂iir̂a awoh komo woskara pono. Paaka komo, kawaru komo, buhu komo, kameru komo, oper̂a komo, ero warai tî awoh komo ceper̂ai n̂iir̂a. Ceper̂ai xa takî tî nai okwe. Waihya takî tî eper̂a yanme, kasko yîwya.

4 Ero wa Ixaw Yana komo yoku cirihra tî nai Kporin komo. Eper̂amra ro makî tî n̂ai, Exipsiu komo yoku warahra. Waipîra ro makî tî nai iyoh komo reha, kasko yîwya.

5 Ero wa kache Exipsiu yok yîwîrîmacho tak nukuknomekn̂e Kporin komo, kaamo ha. Pahxaxa men eper̂a yaw tak nas awoh komo okwe, kasko yîwya, kekn̂e. Ero wa kekn̂e Kporin komo Moises ya.

6 Ero ke enmapuche tak ero wara rma tak Kporin komo iyokuthîrî pen komo n̂iir̂akn̂e. Exipsiu komo yokutho pen tak waihtîkekn̂e ahnoro okwe. Ixaw Yana komo yoku waipîra reha xakn̂e. Cewn̂e n̂hema waipîra xakn̂e.

7 Ero yimaw tî tmaywen komo n̂en̂epekn̂e Paraw Ixaw Yana komo yoku yenso. N̂examro yoku meero waihya, kacho yentachome tî n̂en̂epekn̂e. Pîra, waipîra ro mak nasî Ixaw Yana komo yoku, ketken̂e tî maywen komo tmokuche so hara. Ero wara kacho entache ceipuru wara xa hara xakn̂e Paraw ropotarî kica. Ixaw Yana komo yahsîpînkara rma xakn̂e kica. Ero wa xakn̂e.

8 Ero yinhîrî on wara kekn̂e hara Kporin komo Moises komo ya, Wehto yen yaka etocoko. Iitono tak amehcoko wemronho. Ero tak aacoko Paraw yaka. Noro wero ro tak pahcoko kahsî. Pum tosu sahrarara, kacoko tak.

9 Ero wa pahxapu tak cesî miya rma, Exitu poko hakî. Erek me tak n̂etakîcesî tooto poko, iyoh komo poko marha, kekn̂e Kporin komo Moises ya.

10 Ero ke wemronho namekyakn̂e Moises komo. Paraw yaka tak naar̂atken̂e. Noro yeepatai cexitaw so tak kahsî pahyatken̂e. Ero yipu tak n̂etakîcekn̂e erek me oko tooto poko, iyoh komo poko marha.

11 Ero yimaw takî tî mokuhra thakwa xatken̂e yaskomo komo Moises yaka ereh ken̂e xa cexirî ke so oko. Ahnoro Exipsiu komo tî xatken̂e ereh ken̂e oko yaskomo komo meero.

12 Paraw ropotarî tko xakn̂e ceipuru wara xa hara Kporin komo yanme rma. Ero ke Moises komo mtapotarî yewetîra rma xakn̂e okwe. Ero wa xakn̂e Kporin komo mtapotacho yaw roro rma, Moises ya kekn̂e ero wa kachonho yaw roro rma. Ero wa xakn̂e Paraw.

13 Ero yinhîrî on wara kekn̂e xa hara Kporin komo Moises ya, Ai Moises, pahxaxa etoko xa hara Paraw yaka. Enmarî yakro ro rma etoko. On wara kacoko yîwya, On wara kesî Kporin komo awya, ponaro Ebrew komo yehtopo, Oyanan komo men ahsîpînkak ha opoko ahwotachome so, kes awya, kacoko yîwya.

14 On wara marha kes awya, kacoko yîwya, oroto tak kîwîrîmetîkesî xa tak, amaywen komo marha wîwîrîmesî. Ero wa tak kiir̂axe so on wara kachome tak awya, Anarî exihra ro mak nasî kaan Noro warai. Roowo yakwerî po rma exihra nasî, mîîkesî tak opoko, kacoko yîwya.

15-16 Pahxa rma kwaihkarî ha re okwe eper̂a ke, amaywen komo ahnoro waihkarî ha re. Wara rma kar̂pe oyehtopo yenpotome awya so awaikara wîxakn̂e awîrîmacho ke, roowo poko hakno komo ya rma oyosotî yîhtînomexpotome ha.

17 Yukurumîkno me rma mesehtînoyasî kica. Ero ke oyanan komo memetanmekya ham. Ahsîpînkara rma mas okwe.

18 Ero ke pahxaxa on wara kaamo exitaw saraipa tak wekpes hara, porin komo ro mak wekpesî. Mehxa ro rma re mokyakn̂e saraipa Exitu me on roowo ciitoponhîrî n̂ixa ro rma. Wahra so makî tko ka mokyakn̂e ceipamxapu pahxa. Pahxaxa tak porin komo ro mak men mokyasî, kacoko yîwya.

19 Ero ke awoh komo ermonocoko mîîmo yaka, awanton komo marha an̂ihcoko mîîmo yaka. Waihyaxe men okwe ero yanme mîîmo yawhra exitaw so, kacoko yîwya, kekn̂e. Ero wa kekn̂e Kporin komo Moises komo ya.

20 Taa, ero yipu yentache on wara tî xatken̂e anarî komo Paraw maywen komo, toh komo tî n̂ermonoyatken̂e mîîmo yaka. Tanton komo marha tî nan̂ikyatken̂e mîîmo yaka. Ero wa tî n̂iir̂atken̂e Kporin komo mtapotachonho ponarono komo mak.

21 Anarî komo reha tî tanton komo yan̂ikîra rma xatken̂e mîîmo yaka, toh komo marha ermonopîra xatken̂e. Woskara po rma tî xakn̂e. Ero wa tî xatken̂e Kporin komo mtapotacho ponarora cexirî ke so. Ero wa tî xatken̂e.

22 Ero yinhîrî on wara kekn̂e xa hara Kporin komo Moises ya, Apockantakî tak kahsî saraipa mohtome. Miyan komo pona rma mokyasî Exipsiu komo pona. Tooto komo pen n̂etapes oko, iyoh komo pen marha, naatî pen marha. Ero wa n̂etapes oko, kekn̂e Moises ya.

23 Ero ke kahsî napockanwakn̂e tak Moises. Tamoyin ke cemyarke rma napockanwakn̂e. Ero ke Kporin komo tak saraipa n̂ekpekn̂e ha. Tarai marha tar̂ar̂a kekn̂e. Pepe kekn̂e oco wehto me ro mak. Roowo porero tî wehto cekn̂e oco. Ero yipu Kaan n̂ekpekn̂e Exitu pona.

24 Ero wa tî mokyakn̂e saraipa. Wehto yakro rma mokyakn̂e eraspeto xa. Ero yipu tko tî mokuhra ro mak xakn̂e mehxa ro rma, Exitu me ero roowo ciitoponho n̂ixa ro. Ero wa tî mokyakn̂e.

25 Mîîmo yawno pîn komo tî n̂etapekn̂e okwe saraipa. Exitu poko hakno komo tî n̂etapekn̂e okwe. Tooto pen n̂etapekn̂e, iyokuthîrî pen komo marha. Naatî pen marha n̂etapekn̂e ahnoro. Weewe pen marha n̂etapekn̂e tperemkaxi ro okwe. Ero wa n̂etapekn̂e okwe.

26 Mokuhra rma tko xakn̂e saraipa Kosen po reha, Ixaw Yana komo yewton po ha.

27 Ero ke Moises komo tak nan̂ikyakn̂e Paraw, Araw yakro. On wara kekn̂e yîwya so, Oroto tak kicicme oyehtopo wîhtînoyasî. Kir̂wan̂he nai ham Kporin komo. Kicicme wai ham kica ow, omaywen komo marha natu kicicme ham kica.

28 N̂eexi tak ha. Kporin komo yakro men amtapotacoko yîtîtmamnotome tak saraipa, tarai marha yîtîtmamnotome kpanaikoton̂e oko. Yîtîtmamche tak kahsîpînkexe so. Tan Exitu po exihra tak maxe, kekn̂e. Ero wa kekn̂e Paraw Moises komo ya.

29 On wara n̂eyukyakn̂e Moises, Taa, ewto poi owtoche rma kapockanwasî Kporin komo wece. Ero ke tak tarai nîtîtmamyasî, saraipa marha tak mokuhra nasî, Roowo yosom xa Mîk ham Kporin komo, kachome tak awya.

30 On wara tko kîhtînoyasî, amaywen komo marha wîhtînoyasî. Twerî exihra rma maxe Kporin komo poko okwe, kekn̂e Moises yîwya.

31 Taa, on wara tî xakn̂e Exipsiu komo natîrî, riin̂u tî xakn̂e tîwîrîmaxi, sepata marha. Ceperke tî mîn xakn̂e, ero yipu tî n̂etapekn̂e ro mak saraipa.

32 Kir̂wan̂he rma tî xakn̂e puruma, senteu marha. Wahra ka xakn̂e ero reha. Ero ke yîwîrîmara tî xakn̂e.

33 Ero yinhîrî takî ewto poi cekn̂e Moises Paraw yainonho rma. Napockanwakn̂e tak Kporin komo wece. Ero ke tak, tîî kekn̂e tarai, saraipa marha mokuhra xakn̂e. Xii kahra marha xakn̂e tuuna. Ero wa tak xakn̂e.

34 On wara tko kekn̂e Paraw, Taa, nîtîtmam tak ham tuuna, saraipa marha tak mokuhra nai ham. Tarai marha kahra nasî, kekn̂e takî tî Paraw. Ero ke kicicme tak xakn̂e xa hara. Ceipuru wara xa hara n̂iir̂akn̂e tîropotarî kica. Ero wa xa marha xatken̂e maywen kom hara.

35 Ero wa xakn̂e Paraw ropotarî, ceipuru wara xakn̂e kica. Ero ke Ixaw Yana komo yahsîpînkara rma tî xakn̂e okwe. Kporin komo mtapotarî yaw roro rma xakn̂e, Moises ya kekn̂e ero yaw roro rma kica. Ero wa xakn̂e Paraw.