Taa, ero yinhîrî tak on wara kekn̂e xa hara Kporin komo Moises ya, Paraw yaka etocoko xa hara. Yîropotarî wiirî ceipuru wara xa hara, maywen komo ropotarî marha. Ero wa wiirî cirihnî ciitome owya n̂examro wero ro.

2 Ero yipu wiir̂asî amumuru komo ya an̂ekatîmrî komo amn̂e, aparî komo ya marha. Kar̂pe xa cehtopo n̂enpekn̂e Kporin komo Exipsiu komo yîwîrîmacho ke, kacoko yîwya so amn̂e. Amyamro marha oyehtopo meen̂axe on wara kachome awya so, Kporin komo xa Mîk ero wa ciino n̂iire ham, mîîkexe, kekn̂e. Ero wa kekn̂e Kporin komo Moises komo ya.

3 Ero ke Moises komo tak cetken̂e xa hara Paraw yaka. On wara ketken̂e yîwya, Ai Paraw, on wara kesî Kporin komo awya, ponaro Ebrew komo yehtopo ha, Atî wicakî pahkî, Kicicitho ow ha, kahra mai owya okwe? Oyanan komo ahsîpînkak ha opoko ahwotachome so, kes awya.

4-6 Oyanan komo yahsîpînkara rma awexitaw pahxaxa men makaka warai tak wekmexpesî arowon pona. Roowo pen nahruyasî ro mak. Yîmtoxapu rma cik nasî naatî, peen marha, weewe marha saraipa n̂etapatho pîn. Ero rma tak nahtîkes okwe exihra ro mak cehso ro okwe. Tukuhkaw ro mak nasî amîn yaw, amaywen komo mîn yaw marha, Exipsiu komo mîn yaw ahnoro mak. Ero wicakno makaka yenîhra ro mak xakn̂e aamo komo pahxa, aporin pen komo marha. Mehxa ro roowo po ehtoponhîrî n̂ixa ro noro yipu komo yenîhra ro mak xatken̂e okwe, kesî Kporin komo awya, ketken̂e yîwya. Ero wa kache Moises n̂etaknamekn̂e. Paraw yai cekn̂e hara.

7 Toche on wara tî ketken̂e Paraw maywen komo yîwya, Atî wicakî pahkînon wa nai noro okwe kîwîrîman̂e komo me ha? Ixaw Yana komo ahsîpînkak ha ke Kporin komo poko ahwotachome so ponaro cehtopo komo poko. Tîwîrîmatîkaxi ro mak nasî Exipsiu komo ahnoro, kahra rma ma mai ke? ketken̂e tî yîwya.

8 Ero ke Moises komo tî nan̂ikyakn̂e xa hara Paraw. Mokuche so on wara tî kekn̂e yîwya so, Taa, etocoko tak ha ahwotaxi Kporin komo poko ponaro awehtopo komo poko. On wara tko wîîkes awya so, onoke warai komo kyam awto xe so mat ha? kekn̂e yîwya so.

9 Ahnoro rma amna cesî, kekn̂e Moises yîwya. Rikomo komo amna naar̂asî, poritomotho komo marha. Tumumuru komo amna naar̂asî, cemsîrî komo, toh komo marha amna naar̂asî oper̂a, paaka komo. Ahnoro ro mak amna naar̂asî. Amna n̂eseresmesî Kporin komo poko tahwotachome, kekn̂e yîwya.

10 On wara tko tî kekn̂e Paraw. Awakronomacowpe xa Kporin komo amxîkrî komo yen̂epetaw owya awakro so. Twerî men cexpore nasî, meye men nasî awîrîmacho komo, kekn̂e yîwya so.

11 Pîra. Kîîrî me mak etocoko Aporin komo poko ahwotaxi, kekn̂e. Ero wa kekn̂e Paraw Moises komo ya. Ero wa kache tîhyai tak n̂examro n̂en̂epekn̂e Paraw rîîwo me. Ero wa n̂en̂epekn̂e.

12 Ero yinhîrî on wara kekn̂e Kporin komo Moises ya, Apockantacoko tak Exitu yepoi makaka warai mohtome tak. Exitu pona tak mokyasî taakem komo yahtîkaxi. Saraipa n̂ekahritho nahtîkesî exihra cehso ro, kekn̂e.

13 Ero ke Exitu yepoi tak napockanwakn̂e Moises tamoyin ke cemyarke rma. Ero yinhîrî tak ocowo n̂ekmexpekn̂e Kporin komo resce n̂ixa. Puu kekn̂e tî kokmamso ro, cenmakaxi ro marha. Enmapuche tak makaka n̂ekyakn̂e ocowo.

14 Exitu poko hakî tî cekn̂e makaka. Miya so ro makî tî cekn̂e roowo mapitaka rma. Kicicme ro makî tî xakn̂e kica. Mehxa ro rma ero warai komo mokuhra ro makî tî xakn̂e makaka. Amn̂e tak mokuhra nas hara ero warai.

15 Roowo pen nahruyakn̂e ro mak. Awarpape mak xakn̂e roowo mer̂pora ro mak exirî ke. Comota yarîtho takî tî nahtîkekn̂e, eperîthîrî marha. Saraipa n̂ekahritho nahtîkekn̂e. Weewe yarî yîmtora ro mak xakn̂e, naatî yarî marha. Exitu pono naroketîkekn̂e ro mak roowo mapitaka rorono rma okwe.

16 Ero ke Moises komo tak nan̂ikpekn̂e xa hara Paraw, Araw kom ha. Cerekan̂e nan̂ikpekn̂e. On wara kekn̂e yîwya so, Kicicme wasî kica Kporin komo poko, apoko so marha okwe.

17 Ero ke opoko cma re metîrwoxinkexe oroto oyehtoponho poko. Kporin komo yakro marha cma re mîmtapowaxe makaka yen̂epetopo poko. On warai ya amna waihkapora cma nasî, kekn̂e Paraw yîwya so.

18 Yîmtapotarî yentache tak Paraw yai tak cekn̂e hara Moises. Kporin komo yakro tak nîmtapowakn̂e makaka yen̂epetopo poko.

19 Ero ke ocowo tak n̂ekpekn̂e hara Kporin komo oesce n̂ixan hara. Karitî mîn n̂ekpekn̂e. Ero rma tak makaka naar̂akn̂e. Miya tak naar̂akn̂e Cucurem Yewku kwaka roro. Etîmtora ro mak xakn̂e makaka Exitu po, cewn̂e n̂hema tak exihra xakn̂e.

20 Ero yinhîrî Paraw ropotarî takî tî ceipuru wara n̂iir̂akn̂e xa hara Kporin komo. Ixaw Yana komo yahsîpînkara rma xakn̂e okwe. Ero wa xakn̂e kica.

21 Ero yinhîrî on wara kekn̂e hara Kporin komo Moises ya, Ai Moises, apockantakî xa hara kahsî roowo yawarpantachome tak ahnoro Exitu. Awarpan xa mîn wekpesî kîtîtîno warai xa, kekn̂e Kporin komo yîwya.

22 Ero ke Moises tak napockanwakn̂e kahsî. Ero yinhîrî awarpape tak xakn̂e roowo ahnoro Exitu ha. Kîtîtîno wara xa mîn xakn̂e okwe awarpan. Osorwaw ro n̂enmayakn̂e awarpape.

23 Tpoyino komo yenîhra thakwa tî xatken̂e okwe Exipsiu komo. Etarira ro mak xatken̂e 3 kaamo. Katpape rma tko xakn̂e Ixaw Yana komo yewtonî reha.

24 Ero ke Moises takî nan̂ikyakn̂e xa hara Paraw. On wara tak kekn̂e yîwya, Taa, etocoko tak ha Kporin komo poko ahwotaxi. Amxîkrî komo meero aacoko. Awoh komo makî tko tînomcoko Kosen po rma oper̂a komo, paaka komo, kekn̂e yîwya.

25 Ahce okwe, kekn̂e Moises Paraw ya, amna rma tko arî xe nasî paaka komo, oper̂a kom ha. Kaan ya tîmsom mîk amna yoku, Kporin komo ya tîmsom ha.

26 Ero ke tooku yarî xe nas amna ahnoro. Yîhtathîrî cik meero tînomra nas amna. Noro amna naar̂asî Kporin komo ya tîmsom me, ponaro amna yehtopo ya tîmsom me ha. Atî wicakî yiixe na nai Noro tîwya tîmsom. Amn̂e mak on wicakî xe nai ham, kes amna cepatakache mak, kekn̂e. Ero wa kekn̂e Moises Paraw ya.

27 Wara rma Paraw ropotarî tî n̂iire xa hara Kporin komo ceipuru wara. Ixaw Yana komo yahsîpînkara rma xakn̂e okwe.

28 Ero yinhîrî on wara kekn̂e hara Paraw Moises ya, Ohyai tak men etocoko. Oyewru enîhra ro mak tak ehcoko. Oyewru yeen̂ataw xa hara awya so kwaihkexe so kr̂a tak ha, kekn̂e.

29 Taa, kekn̂e Moises, yaaro rma mîîkesî, awewru yenîhra ro mak tak wasî, kekn̂e. Ero wa kekn̂e Moises Paraw ya.