Ero yinhîrî on wara tî kekn̂e hara Kporin komo Moises ya, Ai Moises, Cewn̂e ro xa tak Paraw yîwîrîmacho wekpesî, Exipsiu komo yîwîrîmacho ha. Ero yinhîrî tak awahsîpînkexe so Paraw. Awen̂epetîkexe so tak, ahnoro rma.

2 Ero ke on wara kasko Ixaw Yana komo ya, Ai oyakno komo, Exipsiu komo yemyawnonho aponcoko aporokru komo. Cepethîkemu xa aponcoko ooru ciixapu, prata ciixapu marha. Kîrkomo amyamro aponcoko kîrkomo yemyawnonho, aaci komo hara amyamro aponcoko wooxam komo yemyawnonho hara, kasko yîwya so, kekn̂e. Ero wa tî kekn̂e Kporin komo Moises ya.

3 On wara tî Exipsiu komo xatken̂e Ixaw Yana komo poko, yîpînîn yawno me so takî tî xatken̂e. Moises marha tî n̂een̂atken̂e yukurumîkno me xa. Ero wa tî xatken̂e Exipsiu komo, Paraw maywen kom ha. Kporin komo yanme rma ero wara xatken̂e.

4-5 Ero yinhîrî on wara tî kekn̂e Moises Paraw ya, Ai Paraw, on wara kesî Kporin komo awya, Rakatawro kîwcesî Exipsiu komo chere. Ero yimaw yîmxîkrî komo tak waihyaxe okwe potuthîrî pen komo mak. Paraw mumutho pen meero waihyasî, kayaritomo mumutho pen ha. Anton komo xîkîtho pen komo meero waihyaxe okwe, puruma yaposokan̂e mretho pen kom ha okwe. Iyoh komo xîkîtho pen marha waihyasî poturme ewruxapu mak.

6 Ero yimaw nîwracexe ro mak Exitu poko hakno komo. Ero wa yîwratara ro makî ka xatken̂e pahxan pen komo. Ero wa yîwratara tak naxe tantono komo amn̂e miya roro. Tîmxîkrî pen komo waipuche rakatawro ero yimaw xa tak nîwracexe okwe, kes awya.

7 Ero yimaw Ixaw Yana komo yewnopîra ro mak nasî xapari, iyoh komo marha yewnopîra nasî. Tîtken̂e mak nasî xapari poko so. Ero wa Kporin komo n̂iir̂asî, Exipsiu komo warahra n̂iir̂a ham Ixaw Yana komo, kachome tak awya, kesî Kporin komo awya.

8 Ero yimaw tak amaywen komo mokyaxe ohyaka. Nutupenwaxe tak omamakan me. On wara kexe owya, Exitu poi cma re mîîcesî amaywen komo yakro rma, kexe owya. Ero wa kache owya kîwcesî tak Exitu poi, kekn̂e tî Moises Paraw ya. Ero wa kache Paraw yai tak cekn̂e Moises, tîrwon̂e xa tî cekn̂e. Ero wa cekn̂e.

9 On wara tko tî kekn̂e Kporin komo Moises ya, Amtapotarî komo yewetîra rma nasî Paraw cirihnî ciitome tak owya emapona. Exipsiu komo yîwîrîmacho mîn wiir̂asî cirihnî ha, kekn̂e tî yîwya.

10 Ero ke ero warai komo rma tî n̂iir̂atken̂e Moises komo Araw yakro, cirihnî tî n̂iir̂atken̂e yaake ro. Ero yipu ciriche Paraw ropotarî tî Kporin komo n̂iir̂akn̂e xa hara ceipuru wara. Ero ke tî Ixaw Yana komo yahsîpînkara rma xakn̂e, en̂epera tî xakn̂e tîrowon poi. Ero wa tî xakn̂e Paraw okwe.