Taa, ero yinhîrî tak Kporin komo nîmtapowakn̂e xa hara Moises yakro, Araw komo yakro. Exitu po exitaw so rma nîmtapowakn̂e. On wara kekn̂e yîwya so.

2 On nuun̂i tak nasî nuun̂i komo yihcitopo awya so. 12 nasî nuun̂i komo. Ero ke on nuun̂i nasî cimn̂ipu kuknomacho yihcitopo me awya so.

3 On wara kacoko Ixaw Yana komo ya, Enmarî yukuknomacoko on nuun̂i pono. 10-înhîrî po tak on wara ehcoko, oper̂a xîkrî ahsîcoko ahyawno komo yotî me. Ero wa ahsîcoko miyan komo rma ahyawno komo yotî me.

4 Asak mak exitaw ahyawno komo amîtwono yakro oper̂a ahsîko asak makno yîîm yakro xa marha. Cewn̂e mak ahsîcoko oper̂a xîkrî asak makno komo yotî me. Ahyawno komo yecenarî mak ahsîcoko, kacoko yîwya so.

5 On warai xa ahsîcoko awokuthîrî komo, kîîrî ahsîcoko kar̂pamxan me cehsom mak, 12 nuun̂i exihnî rma ka ewrutoponhîrî ha. Tupunporem mak ahsîcoko. Oper̂a xîkrî ahsîcoko, kabritu xa na mahsîyatu yiixe awexitaw so.

6 Amîn komo mîtkoso ka yimicoko 4 kaamo mak. Taa, 14-nhîrî po tak noro pen waihkacoko kokmamche rma. Ero wa awokuthîrî komo waihkacoko Ixaw Yana komo ahnoro.

7 Awokuthîrî komo waihkache awya so kamxukuthîrî tak caramacoko amîn komo metatan yecepu pore. Yupunthîrî mon̂exe mîîmo yaw ero metatan yecepu caramacoko. Piirino caramacoko ececokan, peyecepu marha.

8 Ero yinhîrî tak awokuthîrî komo pun tonocoko. Ero po rma tonocoko 14-nhîrî po kosope. Yupucoko ka tonotome tak awya so. Awru komo marha tohcoko wahrututpamnî mak. Naatî yarî yakro rma tonocoko cîmîkno yakro ha.

9 Kamxukre tonohra ro mak ehcoko. Tîyoso marha tonohra ehcoko. Tupuso mak tonocoko. Ahnoro mak yupucoko, yîhtîpîthîrî, petîthîrî, apothîrî, wethîrî. Ahnoro mak yupucoko tonotome tak awya so.

10 Akwenhîrî yîmtora ro mak ehcoko enmapuche tonosom me hara. Akwenhîrî yetîmcetaw rma enmapuche tak akn̂icoko.

11 On wara ehcoko ton̂etaw awya so, awetaritopo komo yaw ehcoko poono yaw. Tîhtake marha tonocoko, tamoyiye marha. Cerekan̂e tonocoko. Kporin komo ya awatotopo komo yimawno mîn. Ero ke ero wa tonocoko.

12 Ero po men kîwcesî Exipsiu komo chere poturme ewruxapu komo waihkaxi. Tooto pen komo waihkesî, iyokuthîri pen komo marha. Yaake naxe ponaro Exipsiu komo yehtopo. Noro yipu komo marha wîwîrîmesî. Ow xa Aporin kom ha, kesî Kaan awya so.

13 On wara was amn̂e Exitu pono pen komo waihkaxi owcetaw, awokuthîrî komo kamxukutho ween̂asî awatotome so owya, awaikara so oyehtome. Amîn komo kuknon me nasî kamxuku ametatan komo yecepu pokono. Twatosom komo moxam on yawno kom ha, wîîkes ero yipu yenîche. Ero yanme awahsîra so nas eper̂a awaikacho kom ha, kacoko yîwya so Ixaw Yana komo ya, kekn̂e Kporin komo Moises komo ya.

14 On wara marha kekn̂e Noro yîwya so, Ero po roro eseresmacoko amn̂e ahnoro cimn̂ipu po roro. Ero po roro eseresmacoko Kporin komo poko awahwotachome so, Exitu poi awtotoponhîrî komo ponaro awehtome so ha. Miya roro ehretawnomaxapu komo meero ero wa n̂eseresmacowpe.

15 Ero yimaw marha wahrututpamnî mak tohcoko awru komo. 7 kaamo wicakî ero yipu tohcoko. Yihcirî po kaamo po awru komo wahrututpamnotoponho ar̂macoko. Amîn komo yaw exihra ro mak n̂expe. Wahrututpamnî mak tohcoko on yimaw 7 kaamo, kacho yewetîn̂e pîn na nai anarimaw. Noro yipu exitaw twaihkapore nasî xaw Yana komo poyino mera tak ehtome.

16 Ero wa aweseresmetaw so esenmecoko tohtopo yihcitopo po. Yîtîhkatopo po marha esenmecoko. Kaan ponaro xa esenmecoko. Ero po awesenmetopo komo po etapickara ro mak ehcoko. Anahrî komo ciitopo poko ciki mak metapickexe wahra mak. Ero wa ehcoko.

17 Ero wara roro eseresmacoko yicimn̂ipuntaxera. Ero po kaar̂axe so Exitu poi amyamro mer̂pono pînî ro mak. 14-nhîrî po kaar̂axe so. Ero ke ero po roro n̂eseresmacowpe miya roro ehretawnomaxapu komo erorome ro mak.

18 Nuun̂i yihcirî po eseresmacoko 14-nhîrî kaamo po xa. Kokon̂i xa eseresmacoko. Wahrututpamnî mak tohcoko. Enmapuche hara ero yipu rma tohcoko yaake kaamo 21-înhîrî pona roro. Ero po tak yîtîhkacoko wahrututpamnî tohtopo, kokon̂i exiche tak ha.

19-20 7 kaamo exihra ro mak n̂expe wahrututpamnotopo amîn komo yaw so. Wahrututpamnoxapu tokn̂e exitaw noro men twaihkapore nasî Ixaw Yana komo chewno mera tak ehtome. Ero wara twaihkapore nasî acheka mohxapu, achew ewruxapu marha. Etîme re ero wa ciicoko wahrututpamnoxapu yokn̂enho komo. Ahce na tokuhra ro mak ehcoko ero yimaw wahrututpamnotopo ken̂e exitaw. Wahrututpamnî mak nohcowpe ahnoro amîn komo yawno komo, kacoko yîwya so Ixaw Yana komo ya, kekn̂e. Ero wa kekn̂e Kporin komo Moises komo ya.

21 Ero yinhîrî takî Ixaw Yana poritomon komo nan̂ikpekn̂e Moises. On wara kekn̂e yîwya so, Oper̂a xîkrî ehtatko ahyawno komo yotî me. Ahyawno komo yecenarî mak ehcoko. Noro yipu tak waihkacoko awatotopo komo me tonosom.

22 Waihkache awya so iisopu peremtho yukpacoko oper̂a kamxukutho kwaka. Ero yipu ke tak caramacoko metata yecepu. Piirino caramacoko asakno roro rma. Peyecepu marha caramacoko. Caramache awya so amîn yaw so mak tak ehcoko. Mîîmo yai epatakara ro mak ehcoko kosope. Enmapuche mak tak mepatakexe.

23 Kosope tak Kporin komo cesî Exipsiu komo chere. Kamxukutho tak n̂een̂asî ametatan komo yecepu poko. Piirino poko exitaw, peyecepu poko exitaw marha amîn komo tak wacesî Kporin komo. On yawno waihkara esko, kesî waihkano rin̂e ya. Ero wa kesî yîwya kamxuku yenîche.

24 Ero wara roro yukukmacoko amn̂e miya roro. Awepamthîrî komo marha nukukmacowpe ero wa xa marha etowîn me ro mak.

25-27 Pahxaro tak arowonî ro komo pona tak mepatakexe. Kporin komo nîmyas awya so tîmtapotachonhîrî yaw roro rma ero pona mepatakexe. Iito awexitaw so tak ero wara roro eseresmacoko. Ero wa aweseresmetaw so on wara kexe amxîkrî komo awya so, Apa, ahce kacho on wara ceseresmet ha? kexe awya so. Ero ke on wara eyuhcoko, Kporin komo ya kwatotoponhîrî komo tîtkukmexe okopuci. Pahxa Kporin komo cekn̂e Exipsiu komo waihkaxi. Ero yimaw Ixaw Yana komo mînî reha wacekn̂e. Amna mîn yawno waihkara xakn̂e. Ero ke ero wa kwatotoponhîrî komo tîtkukmexe, kacoko yîwya so, kekn̂e. Ero wa kekn̂e Moises Ixaw Yana poritomon komo ya. Ero wa kacho yentache n̂examro takî nutupenwatken̂e. Amna porinî ro Amoro okre, ketken̂e Kaan ya.

28 Ero ke Ixaw Yana komo tak cetken̂e oper̂a yahsîso Kporin komo mtapotachonho yaw roro ciitome. Moises ya kekn̂e Araw komo ya, ero wa kacho yaw roro xatken̂e. Ero wa xatken̂e.

29 Taa, ero po rma tak kosope Exitu pono pen komo waihkekn̂e okwe Kporin komo rakatawro. Poturme ewruxapu pen komo mak waihkekn̂e. Paraw mumutho pen waihkekn̂e kayaritomo mumutho rma. Kahrutopo yawno mumutho pen marha waihkekn̂e. Iyoh komo xîkîtho marha waihkekn̂e poturme ewruxapu mak, miyan komo xîkîtho rma.

30 Ero ke Paraw takî nîhcekn̂e kuywa poi kosope rma. Noro maywen komo marha paketken̂e ahnoro Exipsiu komo rma. Nîwracetken̂e takî okwe. Nîwracetken̂e ro mak okwe. Okoputhîrî komo xakn̂e okwe yîmîn yaw so etpoyino pîn yaw okwe.

31 Ero ke Moises komo tak nan̂ikpekn̂e xa hara Paraw. On wara kekn̂e yîwya so, Etocoko tak omaywen komo chei. Etocoko ro mak Ixaw Yana komo ahnoro. Miya tak etocoko Aporin komo poko ahwotaxi amtapotacho komo yaw roro rma.

32 Awoh komo marha aacoko paaka komo, oper̂a komo. Mîîketken̂e ero wa kacho yaw roro rma aacoko. Etocoko tak ha. Awtorî me so owakretopo poko ka amtapotacoko Aporin komo yakro, kekn̂e. Ero wa kekn̂e Paraw Moises komo ya.

33 Ero wa xa marha ketken̂e Exipsiu komo Ixaw Yana komo ya. Yohno etocoko ha. Amna mak waihtîkes okwe, ketken̂e yîwya so.

34 Ero ke tak cetken̂e Ixaw Yana komo Exitu poi. Yohno ro mak cetken̂e tuuru komo wahrututpamnopîra rma. Kwaxarî mak naar̂atken̂e esmacho yaw rma. Tponon komo ke mak womcetken̂e. Ero yipu naar̂atken̂e tmotaw so. Ero wa cetken̂e.

35 On wara xatken̂e Ixaw Yana komo tîtorî komo me, Exipsiu komo yemyawnonho naponukyatken̂e. Cepethîkem xa naponukyatken̂e ooru ciixapu, prata ciixapu marha. Poono marha naponukyatken̂e. Ero wa naponukyatken̂e Moises mtapotacho yaw roro rma.

36 Ixaw Yana komo pînîn yaw so xatken̂e Exipsiu komo. Kporin komo rma ero wa n̂iir̂akn̂e. Ero ke yiixe ehtopo komo rma nîmyatken̂e yîwya so. Ero wa Exipsiu pen komo n̂emyawnonketken̂e Ixaw Yana komo. Ero wa xatken̂e.

37 Taa, cetken̂e tak Ixaw Yana komo. Hameses poi cetkn̂e Sukoci pona. Mer̂pono pînî ro mak mîkyam cetken̂e, 600.000 yakenon okyo. Ero wicakî xatken̂e kîrkomo mak. Rikomo komo yukuknomara xatken̂e. Ero wicakî yakenon xatken̂e Ixaw Yana komo.

38 Anarî yana komo marha cetken̂e Ixaw Yana komo yakro mer̂pono pîn komo. Toh komo marha naar̂atken̂e Ixaw Yana komo, paaka komo, oper̂a komo, mer̂pono pîn naar̂atken̂e.

39 Exitu poi tîtoche so mak tuuru komo tak nayatken̂e. Wahrututpamnopîra rma nayatken̂e. Esmetaw so wahrututpamnotopo cirihra rma xatken̂e okwe cerekan̂e tîtorî ke so Exitu poi. Cerekan̂e ro mak Ixaw Yana komo n̂en̂epetken̂e Exipsiu komo. Ero ke ero wa cetken̂e.

40 Pahkî ro mak xatken̂e Ixaw Yana komo Exitu po 430 cimn̂ipu pahkînon ha.

41 430 cimn̂ipu yenatîche xa, ero kaamo po xa tak Kporin komo yanan pen komo tak cetken̂e mer̂pono pîn komo. Exitu poi cetken̂e.

42 Ero kokmamrî po xa Ixaw Yana komo naar̂akn̂e Kporin komo Exitu poi. Ero ke ero ponaro Ixaw Yana yehtopo ro me xa nasî miya roro ehretawnomaxapu komo ponaro ehtopo me meero. Ero wa ehtopo ro komo me nasî.

43 Ero yimaw marha on wara kekn̂e xa hara Kporin komo Moises ya, Araw komo ya, On wara xa eseresmacoko Awatotoponhîrî komo yukukmacho ha, Ixaw Yana komo mak n̂eseresmacowpe ero yukukmacho me, anarî yana komo reha pîra.

44 Awanton komo reha n̂eseresmacowpe ero yukukmacho me puranta pona aponxapu komo mak ha tko. Etanpikaxapu komo mak n̂eseresmacowpe ero yukukmacho me.

45 Anarimaw anarî yana nai achew so. Amaywen komo me na natu anarî kom hara, puranta pona anapickarî komo. Noro yipu komo eseresmara ro mak n̂ehcowpe ero yukukmacho me.

46 On wara xa eseresmacoko amyamro reha, cewn̂e mîîmo yaw mak tonocoko. Mîîmo yai arîhra ro mak ehcoko awotî komo yakwenho. Awotî yocho komo marha axikwora ehcoko.

47 Ahnoro Ixaw Yana komo n̂eseresmacowpe Awatotoponhîrî komo yukukmacho me.

48-49 Anarî yana exitaw achew so, noro meero na ceseresma xe nai awakro so. Ero wa exitaw on wara kacoko yîwya, Etanpikapocoko amyamro, amumuru komo marha, awanton komo marha kîrkomo. Etanpikaxapu me awexitaw so mak amohcoko eseresmaxi amna yakro, kacoko yîwya. Ero wa exitaw so tak n̂eseresmacowpe awakro so arowon komo po ewruxapu warai me rma. Ero wa eseresmara ro mak n̂ehcowpe etanpikan komo. Etîme re mak n̂ehcowpe, wîîkes awya so. Ero wa n̂ehcowpe arowon komo po ewruxapu komo, anarî yana komo marha acheka so mohxa kom ha, kekn̂e. Ero wa kekn̂e Kporin komo Moises komo ya.

50 Ero ke ero wa kacho tak n̂ewehcatken̂e Ixaw Yana komo. Kporin komo kekn̂e Moises komo ya, ero wa kacho rma n̂ewehcatken̂e.

51 Ero po rma tak Ixaw Yana komo naar̂akn̂e Kporin komo Exitu po. Mer̂pono pîn mîkyam naar̂akn̂e. Ero wa naar̂akn̂e.